“Manori-mafada ami huhule-haradoi'”
11
Lai' esa de Yesus neu hule-haradoi. Ana hule-haradoi basa, boe ma ana mana tuka dean esa mai hule Ni nae, “Ramatua'! Yohanis Mana Sarani' nanori-nafada ana mana tuka dea nara, de ara hule-haradoi ralela'. Ami hule Ramatua' a manori-mafada ami huhule-haradoi' dei!”2 Boe ma Yesus nafada si nae, “Malole! Hule-haradoi sona mae leo' ia:
Ou, Ama'! Nade ma malalao-malalafu'.
Ela leo' bea na basa lahenda ra io-oa Ama' a nade marela-masa'am.
Ela leo' bea na Ama' a dadi Mane' fee basa lahenda ra.
3 Ama', bati-pala fee ami nanaa-nininu' namano'u-namadai' tuka-tuka fai'.
4 Ma fee ampon neu' ami sala-sikom,
sama leo' ami boe fee ampon neu' lahenda fo rasala ro ami.
Ama', manea ami fo ela ami boso' tao sala'.”
5-6 Boe ma Yesus nanori-nafada tamba si la'e-neu' huhule-haradoi'. Ana pake dedea nasasama' nae, “Uni' ko leo fatilada na tia-lai esa neme doo' a mai, hule fo suku neu' o uma ma. Tehuu ta manuu hata-hata esa boe', fo fee ni naa. Boe ma o leo tia-lai feke ma uma na muu, de maloo meme dea' mai mae, ‘A'a! Fee lalai au roti balo' telu dei! Huu fo fui nai au uma ka, tehuu ami ta manuu hata esa boe'! A'a, fali ma au dei! Noi balo' telu' a! Au dei kati!’
7 Bate neu' ko tiam ria nataa nae, ‘A'a ka boe na! Lahenda suku-so'o, tehuu a'a ka oda fafae-fafae' a! Lelesu ra mana koe naisa'! Ana' ara suku ramanee so. A'a, boso' mamanasa'! Fai feke' dei!’
8 Mafarerene' matalolole. Leo mae lahenda ria ta foa fo fee o, huu no o nana ria tia-lain, tehuu kalu o hule maroo, tantu ana foa fo fee.
9 Leo' naa boe, huhule-haradoi' a.
Hule maroo neu' Manetualain;
neu' ko Ana fee.
Saka maroo;
neu' ko Ana natudu eno'.
Maloo maroo;
neu' ko Ana soi lelesu a.
10 Basa lahenda fo hule raroo neu' Manetualain, neu' ko sipo. Bea saka naroo, neu' ko hapu. Bea naloo naroo, neu' ko Ana soi lelesu a. 11 Soba emi afi! Hapun nai bea, ana' a hule ika', sona papa na feen meke? 12 Do, kalu ana' a hule manutolo', sona feen ura'? Ta leo naa', hete? 13 Lahenda dae-bafo' a mema' tadalu'. Tehuu emi Papa ma nai nusatetu-ikutema' a, mema' tebe-tebe malole a. De kalu lahenda dae-bafo' tadalu' rupa' emi a, fee ana mara hata malole, sona Papa lena ria bali! Ana ta fee noi hata fo emi parluu, tehuu lena neme naa' mai, Ana fee Ria Dula-dale Malalao-malalafu Na neu' lahenda fo hule Ni a.”
