Yesus moris nikar
28
Ema Yahudi siakaan loron hamulak siku ti'an, awan kona baa loron domiku. Baa loron domiku seisawan oan, Maria nosi Magdala no Maria seluk nia, baa naree Yesus raten. 2 Teki-tekis, rai kakekuk boot. Maromak Niakaan makbukar lale'an ida tuun mai, baa dudu sees fatuk boot mak taka kuak nia. Hotu makbukar nia tuur baa fatuk nia leten. 3 Niakaan oin naksinak hanesan mameran, no niakaan tais mutin moos. 4 Naree nunia, makdaka rai sia nata'uk basuk to'o kiki lirin. Sia la bele kakoen aan, ahan ema maten.5 Hotu makbukar lale'an nia katak baa feto nia sia na'ak, “Lalika hata'uk! Ha'u katene emi mai buka Yesus, Ema mak sia nedi no'o baa ai karuus nia. 6 Mais Nia la iha ne'e ona. Nia moris nikar ti'an, tuir saa mak Nia dale kedan ti'an. Mai tama baa haree du'uk maten fatin nia. Mamuk ti'an! 7 Rona! Fila lai-lais baa katak baa Yesus Niakaan maktuir sia ha'ak, Nia moris nikar ti'an. Nia uluk baa Galilea ti'an. Sia musti baa nasoru Nia iha nebaa, hanesan Nia nameno kedan ti'an baa sia. Ha'ukaan dalen ne'e, tebes.”
8 Rona nola nunia, feto nia sia nalai sai la'o nela fatin nia. Sia noran nata'uk, mais sia moos noran di'ak. Sia fila lai-lais atu katak lia nia hotu-hotu baa Yesus Niakaan maktuir sia.
9 Mais to'o dalan klaran, sarebak Yesus nasoru sia nodi dale na'ak, “Saloom!” Naree nunia, sia moos nare'is aan, baa nako'ak Niakaan ain nodi lo'u-sudur baa Nia. 10 Nia moos dale na'ak, “Keta hata'uk! Baa katak Ha'ukaan maktuir sia, nebee sia baa nein Ha'u iha Galilea.”
Makdaka rai sia baa nasara lia, nosi saa mak dadi iha Yesus raten
11 Baa oras feto nia sia sei iha dalan klaran, makdaka rai sia moos fila baa kota. Sia baa nasara lia hotu-hotu mak dadi ti'an nia baa na'ilulik ulun sia. 12 Rona nola nunia, na'ilulik ulun nia sia ko'a lia fuan no fukun adat sia atu selu osan wa'in nodi taka makdaka rai ibun. 13 Sia katak baa makdaka rai sia na'ak, “Hoi! Kalo ema nusu emi, emi hataa nune'e: Kalan boot ami toba dukur. La hatene falik, Niakaan maktuir sia mai nana'o nola Niakaan maten. 14 Kalo Ama Gubernur rona nola lia nia, emi lalika hata'uk, tan ami mak atu hahulin ama boot nia.”
15 Hotu makdaka rai sia simu nola osan nia, no nalo tuir siakaan hakaran. Etuk, to'o baa oras ne'e moos, ema Yahudi sia sei fiar lia tolek nia.
Yesus natadu aan baa Niakaan maktuir sia
16 Nunia hotu, Yesus Niakaan maktuir na'in sanulu resin ida baa Galilea atu nasoru Nia iha foho ida, tuir Niakaan mamenon uluk nia.a 17 Baa oras sia naree Nia iha nebaa, sia lo'u-sudur baa Nia. Masik nunia moos, balu sei neon ruak.
18 Hotu Yesus mai nare'is aan baa sia, nodi dale na'ak, “Na'i Maromak latan beran baa Ha'u ti'an, nebee Ha'u ukun hotu-hotu iha lale'an no raiklaran. 19 Tan lia nia, emi musti baa raiklaran tomak, katak Ha'ukaan Manfatin Di'ak baa ema nosi rai hotu-hotu. Hatudu dalan nebee sia dadi baa Ha'ukaan ema. Sarani sia nebee foo tadak na'ak sia talin malu ti'an no Ama, no Niakaan Oan, no Niakaan Kmalar Lulik.b 20 Hotu hanorin nebee sia nalo tuir ukun hotu-hotu mak Ha'u katak ti'an baa emi. Hanoin di'a-di'ak! Ha'u kafati ko emi to'o rai falu fila.”