2 Iha nia noo ema nosi partee Farisi na'in hira. Sia mak kaer metin siakaan adat Yahudi. Oras sia naree maktuir sia ku'u hare gandum, sia nasee Yesus na'ak, “Tan saa okaan maktuir sia nakur itakaan ukun-badu? Maree! Sia ku'u ti'an. Ne'e na'ak, sia serwisu baa loron hanawa serwisu! La bele nunia!”^a

3-4 Mais Yesus nataa na'ak, “Nu'unabee? Emi la hanoin Bei Daud lian uluk nia ka? Oras nia, Bei Daud no niakaan ema sia salaen. Sia tama baa Batane Hamulak, nola tubi mak na'ilulik sia sera ti'an baa Na'i Maromak. Hotu sia naa. Tuir loos, na'ilulik sia mesan mak bele naa tubi nia. Ema seluk la bele. Mais oras Bei Daud sia naa, la noo ema ida nasalak sia. Emi la leno Na'i Maromak Hakerek Moon ka?^b

5 Rona mai! Ha'u ne'e, Ema Raiklaran Isin. Ha'u mak koo beran atu karuka saa mak ema raiklaran bele nalo baa loron hanawa serwisu.”

6 Baa loron hanawa serwisu seluk, Yesus baa nanorin iha uma hamulak. Iha nia, noo mane ida mak liman sorin matek. 7 Iha nia moos noo ema manorik ukun Yahudi no ema partee Farisi na'in hira. Sia mai buka leet atu nahonu Yesus. Sia nein keta arumak Yesus nadi'ak nola ema liman matek nia natoon baa loron hanawa serwisu. Hodi nunia, sia bele tula sala baa Nia iha ema oin. 8 Mais Yesus natene siakaan neon aat. Tan lia nia, Nia bolu liman matek nia na'ak, “Mau! Mai klaran ne'e!” Liman matek nia moos baa kedas. 9 Hotu Yesus nusu baa ema hotu-hotu iha nia na'ak, “Ha'u kusu kokon emi. Tuir itakaan ukun-badu, ita bele halo saa baa loron hanawa serwisu? Ita halo di'ak ka, halo aat? Ita sori ema ka, ita ho'o ema?” 10 Hotu Yesus titu satan leur sia nodi katak baa liman matek na'ak, “Lolo o liman mai!” Nia lolo baa, liman di'ak kedas.

11 Naree nunia, ema mak funu Yesus krakat. Hotu sia buka dalan aat na'ak, “Ita buka seluk leet atu hahonu Nia!”

12 La kleur, Yesus baa foho ida atu namulak. Nia namulak iha nebaa kalan ida tomak. 13 Baa awan seisawan, Nia bolu ema mak tuir Nia hotu-hotu. Hotu, Nia boi nola ema na'in sanulu resin rua, nalo baa klosan. Klosan nia sia, naran mak ne'e:

17 Nunia hotu, Yesus no Niakaan maktuir sia tuun nosi foho, baa rai fehan ida. Ema wa'in naklibur iha nia ti'an. Sia mai nosi rai Yudea, nosi kota Yerusalem, nosi kota Tirus no kota Sidon mak iha tasi tehen.

18 Sia mai rona Yesus no nusu Nia nebee nadi'ak nola ema moras sia. Hotu, Nia nadi'ak nola sia. Nia moos nadi'ak nola ema diabu tekar, nodi te'ur nasai diabu nosi ema nia sia. 19 Ema hotu-hotu nakara koko Nia, tan kalo koko kona Nia, Niakaan beran sai nadi'ak nola sia.

20 Hotu Yesus se'i oin baa Niakaan maktuir sia, nodi nanorin na'ak:

Kalo ema nasusar emi nunia, neon boot baa dei! Lalika blaar, tan ema mak nasusar emi baa oras ne'e, uluk siakaan bei uluk du'uk mak nasusar Maromak mako'an sia.

