3 Baa oras Yesus dale nunia, na'ilulik ulun sia no fukun adat sia naklibur iha Kayafas uman. Kayafas nia, mak na'ilulik ulun boot. 4 Kayafas sia buka dalan atu kohi no-nook Yesus, nebee sia bele no'o Nia. 5 Mais sia nahulin dalan na'ak, “Hein lai! Keta kohi Nia baa loron di'ak sia, tan ema lear sia bele nakfetik ita.”

6 Baa oras nia, noo ema ida naran Simon. Nia nein iha leo Betania. Uluk, ema nakribi nia tan kona moras funi mea. Mais oras ne'e, nia di'ak ti'an. Baa oras loron di'ak nia sia sei la to'o dauk, Yesus sia baa naa iha Simon uman. 7 Baa oras sia naa, feto ida mai nasoru Yesus. Feto nia kaer botir ida mak ema nalo nosi fatuk mahoo folin todan.^b Botir nia moos nahisi mina morin isin mak folin todan basuk. To'o Yesus baa, feto nia fui nanii mina nia baa Yesus ulun atu dadi tadak na'ak nia nakneter Yesus.

8 Mais baa oras Yesus Niakaan maktuir sia titu-naree nunia, sia krakat na'ak, “Hoi! Feto saa mak ne'e, to'o soe butan mina morin mahoo folin todan basuk nia! 9 Di'ak liu fa'an mina nia dei, nebee fa'e osan wa'in nia baa ema mukit!”

10 Mais Yesus natene siakaan neon. Nia dale na'ak, “Keta hasusar feto ne'e! Ha'u neon di'ak, tan nia fui ti'an mina morin ne'e baa Ha'u. 11 Ema mukit sia namutuk no emi bei-beik. Mais la kleur ona, Ha'u la kamutuk ko emi tenik,^c 12 tan Ha'u atu kmate ona. Nodi fui mina morin ne'e baa Ha'u, feto ne'e nahulin ti'an Ha'ukaan isin, hanesan nia kari kedan ai funan baa Ha'ukaan maten. 13 Rona! Ha'ukaan dalen ne'e, tebes no loos! Oras ema keke lema Na'i Maromak Manfatin Di'ak baa fatin hotu-hotu iha raiklaran tomak, sia moos nanis dale feto ne'e niakaan dadi'ak. Hodi nunia, ema nanoin feto ne'e to'o nima-nimak.”

14 Nosi Yesus Niakaan maktuir na'in sanulu resin rua nia, na'in ida naran Yudas Iskariot. Baa loron nia, nia sai baa buka na'ilulik ulun sia. 15 To'o sia baa, nia nusu na'ak, “Ama sia! Kalo ha'u kbele tulun emi kohi Yesus, emi foo saa baa ha'u?”

Sia moos nataa na'ak, “Kalo makara fa'an Nia baa ami, ami nanis selu.” Hotu sia sura nola osan murak tomak tolu nulu, latan baa Yudas.^d 16 Hotu Yudas sai atu buka dalan latan Yesus baa sia.

17 Sura tinan ema Yahudi sia nadahur loron di'ak, loron hitu laran. Sia nanaran loron di'ak nia sia na'ak, ‘Dahur Tubi Bakae’. Baa oras dahur nia atu nahuu ona, Yesus Niakaan maktuir sia mai nusu baa Nia na'ak, “Ama! Ohin kalan ne'e ita musti loke Dahur Tubi Bakae hodi ho'o bibi malae atu haa baa Paska. Ama nakara ami baa hadi'a dahur fatik iha nabee?”

18 Hotu Yesus nataa na'ak, “Emi tama baa kota laran, hotu atu hasoru hola katuas ida. Katak baa nia ha'ak nune'e, ‘Ama! Amikaan Ama Manorik nusu fatin ida iha ama uman atu nadahur Paska no Niakaan maktuir sia.’”

19 Yesus naruka notu nunia, Niakaan maktuir sia moos baa nalo tuir nunia. Hotu sia nadi'a dahur Paska iha fatin nia.

20 Kalan ti'an, Yesus no Niakaan maktuir na'in sanulu resin rua tuur nadahur. 21 Baa oras sia naa, Yesus dale na'ak, “Fiar Ha'u! Ema ida nosi emi atu latan Ha'u baa ema seluk.”

