Maria fui mina morin baa Yesus ain
12
Nunia hotu, sei hela loron neen foin loron Paska to'o mai. Yesus sia moos fila nikar baa leo Betania, mak Lasarus leon. Lasarus nia, ema mak Yesus nalo moris nikar nosi mate. 2 Yesus sia to'o baa, Lasarus no feton sia sale Nia nebee naa kalan bele-bele no sia. Yesus moos simu. Marta naliku haan, Lasarus tuur naa bele-bele no Yesus. 3 Hotu, Maria nola mina morin folin todan botir ida. Nia fui baa Yesus ain, hotu nia no'as Yesus ain nodi fuuk. Mina morin nuhar lema ke'an nia tomak.a b4 Naree Maria nalo nunia, Yesus Niakaan maktuir ida naran Yudas Iskariot (mak atu fa'an lakon Yesus), namuun aan na'ak, 5 “Tan saa la fa'an mina morin nia dei? Mina morin nia folin todan hanesan ema kansera tinan ida. Di'ak liu fa'an baa dei, nebee fa'e osan baa ema mukit sia!”c 6 Tuir loos, Yudas dale nunia, lahoos tan nia nadomi ema mukit sia. Mais tan nia na'ok teen. Nia dadi baa Yesus siakaan ema makaer osan, mais isin ida-idak nana'o nola.
7 Mais Yesus nakahik na'ak, “Habusik nalo baa. Nodi fui mina morin ne'e, feto ne'e nahulin kedan Ha'ukaan maten, foin ema nakoi Ha'u. 8 Ema mukit sia iha emikaan klaran nohuun. Mais la kleur ona, Ha'u la kamutuk ko emi tenik.”d
Na'ilulik ulun sia buka dalan atu no'o Lasarus
9 Ema wa'in rona nola na'ak Yesus iha leo Betania, sia mai atu nasoru Nia. Sia moos mai atu naree Lasarus, tan sia rona ti'an na'ak, Yesus nalo Lasarus moris nikar nosi mate. 10 Naree ema wa'in nunia, na'ilulik ulun sia kabuar lia fuan atu no'o Lasarus. 11 Ulun sia nakara nunia, tan sia nata'uk ema Yahudi la rona baa sia ona. Tan ema wa'in mak rona lia Lasarus, sia hotu-hotu fiar baa Yesus.
Ema simu Yesus iha Yerusalem hanesan simu na'i boot
12 Baa awan, ema lear mak mai atu tuir dahur Paska iha Yerusalem, sia rona nola na'ak, Yesus moos atu mai tuir dahur. 13 Hotu, sia baa kotu nola beet tahan atu nodi simu Yesus mai, hanesan ema simu na'in boot. Sia nahii bele-bele na'ak,
“Hosana! Ita tonu-haboot Na'i Maromak!
Na'i Maromak natudu ti'an laran di'ak baa Na'i Isra'el.
Nia mai nodi Na'i Maromak naran!”e
14 Baa oras nia, sia netan kuda keledai salak ida, hotu Yesus sa'e. Lia nia nato'o lia mak hakerek ti'an iha Hakerek Moon na'ak,
15 “Emi, ema Yerusalem, keta hata'uk!
Emi, ema ‘Sion’, mana baa nebaa lai!f
Emikaan Na'in mai ti'an!
Nia mai, sa'e kuda keledai salak ida.”g
16 Baa oras nia, Yesus Niakaan maktuir sia la natene lia nia isin. Mais nosi ikus, oras Nia moris nikar ti'an nosi mate hotu Na'i Maromak foti-nahaas Nia, foin sia nanoin nola na'ak, ema lear siakaan hahalok nia kona baa saa mak hakerek ti'an iha Hakerek Moon.