27 Hotu Yesus natutan liu na'ak, “Rona mai! Ita musti hadomi funu no halo di'ak baa ema mak hirus ita. 28 Ita musti hamulak husu Na'i Maromak nalo di'ak bodik ema mak tolak nahaat ita. 29 Kalo ema basa itakaan hasan sorin, foo tenik sorin baa. Kalo ema nadau nola itakaan faru klobor, foo tenik faru baa. 30 Kalo ema nusu buat ida, foo baa. Kalo ema foti nodi buat ida, habusik nola baa. Keta baa husu hikar. 31 Ita musti halo baa ema seluk, nu'u ita hakara ema nalo baa ita.^f

32 Ita hadomi itakaan ema du'uk. Kona. Mais ita hetan saa? Tan ema aat sia moos nadomi siakaan ema du'uk. 33 Kalo ita halo di'ak baa ema mak nalo di'ak baa ita, ita hetan saa? Tan ema aat sia moos nalo di'ak baa malu. 34 Kalo ita foo tusan osan baa ema mak bele selu nikar, ita hetan saa? Tan ema aat sia moos foo tusan, surak awan-wainrua sia simu nikar tomak.

35 Lia nune'e: Hadomi funu! Halo di'ak baa sia. Saa mak sia buka, foo baa. Lalika haneo, sia atu foo nikar ka, lale. Hodi nunia, Na'i Maromak selu baa ita. Ita moos dadi oan baa Maromak Mak Aas Kaliuk, tan ita moris hanesan itakaan Ama. Nia nalo di'ak baa ema aat sia. Nia moos nalo di'ak baa ema mak la natene dodan sia. 36 Tan lia nia, ita musti hadomi ema, hanesan itakaan Ama iha lale'an nadomi ita.”

37 Hotu Yesus nanorin natutan na'ak, “Keta sukat ema, nebee ema keta sukat fila emi. Keta hasalak ema, tan sia atu nasalak nikar emi. Halu'a lakon ema salan, nebee sia nalu'a lakon emikaan salan.

38 Kalo foo baa ema saa mak sia buka, emi simu hikar nakonu babu'un. Hanesan ema namamu fore baa fatik sasukat, hotu doko, tonan tuun, nahisi tenik to'o nakduar sai. Mak emi atu simu, oin nunia. Kalo emi foo oan ida, emi simu fila oan ida. Kalo emi foo wa'in, emi simu fila wa'in.”

39 Hotu Yesus nanorin nodi lia hatetek na'ak, “Ema delek la bele nadaek ema delek. Tan sia rua monu baa kuak bele-bele!^g 40 Lawarik sakola la bele liu nosi niakaan manorik. Mais kalo nia tuir hanorin di'a-di'ak, nia bele dadi manesak no niakaan manorik nia.^h

41 Emi hakara hatadan ema salan ki'ik. Mais emikaan salan boot, emi halo aan, la noo sala. Hahalok nia nu'u emi haliku ahukresan lotun ida iha ema matan. Mais emi la horan noo ai rohan boot neli emikaan matan. 42 Nu'unabee emi haksakar aan ha'ak, ‘Belu! Mai nebee ha'u kasai ahukresan nia nosi okaan matan.’ Mais emi du'uk la bele haree sa-saa, tan noo ai rohan boot neli emikaan matan! Etuk oin! Emi huun oin kotuk! Masai ai rohan boot nia nosi okaan matan lai, foin bele masai ahukresan lotun nia nosi okaan belun matan.”

43 Hotu Yesus nanorin soruk na'ak, “Ai huun di'ak la nafua aat. Ai huun aat, la nafua di'ak. 44 Ita bele hatene ai huun hosi fuan. Ita la bele ku'u dila fuan, lale, anggor fuan, hosi ai tarak.^{i j} 45 Nunia moos ema di'ak, nalo lia di'ak. Ema aat, nalo lia aat. Tan itakaan dalen, natudu itakaan neon ain.”^k

46 Hotu Yesus natutan tenik na'ak, “Loron-kalan emi bolu Ha'u ha'ak, ‘Na'i’. Mais, tan saa emi la halo tuir Ha'ukaan dalenn? 47 Ema mak mai nanono Ha'u, hotu nalo tuir Ha'ukaan dalen, ema nia hanesan 48 ema mak nakara nariik uma mak biit. Nia ke'e di'a-di'ak rai kuak tatuur iha rai isin, to'o kona fatuk. Hotu nia nalo tatuur baa fatuk leten, foin nariik uma. Kalo motasa'e kona, uma nia la nawae, tan noo tatuur biit. 49 Mais ema mak rona nodi neon baluk no la tuir Ha'ukaan dalen, ema nia hanesan ema mak nakara nariik uma, surak nariik dei. Nia la nalo tatuur, mais nariik uma baa rai fohon mota tehen. Hotu motasa'e mai, naro'on nola uma nia!”