Yohanis Mak Sarani Ema
3
Baa oras Yesus boot ti'an, Yohanis Mak Sarani Ema nahuu nanorin ema iha fatin fuik sia iha rai Yudea. 2 Nia katak na'ak, “Mamaluk sia! Emi musti la'o hela emikaan salan, hodi fila hikar baa Na'i Maromak ona. Oras ne'e, ema hotu-hotu bele tama ona dadi baa Na'i Maromak eman.”a3 Uluk, Maromak mako'an ida naran Yesaya nakerek kedan nosi Yohanis na'ak,
“Ema ida atu nahii iha fatin fuik na'ak,
‘Ema hotu-hotu musti hadi'a dalan,
hodi simu Na'i Maromak mai!
Haweer dalan atu simu Nia!’”b
4 Yohanis niakaan moris lala'ok, hanesan Maromak mako'an uluk sia. Niakaan tais, halo hosi onta rahun. Niakaan bolas, halo hosi kulit. Niakaan haan, kala'ek no wani ween.c
5 Oras nia, ema lear mai atu nasoru Yohanis. Sia mai nosi kota Yerusalem no rai Yudea tomak. Sia moos mai nosi leo sia mak kre'is no mota Yordan. 6 Sia loke neon nodi na'ak nasai siakaan salan. Hotu Yohanis sarani sia iha mota Yordan.
7 Baa oras nia, ema nosi partee Farisi no partee Saduki moos mai nusu nebee Yohanis sarani sia. Mais Yohanis nakbehek na'ak, “Hoi! Emi ne'e nu'u samea tolek teen! Na'i Maromak atu kastikar emi tan emikaan hahalok aat sia. Keta haneo emi bele hakbois hosi Niakaan kastikar nia.d 8 Di'ak liu fila hikar baa Na'i Maromak ona, hodi soe hela emikaan salan. Hotu halo hahalok di'ak sia, nudaar ai huun mak nasai fuan di'ak. 9 Keta haneo emi sotir tan emi Bei Abraham husar-binan. Fiar ha'u! Na'i Maromak bele nase'i fatuk ne'e sia dadi Bei Abraham husar-binan.e 10 Sintidu! Noo ema mak kaer nola baliun ti'an. Nia nadi'a aan atu nu'an ai huun hotu-hotu mak la nasai fuan di'ak. Nu'an notu, soe baa ha'i.f
11 Tebes. Ha'u ksarani emi kodi wee. Ne'e dadi tadak na'ak emi la'o hela emikaan salan ti'an. Mais ema ida mak maka'as liu ha'u atu mai. Masik dadi baa Niakaan ata moos, ha'u la kfatan. Nia atu nalo liu ha'u, tan Nia atu fakar Maromak Kmalar Lulik baa emi. Nia moos atu namoos emikaan neon, hanesan ema nodi ha'i sunu lere.g 12 Nia kaer lafatin atu tata'ek nasai hare abas. Hotu Nia natama hare isin baa kanaha. Mais hare abas, Nia soe baa ha'i mak laka bei-beik.”
Yohanis sarani Yesus
13 Baa oras nia, Yesus tuun nosi Galilea baa mota Yordan. Nia mai nusu nebee Yohanis sarani Nia, 14 mais Yohanis la no'uk. Nia saseni na'ak, “Nunabee, ha'u mak musti sarani Ita Boot? La baku fila ka? Ita Boot mak musti sarani ha'u. Ha'u kakara mak nia!”
15 Mais Yesus nataa na'ak, “La saa ida. Oras ne'e, mau mak sarani Ha'u dei. Kalo mau nalo nunia, ita halo tuir Na'i Maromak hakaran ti'an.”
Rona nola nunia, Yohanis nataa na'ak, “Loos Ita Boot baa dei.” Hotu nia sarani Yesus.
16 Sarani notu, Yesus sai nosi mota. Teki-tekis, lale'an nakloke. Hotu Nia titu-naree Maromak Kmalar tuun mai baa Nia, hanesan manu lakateu sina. 17 Hotu Na'i Maromak lian maliak sai nosi lale'an na'ak,
“Ne'e mak Ha'ukaan Oan dadobe.
Nia nalo Ha'u neon di'ak tebes.”h