Ramatua Yesus tui dedea nasasama' la'e-neu' lahenda mana noi oka anggor
12
Boe ma Yesus dedea selu' no malaka agama Yahudi malaka nara, mesen agama ra ma lasi' Yahudi ra. Ana pake dedea nasasama' nae, “Lahenda esa tao oka' fo sele ai anggor nai ria daen bibia' esa. Ana heu kofeo' naan. Ma ana tao bak ela natanee oe anggor. Ana tao na uma nanea' madema esa. Ana seba oka' ria fee lahenda feke' roin, fo ara bati buna-boa' ro ni. Boe ma ana leo nusa dea neu.a 
Markus 12:1-17
2 Losa fai eetu anggor, boe ma manuu dae' a nadenu atan esa leo lahenda mana noi ra neu, hule ria nuu babati na. 3 Tehuu ana losa, boe ma lahenda mana noi ra homu raan, de popo'o ni. Basa de radenu fali' ana no lima rou'.
4 Manuu dae' a fee selu' atan esa neu bali. Tehuu lahenda mana noi ra fepa rahea laka na, ramamae' ana, ma puu henin. 5 Basa de manuu dae' a nadenu selu' ata feke' esa neu bali. Tehuu ara raisa ni. Leo mae ara tao leo bea' boe, manuu dae' ria fee ata nara reu raroo. Tehuu mana noi sira popo'o ruma, ma raisa ruma. 6 Besa' ia bei ela noi lahenda esa' a. Ri' manuu dae' a ana mane ise susue na. Huu no ta hapu eno feke' so', de ana nadenu ana' ria neu. Ana afi nae, ‘Kalu au fee ana boki ka neu, tantu ara sipo' ana no malole, ma ramanene ni.’
7 De nadenu ana na neu. Tehuu lahenda mana noi ra rita ana' ria, boe ma dedea-rao nara rae, ‘Emi mete dei! Tou lasi' a fee ana boki na mai. Kalu tou lasi' a mate ni, sona ana' ia ri' sipo' katema' posaka' nara. Mai fo taisa ana' ria, ela ita tanuu posaka' nara!’ 8 Ara hopu ra ana' ria, de raisa ni. Boe ma ara tu'u popora na, leo oka dea' neu. Dedea nasasama' ria te'e ada' naa!”
9 Boe ma Yesus natane lahenda bau-ina' sira nae, “Tuka emi dudu'a-aafim, sona manuu dae' a tao mana noi sira leo' bea? Tuka Au, tantu ana naisa laesa' mana noi sira. Basa te ana seba oka' anggor ria, leo lahenda feke' neu.
10 Ita basa lees nai Manetualain Susura Makamoi Na nae,
‘Batu esa tukan ara tu'u henin so.
Tehuu besa' ia batu ria dadi batu buku'.
11 Manetualain ri' here batu ria, boe ma natende ni.
Huu ria naa, ita tita ni malole na seli!’”b
12 Lahenda bau-ina' sira bubulu' tuti' a rae, Yesus dedea la'e-neu' asa pake dedea nasasama' ria. Ara sama leo' bisinaa' a mana noi oka' anggor sira. De ara mulai saka eno' fo hopu Ni. Tehuu ara lele lahenda kadodou-ina', fo ri' rahii' ramanene Yesus nanori-nafadan. Boe ma ara foa elan mesa' Ana.
Lahenda rahihii' Ramatua Yesus la'e-neu' babae doi-bea
13 Boe ma lahenda Yahudi lahenda bau-ina nara radenu lahenda Farisi hida, ro lahenda reme Herodes partei na, reu ratatane ao' ro Yesus, fo nau rahihii' Ana. 14 Ara mai, boe ma ratatane ao' ro Ni rae, “Papa Mesen! Ami basa bubulu' Papa dale roo-tetu', ma ta mapuputa'. Papa mete noi lahenda dalen. Papa boe mafada ledo-ledo Manetualain hihii-nanaun, nana huu Papa ta mete mata'. Besa' ia, ami matane hihii-nanau' esa. Tuka ita atoran agama Yahudi na, sona ita muste bae doi-bea fee mana pareta Roma a mane' bau-ina na,c do ta'a?”
15 Tehuu Yesus bubulu' sira nau edi-fule Ni, ela Ana dedea nalena-laka neu' mana pareta Roma. Boe ma Yesus nataa no hara bera' nae, “Ubea' taon de emi mahihii' Au meni' natatane' ria! Soba matudu Au doi lilo fula' esa!”
16 Ara loo fee Ni doi lilo fula' esa. Yesus hai na doi' ria de parisa' ana. Boe ma Ana natane si nae, “Gambar ia, nana bea mata-idun? Ma bea naden ia?”
