2 Kre'is baa nia, ema mak tuun tasi sia namoos daitiha iha rai maran. Yesus naree bero mamuk rua nakrai aan iha nia. 3 Bero ida, Simon beron. Yesus sa'e baa Simon beron, hotu naruka dudu soruk oda baa. Hotu Yesus tuur nodi nanorin ema wa'in nia sia.^b

4 Yesus nanorin notu, Nia dale baa Simon na'ak, “Simon! Fofer soruk tenik le'an baa, hotu soe daitiha. Emi nanis hetan na'an tasi lear.”

5 Mais Simon nataa na'ak, “Ama! Ami harui aan kalan tomak ida ti'an, mais lolon ida moos, la hetan! Mais tan Ama naruka, ami hatuun kokon.”^c 6 Hotu sia baa natuun daitiha. Oras dada sa'e, daitiha nia nakonu no na'an tasi, to'o daitiha atu naklees ona.^d 7 Naree nunia, Simon nahii bolu niakaan mamaluk sia nosi bero ida seluk, nebee mai tulun. Hotu sia ra'ut natama na'an tasi baa bero rua nia to'o nakonu kre'is mout. 8-10 Nosi Simon mamaluk sia, noo Sebadeus oan rua, naran Yakobus no Yohanis. Sia moos blaar tan netan na'an tasi lear nia. Naree na'an tasi lear nia, Simon^e sudur kedas baa Yesus oin, nodi na'ak, “Ha'u ne'e, ema maksalan. Di'ak liu, Ama keta kre'is ha'u.”

Mais Yesus nataa na'ak, “Simon. Keta neon ki'ik, tan Ha'u kakara karuka emi. Emi serwisu loron-loron buka na'an tasi. Mais oras ne'e, Ha'u atu kanorin emi buka ema, nebee sia tuir Ha'u.”

11 Nunia hotu, sia dada nasa'e kedan bero baa rai maran. Hotu sia la'o nela hotu-hotu, baa tuir Yesus.

12 Iha leo ida, Yesus nasoru ema ida mak moras funi mea lema isin lolon tomak. Ema nia naree Yesus, nia nakni'a sudur nodi dale na'ak, “Ama! Tulun ha'u lai! Ha'u katene Ama bele nalakon ha'ukaan moras ne'e, nebee ema keta nakribi ha'u ona. Surak Ama nakara.”

13 Yesus lolo liman baa, koko ema nia nodi katak na'ak, “Ha'u kakara! Di'ak ona!” Yesus dale notu nunia, moras funi mea nia lakon mohu kedas. 14 Hotu Yesus katak na'ak, “Manoin di'a-di'ak! O di'ak ti'an, mais la bele katak baa ema! O musti tuir uluk Bei Musa ukun-badu lai. Baa matudu isin lolon baa na'ilulik, nebee nia leno okaan isin atu natene okaan moras lakon tebes ti'an ka, sei. Hotu, o musti matama osan baa na'ilulik atu nalo baa sera, nebee ema hotu-hotu bele natene na'ak, o di'ak tebes ti'an.”^f

15 Masik Yesus nakahik nunia moos, lia nosi Yesus beran nia keke lema nosi ibun baa ibun. Tan baa nia, ema lolok mai bei-beik atu nanono Niakaan hanorin. Nia moos nadi'ak nola ema lear nosi moras oi-oik. 16 Hotu Nia nakiduk nela ema lear, atu baa namulak iha fatin mamuk.

17 Dala ida, Yesus nanorin ema iha uma ida. Baa oras nia, ema na'in hira mai nanono Nia. Sia, ema nosi partee Farisi no ema manorik ukun Yahudi. Sia mai nosi leo sia iha rai Galilea, nosi rai Yudea, no nosi kota Yerusalem. Oras nia, Na'i Maromak latan beran baa Yesus atu nadi'ak nola ema moras sia.

18-19 Tan baa nia, ema na'in hira natiu ema ai kma'as ida baa tane lolo, nodi mai Yesus. Sia narui aan atu tama uma nia, mais uma nia naksetik basuk no ema ti'an, to'o la bele tama. Tan baa nia, sia nodi ema kma'as nia sa'e baa uma leten. Sia sobu nakuak uma leten, hotu natuun tane lolo nia baa Yesus oin iha ema lear leet. 20 Naree nunia, Yesus natene sia fiar Nia bele nalo siakaan maluk nia di'ak. Nia dale baa ema kma'as nia na'ak, “Maluk! Ha'u kasu mohu okaan salan sia ti'an.”