Ramatua Yesus ta pake malaka nitu a kuasan
14 Lai' esa de, Yesus usi heni nitu neme lahenda pakanaa' esa mai. Boe ma lahenda ria mulai dedea selu'. Lahenda fo rai naa ara heran. 15 Tehuu ruma rae, “Tebe so te, Ana bisa usi nitu! Huu fo Ana hapu kuasa neme nitu ra malaka na, ri' Balsebul.”a
16 Lahenda feke' ara nau soba Yesus. Boe ma ara hule fo Ana tao tanda heran esa bali ela natudu si nae, Ria kuasa Na neme Manetualain mai.b
17 Tehuu Yesus bubulu' sira dudu'a-aafi tadalu nara. Boe ma Ana dedea nae, “Kalu nai nusa' esa dale' anaraun ara ratati ao, tantu nusa' ria nasosopu'. Leo' naa boe, kalu nai uma esa dale' uma isi nara esa no esa rarui ao, tantu uma ria dale' esa ta neu esa dale' boe'. 18 De kalu nitu a usi selu' nitu, sona sira malaka na ta bisa homu pareta namanoso! De emi mae Au usi nitu pake nitu a kuasa na, sona ta la'e fa! 19 Mafarerene'! Emi lahenda mara boe usi ralela' nitu, tehuu ta pake nitu a kuasa na fa. De emi boso' dedea mafarara'u mae, Au usi nitu pake nitu a kuasa na. De emi sale Au, tehuu neu' ko emi lahenda mara si' raetu' rae, emi ri' sala. 20 Kalu tetebes ara Au usi nitu pake Manetualain kuasa Na, ria natudu nae, Manetualain pareta Na nai dae-bafo' a nanenea' so.
21 Kalu lahenda bara'ai-ina' esa pake tee-tafa', fo nanea neni' uma na, tantu ta mopo hata-heto nara. 22 Tehuu kalu lahenda esa bara'ai na lena ria, mai suu ni boe ma nasekin, sona roso reni lahenda ria tee-tafa nara. Ma huru reni hata-heto nara fo reu babati fee ana mana tuka dea nara. Doo-naru basa ia lahenda bara'ai-ina' masososa' ria tai-namahena neu' ria tee-tafa nara. Tehuu besa' ia ana ta bisa tai-namahena tee-tafa' sira so'.c
23 Mafarerene' matalolole! Lahenda bea ta ei' esa no Au, sona ria nana Au musu-noo Ki. Ma lahenda bea ta tulu-fali Au nai nonoi-tatao Ka, ria nana tao noi kaco.”d
Nitu a fali selu' leo mamana paraa na neu
24 Yesus dedea tamba selu' nae, “Kalu ita usi heni nitu a neme lahenda esa mai, sona ana leo mamana lino-nees neu saka mamana hahae'. Huu no ana ta hapu mamana' fo naraa, boe ma ana afi nae, ‘Ta hapu mamana' fa leo' ia, de malole lena' au fali uu leo selu' nai maulu na lahenda ria a.’ 25 Boe ma ana fali selu', te nita mamana' ria, mana kakai makamoi' ma mana ator natalolole'. 26 Nitu ria neu naloo na nonoon hitu fo ri' makaresi lena neme ria mai bali. Basa si reu leo nai lahenda ria, de ara ese-rumu ni. Besa' ia lahenda ria masoda na soe lena bali.”
Maua-manale bau-ina'
27 Yesus bei dedea no lahenda kadodou-ina' sira, te ina' esa nai naa naloo nae, “O mama Ma naua-nanale bau-ina, huu fo ana boki ma anutu na O!”
28 Yesus nataa nae, “Tebe, mama! Tehuu maua-manale bau-ina' lena ria bali, nana lahenda fo namanene Manetualain Hara-dasin, ma tao tukan!”
Lahenda ra hule Ramatua Yesus natudu buti!
