Yesus nadi'ak nola ema kma'as ida
2
Siku loron hira ti'an, Yesus fila nikar baa leo Kapernaum. Ema naree Nia, hotu sia baa katak lema leo nia na'ak, “Yesus fila uma ti'an.” 2 Rona nola nunia, ema wa'in lolok mai, to'o sesuk malu iha uma nia. Odamatan moos nakonu ema. Hotu, Yesus nalore Na'i Maromak Manfatin baa sia. 3 Baa oras Yesus sei nanorin, ema na'in haat leba nodi ema kma'as ida mai. 4 Mais sia la bele tama to'o Yesus oin, tan ema wa'in sesuk malu. Tan baa nia, sia sa'e baa, sobu nakuak uma leten, kona besik baa Yesus oin. Hotu, sia natuun ema kma'as nia nodi biti, baa Yesus oin. 5 Naree nunia, Yesus natene na'ak sia fiar tebe-tebes. Tan lia nia, Nia katak baa ema kma'as nia na'ak, “Oa! Ha'u kasu ti'an okaan salan sia!”
6 Baa oras nia, manorik ukun Yahudi na'in hira moos tuur iha nia. Rona Yesus dale nunia, sia hirus 7 nodi namaas baa malu na'ak, “Nia la bele dale nunia, tan Na'i Maromak mesan mak bele kasu ema salan! Nia nalo aan nu'u Maromak. Nia nahaat Maromak naran ti'an!”
8 Mais Yesus natene kedan siakaan neon. Nia katak baa sia na'ak, “Hoi, maluk sia! Emi keta haneo nunia! 9-10 Ha'u ne'e, Ema Raiklaran Isin mak ketan beran kosi Maromak. Ha'u koo beran atu foo pardua baa ema. Mais hanoin! Kalo Ha'u kdale baa ema ne'e ka'ak, ‘O metan pardua ti'an,’ emi la haree Ha'ukaan beran. Mais kalo Ha'u karuka nia ka'ak, ‘Madeer ona!’ foin emi bele haree Ha'ukaan beran.”
Dale notu nunia, Yesus katak baa ema kma'as nia na'ak, 11 “O rona! Oras ne'e, o di'ak ti'an! Madeer! Lulun biti, modi fila ona!”
12 Rona nola nunia, ema kma'as nia moos nadeer kedas. Hotu, nia foti biti nodi sai. Ema hotu-hotu iha nia blaar karin nodi na'ak, “Adeei! Ami foin haree hahalok nune'e! Na'i Maromak beran boot tebes!”
Yesus bolu nola Lewi atu tuir Nia
13 Hotu, Yesus fila baa debu boot Galilea tehen. Ema wa'in mai baa Nia, hotu Nia nanorin sia.
14 Iha fatin nia no ema ida naran Lewi. Lewi aman, naran Alfeus. Lewi nia, maksisi bea bodik ukunrai Roma. Oras Yesus la'o tuir nia, Nia naree Lewi. Hotu, Nia bolu na'ak, “Hei! Mai tuir Ha'u!”
Rona Yesus bolu nunia, Lewi nariik, tuir kedas Yesus.
15 Loron ida, Yesus no Niakaan maktuir sia baa naa iha Lewi uman. Sia naa namutuk no Lewi niakaan mamaluk maksisi bea sia no ema seluk sia mak ema Yahudi sura na'ak, ema lisan aat. Mais sia mak nakara du'uk atu rona Yesus hanorin.
16 Iha nia moos, noo manorik ukun nosi partee Farisi. Sia naree Yesus naa namutuk no ema maksisi bea no ema lisan aat nia sia. Hotu sia nusu baa Yesus Niakaan maktuir sia na'ak, “Tan saa emikaan ulun tuur naa namutuk no ema maksisi bea no ema lisan aat sia?”
17 Rona sia nusu nunia, Yesus katak baa sia na'ak, “Ema moras buka makdook. Ema isin lolon di'ak, la buka makdook. Ha'u kmai atu babilan ema mak aat, lahoos atu babilan ema mak noran aan di'ak.”
Yesus Niakaan hanorin seluk nosi ema Farisi siakaan hanorin
18 Baa loron ida, ema Farisi sia nalirin aan. Yohanis Niakaan maktuir sia moos nalo tuir. Mais ema Farisi sia naree Yesus Niakaan maktuir sia la nalirin aan. Hotu, sia mai nusu Yesus na'ak, “Ama! Ami halirin aan. Yohanis Niakaan maktuir sia moos nalirin aan. Mais tan saa Okaan maktuir sia la nalirin aan?”
19 Rona nola nunia, Yesus nataa na'ak, “Emi hatene ti'an, kalo ema nalo dahur uma kain foun, bainaka sia la nalirin aan, mais sia naa to'o bosu. Kalo sasudin mane sei iha nia, sia naa bele-bele. 20 Mais awan-wainrua, kalo ema seluk mai kohi nola sasudin mane nia, niakaan maluk sia noran susar. Foin, sia nalirin aan.”
21 Hotu, Yesus foo lia hatetek ida na'ak, “Kalo faru naksira, ita la baban hodi tais foun. Tan kalo fasi, tais foun nia nakru'u, to'o faru tuan nia naksira tu'an. 22 No tenik, ita la salin tua midar foun baa knaban tuan. Tan knaban tuan la'ok, hotu tua midar nia nanii mohu. Ita musti salin tua midar foun baa knaban foun.”a [Hodi nunia, Yesus na'ak, niakaan hanorin nia, foun. Keta kahur ho ema Farisi siakaan hanorin tuan.]
Yesus Niakaan maktuir sia ku'u hare gandum baa loron hanawa serwisu
23 Baa loron ida, kona baa ema Yahudi siakaan loron hamulak no loron hanawa serwisu, Yesus no Niakaan maktuir sia la'o tuir to'os ida. Maktuir sia ku'u nola hare gandum, nodi naa la-la'ok.b 24 Mais noo ema Farisi mak naree. Hotu, sia nusu Yesus na'ak, “Tan saa Okaan maktuir sia nakur itakaan ukun-badu? Sia ku'u hare gandum baa loron hanawa serwisu! La bele nunia!”
25-26 Mais Yesus nataa na'ak, “Emi la hanoin lia Bei Daud ka? Na'ilulik boot baa oras nia, naran Abiatar. Natoon baa nia, Bei Daud no niakaan maktuir sia salaen basuk. Sia tama baa Batane Hamulak. Hotu, sia naa nola tubi mak na'ilulik sia sera ti'an baa Na'i Maromak. Tuir loos, na'ilulik sia mesan dei mak bele naa tubi nia. Mais, hanoin. Tan masik Bei Daud sia naa nola moos, la no ema mak nasalak sia.”c
27 Hotu, Yesus nalore tenik na'ak, “Emi keta halu'a ha'ak, Na'i Maromak nase'i loron hanawa serwisu nebee dadi matak-malirin bodik ema raiklaran. Nia la nase'i ema raiklaran nebee tuir ukun loron hanawa serwisu. 28 Ha'u ne'e, Ema Raiklaran Isin mak ketan beran kosi Maromak. Ha'u koo beran atu kakotu saa mak ema bele nalo baa loron hanawa serwisu.”