17 Natoon baa Yesus nalo Lasarus moris nikar nodi bolu sai nosi rate, ema lear moos iha fatin nia. Sia dale keke lia nia tan naree nodi matan du'uk. 18 Rona nola Yesus nase'i tadak blaar nia, ema hetak wa'in mai simu Nia oras atu tama Yerusalem. 19 Naree nunia, ema Farisi sia dale baa malu na'ak, “Lei haree! Ema hotu-hotu iha raiklaran ne'e nalau aan tuir Nia! Baa ikus, ita mak susar! Kalo nunia, ita atu halo nunabee tenik?”
Ema Yunani na'in hira nakara nasoru Yesus
20 Natoon baa nia, ema Yunani na'in hira nosi rai seluk moos mai tuir nadahur bele-bele loron boot Paska iha Yerusalem. Masik sia lahoos ema Yahudi, sia moos lo'u-sudur baa Na'i Maromak. 21 Sia mai nasoru Yesus Niakaan maktuir ida naran Filipus, nosi leo Betsaida iha rai Galilea. Sia nusu baa Filipus na'ak, “Mau! Ami bele hasoru Yesus ka?”
22 Rona nola nunia, Filipus baa na'ak Andreas. Hotu, sia rua baa nasara baa Yesus. 23-24 Yesus moos dale na'ak, “Ha'ukaan oras to'o mai ti'an. Ha'u kmusti mate uluk lai, foin Na'i Maromak foti-nahaas Ha'u. Tebes! Ha'ukaan dalen ne'e, tebes no loos. Kalo ita kuda hare fini musan ida, fini nia musti dodok iha rai lai, foin bele moris nodi nasai fuan wa'in lear. Kalo la dodok nunia, fini nia nafati musan ida. 25 Ema mak la titu Na'i Maromak hakaran, mais nadomi resik niakaan moris iha raiklaran ne'e, niakaan moris la noo folin. Mais ema mak nadi'a aan latan to-tomak niakaan moris iha raiklaran ne'e, nia atu netan moris nima-nimak.h 26 Ema mak nakara serwisu bodik ha'u, nia musti tuir Ha'u bei-beik. Kalo Ha'u iha nabee, nia iha nia. Kalo nia nalo nunia, Ha'ukaan Ama iha lale'an moos nakneter nia.”
Yesus katak kedan nosi Niakaan mate
27 Nunia hotu, Yesus dale tenik na'ak, “Ha'ukaan neon susar basuk, to'o la katene atu ka'ak saa. Iha Ha'ukaan neon, Ha'u kakara kusu baa Ama nune'e: ‘Ama! Sori Ha'u nebee Ha'u lalika kona susar boot ne'e to'o mate.’ Tebes. Ha'u kakara kusu Ama nunia, mais la kusu falik, tan Nia solok Ha'u kmai, nebee Ha'u kmate. 28 Tan baa nia, Ha'u kusu nune'e dei: ‘Ama. Ha'u kalo tuir Ama hakaran dei, nebee ema hotu-hotu foti-nahaas Ama naran.’”
Natoon baa oras nia moos, lia maliak ida nosi lale'an na'ak, “Ha'u kfoti-kahaas ti'an Ha'ukaan naran. Oras ne'e, Ha'u atu kfoti-kahaas tenik.”
29 Ema lear mak nariik iha nia moos rona nola lia maliak nia. Sia dale na'ak, “Hoi! Noo kokur lian!”
Mais balu na'ak, “Lale! Lia maliak nia, makbukar lale'an ida mak dale baa Yesus.”
30 Mais Yesus katak baa sia na'ak, “Lia maliak mak ohin sai nosi lale'an nia, bodik emi, lahoos bodik Ha'u. 31 Na'i Maromak Niakaan oras to'o ti'an atu tetu ema raiklaran. Niakaan oras moos to'o ti'an atu natoba nola a'aat huun mak kaer ukun iha raiklaran. 32 Kalo ema nasa'e Ha'u ti'an iha ai karuus, Ha'u atu kala'o kola ema hotu-hotu dadi baa Ha'ukaan ema.” 33 (Hodi nunia, Yesus nalore kedan Nia atu mate oin nunabee.)
