Ramatua Yesus fee nasaneda' fo besa-besa ro mesen agama ma lahenda Farisi ra
23
Yesus nanori-nafada ana mana tuka dea nara, sama-sama ro lahenda kadodou' fo ri' tuka si. 2 Ana nafada nae, “Mesen agama, ma lahenda Farisi ra homu haak fo ranori-rafada ba'i Musa atoran ara. 3 Huu ria naa, emi muste mamanene si ma tuka sira nanori-nafadan. Tehuu boso' tuka hata fo sira taon, nana huu ara ta tao tuka nanori-nafada nara. 4 Ara raseti lahenda fo lepa-rasaa sira atoran agama mabera na. Tehuu sira ta nau tulu-fali lahenda fo ri' tuka atoran ria. 5 Ara tao basa-basan, ela lahenda io si. Conto leo-leo': oli ana' fo isi na Manetualain Hara-dasin nai dale', ara heken neu' sira lakan, ma lima nara. Tehuu tao ra sira nuu nara bau lena, ela lahenda io si rae, ‘Sira lahenda lalao-lalafu'!’a 6 Kalu ara leo uma mamaso' dale' reu, do reu raa feta, ara saka mamana natuu malole ina', ela lahenda dodou' rita si. 7 Kalu leo pasar reu, sona ara saka noi hada-horomata, ara saka noi lahenda do'o si rae, ‘Soda-mole', papa mesen manuu hada-horomata.’ 8 Tehuu emi boso' tuka sira tataon ria! Ta bole lahenda raloo emi rae, ‘papa mesen’, huu fo emi Mesen ma noi esa' a. Ma emi basa toranoo'. 9 Boso' io lahenda nai dae-bafo' ia mae, ‘papa’, huu fo emi Papam noi esa' a nai nusatetu-ikutema'. 10 Lahenda ta bole raloo emi rae, ‘ramatua'’ huu fo emi Ramatuam fo nanuu haak pareta emi noi esa' a, ri' Au, fo Manetualain helu mema' neme fai a ulu na. 11 Huu ria naa, Au afada emi ta bole madedema ao mara sama leo' lahenda mana saka hada-horomata sira. Neme emi bea mai nau dadi lahenda bau-ina', ria muste dadi sama leo' ata fo nalalau' lahenda feke'.b 12 Huu fo lahenda bea natutua-nadedema aon, neu' ko Manetualain naloe-nadaen. Tehuu lahenda bea naloe-nadae aon, neu' ko Manetualain natutua-nadedeman.”c
Ramatua Yesus nasa'ai malaka agama ra, nana huu ara dedea feke', tao feke'
13 Yesus dedea naroo nae, “Emi mesen agama ma lahenda Farisi ra! Emi lahenda dea-mata'! Neu' ko emi hapu soe, huu fo emi ta nau mamahere Au, Lahenda fo ri' Manetualain helu mema', nau feen mai. Ma tadalu lena bali, emi matabaa maa lahenda ela boso' ramahere Au. Huu ria naa, ara ta bisa dadi reu' Manetualain lahenda Na.
14 [Emi mesen agama ma lahenda Farisi ra! Emi lahenda dea-mata'! Neu' ko emi hapu soe, nana huu emi mapuputa' ina-falu ra, fo malea ma uma nara. Tehuu nai lahenda dodou' matan, sona emi mafuni sala mara, mapadei hule-haradoi doo naa seli, ela lahenda rae emi dale mara lalao-lalafu'. Tehuu neu' ko Manetualain fee emi huhuku' mabera ina.]d
15 Emi mesen agama ma lahenda Farisi ra! Emi lahenda dea-mata'! Neu' ko emi hapu soe, huu fo emi sa'e ofa' sudi leo bea' meu, ma onda-ae lete', fo saka noi lahenda esa, ela ana maso' leo emi partei agama ma dale' neu. Tehuu kalu ana maso' dadi lahenda Farisi, sona nonoi-tataon dadi tadalu lena bali. Neu' ko ana hapu huhuku' nai naraka bera lena lai' dua neme emi mai.
16 Emi dale poke', tehuu ubea' taon de emi bei nau matudu eno' fee lahenda feke' bali? Neu' ko emi hapu soe, nana huu emi manori-mafada mafarara'u mae, ‘Kalu lahenda tao hehelu-barataa' pake sosoo-susupa' ma sesei' Uma Mamaso Yahudi Ina a, sona lahenda ria ta nanaheke' no hehelu-barataa na. Tehuu kalu ana tao hehelu-barataa' pake sosoo-susupa' ma sesei' lilo pilas fo nai Uma Mamaso' dale', sona besa' ko ana nanaheke' no hehelu-barataa na.’ 17 Emi lahenda pakanaa'! Manetualain tao lilo pilas a neu hata ta penting lena neme Ria Uma Mamaso Yahudi Ina Na. Huu fo Manetualain Uma Mamaso Yahudi Ina Na ri' tao na hata ria dadi lalao-lalafu'.
