Yesus nadi'ak nola ema ai kma'as ida
9
Nunia hotu, Yesus sia sa'e nikar bero atu baa Yesus Niakaan leo du'uk iha debu balu baa. 2 To'o nebaa, ema loi nodi siakaan maluk ai kma'as ida, mai baa Nia. Naree nunia, Yesus natene sia fiar na'ak Nia bele nadi'ak nola siakaan maluk nia. Hotu Yesus dale baa ema kma'as nia na'ak, “Oa! Makbiit neon. Ha'u kasu mohu okaan salan sia ti'an.”3 Baa oras nia, ema manorik ukun Yahudi na'in hira iha nia. Rona nola Yesus dale nunia, sia laran namanas kedas. Sia dale baa malu na'ak, “Ema ne'e naksakar aan liu resik! Na'i Maromak mesan mak bele kasu ema salan. Ema ne'e nahaat Na'i Maromak ti'an, tan nalo aan nu'u Na'i Maromak!”
4 Mais Yesus natene siakaan neon laran. Nia dale na'ak, “Tan saa emi haneo ha'ak Ha'u kahaat Na'i Maromak? 5-6 Ha'u ne'e, Ema Raiklaran Isin nosi lale'an. Kalo ha'u katak baa ema ne'e ka'ak, ‘Ha'u kasu mohu okaan salan sia ti'an’ emi la haree ha'ukaan beran. Mais, kalo Ha'u katak baa nia ka'ak, ‘madeer ona’ hotu nia nadeer kedas, emi bele haree du'uk no bele hatene du'uk Ha'ukaan beran atu kasu ema salan.”
Hotu Yesus naruka ema kma'as nia na'ak, “Madeer! Foti toba fatin, fila ona!”
7 Hotu ema kma'as nia nadeer kedas, la'o fila nikar. 8 Naree nunia, ema hotu-hotu blaar. Sia dale foti-nahaas Na'i Maromak naran na'ak, “Na'i Maromak maka'as liu resik to'o foo beran nune'e baa ema raiklaran.”
Yesus bolu nola Mateus atu tuir Nia
9 Hotu Yesus la'o baa fatin seluk. Iha nia, noo ema ida naran Mateus. Niakaan serwisu, sisi bea. Oras Yesus naree nia iha niakaan serwisu fatin, Yesus bolu nia na'ak, “Mai tuir Ha'u!” Rona nola nunia, Mateus moos nariik, tuir kedas Yesus.
10 Hotu Mateus sale Yesus sia mai naa iha niakaan uma. Nia moos sale niakaan mamaluk maksisi bea sia no bainaka seluk sia, nebee mai naa bele.
11 Mais ema na'in hira nosi partee Farisi mai nakusuk baa Yesus Niakaan maktuir sia na'ak, “Tan saa emikaan ulun tuur naa namutuk no ema folin lalek sia, nu'u maksisi bea no siakaan mamaluk aat sia?”a
12 Mais Yesus katak baa sia na'ak, “Ema moras, buka makdook. Mais ema isin di'ak, la buka makdook. 13 Di'ak liu emi fila baa leno di'a-di'ak Maromak Manfatin mak uluk mako'an Hosea nakerek na'ak,
‘Ha'u kakara nebee
Ha'ukaan ema sia nadomi malu no dodan malu.
Kalo sia la nalo nunia,
sera tunun mak sia nodi natetu baa Ha'u
la noo folin saa ida.’
Na'i Maromak katak tebes nunia. Tan lia nia, Ha'u la kmai kaliku ema mak filak aan ema loos ti'an. Ha'u kmai atu kaliku ema maksalan mak nakara buka moris loos.”b
Ema nusu tan saa Yesus Niakaan maktuir sia la nalirin aan
14 Baa oras nia, ema mak tuir Yohanis Mak Sarani Ema mai baa Yesus nodi nusu na'ak, “Ami mak tuir Yohanis halirin aan nanis. Ema Farisi sia moos nalirin aan. Mais, tan saa Ama Niakaan maktuir sia naa-nemu bei-beik? Sia la natene nalirin aan ka?”
15 Mais Yesus nataa nodi lia hatetek na'ak, “Nune'e. Oras dahur hola malu, bainaka sia la nalirin aan. Sia naa to'o bosu. Kalo sasudin mane sei iha nia, nanis sia hotu-hotu naa bele-bele. Mais, kalo dala ida, ema seluk kohi nodi sasudin mane nia, niakaan mamaluk sia noran susar. Baa oras nia, foin sia nalirin aan.
16 Kalo faru naksira, ita la hola tais foun rohan ida, hodi baban hikar baa faru tuan mak naklees nia. Tan kalo ita fasi, tais foun nia nanis nakru'u, nalo faru tuan nia hetak naklees.
17 Nunia moos, ita la salin tua foun baa knaban tuan. Tan knaban tuan nia atu naksira, hotu tua ween nanii mohu. Musti salin tua ween foun baa knaban foun, nebee metin di'a-di'ak!”c [Nodi nunia, Yesus nanorin na'ak Niakaan hanorin nia, hanorin foun. Keta kahur no hanorin tuan.]
