2 Mais hahalok nunia atu naksain, tan hotu-hotu mak sei nakfunin, atu naksain. 3 Rona! Saa mak emi dale subar, ema atu rona malorek. Saa mak emi hamaas iha ke'an, ema atu nahii iha ema lear oin.”^b

4 Hotu Yesus nanorin natutan na'ak, “Maluk sia! Lalika hata'uk kalo ema atu no'o emi. Masik sia no'o emi moos, sia la bele nahaat emikaan kmalar. 5 Ha'u atu katak baa emi, emi musti hata'uk see. Emi musti hata'uk Maromak, tan Nia mak bele no'o emi, hotu soe tama emi baa naraka. Tebes! Nia, mak emi musti hata'uk.

6 Haneo kokon! Manu harek folin hira? Folin kmaan basuk! Matan lima, foin osan lahon rua. Masik nunia moos, Na'i Maromak la nalu'a matan ida no. 7 Nia nanis tau neon baa emi liu tan manu harek nia sia. Nia natene malorek fuuk lahon hira iha emikaan ulun. Keta hata'uk, tan Na'i Maromak nafoli emi, liu tan manu harek nia sia.”

8 Hotu Yesus dale tenik baa Niakaan maktuir sia na'ak, “Rona di'a-di'ak! Kalo ema raiklaran temi Ha'u iha ema lear oin na'ak ‘Ha'u ne'e, Yesus eman,’ Ha'u moos temi ema nia iha Maromak Niakaan makbukar lale'an sia oin ka'ak, ‘Nia, Ha'ukaan ema.’ 9 Mais kalo ema dale iha ema raiklaran oin na'ak, ‘Ha'u la katene Yesus,’ Ha'u moos dale iha makbukar lale'an sia oin ka'ak, ‘Ha'u la katene ema nia.’

10 Ha'u ne'e, Ema Raiklaran Isin kosi lale'an. Kalo ema dale nadois Ha'ukaan naran, Na'i Maromak sei kasu niakaan salan nia. Mais kalo dale nadois Kmalar Lulik naran, Na'i Maromak la nalu'a kedan sala nia.^c

11 Kalo ema nodi emi baa moon-metan, lale, nodi emi baa ema makaer ukun, tan emi fiar Ha'u, emi lalika hata'uk atu haloos aan nunabee. 12 Tan baa oras nia moos, Kmalar Lulik atu nanorin emi lia fuan makonak atu hodi hataa sia.”^d

13 Nunia hotu, ema ida nosi ema lear nia nusu Yesus na'ak, “Ama Boot! Tulun maruka ha'ukaan maun nebee nia fa'e foo baa ha'u, amikaan aman bein sasoin.”

14 Mais Yesus nataa na'ak, “Hoi! See foti Ha'u kdadi makotu lia baa emi rua?”

15 Hotu Yesus dale baa ema lear nia na'ak, “Sintidu! Keta rotus! Tan naha wa'in la foo moris manek.”

16 Hotu Yesus dale lia hatetek ida na'ak, “Noo ema maksoin ida. Niakaan to'os nasai isin wa'in. 17 Kanaha uman sia naksetik ti'an, to'o nia la natene atu nalo nunabee tenik. 18 Nia naneo na'ak, ‘Di'ak liu, ha'u kalo nune'e! Ha'u ksobu kahaat kanaha uman tuan ne'e, kariik seluk kanaha uman boot kaliuk, nebee rai to'os isin no naha seluk hotu-hotu baa. 19 Kariik ti'an, ha'u kdale du'uk ka'ak, “Kanaha uman boot nakonu ti'an. Haan naresin ti'an, hemun naresin ti'an. Ha'u kaa-kemu kamidar aan kodi kakoen ain dei nosi tinan baa tinan.’” 20 Hanoin! Masik ema nia naneo nunia moos, Na'i Maromak atu katak baa nia na'ak, ‘Hoi, beik! Ohin kalan ne'e moos, o mate. Hotu, see mak netan okaan kanaha uman isin hotu-hotu?’

21 Rona di'a-di'ak! Ema bele libur sasoin lear iha raiklaran ne'e, bodik isin lolon. Mais iha Na'i Maromak oin, sia mukit teen.”

22 Hotu, Yesus nanorin tenik Niakaan maktuir sia na'ak, “Emi keta haneo baa emikaan moris loron-loron ha'ak, ‘Ha'u atu kaa saa? Atu ktau saa?’ 23 Tan emikaan moris folin liu nosi saa mak emi haa, no saa mak emi tau. 24 Haree kokon baa kawaa sia! Sia la furi, la ku'u, la noo kanaha uman atu rai haan baa. Mais Na'i Maromak naliku sia. Nia moos nanis naliku emi. Tan Nia nafoli emi liu nosi manu ai leten sia. 25 Kalo ema nariik iha lalenok oin, nalau aan no isin lolon, nia bele nalo isin hetak aas ka? La bele! 26 Kalo emi la bele halo lia ki'ik nunia, tan saa haneo baa lia boot?

27 Haree kokon baa ai funan fuik sia. Sia la serwisu to'os. Sia la soru tais. Mais siakaan kabaas, liu nosi Na'i Soleman niakaan tais kabaas.^e 28 Na'i Maromak naliku ai funan fuik mak la noo folin. Ohin loron sia moris, awan mate, hotu ema soe baa ha'i. Kalo nunia, Na'i Maromak moos nanis naliku emi, mak hoo folin liu tan ai funan fuik nia sia. Tan saa emi la haloon tebe-tebes baa Nia? 29 Keta haneo baa lia haa-hemu. Tan Na'i Maromak mak nahulin. 30 Ema mak la naloon baa Nia, sia susi ruin baa lia nia sia. Mais emi keta nunia, tan emikaan Ama iha lale'an natene hotu-hotu mak emi buka. 31 Emi musti hala'ok uluk Niakaan serwisu, foin Nia nahulin lia ne'e sia bodik emi.”