22 Rona nola nunia, sia noran la di'ak. Sia ida-idak nusu baa Yesus na'ak, “Ema mak Ita Boot dale nia, ha'u ka?”

23 Nia moos nataa na'ak, “Ema mak loban tubi namutuk no Ha'u baa haan fatik ne'e, nia mak atu fa'an lakon Ha'u.^e 24 Hanoin! Ema Raiklaran Isin ne'e musti mate atu nato'o saa mak Maromak mako'an sia nakerek kedan hori uluk. Mais sintidu! Ema mak fa'an Ha'u, nia atu natiu niakaan dinu! Di'ak liu niakaan inan la nahoris kedan nia!”

25 Hotu Yudas, mak atu fa'an Yesus, moos nusu kalolon na'ak, “Nanis ema mak Ama dale nia, lahoos ha'u ka?”

Yesus nataa na'ak, “O na'in du'uk mak ma'ak nunia ti'an.”

26 Baa oras sia sei naa, Yesus foti nola tubi baluk ida, nodi sera dodan baa Na'i Maromak. Hotu Nia tohi fa'e tubi nia, lolo foo baa Niakaan maktuir sia. Nia katak na'ak, “Tubi ne'e, Ha'ukaan isin. Simu, haa baa ona!”

27 Nunia hotu, Nia nola hemu fatik ida mak nakonu anggor ween. Nia namulak tenik, sera dodan baa Na'i Maromak. Hotu Nia lolo foo baa Niakaan maktuir sia. Nia katak na'ak, “Simu, hemu baa ona. 28 Anggor ween ne'e, Ha'ukaan raan mak atu nakduar nodi sori ema lear nosi sala. Nodi raan ne'e, Na'i Maromak namate menon foun no emi.^f 29 Mais nebee emi hatene, nahuu nosi oras ne'e, Ha'u la kemu tenik anggor ween ona, to'o Ha'ukaan Ama nabesi aan kaer ukun iha lale'an ti'an, foin Ha'u kemu tenik ko emi.”

30 Yesus dale notu nunia, sia nananu kananuk ida nodi tonun Na'i Maromak. Baa kalan nia moos, sia la'o kedan baa Foho Saitun.

31 Baa oras sia la'o nia, Yesus katak baa Niakaan maktuir sia na'ak, “Ohin kalan ne'e, emi hotu-hotu atu halai hela Ha'u. Hori uluk Maromak mako'an nakerek nela kedan nosi lia ne'e na'ak,

32 Nanis Ha'u kmate. Mais, kalo Ha'u kmoris kikar ti'an, Ha'u atu kbaa uluk kein emi iha rai Galilea nebaa.”^h

33 Rona nola nunia, Petrus sakar na'ak, “La bele nunia Ama! Masik ema seluk sia hotu-hotu nalai nela Ama moos, ha'u la kla'o kela Ama!”

34 Yesus nataa na'ak, “Nunia ka? Rona mai Petrus. Ha'ukaan dalen ne'e, tebes no loos! Ohin kalan ne'e, manu sei la kokoreek dauk, o meli Ha'u isin tolu ti'an ma'ak, o la matene Ha'u!”

35 Mais Petrus sakar tenik na'ak, “Lale Ama! Kalo Ama mate, ha'u moos mate tuir. Ha'u la kalai kela Ama!” Petrus niakaan mamaluk sia ida-idak moos na'ak nunia.

36 Hotu Yesus sia la'o iha Foho Saitun, to'o to'os ida naran ‘Getsemani’.ⁱ Iha nia Yesus katak baa Niakaan maktuir sia na'ak, “Tuur heik iha ne'e lai, tan Ha'u atu kbaa kamulak iha nebaa.” 37 Mais Nia bolu nola Petrus, Yakobus no Yohanis, nebee sia baa bele-bele no Nia. Nahuu baa oras nia, Nia noran susar basuk no neon la metin. 38 Hotu Nia katak baa sia na'ak, “Ha'ukaan neon susar basuk! Koran nu'u atu kmate dei. Emi tuur daka ho Ha'u iha ne'e lai.”