34 Hotu, ema iha nia sia nusu na'ak, “Ami leno ti'an iha Hakerek Moon na'ak, Kristus atu moris nima-nimak. Kristus no Ema Raiklaran Isin nia, ema ida dei ka, lahoos? Kalo tebes nunia, tan saa Ama Boot na'ak, ‘Ema atu nasa'e Ema Raiklaran Isin iha ai karuus?’ Ema Raiklaran Isin nia, mak see?”i
35 Yesus nataa na'ak, “La kleur ti'an, Ha'ukaan kroman la naroma baa emi ona. Tan baa nia, oras Ha'u ksei ko emi, emi musti moris loos, nebee lia aat keta taka nola kroman iha emikaan neon laran. Tan ema mak la'o iha makukun laran, la natene dalan atu baa nabee. 36 Oras Ha'ukaan kroman sei iha, emi musti fiar baa Ha'u no moris iha kroman laran, nebee emi bele hatene dalan atu baa nabee.”
Yesus dale notu nunia, Nia nakiduk nosi ema lear nia, tan nakara mesan.
Ema Yahudi wa'in la fiar baa Yesus
37 Masik Yesus nase'i tadak blaar wa'in ti'an iha ema lear oin moos, noo ema mak sei la no'uk fiar baa Nia. 38 Lia nia natebes saa mak Maromak mako'an Yesaya nakerek kedan hori uluk na'ak,
“Ama Boot! La noo ema mak fiar baa amikaan dale!
Masik Ama Boot natudu beran ti'an moos,
sia la naree saa ida!”j
39 Etuk, ema Yahudi balu la bele fiar, tan Yesaya moos nakerek nela ti'an lia nia na'ak,
40 “Na'i Maromak taka siakaan neon,
to'o neon naktomak.
Nia nabusik siakaan neon namonas aan,
to'o sia la natene dalan loos.
Nia nabusik sia nunia,
nebee sia lalika fila mai buka Ha'u.
Ha'u moos lalika kadi'ak kola sia.”k
41 Uluk Yesaya nakerek nunia, tan nia naree nola ti'an Yesus Niakaan maka'as, hotu nia dale kedan lia nosi Yesus.
42 Masik Yesaya katak nunia moos, sei noo Yahudi ulun balu fiar baa Yesus. Mais sia la dale nasai lia nia, tan sia nata'uk ema Farisi sia atu lelen sia nosi uma hamulak. 43 Sia fiar no-nook dei, tan sia buka ema raiklaran tonun, lahoos buka Na'i Maromak tonun.
Yesus hanorin mak ikus basuk bodik ema lear
44 Nunia hotu, Yesus dale nodi lian maka'as na'ak, “Ema mak fiar baa Ha'u, sia moos fiar baa Ema mak solok Ha'u. 45 Kalo ema naree Ha'u ti'an, sia moos naree Ema mak solok Ha'u ti'an. 46 Ha'u kmai iha raiklaran ne'e atu dadi kroman, nebee ema mak fiar baa Ha'u la moris iha makukun. 47 Kalo ema la tuir Ha'ukaan hanorin, Ha'u la ukun sia. Tan Ha'u kmai iha raiklaran ne'e atu sori ema, lahoos atu ukun ema. 48 Mais ema mak dudu sees Ha'u tan la simu Ha'ukaan hanorin, siakaan makotu lia noo ti'an. Tan oras rai falu fila, Ha'ukaan hanorin mak atu nasalak sia. 49 Ha'u la kanorin kodi kakara du'uk, mais kanorin tuir Ha'ukaan Ama hakaran, tan Nia mak solok Ha'u atu kanorin saa mak Nia naruka. 50 Ha'u katene ka'ak, saa mak Nia naruka, foo moris to'o nima-nimak. Tan lia nia, saa mak Ha'u kanorin ne'e, Ha'u ksimu kosi Ha'ukaan Ama.”