32 Hotu Yesus natutan tenik na'ak, “Emi hanesan bibi malae klibur ki'ik ida mak biit lalek. Mais keta hata'uk, tan emikaan Ama iha lale'an, Na'i Boot. Saa mak Niakaan, Nia nakara foo baa oan sia.

33 Tan lia nia, baa fa'an lakon emikaan sasoin sia, hotu fa'e osan baa ema mukit sia. Hodi nunia, emi rai sasoin iha lale'an. Lale'an, fatin manek. Ema na'ok la bele tama. He'as moos la bele tota nahaat. 34 Emi rai sasoin iha nabee, emikaan neon moos iha nebaa.”

35-36 Nunia hotu, Yesus dale tenik na'ak, “Emi musti hadi'a aan loron-kalan atu hein Ema Raiklaran Isin mai nikar. Lia nia hanesan ema makdaka uma sia nein uma na'in fila mai nosi dahur. Kalo uma na'in to'o mai, hotu deku odamatan, makdaka sia musti loke lai-lais.^f 37 Kalo uma na'in naree sia daka nunia, sia nanis sotir, tan uma na'in atu natudu laran di'ak baa sia. Rona, tan Ha'ukaan dalen ne'e, tebes no loos! Uma na'in nia atu nalo aan nu'u ata, hotu naliku sia nodi haan midar. 38 Sia sotir tan sia naliku siakaan ulun di'a-di'ak. Masik ulun mai baa tuku hira, baa kalan boot ka, kre'is rai naroma ka, sia nadi'a aan bei-beik.

39 Hanoin di'a-di'ak! Kalo uma na'in natene tuku hira ema na'ok atu mai, nia la foo leet baa na'ok sobu uma. 40 Mais tan la noo ema ida mak natene wainhira Ema Raiklaran Isin atu mai nikar, emi musti hadi'a aan loron-kalan.”^g

41 Hotu Petrus nusu Yesus na'ak, “Ama Boot! Lia hatetek mak Ama hanorin ohin nia, kona ami mesan ka, kona no ema hotu-hotu?” 42-44 Yesus nataa na'ak, “Lia hatetek nia kona baa ema hotu-hotu mak natene serwisu moon bodik ulun. Nosi ikus, ulun atu foti nia, nebee nia fa'e haan bodik ema seluk sia. Masik ulun mai wainhira moos, ema mak madinas, nia nalo tuir ulun beer nohuun. Nia sotir, tan ulun atu foti nia nebee naliku ulun sasoin hotu-hotu.

45 Mais dinu atu kona baa ema serwisu mak naneo na'ak, ‘Katuas sei kleur foin mai nikar.’ Hotu ema nia nahuu ta'e ema serwisu seluk sia, feto-mane. Hotu nia tuur naa-nemu nafurak aan to'o lanu. 46 Mais baa loron ida, oras ema nia la naneo falik, teki-tekis ulun to'o mai. Naree nunia, ulun atu ta'e ema nia, hotu nabu'a sai nia, nebee netan kastikar iha luan, bele-bele no ema seluk mak la tuir ulun beer.

47 Ema serwisu mak natene ulun beer, mais la nadi'a aan tuir, lale, la no'uk tuir, ema nia kona kastikar todan. 48 Mais, ema serwisu mak serwisu la makonak tan nia la natene ulun beer, ema nia kona kastikar kmaan. Tan ema mak netan wa'in, niakaan hataa moos wa'in. Ema mak simu boot, niakaan hataa moos boot.”

49 Hotu Yesus natutan na'ak, “Ha'u kmai kodi ha'i baa raiklaran. Ha'u kakara nebee ha'i nia laka iha fatin hotu-hotu. 50 Mais Ha'u kmusti katiu uluk susar todan lai, to'o oras mohu.^h 51 Emi haneo, Ha'u kmai kodi dame baa raiklaran ka? Lale! Ha'u kmai atu kalo ema nakaat malu no toe malu, to'o fa'e karin malu tan Ha'ukaan hanorin. 52 Nahuu oras ne'e, ema mak famili malu sia, fa'e karin malu. Tolu sakar rua, rua sakar tolu.

54 Hotu Yesus dale kedas no ema lear nia na'ak, “Kalo ita haree kalo'an ma'ar mosu iha loromonu, ita hatadan ha'ak, ‘Udan atu tuun.’ Tebes. 55 Kalo anin lorokbelan nuu, ita hatadan ha'ak, ‘Loro makas to'o mai.’ Tebes. 56 Mais emi ne'e, liu resik ti'an! Tan saa emi hatene leno tadak nosi raiklaran, mais la hatene leno tadak nosi Na'i Maromak?”

57-58 Hotu Yesus dale tu'an na'ak, “Kalo emi halo lia, tan saa emi la bele hakotu du'uk! Di'ak liu, babilan dame malu. Keta to'o makotu lia oin, hotu nia nakotu atu natama emi baa bui. 59 Kalo nunia ti'an, emi la bele sai ona, da-dau to'o emi selu mohu osan tate mak makotu lia fake baa emi.”