Diabu ulun sokur Yesus
4
Yesus simu sarani ti'an, Nia la'o nela mota Yordan. Maromak Kmalar Lulik namutuk no Nia, no nala'o Nia baa fatin fuik ida.
Lukas 4:1-30
2 Yesus nein iha fatin nia to'o loron haat nulu. Nia la naa sa-saa, to'o salaen mate. Hotu diabu ulun mai sokur kokon Nia.
3 Nia dale baa Yesus na'ak, “Kalo O Na'i Maromak Oan tebes, O moo beran. Dadi maruka fatuk ne'e sia dadi tubi, nebee O maa to'o bosu.”
4 Mais Yesus nataa na'ak, “Lale! Hakerek Moon na'ak,
‘Ema raiklaran moris lahoos nosi haan dei!’”a
5-6 Nunia hotu, diabu ulun nala'o Yesus baa fatin aas ida. Nia natudu kabaas nosi ukunrai hotu-hotu iha raiklaran. Nia namaus Yesus na'ak, “Ukunrai beran no kabaas hotu-hotu ne'e sia, ha'ukaan. Ha'u koo beran atu kfoo baa see dei mak kakara. 7 Ha'u kbele foo baa O, surak O lo'u-sudur baa ha'u. Nia dei!”
8 Mais Yesus nataa na'ak, “Lale! Hakerek Moon na'ak,
‘Ita musti lo'u no sudur baa Na'i Maromak dei.
Nia, mak ita musti haliku.’”b
9 Nunia hotu, diabu ulun nala'o Yesus baa kota Yerusalem. Hotu nia nodi Yesus sa'e baa fatin mak aas kaliuk iha Uma Hamulak Huun. Hotu nia katak na'ak, “Kalo O Na'i Maromak Oan tebes, soe aan tuun ona! 10 Tan Hakerek Moon na'ak,
‘Na'i Maromak atu naruka Niakaan makbukar lale'an sia,
nebee sia daka nola O.
11 Sia mai tane nola O,
nebee Okaan ain la roos aan baa fatuk.’”c
12 Mais Yesus nataa na'ak, “Keta kli-li'is mo ha'u. Tan Hakerek Moon na'ak,
‘Keta sokur Maromak!’”d
13 Hodi nunia, diabu ulun koko Yesus nodi dalan oi-oik, mais la bele sokur nola. Hotu, nia nakiduk nela Yesus atu nein leet seluk.
Yesus baa Galilea atu nahuu katak lia Na'i Maromak
14 Nunia hotu, Kmalar Lulik nala'ok Yesus fila nikar baa rai Galilea. La kleur, ema rai nia tomak natene ti'an Niakaan naran. 15 Nia nanorin iha ema Yahudi siakaan uma hamulak sia. Ema hotu-hotu mose na'ak, “Yesus nia, maka'as tebes!”
Ema iha Yesus leon du'uk la simu Nia
16 Dala ida, Yesus mai Niakaan leo Nasaret du'uk. Natoon baa ema Yahudi siakaan loron hamulak, Yesus tama uma hamulak hanesan Nia nalo sura loron hamulak. Iha uma hamulak nia laran, Nia nariik atu leno Hakerek Moon. 17 Sia lolo foo Bei Yesaya niakaan hakerek. Nia loke, hotu leno na'ak:
18 “Na'i Maromak Kmalar Lulik natuun beran baa Ha'u.
Nia boi Ha'u
atu katak Manfatin Di'ak baa ema susar.
Nia solok Ha'u
atu katak ka'ak,
ema bui, atu sai;
ema delek, atu naree;
ema mak oin kraik, atu foti ulun.
19 Tan oras ne'e, Na'i Maromak oras to'o ti'an
atu sori Niakaan ema.”e
20 Leno notu, Yesus lulun nikar hakerek nia, hotu foo baa uma hamulak ulun. Hotu Nia tuur. Ema hotu-hotu iha nia nobun Nia bei-beik. 21 Hotu Nia katak baa sia na'ak, “Lia mak emi rona ohin nia, oras ne'e dadi ti'an!”
22 Rona nola nunia, ema nia sia mose Yesus na'ak, “Adeei! Saa mak Nia dale ohin nia, kabaas liu! Mais Nia ne'e, Yusuf oan! Tan saa bele nune'e?”
