Yohanis Mak Sarani Ema solok niakaan maktuir baa Yesus
11
Yesus solok notu Niakaan maktuir na'in sanulu resin rua nia, Nia baa nasirin leo iha rai nia atu nanorin ema nodi katak Na'i Maromak Manfatin Di'ak.2 Baa oras nia, Yohanis iha bui laran ti'an. Rona nola lia hotu-hotu mak Yesus nalo, Yohanis naruka niakaan maktuir baa nusu Yesus na'ak, 3 “Na'i Maromak nameno kedan hori uluk na'ak Nia atu solok Kristus mai nebee sori ita ema Yahudi. Ama ne'e mak Kristus ka? Lale, ami musti hein tenik ema seluk ka?” Rona nola Yohanis dale baa sia nunia, sia moos baa nusu Yesus.
4 Hotu Yesus nataa sia na'ak, “Fila baa, katak Mau Yohanis lia hotu-hotu mak emi rona no haree du'uk ti'an. Lia nia sia tuir saa mak Maromak mako'an Yesaya nakerek kedan na'ak:
5 Ema matan delek, bele titu-naree.
Ema ain asak, bele nariik la'o.
Ema moras funi mea, isin dadi moos.
Ema diuk, bele rona.
Ema maten, moris nikar.
Ema kiak, rona Manfatin Di'ak.a
6 Katak baa Mau Yohanis ha'ak nia atu netan sotir kalo fiar bei-beik baa Ha'u. Tan Na'i Maromak atu natuun matak-malirin baa ema mak la tali'ur Ha'u!”
7 Yesus dale notu nunia, Yohanis niakaan maktuir sia moos fila. Hotu Yesus dale no ema lear sia nosi lia Yohanis na'ak, “Baa oras emi baa buka Yohanis iha fatin fuik nia, emi haneo ha'ak emi atu hasoru ema raiklaran oin nunabee? Emi baa iha nebaa, nanis emi la buka hasoru ema mak mamar, hanesan au mak kakoen tuir anin nuu! 8 Emi baa iha nebaa, nanis emi la buka haree ema mak natais tais folin todan, tan ema oin nunia nein iha tofatik dei! 9 Dadi emi baa buka see iha nebaa? Emi baa buka Maromak mako'an ka? Tebes! Yohanis nia, mako'an maka'as tebes. 10 Noo hakerek kedan iha Hakerek Moon nosi lia Yohanis na'ak,
‘Rona! Ha'u ksolok Ha'ukaan ema
baa loke dalan bodik O.’b
11 Tan lia nia, rona di'a-di'ak! Ha'ukaan dalen ne'e, tebes no loos! Iha raiklaran la noo ema ida kois mak maka'as liu Yohanis. Mais iha Na'i Maromak fohorain, ema mak ikus basuk moos maka'as liu Yohanis. 12 Nahuu hori Yohanis nala'o niakaan serwisu to'o oras ne'e, noo ema mak sakar nebee ema la bele tama dadi baa Na'i Maromak eman. 13 Bei Musa no Maromak mako'an seluk sia nakerek kedan ti'an hori uluk nosi lia nia sia hotu-hotu.c 14 Sia nakerek na'ak Elia atu mai nikar. Fiar Ha'u! Yohanis nia mak Elia. Maromak mako'an sia katak kedan nosi niakaan mamain.d 15 See mak bele tolan lia ne'e, nanono di'a-di'ak.
16 Ha'u atu kfoo lia hatetek, nebee emi bele hatene emi ema raiklaran oras ne'e, oin nu'u saa. Emi nu'u lawarik oan mak na'in tu-tuur iha dalan, nodi nahii baa mamaluk sia na'ak,
17 ‘Hoi! Ami huu kfui bele-bele,
mais emi la ho'uk bidu hodi neon di'ak.
Ami hananu kananuk susar,
mais emi la ho'uk tanis.’
