Diabu ulun koko Yesus
4
Nunia hotu, Maromak Kmalar Lulik dada nodi Yesus baa fatin fuik ida, nebee diabu ulun koko Nia.a 2 Iha nia, Yesus nalirin aan loron haat nulu, kalan haat nulu. Nia noran salaen tebe-tebes, 3 hotu diabu ulun mai koko Nia na'ak, “O ne'e tebe-tebes Na'i Maromak Oan ka? Kalo tebes, maruka fatuk ne'e sia dadi haan, nebee O maa.”4 Mais Yesus nataa na'ak, “Hakerek ti'an iha Hakerek Moon na'ak:
‘Ema raiklaran la moris nosi haan dei.
Mais sia moos musti nanono Maromak Manfatin,
nodi nalo tuir Niakaan beer.’”b
5 Hotu diabu nia dada nodi Yesus baa kota Yerusalem, mak Na'i Maromak Niakaan kota lulik. Nia dada nasa'e Yesus baa Na'i Maromak Niakaan Uma Hamulak Huun fafuhun. 6 Hotu nia dale na'ak, “Kalo O ne'e tebe-tebes Na'i Maromak Oan, maksoit tuun kokon baa rai. Nanis O la metan susar, tan hakerek ti'an iha Hakerek Moon na'ak,
‘Na'i Maromak naruka Niakaan makbukar lale'an sia,
mai daka O.’
Hakerek Moon moos na'ak,
‘Sia atu tane nola O nodi siakaan liman,
to'o masik O ain atu sidi kona fatuk moos, lale kedas.’”c
7 Mais Yesus nataa na'ak, “Hakerek Moon na'ak,
‘Na'i Maromak nia, okaan Na'in.
Keta maruka Nia nodi Niakaan beran atu natudu kakaer na'ak,
Nia mak tebe-tebes Maromak.’”d
8 Hotu diabu nia nodi tenik Yesus sa'e baa foho dikin ida. Nia natudu na'i raiklaran hotu-hotu siakaan fohorai, no siakaan kabaas hotu-hotu. 9 Natudu mohu ti'an, diabu katak baa Yesus na'ak, “Ha'u klatan fohorai nia sia hotu-hotu baa O, surak O makni'a lo'u-sudur baa ha'u.”
10 Mais Yesus nakbehek na'ak, “Hoi, Diabu! Sees mosi ne'e! Hakerek Moon na'ak,
‘O musti lo'u-sudur baa Na'i Maromak,
no serwisu bodik Nia mesan dei.’”e
11 Rona nola nunia, diabu moos la'o nela Yesus. Hotu makbukar lale'an sia mai naliku Yesus.
Yesus nahuu nanorin iha Galilea
12 Baa oras nia, Na'i Herodes natama Yohanis Mak Sarani Ema baa bui. Rona nola lia nia, Yesus fila baa Galilea.f 13 Nia baa Niakaan leo Nasaret, hotu la'o liu baa nein iha leo Kapernaum. Leo nia iha debu boot Galilea tehen, iha ema Sebulon no ema Naftali rain.g 14 Hodi nunia, Yesus nato'o saa mak Maromak mako'an Yesaya nakerek kedan hori uluk na'ak,
15 “Rai Sebulon no Rai Naftali,
mak kre'is debu boot Galilea, iha mota Yordan loromonu.
Ema maktabar wa'in nein iha nia.
16 Sia moris iha makukun laran,
mais oras ne'e, sia naree Kroman ti'an.
Oras ne'e, Kroman naksinak ti'an
bodik ema hotu-hotu mak sei la natene dauk Na'i Maromak.”h
17 Nahuu baa oras nia, Yesus nanorin ema na'ak, “Emi musti la'o hela emikaan salan, nebee moris loos ona! Tan oras ne'e, ema hotu-hotu bele tama ti'an dadi baa Na'i Maromak eman.”i
Yesus bolu nola ema maktuun tasi na'in haat atu tuir Nia
18 Baa loron ida, Yesus la'o iha debu boot Galilea tehen. Nia nasoru ema na'in rua, maun-alin. Maun naran Simon, mais loron-loron ema temi nia na'ak Petrus. Niakaan alin, naran Andreas. Sia no'i tiha na'an tasi iha debu laran, tan sia na'in rua nia, ema maktuun tasi. 19 Nasoru ti'an, Yesus bolu sia na'ak, “Hei, mai tuir Ha'u ona! Loro-loron emi buka na'an tasi, mais oras ne'e Ha'u atu kanorin emi atu buka ema, nebee sia moris tuir Na'i Maromak.” 20 Rona nola nunia, sia rua la'o nela siakaan daitiha, hotu tuir kedas Yesus.
21 La'o soruk tenik baa, Yesus naree ema na'in rua tenik. Sia, Sebadeus oan. Maun, naran Yakobus. Alin, naran Yohanis. Sia na'in rua no'i nadi'a daitiha bele-bele no siakaan ama iha bero laran. Yesus moos bolu sia na'in rua atu tuir Nia. 22 Rona nola nunia, sia moos la'o nela siakaan ama no siakaan bero, hotu tuir kedas Yesus.
Yesus nanorin ema nodi nadi'ak nola ema moras
23 Hotu Yesus la'o nasirin rai Galilea atu nanorin iha uma hamulak Yahudi. Nia nanorin Na'i Maromak Manfatin Di'ak nodi nalore oin nunabee ema bele tuir Na'i Maromak ukun. Nia moos nadi'ak nola ema nosi siakaan moras oi-oik.j 24 La kleur, lia nosi Niakaan hahalok nia keke lema rai Siria. Hotu ema nodi siakaan ema moras oi-oik mai baa Nia. Sia moos nodi ema mak diabu tekar, ema mak horak bibi maten, no ema mak ain asak. Nia nadi'ak nola hotu-hotu.
25 Baa oras nia, ema lear mai tuir Yesus. Sia mai nosi rai Galilea, nosi rai Kota Sanulu mak ema temi na'ak Dekapolis. Seluk sia mai nosi kota Yerusalem, nosi rai Yudea, no nosi mota Yordan sorin balu baa.