23 Yesus nataa na'ak, “Noo lia hatetek na'ak, ‘Hoi, makdook! Malo okaan isin lolon di'ak uluk lai, foin madi'ak ema seluk.’ Nanis emi hatene ti'an lia hatetek nia. Emi balu hakara hodi lia nia ta'e fila Ha'u, hodi husu Ha'u ha'ak, ‘Tan saa O la mase'i tadak blaar bodik ami iha ne'e, hanesan uluk O mase'i iha kota Kapernaum?’ 24 Rona, tan Ha'ukaan dalen ne'e, tebes no loos! Ema la nakara simu Maromak mako'an iha siakaan leo du'uk.f 25-26 Hola lia hatetek ida hosi Maromak mako'an uluk Elia. Baa dala ida, udan la tau rai tinan tolu no balun. Baa oras nia, feto faluk wa'in iha Isra'el. Masik nunia moos, Na'i Maromak la solok Elia baa tulun sia hotu iha Isra'el. Nia solok Elia baa feto faluk mesak ida iha leo Sarfat kre'is kota Sidon. Tuir loos, ferik nia lahoos ema Yahudi, mais tan nia fiar baa Na'i Maromak.g
27 Hola lia hatetek seluk hosi Maromak mako'an Elisa. Baa oras nia, ema Yahudi wa'in moras funi mea iha Isra'el. Mais Na'i Maromak la nadi'ak nola sia. Na'i Maromak naruka Elisa nadi'ak nola ema moras funi mea mesak ida dei. Ema nia, naran Naaman. Tuir loos, nia ema Siria, lahoos ema Yahudi, mais tan nia fiar baa Na'i Maromak.”h
28 Rona Yesus dale nunia, sia hotu-hotu krakat. 29 Sia nariik bele-bele, nabu'a sai Nia nosi uma hamulak nia. Sia dada nodi Nia baa leo di'in, atu soe baa horun laran. 30 Mais Nia sai luku tuir ema lear nia leet. Hotu Nia la'o nela sia.
Yesus te'ur sai diabu nosi ema ida
31 Nunia hotu, Yesus tuun baa kota Kapernaum iha debu boot Galilea tehen. Sura loron hamulak, Nia nanorin ema iha uma hamulak Yahudi.
Lukas 4:31-44
33 Dala ida, oras Yesus nanorin iha uma hamulak, noo ema ida mak diabu tekar. Nia nakrake maka'as na'ak, 34 “Hoi Yesus, ema Nasaret! O moo lia saa mo ami! O mai atu madodok ami ka? Ami hatene O. O ne'e, Ema Moon mak uluk Na'i Maromak nameno atu solok mai.”
35 Mais Yesus nakanas nia na'ak, “Taka ibun! Sai mela ema nia!” Teki-tekis diabu nia foti ema nia nitak baa rai iha ema sia leet. Nitak notu, diabu moos sai nela nodi la nahoras tenik nia.
36 Ema hotu-hotu blaar. Sia dale na'ak, “Ita blaar tebes! Ema ne'e dalen, noo beran maka'as! To'o diabu sia moos tuir Niakaan haruka nodi sai nela ema!” 37 Hotu ema nia sia la'o nasirin rai nia, katak lia nosi Yesus baa ema hotu-hotu.
Yesus nadi'ak nola Simon banin feto no ema wa'in
38 Yesus sai nosi uma hamulak nia ti'an, Nia baa ema ida uman. Ema nia naran, Simon.j Simon banin feto moras kiki. Sia nusu baa Yesus na'ak, “Ama! Tulun madi'ak mola ferik nia lai!” 39 Rona nola nunia, Yesus baa nariik kre'is ferik nia toba fatin. Hotu Nia te'ur sai moras kiki nia nosi nia. Oras nia moos, moras kiki nia lakon kedas. Ferik nia moos nadeer kedan, baa nadi'a haan bodik sia.
40 Kre'is loro monu ona, ema loi nodi siakaan ema mak moras oi-oik baa Yesus. Nia rai liman baa, nadi'ak nola sia hotu-hotu. 41 Ema mak moras nia sia, na'in hira diabu tekar. Yesus moos nesi diabu sia sai nela ema nia sia. Sia sai nodi nakrake na'ak, “O ne'e, Na'i Maromak Oan!” Tebes. Diabu nia sia natene na'ak, Yesus nia, Kristus, mak uluk Na'i Maromak nameno atu solok mai. Tan baa nia, Yesus nakahik diabu sia nebee keta dale lia fuan ida moos nosi Nia.
Yesus baa katak Manfatin Di'ak iha uma hamulak sia
42 Baa awan kre'is rai naroma, Yesus nadeer atu baa fatin mamuk ida iha kota luan. La kleur, ema buka Nia nasiri fatin hotu-hotu. Sia nasoru ti'an, sia namaus Nia na'ak, “Ama, mein mo ami dei! Lalika baa fatin seluk sia!”
43 Mais Yesus nataa na'ak, “La bele! Ha'u kmusti baa leo seluk sia atu katak Manfatin Di'ak nosi Na'i Maromak ukunrai. Tan Nia solok Ha'u kmai atu kala'ok serwisu nia.”
44 Hotu Yesus nosi leo ida baa leo ida iha rai Yudea, nodi nanorin iha uma hamulak sia.