3-4 Tehuu Yesus nataa si nae, “Leo' bea? Emi ta mafarene ba'i Daud tutui na? Ba'i Daud no ana mana tuka dea nara ramalaa raan seli. Boe ma ara maso' leo Manetualain Laa' Huhule-haradoi Na dale' reu, hai roti fo ri' malaka agama ra fee neu' Manetualain, de ara raa. Sekonaa te noi malaka agama ra si' bole raa roti ria. Lahenda feke', sona ta bole fa. Ba'i Daud asa raa, tehuu lahenda ta sale si. Nonoo' leo emi ta lees Manetualain Susura Makamoi Na!^b 5 Nai naa mana dui' la'e-neu' malaka agama fo ri' ralalau nai uma mamaso', naraa la'e fai hahae ao'. Tehuu ta sala fa.^c 6 Nenene! Maulu na uma mamaso' a ri' penting, tehuu besa' ia ruma penting lena bali. Ri' Au, Lahenda Dae-bafo' Tetea' ia. 7 Nai Manetualain Susura Makamoi Na, Manetualain nae, ‘Au hihii-nanau Ka leo ia': Au lahenda kara muste ratudu dale kasian nara esa no esa. Kalu ara ta tao leo naa', sona sira banda tutunu-hohotun fo ri' reni fee Au a, sosoa-raraa' ta'a.’ Kalu emi bubulu' matetu' Manetualain dedea Na, tantu emi ta sale mae Au ana mana tuka dea kara sala. Huu fo sira ta tao sala' hata esa boe'!^d 8 Au, Lahenda Dae-bafo' Tetea'. Au anuu haak aetu' ae, lahenda bole tao ubea' naraa la'e fai hahae ao'.”

9 Boe ma Yesus la'o ela mamana' ria, fo leo sira uma mamaso na neu. 10 Nai naa, tou' esa mate liman esa. Lahenda Farisi ra rasaka eno' nau sale Yesus, uni' ko leo Ana puli na lahenda fo ri' mate liman esa a, naraa la'e fai hahae ao'. De ara ratane Ni rae, “Tuka ita atoran agama na, lahenda bole puli na lahenda naraa la'e fai hahae ao' do, ta'a?”

11 Yesus nataa si nae, “Kalu lahenda bibi-lopon esa tuda nala bolo' dale', naraa la'e fai hahae ao', tantu manuu bibi a hela bibi-lopo ria leo dea' mai, hete?^e 12 Manetualain sue-lai lahenda dae-bafo' a, lena manuu bibi a sue ria bibi-lopon. Huu ria naa, lahenda bole tao hihii-nanau' malole naraa la'e fai hahae ao'.”

13 Boe ma Ana dedea no lahenda fo ri' mate liman esa a nae, “A'a! Loo' lima ma mai!” Ana loo' lima mates na, boe ma te'e tuti' a, sama leo' lima neulau na.

14 Lahenda Farisi ra rita leo' naa, boe ma nasa nara lua. Ara kalua ela uma mamaso' ria, de reu dedea-rao' rae, “Ita muste saka eno' fo taisa Ni!”

15 Tehuu Yesus bubulu' sira dale tadalu na, huu ria naa Ana leo mamana feke' neu. Lahenda dodou' tuka Ni, boe ma Ana puli na basa lahenda kamahedis ara. 16 Tehuu Ana horo si nae, “Emi boso' mafada lahenda feke' la'e-neu' Au.” 17 Ana tao leo naa' tuka hata fo Manetualain nafada neu' Ria mana nesi matan Yesaya nae,

22 Lahenda esa nitu a heke naan losa' poken, ma ta bisa dedea, lai' esa de lahenda ra roo ni leo Yesus neu. Boe ma Yesus puli naan, ma usi heni nitu ria. De lahenda ria nita dae, ma dedea tuti' a. 23 Basa lahenda ra rita leo' naa, boe ma ara heran. Ara beidea rae, “Bate ia nana, Daud tititi-nonosin, fo ri' Manetualain mana nesi mata nara dui' mema' neme fai a ulu na mai. Ria nana, tantu ri' Lahenda fo ita tahanin a!”