Ara rataa rae, “Ria nana mana pareta Roma a mane' bau-ina na!”
17 Yesus nae, “Kalu leo' naa, sona emi fee mana pareta hata fo mana pareta haak na. Ma fee Manetualain hata fo Manetualain haak Na!”
Basa si ramanene Ni nataa nae leo' naa, boe ma ara heran, huu fo Ana nafada neu' matetu na. Huu ria naa, ara ta bisa rahihii' Ana.
La'e-neu' lahenda mana mate' a nasoda selu', ma lahenda sao nai nusatetu-ikutema' a, do ta'a?
18 Partei agama feke', fo lahenda rae, partei Saduki. Ara ranori-rafada rae, lahenda mana mate' a ta nasoda selu'. Lai' esa de, lahenda Saduki hida mai rahihii' Yesus. Ara dedea ro Yesus rae,d
Markus 12:18-44
19 “Papa Mesen! Ba'i Musa dui' fee ita hadas ia nae: kalu tou' esa mate ela sao na, tehuu ana' ta'a, sona tou' ria fadi na muste sao na ina-falu ria, ela boki fee a'a mana maten ria tititi-nonosi'.e 20 Tebe ba'i Musa nanori-nafada nae leo' naa. Tehuu ami matane leo ia': tou' hitu toranoo' ara. Ulu' a sao, basa de mate ni, tehuu ana' ta'a. 21 Boe ma fadi mana tuka ria a, sao na ina-falu ria. Ta doo bea boe' te mate ni, ma ana' ta'a. Leo' naa boe fadi katelu a, ana sao na ina-falu ria, tehuu mate ni, ma ana' ta'a boe. 22 Leo-leo naa losa' fadi mate'a tei-susu' a, boe mate ni. Mate'e na ina-falu ria maten boe.
23 Besa' ia ami saka' matane leo ia': ina' ria parnaa sao tou' hitu! Tehuu kalu dae-bafo' a nonoe na, te Manetualain fee lahenda mana mate' ara rasoda selu', neu' ko neme tou kahitu' sira mai, bea ri' dadi neu' ina' ria sao na?”
24 Yesus nataa nae, “Kalu emi matane leo naa', sona sosoa na nae, emi ta bubulu' matetu' Manetualain Susura Makamoi Na isi-liin. Ma emi ta bubulu' Manetualain kuasa Na. De emi sala ria so!
25 Nenene! Leo ia: nai nusatetu-ikutema' a sasao-aana' ta'a. Basa lahenda mana mate' fo Manetualain fee si rasoda selu' a, ta hapu esa sao so boe'. Leo' naa boe Manetualain eila'o-limalope nara rai nusatetu-ikutema' a ta sao. 26 Au boe afada la'e-neu' lahenda mana mate' ara rasoda selu', do ta'a. Ba'i Musa dui' la'e-neu' ai huu ana' fo ai-pila' a naan tehuu ta putun. Emi mafarene tutui' ria, do ta'a? Tepo' fo ai a pila nai ai huu' ria, Manetualain nafada Musa nae, ‘Au nana, o ba'i mara Manetualain na. Si' ba'i Abraham, ba'i Isak ma ba'i Yakob. Basa si do'o-tabe raroo Au losa' besa' ia.’f 27 Ita bubulu' tae, ba'i sira mate si doo' a so. Tehuu no Manetualain nae Ria bei dadi neu' sira Ramatua na, huu ria naa ita bubulu' tae, ara rasoda selu'. Tebe lahenda masoda' a ri' do'o-tabe Manetualain, ta lahenda mana mate' a, hete? De kalu emi homu mahere nanori-nafada' fo ri' nae, lahenda mana mate' ara ta rasoda selu', mema' emi sala ria so!”
Sue-lai Manetualain ma sue-lai lahenda
28 Fai ria, Yesus dedea no lahenda reme partei Saduki, te mesen agama esa nai naa de namanene boe. Mesen agama ria afi nae, Yesus nataa sira natatane na no malole. Boe ma ana natane Yesus nae, “Papa! Au saka' atane leo' ia: ita atoran hadas, ma agama a pareta nara, dodou' naan seli. Neme ba'i Musa pareta nara, bea ri' penting naan seli?”
29 Yesus nataa nae, “Nai Manetualain Susura Makamoi Na dale', pareta fo penting naan seli a, nae leo' ia:
‘Basa lahenda nai Israel! Nenene matalolole!
Manetualain mema' ita Ramatua na,
ma nanuu haak pareta ita!
Ta hapu feke' so', noi Ria mesa' ana!