Yesus nadi'ak nola feto ida mak moras raan naruk, no nalo lawarik feto ida moris nikar
18 Iha nia, noo ema uma hamulak ulun ida. Baa oras Yesus sei dale no Yohanis niakaan maktuir sia, nia mai nasoru Yesus. Nia nakni'a iha Yesus oin nodi nusu na'ak, “Ama! Tulun lai! Ha'ukaan oan feto foin mate. Ita Boot tulun rai liman baa nia, nebee bele moris nikar.”
19 Rona nola nunia, Yesus no Niakaan maktuir sia tuir kedas ema nia.
20-21 Iha dalan klaran, noo feto ida. Tinan sanulu resin rua ti'an, feto nia netan fulan la nanawa tuir loos. Nia moos la'o tuir Yesus sia nodi naneo na'ak, “Surak ha'u koko loos Yesus farun dei moos, ha'u kbele di'ak.” Tan nia, nia baa koko Yesus faru ninin.
22 Oras Yesus noran nola, Nia mana atu naree feto nia. Nia moos dale na'ak, “Bii! Makbiit okaan neon. Tan o fiar tebe-tebes baa Ha'u, o di'ak ti'an.” Baa oras nia moos, feto nia di'ak kedas.
23 Hotu Yesus sia la'o liu baa uma hamulak ulun uman. To'o nebaa, Nia tama baa naree ema tanis naro'an aan no ema nuu kfui, tuir siakaan adat ema maten. 24 Naree nunia, Yesus dale baa sia na'ak, “Hanawa tanis ona. Fila ona, tan lawarik ne'e la mate. Nia toba dei.” Rona Yesus dale nunia, sia nanasa nodi nakmulis ibun baa Nia.
25 Oras ema nia sia sai mohu ti'an, Yesus tama baa lawarik nia ke'an, hotu kaer baa liman. Lawarik nia moos moris nikar kedas. 26 Naree nola nunia, ema katak nasirin rai-rai nosi lia saa mak Yesus nalo ti'an nia.
Yesus nadi'ak nola ema matan delek na'in rua
27 Hotu Yesus la'o liu. Iha dalan klaran, noo ema matan delek na'in rua. Sia la'o tuir Yesus nodi nahii na'ak, “Na'i Daud husar-binan! Madomi ami lai!”
28 Hotu Yesus tama baa uma ida, ema matan delek na'in rua nia moos tuir mai. Hotu Yesus nusu sia na'ak, “Emi fiar tebe-tebes ha'ak Ha'u koo beran atu kalo emi bele haree ka?”
Sia moos nataa na'ak, “Aikee! Lia nia Ama lalika nusu ona.”
29 Rona nola nunia, Yesus koko siakaan matan nodi dale na'ak, “Kalo nunia, nebee dadi tuir emikaan fiar!” 30 Yesus dale notu nunia, sia moos bele naree kedas. Mais Yesus katak baa sia nodi maka'as na'ak, “Hanoin! Keta katak baa se-see nosi saa mak dadi ti'an ne'e!”
31 Mais sia la bele neti neon. Sia la'o nasirin rai nia nodi keke lema lia Yesus Niakaan hahalok nia.
Yesus nadi'ak nola ema nunuk ida
32 Delek na'in rua nia sai ti'an, ema nodi tenik ema ida seluk mai baa Yesus. Ema nia nunuk, tan diabu tekar. 33 Naree nola nunia, Yesus naruka diabu sai nela ema nia. Diabu sai ti'an, ema nia moos dale kedas. Hotu ema lear iha nia blaar karin na'ak, “Aikee! Ita ema Yahudi foin haree nune'e!”
34 Masik nunia moos, ema Farisi sia noran la di'ak. Hotu sia dale na'ak, “Diabu ulun mak foo beran baa Nia, foin Nia bele te'ur sai diabu.”d
Yesus dodan baa oras naree ema lear
35 Hotu Yesus la'o nasirin kota no leo wa'in, nodi nanorin iha uma hamulak sia. Nia nanorin ema nosi Na'i Maromak Manfatin Di'ak, no oin nunabee sia bele tama dadi baa Niakaan hutun-renu. Nia moos nadi'ak nola ema moras sia, no ema mak isin la di'ak sia hotu-hotu.e 36 Naree ema lear nia sia, Yesus dodan sia tan sia la natene atu nalo nunabee tenik. Sia hotu-hotu hanesan bibi malae mak la noo makbalin.f 37 Hotu Yesus dale baa Niakaan maktuir sia na'ak, “Ema lear ne'e, nu'u to'os isin. To'os isin wa'in ti'an, mais ema serwisu la to'o atu ku'u nola to'os isin nodi rai baa kanaha uman.g 38 Tan lia nia, emi musti husu baa To'os Na'in, nebee Nia solok ema serwisu atu baa libur nola Niakaan to'os isin.”