11 Kalu lahenda feke' a tao doidoso emi, nana huu emi tuka Au, emi boe maua-manale. Kalu ara dedea tadalu' neu' emi, ma tui rapuputa' tao ramumulu-ramamae emi, emi boe maua-manale.^f 12 Leo mae leo' naa, tehuu emi muste mamaho'o-matadale, nana huu Manetualain sadia balas fee emi babati ma, mauunu' nai nusatetu-ikutema' a. Tehuu mafarerene'! Ta noi emi ri' hapu doidoso leo naa', huu fo fai a ulu na lahenda ra tao tadalu leo naa' soa-neu' Manetualain mana nesi mata nara boe.”^g

13 “Kalu ita nau tao nanaa' a mina-malada, sona parluu ita tao masi' neu. Leo' naa boe lahenda fo rasoda nai dae-bafo' ia, ara parluu emi. Tehuu kalu masi' a dadi mamis, sona sosoa-raraan ubea'? Noi tu'u henin nai eno' fo ramolo-ratabu' ana.^h

14 Emi muste masoda sama leo' dedede', ela lahenda dodou' rita-dae no malole. Emi muste pila loa-loa, sama leo' kota fo nai lete' lain, de basa lahenda ra ritan.ⁱ 15 Lahenda dede na dedede ana' a, ara ta tatana etu dedede' ria nai ure dae dale'. Tehuu ara fua dedede' ria nai mamana madema, ela bisa nahaa nabasa uma a oe-isin.^j 16 Emi muste masoda leo naa'. Emi muste mahaa-makaledo, ela lahenda feke' ara rita emi soda malole ma. Ma rita leo' naa neu' ko ara io-oa Manetualain rae, ‘Emi Papa ma nai nusatetu-ikutema' a, marela-masa'a naan seli!’”^k

17 “Emi boso' afi mae, Au mai nai dae-bafo' ia, ela ose heni Manetualain atoran fo Ana feen neu' ba'i Musa. Ma boso' mae Au ta tao dale' neu' hata fo Manetualain mana nesi mata nara rafada mema' neme ulu' mai. Huu fo Au mai, nana nau tao basa-basan natetu na hata fo ara rafada a. 18 Huu ria naa, nenene matalolole! Basa Musa atoran nara, leo mae titi' do koma esa boe bei pake raheren ma neu' ko natetu na maksud na losa' lalai ma dae-ina' a noe.^l 19 Neme basa Manetualain lahenda nara mai, esa nalena-laka Manetualain atoran Na, nana huu ana afi nae, ‘Atoran ia aana', ta nanuu sosoa-raraa'!’ Boe ma ana nanori-nafada leo naa' soa-neu' lahenda feke', neu' ko Manetualain nai nusatetu-ikutema' a tao naan dadi neu' lahenda aana'. Tehuu lahenda fo tao tuka Manetualain atoran Na katema', ma ana nanori-nafada leo naa' soa-neu' lahenda feke', neu' ko lahenda ria hapu hada-horomata nai Manetualain matan. 20 Mamahere Au! Kalu emi ta masoda roo-tetu' lena neme mesen agama, ma lahenda partei Farisi ra, sona emi ta bisa dadi meu' Manetualain lahendan.”

21 “Emi bubulu' ba'i Musa atoran fo ri' ana nafada mema' neu' ita bei-ba'in nae, ‘Boso' maisa lahenda, huu fo bea naisa lahenda, neu' ko ana hapu huhuku'.’^m 22 Tehuu Au afada leo ia': boso' mamanasa, huu fo bea namanasa no toranoo na, neu' ko ana hapu huhuku'. Lahenda fo nasa na lua no ria toranoo na nae, ‘O dodole ea!’ Neu' ko lahenda ria muste nataa nai lasi agama ra. Ma lahenda fo nasapaa toranoo na nae, ‘Pakanaa'!’, neu' ko ana hapu huhuku' nai ai-pila naraka.

23 De kalu o muni tutunu-hohotu' soa-neu' Manetualain, tehuu mafarene, toranoo ma bei namanasa no o, 24 sona boso' fee tutunu-hohotu' sira dei. O muu mole-dame mo toranoo ma dei, besa' ko fee tutunu-hohotu' ria soa-neu' Manetualain.

25 Kalu lahenda nadedea no o, sona malole lena' mole-dame moo ni dei. Kalu ta'a, sona neu' ko lahenda ria no o muu mataa nai mana ee dedea' a. Boe ma mana ee dedea' a fee o leo polisi ra muu, de ara ena o nai bui dale'. 26 Au dedea tetea' ia! Neu' ko o leo mahani' bui dale', losa' o bae etu huta ma katema'.”

