2 Baa oras nia, noo ema ida moras isin bubuk tuur iha nia. 3 Naree ema nia, Yesus nusu ema Farisi no matenek ukun mak tuir naa iha nia na'ak, “Tuir Bei Musa Ukun-badu, ita bele hadi'ak hola ema moras baa loron hamulak ka, lale?”

4 Mais la noo ema ida loke ibun. Hotu Yesus kaer ema moras nia. Ema nia moos di'ak kedas. Hotu, Yesus naruka nia fila. 5 Nunia hotu, Yesus nusu tenik baa ema nia sia na'ak, “Kalo lawarik monu baa wee knuuk kona baa loron hamulak, emi dada hasai nia ka, lale? Karau baka monu baa wee knuuk, emi habusik ka, dada hasai? Nanis emi dada hasai. Lia nia na'ak, emi serwisu ti'an kona baa loron hamulak!”^a

6 Rona Yesus dale nunia, la noo ema ida mak bele nataa.

7 Oras nia, Yesus naree ema mai iha uma nia. Sia wa'in boi tuur iha fatin oin. Naree nunia, Nia dale na'ak, 8 “Kalo ema nalo dahur hola malu, hotu namata emi mai, keta buka tuur iha ema boot fatin, tan keta to'o dahur na'in natuur ema mak boot liu emi. 9 Keta to'o nia dale baa emi na'ak, ‘Maluk, keta krakat! Tulun lori baa fatin kotuk lai, tan kadi'a fatin ne'e ti'an bodik ema boot sia.’ Hotu emi musti hariik hela fatin nia hodi moe, baa tuur iha kotuk baa. 10 Kalo ema namata mai dahur, tuur iha fatin kotuk dei. Oras dahur na'in titu-naree, nia atu mai na'ak, ‘Mai tuur iha oin baa.’ Hodi nunia, emi hetan kneter iha bainaka hotu-hotu oin.^b 11 Tan ema mak naksa'ek aan, Na'i Maromak nahonu nia. Mais ema mak nalo aan hanesan ema ki'ik, Na'i Maromak foti sa'e nia.”^c

12 Hotu, Yesus dale baa uma na'in na'ak, “Loron seluk, kalo halo dahur, keta hamata famili no ema maksoin dei, tan sia bele namata fila ama. 13 Mais kalo halo dahur, hamata ema mukit, ema ai asak, ema ai kma'as, no ema delek sia. 14 Nanis sia la bele namata selu ama. Mais kalo hamata sia, Na'i Maromak mak selu baa ama. Nosi ikus, oras Nia nalo ema mak fiar moris nikar, Nia la nalu'a okaan dadi'ak nia.”

15 Rona nola nunia, ema ida mak tuur naa-nemu no Yesus dale na'ak, “Ema mak sotir liu, ne'e mak, ema mak tuir naa-nemu bele-bele iha Na'i Maromak tofatik.”

16 Yesus nataa na'ak, “Noo lia ida nune'e: Ema ida nalo dahur boot nodi namata ema lear. 17 Dahur tetuk ti'an, nia naruka atan baa bolu ema mak kona hamata sia na'ak, ‘Mai ona, tan dahur atu nahuu ona.’ 18 Mais ema mak kona hamata nia sia, nase'i sohan oi-oik. Ida foo sohan na'ak, ‘Aikee! Ha'u kfoin sosa kola to'os, dadi musti baa karee kokon lai. Keta krakat, tan ha'u la kbele mai.’ 19 Seluk foo sohan na'ak, ‘Ha'u kfoin sosa kola karau baka sama rai, inan lima, aman lima. Ha'u kmusti baa matan sia. Ha'u kusu pardua oo!’ 20 Seluk tenik na'ak, ‘Ha'u kfoin kola feto, dadi la bele la'o kela.’

21 Rona sohan nia sia hotu, ata nia fila nasara baa na'in. Rona nola sohan nia sia, na'in krakat liu. Hotu nia naruka tenik ata na'ak, ‘Kalo nunia, sai lai-lais baa dalan boot no dalan inuk sia. Mamata mola ema mukit, ema ai asak, ema delek no ema ai kma'as sia.’ 22 Rona nola nunia, ata nia baa namata ema nia sia. Namata hotu, nia fila mai nasara na'ak, ‘Ama! Sia mai hotu ti'an, mais fatin mamuk sei wa'in.’

23 Hotu na'in naruka tenik na'ak, ‘Kalo nunia, o baa tenik to'o leo sikun hotu-hotu. Mamaus mola ema se-see dei modi mai. Surak nakonu nola fatin ne'e. 24 Rona! Ema mak dudu ha'ukaan hamata la bele noran dahur mamidar!’”

25 Nunia hotu, Yesus sia la'o liu baa Yerusalem. Ema wa'in moos tuir. Hotu Yesus se'i oin baa sia, nodi dale na'ak,

26 “Ema mak tebe-tebes nakara tuir Ha'u, nia musti beer Ha'u liu nosi sa-saa hotu-hotu: liu nosi inan-aman, liu nosi feen-oan, liu nosi maun-alin, no liu nosi isin lolon du'uk. Kalo lale, nia la fatan dadi baa Ha'ukaan maktuir.^d 27 Ema mak la no'uk natiu susar tan tuir Ha'u, nia la fatan dadi Ha'ukaan ema. Masik ema seluk nakara no'o nia moos, nia musti natiu nohuun.^e

28 Kalo hakara tuir Ha'u, haneo di'a-di'ak uluk lai, hanesan lia hatetek ne'e. Noo ema ida mak atu nariik uma boot. Nia naneo uluk folin to'o lotu-lotuk, keta-keta osan la to'o. 29 Kalo la haneo lotu-lotuk nunia, arumak nia foin nalo uma tatuur, osan mohu ti'an. Hotu ema nanasa namoe nia 30 na'ak, ‘Haree kokon ema nia lai! Nia foin nalo uma tatuur, la saa ida dauk, osan mohu ti'an.’

31 Ha'u kfoo lia hatetek ida tenik kodi lia hatuda. Noo na'in ida mak atu natuda. Nia musti tuur nodi sura uluk no niakaan mamaluk sia. Kalo nia noo sondadu rihun sanulu, takseer nia bele naloti funu rihun rua nulu ka, lale? 32 Kalo la bele, baa oras funu sei iha dook, di'ak liu nia solok kedan klosan baa babilan dame. 33 Nunia moos ema mak nakara tuir Ha'u. Nia musti sura di'a-di'ak lai, nebee natene nia bele la'o nela hotu-hotu ka, lale.”

34-35 Hotu Yesus natutan dalen nodi lia hatetek seluk tenik na'ak, “Masin noo folin, tan ita hodi hamidar haan. Mais kalo masin miis ti'an, folin saa? Ita la bele hodi hamidar haan tenik. Halo baa babudun moos, la bele. Ita foti soe dei! Hanono! Ema mak noo tilun, rona di'a-di'ak lia ne'e!”