29 Fai ria Yesus bei dedea, nana lahenda dodou' rarurupu eo ra Ni. Boe ma Ana dedea nae, “Lahenda besa' ia ra, ralela' noi tatao tadalu'. Ara hule kokosen Au atudu si tanda heran, ela ara bubulu' Au nana tebe Manetualain lahendan. Sekonaa te fai a ulu na Manetualain natudu si tanda heran, pake mana nesi matan Yunus. Ria dai so! 30 Fai a ulu na Yunus nafada kota Niniwe lahenda nara nae, saledale-tu'etei mara dei. De fai a ulu na hata fo dadi neu' Yunus, dadi tanda soa-neu' asa nae, Manetualain ri' nadenu ni. Leo' naa boe neu' Lahenda Dae-bafo' Tetea'. Au mai afada emi fo muste saledale-tu'etei mara. Hata fo dadi neu' Au, neu' ko dadi tanda soa-neu' lahenda besa' ia ra nae, tebe Manetualain nadenu Au.e
31 Neu' ko losa dae-bafo' a nonoe na, kalu Manetualain dadi Mana Ee Dedea', neu' ko ina mane' neme ona mai, ana nasoda selu' fo dadi sakasii. Ana tutudu lima na, sale emi basa fo ri' masoda nai besa' ia nae, ‘Emi basa pakanaa'!’ Huu fo fai a ulu na, ina mane' ria neme dae doo' mai ela nita mata' mane' Soleman malela na. Sekonaa te, besa' ia Lahenda esa nai emi talada kahere' lena mane' Soleman. Tehuu emi ta tao dale' neu' Ana!f
32 Ma ta noi mesa' ana! Neu' ko lahenda reme Niniwe mai boe, ara sale mata-mata emi fo ri' masoda besa' ia rae, ‘Emi pakanaa'!’ Ara rae leo' naa, nana huu tepo' fo Yunus neu nafada si Manetualain hihii-nanaun, boe ma ara saledale-tu'etei nara. Sekonaa te, besa' ia Lahenda fo kahere' lena Yunus nai emi talada, tehuu emi ta saledale-tu'etei mara!”g
Masoda makaledo'
33 Yesus tuti selu' dedea Na nae, “Lahenda dede na dedede ana' a, basa nana fua ni neu' mamana madema, ela nahaa nai kama ria dale' soa-neu' basa lahenda fo kodi naa' reu a. Ta hapu lahenda dede na dedede' a, sona tatana etu ni neni' lapaneu, do nafuni naisa' ana.h Ria sosoa-raraan ta'a!i 34 Emi mata mara boe sama leo' dedede'. Ana nahaa-nakaledo nai emi dale mara. Kalu mata' a maiu', sona lahenda mete basa-basan neni' dale tadalu'. Tehuu kalu mata' a makaledo', sona lahenda mete basa-basan neni' dale malole. 35 Afi ela makaledo' fo nai emi dale mara a, nahaa naan seli, sama leo' ledo a. Makaledo' fo nai emi dale mara a, boso' sama leo' bula' a haa na, noi nasararaa' a. 36 Kalu emi dale mara makaledo', losa' ta hapu lela ana' esa maiu' boe', tantu katema' emi masoda ma boe makaledo' a, sama leo' dedede bau-ina' a nahaa soa-neu' emi masoda ma.”
Ramatua Yesus nasa'ai lahenda Yahudi ra malaka agama nara
37 Yesus dedea basa, boe ma lahenda agama Farisi esa, hule Ni neu naa-ninu nai uma na. Losa naa, boe ma Yesus kodi leo uma dale' neu de natuu' nai mei nanaa' a. 38 Tehuu manuu uma' a heran, nita Yesus naa-ninu ta safe naulu' lima Na, tuka lahenda Farisi ra atoran.
39 Yesus nafada ni nae, “Emi lahenda Farisi ra kahere'! Emi homu mahere atoran agama ma! Emi mafarerene' safe noi bika-galaas ara dea nara losa' makadila' a, tehuu ta mafarene fo makamomoi emi dale makekeo-makakanum fo ri' tadalu' ma mana tendetuu'. 40 Koa-pakanaa', emin! Boso' mafarene henin. Manetualain adu na poo' dea, ma poo' dale boe. 41 Tehuu malole lena', emi fee lahenda kasian ara neme hata-nuum mai, ela emi bisa makamoi' nai Manetualain mata Na.