18 Emi ne'e hanesan lawarik oan mak nakara oi-oik. Baa oras Yohanis mai, nia nalirin aan no la nemu anggor ween. Mais emi ha'ak, ‘Diabu tekar nia’. 19 Oras ne'e, Ema Raiklaran Isin ne'e mai ti'an. Ha'u kemu anggor ween no la kalirin aan. Mais emi sei ha'ak, ‘Etuk oin, Nia ema rotus teen! Tua lanuk teen! Nadulur no ema maksisi bea! Partee ida no ema mak la noo folin!’ Mais emi lei haree Ha'ukaan dalen ne'e! Na'i Maromak Niakaan matenek nanis atu dadi malorek iha Niakaan eman moris.”
Ema mak la no'uk simu Yesus
20 Nunia hotu, Yesus nahuu de'an ema mak nein iha leo sia iha rai Galilea. Nia nase'i tadak blaar wa'in boot iha nebaa, mais sia la no'uk la'o nela siakaan salan no tuir Na'i Maromak dalan loos. 21 Yesus de'an na'ak, “Emi, ema Korasin no ema Betsaida sia, sintidu! Emi atu hetan dinu! Ha'u kase'i ti'an tadak blaar oi-oik iha emikaan oin, mais emi la ho'uk fiar baa Na'i Maromak. Tuir loos, emi ne'e ema Yahudi mak ha'ak hatene Na'i Maromak. Mais, kalo uluk aan ema kota Tirus no kota Sidon naree tadak blaar mak ha'u kase'i iha emikaan leo nia sia, sia nanis nalo neon aat nodi la'o nela siakaan salan atu tuir Na'i Maromak dalan loos. Sia moos nanis natais tais hene metan, nodi tau ahukresan baa ulun, atu dadi tadak na'ak siakaan neon monu baa siakaan salan. Mais tuir loos, ema Tirus no ema Sidon uluk nia, lahoos ema Yahudi. Sia la natene Na'i Maromak.e 22 Lei haree dei! Nosi ikus, oras Na'i Maromak natetu ema hotu-hotu siakaan moris, emikaan kastikar todan liu nosi ema Tirus no ema Sidon siakaan kastikar.
23 Emi, ema Kapernaum sia, sintidu! Keta hanoin ha'ak, Na'i Maromak atu foti sa'e emi natama baa lale'an. Lale! Na'i Maromak atu soe lerek emi tama baa naraka! Kalo tadak blaar sia mak Ha'u kase'i iha emikaan leo, dadi uluk ti'an iha kota Sodom, nanis Na'i Maromak la nadodok kota aat nia. Tan kalo ema Sodom naree tadak blaar nia sia, nanis sia la'o nela siakaan a'aat.f 24 Tebes! Lei haree dei! Nosi ikus, oras Na'i Maromak natetu ema hotu-hotu siakaan moris, emikaan kastikar todan liu sia!”g
Yesus tene ema atu tuir Nia, nebee dadi biit
25 Dale notu nunia, Yesus namulak baa Na'i Maromak na'ak, “Ama! Ita Boot mak Ulun Boot iha lale'an no raiklaran. Ha'u ksera dodan tan Ama subar lia nia sia nosi ema mak nafolin aan matenek no ema mak loko aan sia. Mais Ama loke lia nia sia bodik ema ki'ik no ema mak naraik aan sia. 26 Tebes Ama! Tan lia nia nalo Ama neon di'ak!”
27 Namulak notu nunia, Yesus katak baa ema iha nia sia na'ak, “Rona di'a-di'ak! Ha'ukaan Ama iha lale'an latan beran hotu-hotu baa Ha'u. Ha'ukaan Ama mesan dei mak natene di'a-di'ak Ha'u. Ha'u ne'e, Niakaan Oan. Ha'u mesan dei katene di'a-di'ak Nia. Mais Ha'u kboi ema atu katak nalore baa sia nosi Ha'ukaan Ama, nebee sia moos bele natene di'a-di'ak Nia.h
28 Emi hotu-hotu mak kole, mai tuir Ha'u! Emi hotu-hotu mak hatiu todan, mai baa Ha'u! 29 Simu Ha'ukaan hanorin no la'o hamutuk ho Ha'u, nebee ita rua ahan karau baka matan rua mak dada bele-bele ai suak ida. Hodi nunia, emi bele dadi biit hikar. Tan Ha'u laran di'ak. Ha'u neon kraik.i 30 Ha'ukaan hanorin, la susar. Ha'ukaan harukan, la todan.”