24 Tehuu lahenda Farisi ra ramanene leo' naa, boe ma ara ta sipo'. De ara beidea rae, “Lahenda ia bisa usi kalua nitu, nana huu nitu ra malakan Balsebul, ri' fee Ni kuasa.”^g

25 Tehuu Yesus bubulu' lahenda Farisi ra dedea na. De Ana nafada si nae, “Emi dedea ma, ta la'e fa! Kalu nai nusa' esa, anaraun nara ranala ao, tao leo' bea fo nusa' ria bei bisa natata'a! Leo' naa boe kalu lahenda rai kota esa dale', do rai uma esa dale', esa no esa rarui ao, tantu ara rabika-rabati' losa' rasosopu'. 26 De kalu nitu ra ranala ao ma rausi ao, sona sira malaka na ta bisa homu pareta namanoso! 27 Mafarerene'! Lahenda rai emi Farisi a talada, lahenda feke' ara rae sira ranuu kuasa fo usi nitu. Ara pake kuasa neme nitu a mai, do? Ta'a! De emi boso' dedea mafarara'u mae, Au pake nitu a kuasa na fo usi nitu. Neu' ko emi lahenda mara si' raetu' rae, hata fo emi mapaneneo' ana a, sala. 28 Tehuu kalu tebe-tebe Au usi nitu pake kuasa neme Manetualain Dula-dale Malalao-malalafu Na, ria natudu nae, tebe Manetualain Mane' nai emi mata-idum.

29 Kalu lahenda nau ofe hata nai lahenda bara'ai' esa uma na, ana muste heke naisa' lahenda ria dei. Besa' ko, ana bisa ofe neni lahenda ria hata-heton.^h

30 Mafarerene' matalolole! Huu fo lahenda bea ta ei' esa no Au, sona ria nana Au musu-noo Ki. Ma lahenda bea ta tulu-fali Au nai nonoi-tatao Ka, ria nana tao noi kaco.ⁱ 31 De nenene matalolole Au dedea Ka! Manetualain sadia sae-safe heni lahenda sala-sikon. Ma kalu lahenda dedea tadalu' soa-neu' lahenda feke', Manetualain bei sadia fee ni ampon. Tehuu kalu lahenda naparani dedea tadalu' soa-neu' Manetualain Dula-dale Malalao-malalafu Na, Manetualain ta fee ni ampon. 32 Kalu lahenda dedea tadalu' soa-neu' Au Lahenda Dae-bafo' Tetea' ia, Manetualain sadia fee ampon neu' ana. Tehuu kalu lahenda dedea nadadae Manetualain Dula-dale Malalao-malalafu Na, leo mae losa' dae-bafo' a noe boe, Manetualain ta fee ampon neu' ana!”^j

33 Boe ma Yesus dedea naroo neu' lahenda Farisi ra nae, “Afi matalolole! Ai huu malole naboa boa malole. Tehuu ai huu tadalu' a naboa boa tadalu'. Huu fo neme ai huu' a boa na, lahenda bisa bubulu' ai huu' ria malole a, do ta'a.^k 34 Tehuu emi sama leo' meke mapuputa'! Emi ta bisa dedea hihii-nanau' malole ra. Nana huu hata fo nana peda' nai lahenda dale na, ria ri' neu' ko kalua neme ria bafa na mai.^l 35 Lahenda malole, tantu dedea malole nana huu hihii-nanau' malole ra nana peda' rai ria dale na. Tehuu lahenda tadalu' a, tantu dedea tadalu', nana huu hihii-nanau' tadalu' ara nana peda' rai ria dale na.

36 Mamahere Au! Dae-bafo' a noe, te neu' ko Manetualain parisa' lahenda ra dedean. Tepo' ria, lahenda ra muste esa' ko nataa aon ria dedean fo ri' ta nanuu sosoa-raraa'. 37 De besa-besa! Neu' ko Manetualain tai emi dedea-nafadam ma naetu' nae, emi hapu huhuku', do ta'a.”

