Lia Yohanis Mak Sarani Ema
3
1-2 Baa oras nia, Tiberius mak liurai Roma. Nia kaer ukun tinan sanulu resin lima ti'an. Pontius Pilatus, mak gubernur rai Yudea. Herodes, mak gubernur rai Galilea. Herodes maun Filipus, mak gubernur rai Iturea no rai Trakonitis. Lisanas, mak gubernur rai Abilene.aBaa oras nia moos, Hanas no Kayafas, mak na'ilulik ulun boot iha kota Yerusalem.
Natoon baa oras nia, Yohanis,Sakarias oan, nein iha fatin fuik dook nosi leo. Iha nebaa, Na'i Maromak tau lia baa nia.
Lukas 3:1-20
3 Rona nola ti'an, Yohanis baa leo hotu-hotu mak kre'is baa mota Yordan, atu katak ema na'ak, “Emi musti katak sain no la'o hela emikaan salan sia, nebee Na'i Maromak kasu mohu hotu-hotu. Hotu, emi musti simu sarani, hanesan marak ida na'ak, emi ne'e di'a-di'ak ti'an ho Na'i Maromak.”
4 Uluk, Maromak mako'an Yesaya nakerek nola lia nosi Yohanis nia nune'e:
“Noo ema ida iha rai fuik mak nahii na'ak:
‘Hadi'a dalan atu simu Na'in namaan aan mai!
Hamoos dalan atu simu Nia.
5 Tunin haweer sura horun.
Taa haweer sura foho.
Haloos dalan kale'uk sia.
Haweer dalan karutas sia.
6 Nebee ema rai hotu-hotu bele natene na'ak,
Na'i Maromak nakara sori ema
nosi siakaan salan.’”b
7 Baa oras nia ema mai nosi fatin hotu-hotu, atu nusu Yohanis sarani sia. Mais nia nakanas sia na'ak, “Hoi! Tolek teen sia! Emi nu'u samea mak noo raso! Keta haneo ha'ak, emi bele hakbois hosi Na'i Maromak kastikar! Lale! Tan la kleur ona, Na'i Maromak natuun kastikar baa ema hotu-hotu mak la di'ak no Nia.c 8 Keta haneo ha'ak, emi la hetan kastikar tan emi Bei Abraham husar-binan. Lale! Emi Bei Abraham husar-binan tebes, mais lia nia la nalo emi moon. Na'i Maromak bele nalo fatuk ne'e sia dadi baa Bei Abraham husar-binan. Ha'u katak emi. Hatudu kakaer hodi emikaan moris, nebee ema natene tebe-tebes na'ak, emi se'i kotuk ti'an la'o hela emikaan salan sia, hodi tuir hikar Na'i Maromak.d 9 Emi musti halo lia di'ak sia. Kalo lale, Na'i Maromak natuun kastikar todan baa emi, hanesan ema nodi baliun nu'an ai huun. Nunia tebes! Ai huun la noo folin, kalo la nafua di'ak! Di'ak liu hu'an, soe baa ha'i dei.”e
10 Rona nola Yohanis dale nunia, ema nia sia nusu nia na'ak, “Kalo nunia, ami musti halo saa?”
11 Nia nataa na'ak, “Kalo moo faru tahan rua, foo tahan ida baa ema faru lalek. Kalo moo haan, fa'e foo baa ema haan lalek.”
12 Ema maksisi bea sia moos mai nusu baa Yohanis, nebee nia sarani sia. Sia nusu na'ak, “Ama boot! Tulun hanorin ami atu halo saa.”f
13 Nia nataa na'ak, “Uluk, emi tolek teen. Mais oras ne'e, emi musti serwisu halo loos. Keta husu bea liu nosi ukun. Nebee hutun-renu selu bea kona besik no ukun-badu.”
14 Sondadu na'i hira moos iha nia. Sia nusu baa Yohanis na'ak, “Kalo ami, nunabee? Ami musti halo saa?”
Nia nataa na'ak, “Keta todak ema niakaan osan tuir emikaan hakara. Keta duu karin ema. Oras simu kansera, musti neon boot hodi horan to'o.”
15 Rona Yohanis dale nunia, ema hotu-hotu kebit malu nodi namaas baa malu na'ak, “Hoi! Keta arumak Yohanis ne'e. Kristus mak hori uluk Na'i Maromak nameno atu solok mai!”