39 Hotu Nia la'o soruk oan ida tenik. Nia nakni'a sudur baa rai nodi namulak na'ak, “Ama! Kalo Ama nakara, Ha'u lalika katiu kola susar ne'e. Mais keta tuir Ha'ukaan hakaran, tuir Ama hakaran dei.”

40 Namulak notu, Yesus fila baa Niakaan maktuir na'in tolu nia. Mais sia toba dukur. Nia nafanun sia nodi dale baa Petrus na'ak, “Hoi Petrus! Nansaa emi toba? Ha'u iha nebaa la oras dei, mais emi la bele hadeer tuur daka oan ida no! 41 Kose haroma emikaan matan lai, hotu daka ho Ha'u! Emikaan neon nanis nakara nalo di'ak, mais emikaan isin la biit. Di'ak liu emi hamulak, nebee kalo kona sokur, emi bele terus.”

42 Hotu Nia baa namulak tenik na'ak, “Ama! Kalo Ha'u kmusti katiu kola susar ne'e, nebee tuir Ama hakaran dei.” 43 Namulak notu, Nia fila nikar baa Niakaan maktuir na'in tolu nia. Mais sia toba nikar ti'an, tan matan nakati todan.

44 Hotu Nia la'o nela sia, baa namulak isin ida tenik. Nia nakro'an nikar baa Aman, nebee keta nabusik lerek Nia natiu susar nia, mais nebee tuir Aman hakaran dei. 45 Namulak notu, Nia fila nikar baa nafanun Niakaan maktuir sia na'ak, “Emi sei toba ka? Haree lai! Niakaan oras to'o ona. Ema mak atu fa'an Ema Raiklaran Isin mai ti'an. Ema mai kohi Ha'u atu latan Ha'u baa ema aat liman. 46 Hadeer ona! Loke matan, mana kokon baa nebaa lai! Ema mak fa'an Ha'u mai ti'an. Mai ita baa hasoru nia ona!”

47 Yesus sei dale nunia, Niakaan maktuir ida naran Yudas mai no ema wa'in. Sia mai nodi surik no ai kaliduk atu kohi Yesus. Sia tuir ukun nosi ema boot sia, mak na'ilulik ulun sia no fukun adat sia. 48 Uluk Yudas foo kedan tadak baa sia na'ak, “Haree di'a-di'ak! Ema mak ha'u kde'i, kohi hola Nia ona! Tan Nia mak emi buka!”

49 To'o Yesus baa, Yudas liu kedan baa Niakaan oin nodi na'ak, “Tabe, Ama Boot!” Hotu Yudas nako'ak nodi de'i Nia.

50 Yesus nusu nia na'ak, “Yudas! O mai ne'e atu malo saa?” Hotu ema lear nia kabuun baa, kohi nola Yesus.

51 Mais la natene falik, Yesus eman ida losu nola taha, taa kotu ema ida tilun sorin. (Ema kanek nia, na'ilulik ulun boot atan.) 52 Naree nunia, Yesus katak baa ema mak taa nia na'ak, “Maknua mikar okaan taha, tan ema mak nakaat nodi taha, nia moos atu mate kona taha. 53 O la matene ka? Ha'u kbele kusu Ha'ukaan Ama nebee solok Niakaan makbukar maliun-maliun^j mai nosi lale'an atu tulun Ha'u. 54 Mais lalika. Habusik baa, nebee ema ne'e sia kohi nola Ha'u. Tan lia ne'e sia hotu-hotu nato'o saa mak hakerek kedan hori uluk iha Hakerek Moon.”

55 Hotu Yesus dale baa ema lear nia sia na'ak, “Hoi! Nansaa mai kohi Ha'u hodi surik no ai kaliduk? Ha'u ne'e, ema aat ka? Sura loron Ha'u kanorin ema iha Uma Hamulak Huun, mais emi la mai kohi Ha'u.^k 56 Mais so'in baa dei! Kohi hola Ha'u ona! Tan lia ne'e nato'o saa mak Maromak mako'an sia nakerek kedan hori uluk iha Hakerek Moon.”

Titu-naree ema lear kohi Yesus nunia, Niakaan maktuir sia nata'uk tebes to'o ni'it aan nalai nela Nia.

