Ramatua Yesus nanori-nafada fo tulu-fali lahenda manato'a-manataa' ara
6
Yesus nanori-nafada naroo nae, “Mafarerene'! Boso' moi tuka-tuka' agama a atoran na, fo ela lahenda io emi. Kalu emi tao leo naa', sona emi Papa ma nai nusatetu-ikutema' a neu' ko ta seba emi hata-hata esa boe'.a2 Kalu emi tulu-fali lahenda kasian ara, sona boso' meu matui dedea' nai basa mamana' ain. Kalu emi tao leo naa', sona emi sama leo' lahenda fo dedea feke' tao feke'. Ara rahii' lala'o' leo uma mamaso' a reu, ela lahenda io si rae, ‘Lahenda ia kahere'.’ Au dedea tetebe'! No hapu i'io leo naa' a, ara sipo ra seseba nara so. 3 De kalu emi tulu-fali lahenda kasian ara, sona boso' tutui esa boe'! 4 No ria naa, lahenda nai dae-bafo' ia ta bubulu'. Tehuu emi Papa ma nai nusatetu-ikutema' a bubulu' hata fo emi tao no namaninino'. Neu' ko Ana balas emi neni' ua-nale' dodou'.”
Ramatua Yesus nanori-nafada lahenda huhule-haradoi'
5 “Emi hule-haradoi, sona boso' tao ao mara sama leo' lahenda fo dedea feke', tao feke'. Ara rahii' lala'o rai eno-dala rame, ma rapadei rai uma mamaso' dale', ela lahenda dodou' rita ma io si rae, ‘Lahenda lalao-lalafu' ia ra!’ Tehuu nenene! No saka i'io leo naa', sira sipo ra seseba-babae nara so.b 6 Tehuu emi ta bole leo naa'. Kalu emi hule-haradoi, sona maso' leo kama dale' meu fo ena lelesu a. Boe ma hule-haradoi nai dale mara neu' emi Papa ma. Leo mae lahenda feke' ta rita, tehuu emi Papa ma nita. Neu' ko Ana balas emi neni' ua-nale' dodou-ina'.
7 Kalu emi hule-haradoi, sona boso' dedea matafafali meu-mai. Te lahenda fo ta ralela' Manetualain boe bisa hule-haradoi leo naa'. Ara afi rae, Manetualain nahii' namanene sira huhule-haradoi manaru na. 8 Boso' tao sama leo' sira! Huu fo leo mae emi bei ta hule hata-hata esa neme emi Papa ma nai nusatetu-ikutema' a, tehuu Ana bubulu' mema' hata fo emi parluu a. 9 De kalu hule-haradoi, sona pake conto leo ia':
‘Ama' nai nusatetu-ikutema' a! Ama' a nade Ma lalao-lalafu' naan seli.
Ela leo' bea na basa lahenda radedema Ama' a nade marela-masa'a Ma.
10 Ela leo' bea na Papa dadi Mane' soa-neu' basa lahenda ra!
Ela leo' bea na basa lahenda ra tao tuka Papa pareta Ma nai dae-bafo' ia,
sama leo' Papa eila'o-limalope mara tao tuka Papa pareta Ma nai nusatetu-ikutema' a.
11 Papa fee ami nanaa-nininu namano'u-namadai' tuka-tuka fai'.
12 Ami hule Papa sae-safe heni ami sala-siko mara,
sama leo' ami fee ampon neu' lahenda sala-sikon fo ara taon soa-neu' ami.
13 Papa, manea ami ela boso' tao sala'.
Ma po'i-tata maa ami meme nitu a kuasa na mai.
[Huu fo Papa nana, Mane' mana kuasa ma marela-masa'a.
Papa ri' homu maroo pareta.
Papa, ami huhule-haradoi ma, noi ri naa'. Amin.]’c
14 Tehuu nenene! Kalu emi fee ampon neu' lahenda fo nasala no emi, neu' ko emi Papa ma nai nusatetu-ikutema' a boe sae-safe heni emi sala-sikom. 15 Tehuu kalu emi ta fee ampon neu' lahenda fo nasala no emi, neu' ko emi Papa ma boe ta fee ampon neu' emi.”d
Ramatua Yesus nanori-nafada lahenda la'e-neu' puasa
16 “Kalu emi hule-haradoi ma puasa, sona boso' marurutu sama leo' lahenda fo dedea feke' tao feke'. Ara tao leo naa' ela lahenda io si rae, ‘Sira lahenda lalao-lalafu'.’ Tehuu nenene! No hapu i'io leo naa', ara sipo ra seseba-babae nara so. 17 Tehuu kalu emi puasa, sona marou makamomoi mata-idum, ma sau matalolole laka mara! 18 De neu' ko lahenda rita emi, ara ta bubulu' rae, emi puasa. Tehuu emi Papa ma bubulu. Neu' ko Ana balas fee emi neni' ua-nale' dodou'.”