30 De emi muste sue-lai Ni, lena heni basa-basan.
Huu ria naa, emi muste mahii' maroo Ni,
malela' Ana,
ma moi-tao mela-maku tuka Ria hihii-nanaun.’g
31 Ma pareta kadua a nae leo' ia:
‘O muste sue-lai lahenda feke' ara, sama leo' o sue-lai ao-ina heheli ma.’
Pareta kadua' ia ra penting naan seli. Ta hapu pareta feke' penting lena heni pareta kadua' ia ra!”h
32 Boe ma mesen agama ria dedea no Yesus bali nae, “Mema'! Papa mafada ria nana, tebe. Manetualain nanuu haak pareta ita, ta hapu ramatua' feke' so'.i 33 Ita muste sue-lai Ni lena heni basa-basan, losa' ita tahii' taroo Ni, talela' Ana, ma toi-tao mela-maku tuka Ria hihii-nanaun. Ma ita boe muste sue-lai lahenda feke', sama leo' ita sue-lai ao-ina heheli' ara. Ria sona Manetualain namaho'o, malole lena neme ita tuka noi atoran agama. Ria malole lena neme ita fee Ni banda tutunu-hohotu', do hata feke'.”j
34 Yesus namanene ana nataa nae leo' naa, boe ma afi nae, mesen agama ria bubulu' no malole. De Yesus nae, “Hisadei na o dadi Manetualain lahendan.”
Basa boe ma ta hapu lahenda feke' naparani natatane ao' no Yesus so', huu fo ta hapu esa naseki Ni boe'.k
Kristus nana, tebe mane' Daud tititi-nonosin, tehuu Ria boe mane' Daud Ramatua na
35 Yesus bei nanori-nafada lahenda ra nai Manetualain Uma Mamaso Yahudi Ina Na. Ana natane si nae, “Tuka emi dudu'a-aafim, sona leo' bea? Mesen agama ranori-rafada la'e-neu' Kristus, fo ri' Manetualain tudu mema' Ana neme fai a ulu na mai. Tuka sira, Ria nana noi mane' Daud tititi-nonosin. Tehuu ria ta la'e fa. 36 Huu fo fai a ulu na Manetualain Dula-dale Malalao-malalafu Na pake Mane' Daud, de dui' nae,
‘Manetualain nafada au ramatua ka nae,
“Mai matuu' nai mamana' hada-horomata' nai Au boboa ona Ka.
Neu' ko Au tao a musu-noo mara, roi rae' o.’”l
37a No ria naa ita bubulu', mane' Daud boe naloo Kristus nae, ‘Ramatua'’. Sosoa na nae, kalu lahenda rae Kristus nana, noi mane' Daud tititi-nonosin, sona bei ta dai! Huu fo Ria boe mane' Daud Ramatua na ri' nanuu haak pareta ni!”
Ramatua Yesus nae besa-besa mo mesen agama ra napuputa nara
37b Yesus dedea nae leo' naa, boe ma lahenda dodou' rahii' ramanene Ni. 38 Ana nafada selu' asa nae, “Emi muste besa-besa mo mesen agama ra. Ara rahii' lala'o pake badu manaru fo roroso raroo' a, reu raneta ro lahenda dodou', ela lahenda rita si sona rae, ‘Sira lahenda bau-ina'!’ 39 Kalu ara maso' leo uma mamaso' dale' reu, do reu raa feta, sona ara saka mamana natuu' malole ina', ela lahenda dodou' rita si. 40 Tehuu besa-besa! Huu fo sira boe rapuputa' ina-falu ra, fo ralea ra uma nara. Tehuu nai lahenda dodou' matan, sona rapoti etu sira salan ria, rapadei hule-haradoi doo na seli'. Ara nau lahenda rae sira dale lalao-lalafu'. Tehuu neu' ko Manetualain fee si huhuku mabera ina.”
Ina-falu kasian tu'u doi' kolete desi lena basan
41 Boe ma Yesus neu natuu' nasare na peti derma fo nai Manetualain Uma Mamaso Yahudi Ina Na. Ana nita lahenda ra mai rakodi doi kolete nara leo peti ria dale' neu. Ana nita lahenda kamasu'i ara mai tu'u doi' dodou' nai naa boe. 42 Ina-falu kasian esa boe tuka mai hule-haradoi. Ana nakodi doi' sen dua leo peti ria dale' neu. Doi' sira beli na baiana' naan seli.
43 Boe ma Yesus kape ana mana tuka dea nara ma nafada nae, “Emi mete matalolole ina-falu kasian ria. Ana nakodi noi doi' sen dua' a, tehuu ana fee desi lena basa lahenda ra. 44 Basa lahenda feke' sira rakodi doi kolete neme sira doi lena nara. Tehuu ina-falu ia, fee heni katema' doi nara leo Manetualain neu.”