27 “Emi bubulu' ba'i Musa atoran na nae, ‘Boso' hohoke.’ⁿ 28 Tehuu Au afada leo ia': lahenda nita ina' esa, boe ma dale na nahii' suku no' ana, sona tou' ria hohoke ina' ria nai dale na. 29 Kalu o tao sala' pake mata ona ma, sona edo henin. Huu fo malole lena' o maso' nusatetu-ikutema' a muni noi mata' seri' a, lena heni ara tu'u o leo naraka dale' muu muni matam dua si.^o 30 Ma kalu o tao sala' muni' lima ona ma, sona tete heni lima' ria. Huu fo malole lena' o maso' nusatetu-ikutema' a muni noi lima' seri' a, lena heni ara tu'u o leo naraka dale' muu muni limam dua si.”^p

31 “Emi bubulu' ba'i Musa atoran na nae, ‘Lahenda fo namaetu' no sao ina na, ana muste fee susura namaetu' leo ina' ria neu.’^q 32 Tehuu Au afada leo ia': kalu lahenda namaetu' no sao ina na, sekonaa te sao ina na ta parnaa hohoke, ria bei sama leo' ara bei sao rahere. De kalu ina' ria sao selu', sona ria sama leo' sao ulu na tao naan hohoke. Ma kalu tou' esa sao na ina' fo ri' parnaa namaetu', sona sira dua hohoke ria so boe, huu fo ara ralena laka neu' eno sasao' a.”^r

33 “Emi bubulu' ba'i Musa atoran fo ri' ana nafada neu' ita bei-ba'i nara nae, ‘Kalu o soo-supa pake Manetualain nade Na, sona o muste tao matetu' hehelu-barataa' ria.’^s 34 Tehuu Au afada leo ia': kalu o tao hehelu-barataa', sona boso' pake sosoo-susupa'. Boso' soo-supa pake nusatetu-ikutema' a nade na, huu fo nusatetu-ikutema' a, nana Manetualain mamana leleon.^t 35 Boso' soo-supa pake dae-ina' a nade na, huu fo dae-ina' a, nana Manetualain ei momolo-tatabun. Ma boso' soo-supa pake Yerusalem nade na, huu fo Yerusalem, nana Mane Bau-ina' a kota na.^u 36 Boso' soo-supa meni' emi laka ma. Huu fo emi ta manuu kuasa pareta laka-doo' esa ela dadi keo' do fula'. 37 De kalu emi tao hehelu-barataa' mae, ‘ia’, sona mafada mae, ‘ia’. Ma kalu ta'a, sona mae, ‘ta'a’. Kalu emi mafada lena neme naa' mai, sona ria naoka-nasamu nai nitu a.”

38 “Emi bubulu' ba'i Musa atoran na nae, ‘Kalu lahenda tao nalutu o mata ma, sona balas ana fo tao malutu ria mata na boe. Ma kalu lahenda tao namosu heni nisi ma, sona balas ana fo tao mamosu heni nisi na boe.’^v 39 Tehuu Au afada leo' ia: boso' balas tadalu' no tadalu'. Kalu lahenda fapa sukem seri, sona neme' naa ela ana fapa suke' seri bali. 40 Kalu lahenda nadedea no o, fo nau hai na badu ma, sona fee badu hanas ma neu bali. 41 Kalu soldadu esa naseti o lepa-masaa feen hata ni esa doo-doo na kilo esa, sona masaa maroon losa kilo dua. 42 Kalu lahenda hule o hata ubeam, sona fee ni. Ma kalu lahenda tonda o hata ubeam, sona fee ni.”

43 “Emi mamanene lahenda rafada rae, ‘Sue-lai o toranoom, ma ete' ao ma moo lahenda fo ete' aon no o.’^w 44 Tehuu Au afada leo ia': o muste sue-lai lahenda fo ete' aon no o. Ma hule ela Manetualain fee ua-nale' neu' lahenda fo tao na o doidoso. 45 Kalu o tao leo naa', sona matudu mae, o nana Ama' nai nusatetu-ikutema' a anan. Huu fo Ana adu-tao na ledo a nahaa soa-neu' lahenda malole, ma soa-neu' lahenda tadalu' a boe. Ria naonda uda fee lahenda fo tao tuka pareta Na sama-sama ro lahenda fo ralena laka Ria pareta Na. 46 De kalu o sue-lai noi lahenda fo sue-lai o, sona boso' afi mae Manetualain muste balas o neni' ua-nale'. Huu fo lahenda tadalu' a boe sue-lai sira tia-lain fo ri' sue-lai si. 47 De kalu o fee haraoe soda-mole' noi neu' tia-laim, sona boso' afi mae ria lena neme lahenda feke'. Te lahenda fo ta namahere Manetualain boe tao leo naa'. 48 De mafarerene'! O Papa ma nai nusatetu-ikutema' a sue-lai basa lahenda ra. De o boe muste tao leo' naa!”^x