57 Baa oras nia, na'ilulik ulun sia, manorik ukun sia, no fukun Yahudi sia naklibur ti'an iha na'ilulik ulun boot Kayafas uman. Ema mak kohi Yesus ohin nia, sia nodi Nia baa Kayafas uman. 58 Petrus moos tuir no-nook nosi kotuk. To'o uma nia baa, Petrus moos tama baa lalawar, hotu tuur bele-bele no ema iha nia. Nia buka natene saa mak atu dadi baa Yesus. 59 Iha uma nia laran, ema boot sia buka lia kakaer atu nodi nasalak Yesus, tan nakara taa ukun mate baa Nia. 60 Masik sia natama ema mataa lia tolek wa'in moos, sia la netan lia kakaer ida kedan. Mais ikus basuk, foin netan ema na'in rua 61 mak nataa na'ak, “Ami rona Ema ne'e dale na'ak, ‘Ha'u atu karo'on Uma Hamulak Huun. Mais to'o wainrua, Ha'u kariik kikar.’”^l

62 Hotu Kayafas nariik iha oin nodi nusu baa Yesus na'ak, “Ema wa'in tula sala baa O. Tan saa O no-nook dei?” 63 Mais Yesus la nataa kois. Hotu na'ilulik nia nusu tenik na'ak, “Ha'u atu kusu ne'e, mais O musti mataa tebe-tebes hanesan O mataa baa Na'i Maromak mak moris iha lale'an. Ema balu na'ak, O ne'e Kristus, Na'i Maromak Oan. Lia nia tebes ka lale?”

64 Yesus nataa na'ak, “Ama dale nia tebes. Nosi ikus, emi atu haree Ha'u, mak Ema Raiklaran Isin, tuur iha lale'an iha Na'i Maromak sorin kwana. Ha'u atu kaer ukun kamutuk ko Nia mak beran kaliuk nia. Emi moos haree Ha'u kmai kikar, ktuun kodi kalo'an.”^m

65 Rona nola Yesus nataa nunia, na'ilulik nia nawan sa'e tebe-tebes, to'o lees nasira niakaan faru klobor. Hotu nia katak baa ema hotu-hotu iha nia na'ak, “Ita lalika buka ema mataa lia tenik! Emi rona du'uk Nia foti aan nu'u Na'i Maromak Oan. Nia dale nahaat Na'i Maromak ti'an! Tuir itakaan ukun, kalo ema nalo aan nu'u Na'i Maromak, ema nia musti mate! 66 Dadi, ita atu hakotu nunabee?”

Sia hotu-hotu nahii na'ak, “Ema ne'e, sala tebes! Musti taa ukun mate baa Nia!”ⁿ

67 Hotu ema na'in hira soruk baa soe kaban baa Yesus. Sia moos basa nakdiuk Nia^o 68 nodi naleuk na'ak, “Hoi! Kalo O ne'e Kristus tebes, O ma'ak kokon see mak tuku O ne'e?”

69 Baa oras nia, Petrus sei tuur iha lalawar. Hotu ata feto ida mai dale no nia na'ak, “Ohin nia, o moos bele-bele mo Yesus, ema Nasaret nia ka?”

70 Mais Petrus neli iha ema wa'in nia oin na'ak, “Lale! Nansaa o musu nunia? Ha'u la katene ema nia.”

71 Hotu Petrus sai baa nariik iha odamatan nanokar oin. Feto ida seluk naree nia, hotu katak baa ema sia iha nia na'ak, “Ohin nia, ema ne'e moos bele-bele no Yesus, ema Nasaret nia.”

72 Mais Petrus sakar na'ak, “O bula arumak! Ha'u ktuku fatuk la katene ema nia!”

73 La kleur tenik, ema seluk dale baa Petrus na'ak, “Hoi! Keta maktolek tenik ma'ak o la matene ema nia! Tan okaan lia klalain, manesak no ema Galilea sia!”

74 Mais Petrus sakar nodi nabasuk lian tenik na'ak, “Hoi! Ha'u ktuku fatuk la katene ema nia!” Baa oras nia moos, manu kokoreek.

75 Rona nola manu kokoreek, Petrus moos nanoin nola Yesus Niakaan lia fuan ohin nia mak na'ak, “Manu sei la kokoreek dauk, o meli Ha'u isin tolu ti'an, ma'ak o la matene Ha'u.” Nanoin nola nunia, Petrus sai nikar baa luan nodi tanis nanse'ur aan.