Feto faluk mukit ida foo sera mak boot kaliuk
21
Baa oras Yesus nanorin iha Uma Hamulak Huun, Nia titu-naree maksoin sia natama osan baa ai balun sera.
Lukas 21:1-28
2 La kleur, feto faluk mukit ida moos mai tuir namulak. Nia natama osan lahon rua baa ai balun nia. Osan nia folin, ki'ik basuk. 3 Naree nunia, Yesus dale baa Niakaan maktuir sia na'ak, “Haree baa lai! Feto faluk mukit ne'e natama osan lahon rua dei, mais niakaan sera nia, boot liu nosi ema hotu-hotu siakaan sera. 4 Ema seluk sia foo sera nosi siakaan osan resin. Mais feto faluk ne'e sera mohu niakaan osan hotu-hotu, to'o osan atu nola haan moos, la nela.”
Yesus katak kedan na'ak, Uma Hamulak Huun atu nakro'on
5 Baa oras nia, Yesus Niakaan maktuir sia mose Uma Hamulak Huun na'ak, “Ama! Haree kokon! Uma ne'e, kabaas basuk! Ema nada fatuk fera boot sia, di'ak basuk. Sia moos sera naha folin todan hodi hafutar Na'i Maromak Uman ne'e!”
Mais Yesus nataa na'ak, 6 “Uma ne'e kabaas tebes. Mais la kleur ona, ema atu naro'on mohu fatuk ne'e sia, to'o weer baa rai.”
Loron susar no loot
7 Hotu Yesus Niakaan maktuir sia nusu na'ak, “Ama Boot! Hanorin ohin nia, wainhira atu dadi? Kalo kre'is ti'an, niakaan tadak oin nunabee?”
8 Yesus nataa na'ak, “Emi musti daka aan di'a-di'ak, nebee keta kona be'ur. Tan ema oi-oik atu mai loko aan na'ak, ‘Ha'u ne'e, Kristus.’ Balu tenik na'ak, ‘Kristus namaan aan mai nikar ti'an!’ Mais lalika fiar! 9 Kalo rona lia na'ak, ema rakut malu no natuda malu iha nabee dei, lalika sarebak. Tebes! Lia nia sia hotu-hotu musti dadi, mais rai falu fila sei la to'o dauk.
10 Ema hunun ida atu natuda no hunun seluk. Ema rai ida natuda sakar rai seluk. 11 Rai atu kakekuk boot, no salaen boot. Moras maufinu mosu lema rai. Ema atu naree lia mak nalo isin rahun nafuna, no tadak maka'as iha lale'an. 12 Lia ne'e sia hotu-hotu sei la dadi dauk, mais ema kohi nola emi nodi nahoras, tan emi fiar Ha'u. Hotu, sia nodi emi baa uma hamulak atu tula lia baa emi, no neti emi iha bui laran. Sia moos naruka emi baa hataa lia baa na'in no ukunrai seluk sia. Hotu-hotu ne'e sia atu dadi baa emi, tan tuir Ha'u. 13 Mais emi musti hodi leet nia sia, atu katak malorek Ha'ukaan Manfatin Di'ak baa sia. 14 Keta neo-neon ha'ak, emi atu haloos aan nunabee. 15 Tan Ha'u atu kfoo emi lia fuan makonak atu hodi haloos aan. Hodi nunia, emikaan funu sia benar karin.a 16-17 Ema wa'in atu hirus emi, tan tuir Ha'u. Emikaan familin du'uk, nu'u inan no aman, maun no alin, mamaluk sia no belun sia atu buka dalan fa'an emi, to'o no'o emi balu. 18 Mais lalika hata'uk, tan Na'i Maromak la nalu'a emi. Fuuk lahon ida moos la bele nakodan nosi emikaan ulun, kalo Nia la nakara. 19 Mais kalo emi haterus aan bei-beik, Na'i Maromak nanis sori emi.”
Yesus dale lia Yerusalem nakro'on
20 Hotu, Yesus dale natutan na'ak, “Kalo emi haree funu sia kabuun nola kota Yerusalem, emi bele hatene ha'ak, Yerusalem kre'is dodok ona. 21 Naree nunia, ema iha rai Yudea musti nariik nalai baa foho. Ema iha kota moos, nalai ona. Ema iha leo lalika tama kota tenik. 22 Tan Na'i Maromak solok susar nia sia, atu kastikar ema mak la no'uk nanono baa Nia. Lia nia sia hotu-hotu kona besik baa saa mak Niakaan mako'an nakerek kedan hori uluk.b 23 Baa oras susar nia to'o, ema mak susar kaliuk, mak feto mako'us no feto mak nasusu oan. Baa oras nia, raiklaran tomak netan susar. Ema Yahudi sia moos kona susar, tan Na'i Maromak nahibu sia. 24 Funu atu no'o sia balu, no sena balu dadi ata iha rai hotu-hotu. Ema maktabar mak la natene Maromak atu mai sama nadoor kota Yerusalem, nodi kaer nola kota isin, to'o siakaan oras nia mohu.”
Yesus katak Niakaan oras mai nikar
25 Hotu, Yesus katak tenik na'ak, “Baa oras Ha'u, Ema Raiklaran Isin ne'e mai kikar, tadak sia sai iha loro, iha fulan no iha fitun. Iha raiklaran moos noo tadak nu'u tasi nakali sa'e, no anin dadurus boot. Lia ne'e sia hotu-hotu nalo ema raiklaran nata'uk to'o benar.c 26 Fafutar lale'an sia moos nawae karin. Naree nunia, ema nata'uk basuk, tan raiklaran atu netan dinu. 27 Nunia ti'an, foin ema titu-naree ‘Ema Raiklaran Isin namaan aan tuun nodi kalo'an’. Baa oras nia, Ha'u atu ktuun kodi beran no ahar kabaas.d 28 Hanoin! Kalo tadak ne'e hotu-hotu dadi ti'an, foti ulun ona, tan Na'i Maromak oras sori emi, to'o mai ti'an.”
Lia hatetek nosi ai huun
29 Hotu, Yesus foti lia hatetek ida na'ak, “Ita hatadan di'a-di'ak baa ai huun sia.
Lukas 21:29-38
30 Kalo ai tahan nahuu nakmodok, nia foo tadak na'ak loro falin kre'is mai ona. 31 Nunia moos, loron susar nia sia. Kalo loron susar nia sia to'o mai ti'an, nia foo tadak na'ak, Na'i Maromak kre'is atu nabesi aan nodi kaer ukun ona.
32 Rona, tan Ha'ukaan dalen ne'e, tebes no loos! Ha'u katak kedan lia nune'e. Nosi ema hotu-hotu oras ne'e, balu sei la mate dauk, to'o loron susar nia sia mosu mai. 33 Masik lale'an no raiklaran lakon moos, Ha'ukaan lia fuan sia nafati nohuun.”
Hadi'a aan hein Yesus namaan aan mai
34 Hotu, Yesus dale natutan na'ak, “Sintidu, tan Ha'u atu kmosu mai teki-tekis! Keta to'o emi halu'a moris makonak, hotu hemu lanuk, hodi hafurak aan dei. Keta to'o emi la leno niakaan tadak, tan halau aan baa serwisu seluk. 35 Oras Ha'u kmai kikar, la noo ema ida moos bele nakfunin nosi Ha'u. 36 Dadi, sintidu nohuun. Hamulak bei-beik, nebee bele terus susar nia sia hotu-hotu. Kalo emi halo nunia, oras Ha'u, Ema Raiklaran Isin ne'e mai kikar, emi la moe hariik iha Ha'ukaan oin.”