Ramatua Yesus nanori-nafada lahenda la'e-neu' nabubua hata-heto nai nusatetu-ikutema'
19 “Boso' moi-tao mela-maku mabubua hata-heto dodou' nai dae-bafo' ia. Huu fo neu' ko fufu', ma rutu' ara raa heni si. Ma na'o ra ramana'o reni si.e 20 Tehuu malole lena' emi moi-tao mela-maku mabubua hata-heto dodou' nai nusatetu-ikutema' a. Huu fo nai naa fufu' ma rutu' ara ta raa si. Ma na'o ra boe ta bisa ramana'o reni si. 21 Emi peda hata-heto mara rai bea, tantu emi dale ma boe rai naa.”
Ramatua Yesus nanori-nafada lahenda la'e-neu' soda' nai makaledo' dale'
22 “Lahenda mata na, sama leo' dedede' fo tao makaledo ria dale na. Kalu mata na nita dae, sona ana tuka eno soda matetu' a, sama leo' lahenda la'o nai makaledo' a dale'. 23 Tehuu kalu mata na nasasapu, sona ana ta tuka eno malole a, sama leo' lahenda la'o noi nafaroroe' a nai maiu' dale'. De kalu makaledo' fo nai emi dale mara dadi maiu', sona emi boe masoda nai maiu' dale'.”
Ramatua Yesus nanori-nafada lahenda fo boso' dale nara doda' rasoda tao leo bea'
24 “Lahenda ta bisa noi-tao tebe-tebe soa-neu' malaka dua, huu fo neu' ko ria nahii' malaka esa, lena neme malaka feke' a. Neu' ko ana tuka malaka esa, tehuu malaka esa bali ana ta tao dale' neu. Huu ria naa, o ta bisa mae ‘Manetualain ri' nanuu haak fo pareta au,’ kalu o tao doi' a dadi neu' malaka ma.
25 Huu ria naa Au afada leo ia': boso' dale mara doda' mae ami saka' masoda tao leo bea', ami saka' mia ubea', minu ubea', kao-pake ubea'? Emi bate mae masoda' a nana noi ri' nanaa-nininu'? Ma ao-ina' a nana pake noi kakao-papake'? Ta leo naa' fa. 26 Soba mete masudi manupui' fo ara laa-laa rai lalai. Ara ta rasapute sele-tande ma etu-oru fo peda nanaa' nai mamana pepeda-fufua'. Tehuu emi Papa ma nai nusatetu-ikutema' a naboi-nasamao naroo si. Ria boe tantu bisa naboi-nasamao emi lena neme sira mai. De afi matalolole dei. Huu fo Ana uku-sudi emi lena neme manupui' sira mai. 27 Kalu lahenda napadei' nai tiro-ao a matan, boe ma dale na doda', ana bisa tao namadema ria ao-ina na, do? Ta bisa fa! 28 Kalu ta'a, sona ubea' taon, de emi dale mara doda' la'e-neu' kakao-papake'? Soba meu mete masudi buna bakung nai moo' a. Ara ta tenu-heke.
29 Tehuu nenene matalolole! Mane' Soleman kakao-papake madidila-mabebeben boe oo, ta bisa leo' buna' sira lole nara.f 30 Huu fo Manetualain tao dale' neu' buna' fo rasoda noi fai' ia, boe ma balahaa' te mate si, de lahenda tu'us leo ai-pila' dale' reu. Kalu Ana tao leo naa', Ria boe tantu fee emi kao-pake lena neme buna' sira mai. Ubea' taon, de emi ta mamahere tebe-tebe neu' Ana? 31 De boso' dale mara doda' mae, ‘Ami saka' mia ubea'?’ do, ‘Ami saka' minu ubea'?’ do, ‘Ami saka' kao-pake ubea'?’ 32 Lahenda fo ta nau ramahere Manetualain, ara sota raan seli ela hapu katema' hihii-nanau' sira. Tehuu emi boso' leo naa', huu fo emi Papa ma nai nusatetu-ikutema' a bubulu' basa-basan fo emi parluu. 33 Tehuu emi muste malala'o Ria nonoi-tataon, ma muste tuka Ria pareta na dei, sona neu' ko Ana fee tamba selu' basa hihii-nanau' fo emi parluu a. 34 De boso' emi dale mara doda' neu' hata fo emi parluu nai balahaa'. Huu fo balahaa' nanuu pupute-aai feke' bali. Fai ia susa na dai so.”