16 Mais Yohanis katak baa sia na'ak, “Rona di'a-di'ak! Ema ida mak boot liu ha'u atu mai. Masik ha'u kdadi baa niakaan atan moos, ha'u la kfatan.g Ha'u ksarani ema kodi wee dei, mais Nia atu nalo liu tan ha'u, tan Nia atu nakonu emikaan neon no laran nodi Maromak Kmalar Lulik. Nia atu namoos emi, hanesan badaen mean namoos mean nodi ha'i, atu soe mean teen, nebee netan mean isin. 17 Nia moos hanesan ema mafaho rai laliki nasai hare abas. Nia rai hare moos baa kanaha laran, mais namotu hare abas. Nunia moos Na'i Maromak. Nia atu kastikar ema mak se'i kotuk baa Nia, nodi soe lakon sia baa ha'i laran mak laka bei-beik.”
18 Hodi nunia, Yohanis foo natene lia oi-oik baa ema, nodi katak Na'i Maromak Manfatin Di'ak baa sia.
19-20 Baa oras nia moos, Yohanis nahuu dale malorek Herodes niakaan hahalok aat sia. Niakaan lia nune'e: Herodes nia, gubernur rai Galilea. Niakaan salan butuk bein ti'an. Nia moos nadau nola alin feen, naran Herodias. Mais tuir loos, alin sei moris no sei la soe malu dauk no feen Herodias. Tan Herodes hahalok aat nia sia, Yohanis de'an nia loke fore, to'o Herodes krakat, hotu kohi nola nia, soe baa bui.h
Yohanis sarani Yesus
21 Uluk, oras Herodes sei la kohi Yohanis dauk, Yohanis sarani ema wa'in. Nia moos sarani Yesus. Sarani hotu, Yesus namulak. Oras nia moos, lale'an nakloke.
Lukas 3:21-38
22 Hotu Maromak Kmalar Lulik namaan aan tuun baa Yesus. Kmalar Lulik nia ilas nu'u lakateu sina. Baa oras nia moos, noo lia maliak ida nosi lale'an na'ak:
“O ne'e, Ha'ukaan Oan mak Ha'u kakara no kadomi.
O malo Ha'u neon di'ak.”i
Na'i Yesus bei uluk sia, tuir aman Yusuf husar-binan
23 Baa oras Yesus nahuu katak lia nosi Na'i Maromak, Niakaan otas takseer tinan tolu nulu. Ema natene Yesus nia, Yusuf oan. Yusuf bein uluk sia mak ne'e:
Yusuf aman, Eli.
24 Eli aman, Matat.
Matat aman, Lewi.
Lewi aman, Melki.
Melki aman, Yanai.
Yanai aman, Yusuf.
25 Yusuf aman, Matatias.
Matatias aman, Amos.
Amos aman, Nahum.
Nahum aman, Hesli.
Hesli aman, Nagai.
26 Nagai aman, Maat.
Maat aman, Matatias.
Matatias aman, Semein.
Semein aman, Yosek.
Yosek aman, Yoda.
27 Yoda aman, Yohanan.
Yohanan aman, Resa.
Resa aman, Serubabel.
Serubabel aman, Sealtiel.
Sealtiel aman, Neri.
28 Neri aman, Melki.
Melki aman, Adi.
Adi aman, Kosam.
Kosam aman, Elmadam.
Elmadam aman, Er.
29 Er aman, Yosua.
Yosua aman, Elieser.
Elieser aman, Yorim.
Yorim aman, Matat.
Matat aman, Lewi.
30 Lewi aman, Simeon.
Simeon aman, Yahuda.
Yahuda aman, Yusuf.
Yusuf aman, Yonam.
Yonam aman, Elyakim.
31 Elyakim aman, Melea.
Melea aman, Mena.
Mena aman, Matata.
Matata aman, Natan.
Natan aman, Daud.
32 Daud aman, Isai.
Isai aman, Obed.
Obed aman, Boas.
Boas aman, Salmon.
Salmon aman, Nahason.
33 Nahason aman, Aminadab.
Aminadab aman, Admin.
Admin aman, Arni.
Arni aman, Hesron.
Hesron aman, Peres.
Peres aman, Yahuda.
34 Yahuda aman, Yakob.
Yakob aman, Isak.
Isak aman, Abraham.
Abraham aman, Tera.
Tera aman, Nahor.
35 Nahor aman, Seruk.
Seruk aman, Rehu.
Rehu aman, Pelek.
Pelek aman, Eber.
Eber aman, Sela.
36 Sela aman, Kenan.
Kenan aman, Arpaksad.
Arpaksad aman, Sem.
Sem aman, Noh.
Noh aman, Lamek.
37 Lamek aman, Metusalak.
Metusalak aman, Henok.
Henok aman, Yared.
Yared aman, Mahalalel.
Mahalalel aman, Kenan.
38 Kenan aman, Enos.
Enos aman, Set.
Set aman, Adam.
Adam nia, Na'i Maromak mak nase'i.