42 Lahenda Farisi emin! Neu' ko emi hapu soe! La'e-neu' fee Manetualain babati' esa neme babati' sanahulu, emi bareken basa-basan, aana-bauina'. Losa leo bumbu aana' neme oka-tine mara mai boe, emi bareken mamate'! Tehuu emi ta tao dale' neu' hihii-nanau' penting. Emi mafarene heni la'e-neu' sue-lai Manetualain, ma hihii-nanau' fo ri' beibebera'! Tebe ita muste fee taroo Manetualain nuu babati na, tehuu boso' mafarene heni hihii-nanau'penting.j
43 Neu' ko emi hapu soe! Huu no emi mahii' saka mamana malole ina' nai uma mamaso' dale, ma mahii' saka hada-horomata nai mamana' lahenda dodou'.
44 Neu' ko emi hapu soe! Huu no emi sama leo' rates mana lutu taa'. Lahenda la'o resi' naa, tehuu ara ta bubulu' rates nai naa, nana huu dae fo nai rates lain makamoi', tehuu nai dale' naboo puru. Sekonaa te tuka ita hadas na, lahenda fo molo neu' rates a sona tao nakekeo ria ao-ina na, de ta naraa maso' leo uma mamaso' dale' neu. Emi lahenda Farisi ra sama leo' rates ria! Nai dea mara sona nonoo' nae emi makamoi' naan seli. Tehuu nai emi dale mara henu' no hihii-nanau' maboo puru'.
45 Lahenda malela atoran agama Yahudi esa nai naa, ana naraufako Yesus dedea na nae, “Papa Mesen! Bisinaa' a Papa dedeam sira, li'u la'e ami boe!”
46 Yesus sipo' ana nae, “Tebe! Emi lahenda malela atoran agama Yahudi ra, emi hapu soe! Emi ta tulu-fali lahenda, ma tao mamakafa sira bera-baun, tehuu emi tao masususa' asa meni' atoran agama mabera. Ma fee lahenda lepa emi atoran rupa mara. Tehuu emi ta lepa soba bera-bau' ria meni' lima u'u esa boe'!
47 Neu' ko emi hapu soe! Huu no emi masapute lutu rates fee Manetualain mana nesi mata fai ulu nara, fo fee hada' neu' asa. Sekonaa te, emi bei-ba'i mara si' raisa mana nesi mata sira! 48 Emi boe ei' esa mo bei-ba'im sira. Ara ta sipo' Manetualain mana nesi mata nara, ma raisa si. Emi lutu rates fee mana nesi mata sira, fo dadi tanda nae, emi sipo' bei-ba'im sira no malole. 49 Huu ria naa, Manetualain fo ri' bubulu' basa-basan a, parnaa nafada nae, ‘Neu' ko Au adenu mana nesi mata kara, ma lahenda nadedenu feke' ara leo lahenda Israel ara reu. Lahenda Israel ara ese-rumu ramimina' ruma, ma raisa ruma.’
50-51 Lahenda fo rasoda nai besa' ia, muste lepa ra natataa' neme lahenda fo raisa Manetualain mana nesi mata nara. Reke ni neme Manetualain adu na dae-bafo' a, mulai neme Habel mamate na, losa mate'e na, Sakaria. Ara raisa Sakaria nai mei tutunu-hohotu' a no Kama Malalao-malalafu' a talada, nai Manetualain Uma Mamaso Yahudi Ina Na dale'. Emi boe lepa ma sira huhuku na!k
52 Lahenda malela atoran agama Yahudi emin! Neu' ko emi hapu soe! Huu fo emi homu koe' fo ri' bisa soi lelesu a ela lahenda bubulu' ratalolole Manetualain hihii-nanaun. Tehuu emi ta maso' leo naa' meu. Tadalu lena bali, ri' emi matabaa lahenda, ela ara boso' maso' leo naa' reu!”
53-54 Yesus dedea basa, boe ma lahenda malela atoran agama Yahudi ria no lahenda Farisi ra ramanasa ro Ni. Mulai neme fai ria mai, ara ratanen rupa' ara ela rahihii' ratuda Ni. Ara rasaka eno' fo tao dedea' ro Ni.