Ramatua Yesus nanori-nafada fo boso' mapaneneo' lahenda
7
“Emi boso' mapaneneo' lahenda, ela Manetualain boso' napaneneo' emi. 2 Emi mararaa' lahenda leo' bea, sona neu' ko Manetualain nararaa' emi leo naa' boe. Ma emi uku-sudi lahenda feke' a sala-sikon leo bea', sona neu' ko Manetualain uku-sudi emi leo naa' boe.a 3 O mahii' tanda noi lahenda sala-siko aana na, tehuu o sala-siko kaba'u-ina ma, sona o mae sala' ta ria. Ria sama leo' o mita kadafu ana' esa nai o tia-laim mata na. Sekonaa te balo' kaba'u-ina a babaa etu o mata ma, tehuu ta mameda maan. 4 Tao leo' bea, de o maparani dedea mae, ‘Toranoo'! Mai fo au kue heni kadafu ana' ria neme mata ma mai dei.’ Sekonaa te o ta bisa mita hata-hata esa boe', huu fo balo' a babaa etu o mata ma. 5 Tebe o lahenda masarole-masarali'! Afi fo, tu'u heni balo' ria neme o mata ma mai dei, besa' ko bisa mita-dae, fo kue heni kadafu ana' a neme toranoo ma mata na mai.6 Hihii-nanau' lalao-lalafu' la'e-neu' Manetualain, boso' manori-mafadan neu' mana mamumulu' ara. Huu fo sira nana sama leo' busa ma'aa', de neu' ko natafali mai suu emi. Sira pakanaa' sama leo' bafi. Kalu lahenda feen lilo mabeli, sona ana ta tao dale' neu! Noi namolo-natabu' ana.”
Ramatua Yesus nanori-nafada lahenda fo hule-haradoi raroo
7 “Kalu emi hule-haradoi,
hule maroo neu' Manetualain;
neu' ko Ana fee.
Kalu saka maroo;
neu' ko Ana natudu eno'.
Kalu maloo maroo;
neu' ko Ana soi lelesu.
8 Lahenda fo hule raroo neu' Manetualain,
neu' ko sipo.
Saka naroo,
neu' ko hapu.
Naloo naroo,
neu' ko Ana soi lelesu.
9 Emi dodoo manenin! Kalu ana' a hule roti, tantu papa na ta feen batu fa, hete? 10 Do kalu ana' a hule ika', papa na ta feen meke! 11 Kalu lahenda dae-bafo' tadalu' rupa leo' emi a, mahii' fee emi ana mara hata malole, tantu emi Papa ma nai nusatetu-ikutema' a fee hata fo emi hule Ni a, huu fo emi Papa ma tebe malole a.
12 De hata fo o nau lahenda feke' taon soa-neu' o, sona o muste tao leo naa' soa-neu' ana boe. Huu fo ia nana, huu-peda' neme basa-basan fo ba'i Musa no Manetualain mana nesi mata feke nara ranori-rafada mema' neme fai a ulu na mai.”b
Ramatua Yesus nanori-nafada lahenda la'e-neu' lelesu bafa lutu'
13 “Kalu lahenda nau maso' nusatetu-ikutema' a, sona ana muste la'o nesi' lelesu bafa lutu'. Nana huu eno' muda' a ma lelesu bafa loa' a, lahenda dodou' rahii' resi' naa. Tehuu besa-besa! Huu fo eno leo naa' a, neni lahenda leo naraka neu, de ara bika-bati reme Manetualain mai. 14 Lahenda fo nau maso' nusatetu-ikutema' a, muste tuka eno susa, ma nesi' lelesu bafa lutu' ria. Leo mae noi lahenda baiana' a la'o resi' naa, tehuu eno bafa lutu' ria ri' noo lahenda leo Manetualain neu.”
Ramatua Yesus nanori-nafada lahenda fo boso' tuka mapuputa' ara
15 “Besa-besa mo manatipu-manadai' fo io ao nara rae, sira nana Manetualain mana nesi matan. Huu fo sira tao ao nara malole sama leo' bibi-lopo. Sekonaa te sira tadalu', sama leo' busa fui' ma'aa'. 16 Emi bisa malela' tao lahenda mana fufudi' sira leo' bea? Mete neme sira nonoi-tataon. Sama leo' lahenda nita ai boa', ela nalela' ai boa' ria huu na. Ai boa malole, ta kalua neme ai huu' fo ta malole. 17 Huu fo ai huu malole neni buna-boa malole. Tehuu ai huu ta malole neni buna-boa ta malole. 18 Ta hapu ai huu malole neni buna-boa ta malole. Ma ta hapu ai huu ta malole, neni buna-boa malole. 19 Ai huu' fo ta neni buna-boa malole, tantu ara beta henin fo tu'un leo ai-pila' dale' neu.c 20 Leo' naa boe soa-neu' mana nesi mata fufudi' ara. Emi bisa malela' asa neme sira nonoi-tataon mai.”d
Ramatua Yesus nafada la'e-neu' lahenda fo sesei' Manetualain noi nai bafa-doo nara
21 “Neu' ko lahenda raloo Au rae, ‘Ramatua'!’ Tehuu ara sesei' noi nai bafa-doo nara. Neu' ko Manetualain nai nusatetu-ikutema' a tipa heni si. Noi lahenda fo tuka matetu' Ria hihii-nanaun, Ana sipo' asa dadi reu' Ria lahendan. 22 Neu' ko dae-bafo' a nonoe na, te lahenda dodou' manaku rae, Au anuu haak pareta si. Ara o'oe Au rae, ‘Ramatua'! Ami tui-beka Ramatua' a nanori-nafadam so. Ami boe usi nitu ra pake Ramatua' a nade Ma. Ma ami tao tanda heran rupa' pake Ramatua' a kuasa Ma.’
23 Leo mae ara o'oe Au la'o naroo leo' naa boe, tehuu neu' ko Au afada si ae, ‘Emi ia nana bea? Au ta alela' emi, huu fo emi ta masoda tuka Manetualain hihii-nanaun. De maheo' meme ia' mai.’”e
Ramatua Yesus nanori-nafada la'e-neu' lahenda malela' ma lahenda pakanaa'
24 “Lahenda fo namanene neu' Au, ma tao tuka Au dedea-nafada Ki, ria sama leo' lahenda malela' a nafoa uma na nai fanderen batu. 25 Boe ma uda ina' a onda mai losa' faa ra. Ani ina' a boe fae fee uma ria. Tehuu uma ria ta hea neu, nana huu ana napadei nai fanderen batu matea.
26 Lahenda fo namanene neu' Au, tehuu ta tao tuka Au dedea-nafada Ki, ria sama leo' lahenda pakanaa' a nafoa uma na neu' soroae' lain. 27 Tepo' fo uda ina' a mai losa' faa ra, ma ani ina' a fae fee uma ria. Boe ma uma ria hea neu losa' nalulutu'.”
Lahenda ra heran ramanene Ramatua Yesus nanori-nafada kahere Na