38 Mesen agama hida ma lahenda Farisi ra ramanene Yesus dedea nae leo' naa, boe ma ara hule Ni rae, “Papa Mesen! Ami mahii' mita Papa tao tanda heran, fo dadi buti nae, Papa kuasa Ma tebe-tebe neme Manetualain mai.”^m

39 Tehuu Yesus nasapaa si nae, “Emi lahenda besa' ia ta nau mamania-mamanene neu' Manetualain! Emi tao noi tadalu' a! Leo mae emi hule tanda heran, tehuu Au ta fee. Huu fo fai a ulu na Manetualain fee tanda heran, pake Ria mana nesi matan Yunus. Ria dai so!ⁿ 40 Yunus leo hatu-leledon fai' telu nai ika bau-ina' a tein dale'. Leo' naa boe Au, Lahenda Dae-bafo' Tetea' ia. Neu' ko Au leo hatu-leledon fai' telu nai lea' roo-rates.^o 41 Nai dae-bafo' a nonoe na, kalu Manetualain dadi mana ee dedea', neu' ko lahenda Niniwe ra dadi sakasii fo sale emi rae, ‘Emi basa nana, pakanaa'!’ Maulu na, lahenda Niniwe ra ramanene neu' Manetualain mana nesi matan Yunus, boe ma ara saledale-tu'etei nara. Tehuu emi ta'a. Sekonaa te, besa' ia Lahenda fo nai emi talada kahere' lena Yunus, nana ri' Au ia. Tehuu emi ta tao dale' neu' Au bai' boe'.^p 42 Nai dae-bafo' a nonoe na, kalu Manetualain dadi mana ee dedea', ina mane' Seba neme ona mai, dadi sakasii. Ana tutudu lima na, sale emi basa fo ri' masoda nai besa' ia nae, ‘Emi basa pakanaa'!’ Fai a ulu na ina mane' ria neme dae doo' mai, ela nita mata' mane' Soleman malela na. Sekonaa te, besa' ia Lahenda esa nai emi talada kahere' lena Mane' Soleman, ri' Au ia. Tehuu emi ta tao dale' neu' Au bai' boe'.”^q

43 “Kalu nitu a nana usi heni' neme lahenda esa mai, nitu ria leo mamana lino-nees neu saka mamana hahae'. Tehuu ana ta hapu mamana matetu-maraa'. 44 Boe ma ana afi nae, ‘Ta hapu mamana' fa, de malole lena' au fali uu leo selu' nai maulu na lahenda ria a.’ Boe ma ana fali selu', te nita mamana' ria mana kakai makamoi' ma mana ator natalolole' so. 45 Nitu ria neu naloo nonoon hitu fo ri' makaresi lena neme ria mai bali. Basa si reu leo nai lahenda ria, de ara ese-rumu bela' ana. Besa' ia lahenda ria masoda na soe lena. Leo' naa boe soa-neu' lahenda tepo-lele' besa' ia.”^r

46 Yesus bei dedea no lahenda kadodou' ara, te Ria mama Na ma fadi nara mai saka Ni. Ara rapadei rahani' uma dea', de radenu lahenda neu naloo Ni. 47 Boe ma lahenda mai nafada nae, “Papa! Papa mama ma, no fadi mara rai dea'. Ara mai saka Papa.”^s

48 Yesus nataa nae, “Au mama boki Ka ri' bea? Ma Au toranoo boki kara si' bea?” 49 Boe ma Ana tudu leo lahenda fo tuka Ni a, ma nafada nae, “Mita', basa ia ra nana Au mama Ka, ma Au toranoo kara. 50 Huu fo lahenda bea tao tuka Au Papa Ka nai nusatetu-ikutema' a hihii-nanaun, sira nana Au kileo-boboki tea kara.”