21 Rona Yesus dale nunia, ema Farisi no ema manorik ukun nia sia naneo na'ak, “Hoi! Maromak mesan mak noo beran kasu ema salan. Nia ne'e see, to'o nalo aan nu'u Na'i Maromak! Ne'e nahaat Maromak ti'an!”

22 Mais Yesus natene siakaan neon. Nia dale na'ak, “Tan saa emi haneo ha'ak, Ha'u kahaat Maromak? 23-24 Ha'u ne'e, Ema Raiklaran Isin. Ha'u koo beran kasu ema salan. Kalo Ha'u katak baa ema kma'as ne'e ka'ak, ‘Ha'u kasu mohu okaan salan sia ti'an,’ emi la haree kakaer. Mais kalo Ha'u katak ka'ak, ‘Madeer! Foti tane lolo, fila ona,’ hotu ema kma'as ne'e nadeer kedan, foin emi haree kakaer.”

Yesus dale notu nunia, Nia fila baa ema kma'as nia nodi na'ak, “Mariik! Foti tane lolo, fila ona!”

25 Oras nia moos, ema kma'as nia nariik kedas iha ema lear oin, hotu foti tane lolo, fila nodi tonu Na'i Maromak. 26 Naree nunia, ema hotu-hotu nata'uk no blaar. Sia moos foti-nahaas Na'i Maromak naran na'ak, “Na'i Maromak maka'as! Ohin loron, ita haree du'uk lia kasalak basuk!”

27 La kleur, Yesus sai nosi uma nia. Hotu Nia naree ema maksisi bea ida tuur iha niakaan serwisu fatik. Ema nia, naran Lewi.^g Yesus tene ema nia na'ak, “Mai tuir Ha'u!” 28 Rona nola nunia, Lewi nariik kedas, la'o nela hotu-hotu, baa tuir Yesus.

29 Nunia hotu, Lewi nalo dahur boot. Nia namata Yesus no mamaluk maksisi bea no bainaka seluk sia. 30 Mais ema partee Farisi na'in hira no ema manorik ukun Yahudi sia nakmuuk Yesus eman maktuir sia na'ak, “Tan saa emi haa hamutuk ho ema la noo folin? Tan saa emi kahur ho ema maksisi bea no ema lisan aat sia? Ema di'ak la bele kahur no ema oin nunia sia!”^h

31 Mais Yesus katak baa sia na'ak, “Ema moras, buka makdook. Ema isin di'ak, la buka makdook. 32 Ha'u kmai atu kaliku ema maksalan, lahoos atu kaliku ema mak filak aan ema loos.”

33 Nunia hotu, ema partee Farisi no ema manorik ukun Yahudi sia nakmuuk Yesus na'ak, “Nune'e, Ama! Yohanis eman maktuir sia nalirin aan no namulak nohuun. Ema Farisi sia moos nunia. Mais tan saa Ama eman sia naa-nemu nohuun? La natene nalirin aan ka?”

34 Mais Yesus nataa na'ak, “Kalo halo dahur hola malu, emi haruka bainaka nalirin aan ka? Lale! Nanis emi haruka naa to'o bosu. Kalo mane foun sei iha nia, musti haa bele-bele. 35 Mais nosi ikus, kalo ema kohi nola mane foun nodi baa ti'an, foin bainaka sia noran susar to'o nalirin aan.”

36 Hotu Yesus foo lia hatetek ida tenik na'ak, “Kalo faru naksira, ita la tabar hodi tais foun. Tan kalo fasi, tais tatabar foun atu nakru'u, nalo faru tuan hetak naksira. 37-38 Nunia moos, ita la fui tua foun baa knaban la'ok. Tan knaban nia be'o, tua moos nanii mohu. Tan baa nia, musti fui tua foun baa knaban foun.ⁱ [Hodi nunia, Yesus nanorin sia na'ak, Niakaan hanorin foun, keta kahur no ema Farisi siakaan hanorin tuan.] 39 Mais ema mak nemu ti'an anggor ween tuan, sia la no'uk nemu anggor ween foun. Tan naneo na'ak, ‘Anggor ween tuan mak midar kaliuk!’”