18 Emi boe manori-mafada mafarara'u mae, ‘Kalu lahenda tao hehelu-barataa' pake sosoo-susupa' ma sesei' mei tutunu-hohotu' fo ri' nai Uma Mamaso Yahudi Ina, sona lahenda ria ta nanaheke' no hehelu-barataa na. Tehuu kalu ana tao hehelu-barataa' pake sosoo-susupa' ma sesei' tutunu-hohotu' fo ri' nai mei lain, sona besa' ko ria nanaheke' no hehelu-barataa na.’ 19 Tebe-tebe emi poke'. Tantu mei tutunu-hohotu' ria penting lena neme tutunu-hohotu' fo ri' nai mei ria lain. Huu no mei ria, de tao naa sira tutunu-hohotun dadi malalao-malalafu' soa-neu' Manetualain. 20 Huu ria naa, kalu lahenda soo-supa ma sesei' mei tutunu-hohotu' a, sona malole lena' sesei' mei ria, no basa tutunu-hohotu' rai mei lain boe. 21 Ma kalu soo-supa ma sesei' Uma Mamaso Yahudi Ina a, sona malole lena' sesei' Uma Mamaso' a sama-sama no Manetualain nade Na. Huu fo Ria leo-naparasa nai naa. 22 Ma kalu lahenda soo-supa ma sesei' nusatetu-ikutema' a, sona ria sama leo' ana sesei' Manetualain kadera pareta Na sama-sama no Ria nade Na, huu fo Ria natuu' homu pareta nai naa.e
23 Emi mesen agama ma lahenda Farisi ra! Emi lahenda dea-mata'! Neu' ko emi soe, nana huu emi fee Manetualain babati' esa neme babati' sanahulu mai, sona emi malela mara seli no bareken. Emi bareken basa-basan, losa' leo bumbu mara rai emi oka-tinem boe hika-reke si. Conto leo-leo' emi reke lutu-lutu emi darafoo ma, adas ma'ee' ma jintan. Sekonaa te, emi mafarene heni Manetualain atoran penting nara! Huu fo emi ta masoda roo-tetu'. Emi ta sue-lai lahenda kasian ara. Ma emi ta masoda tuka maroo Manetualain hihii-nanaun. Malole lena' emi tuka Manetualain atoran masososa Na dei, besa' ko reke babati' esa neme babati' sanahulu mai soa-neu' Manetualain.f 24 Emi dale poke', tehuu ubea' taon de emi bei nau matudu eno' fee lahenda feke'? Emi tao atoran losa leo lulutu-rarae' a neu, fo madenu lahenda feke' ara tuka, tehuu Manetualain atoran penting naan seli a, emi ta tukan fa. Sama leo' emi see heni pena-mumuu reme emi oe nininu ma mai. Tehuu banda sela' leo-leo' apa a, emi odo katema' ana!
25 Emi mesen agama ma lahenda Farisi ra! Emi lahenda dea-mata'! Neu' ko emi soe, nana huu emi safe noi bika-mako mara poo' dea nara losa makadidilan tuka emi atoran agama ma. Sekonaa te poo' dale nara kekeo' mesan, neni' emi nonoi-tatao na'o, ma tendetuu-dalesala mara.
26 Lahenda Farisi poke' emin! Safe maulu' emi bika-mako mara poo' dale nara dei! No ria naa, poo' dea na boe bisa makamoi'!
27 Emi mesen agama ma lahenda Farisi ra! Emi lahenda dea-mata'! Neu' ko emi hapu soe, nana huu emi sama leo' rates mana cet fula'. Lahenda mete rita dea na, sona malole na seli. Tehuu nai dale', henu' no lahenda mana mate' a dui-aalun ma naboo puru'.g 28 Emi leo naa' boe! Emi mahii' tao ao mara dadi' lahenda lalao-lalafu'. Lahenda mete emi neme dea' mai, sama leo' lahenda dale roo-tetu'. Sekonaa te emi dale mara, henu' no hihii-nanau' tadalu'. Huu fo emi dedea feke', tao feke' ma mafarene heni Manetualain pareta nara.
29 Emi mesen agama ma lahenda Farisi ra! Emi lahenda dea-mata'! Neu' ko emi hapu soe! Emi tao rates bau-ina' soa-neu' Manetualain mana nesi matan ma paroong matalolole lahenda roo-tetu' ara roo-raten, tehuu emi bei madale tadalu'. 30 Tehuu emi mae, ‘Uni' ko leo ami masoda tepo-lele' esa moo ami bei-ba'im, tantu ami ta tuka maisa Manetualain mana nesi mata nara.’ 31 No ria naa, emi manaku ao mara mae, emi boe tadalu' a sama leo' bei-ba'i mara. 32 De malole lena' emi maru'u-malosa' bei-ba'i mara tadalun!
33 Tetebes ara emi tadalu' sama leo' meke manuu raso'. Bate emi mae Manetualain ta huku emi fa? Tantu Ana tu'u emi leo ai-pila naraka dale' meu! 34 Nenene! Neu' ko Au fee emi Au lahenda nadedenu Kara, ela ara ranori-rafada ma ratudu emi Manetualain eno masoda roo-tetu Na. Tehuu neu' ko emi maisa ruma, ma paku mamate ruma rai ai kake'. Emi li'u-fepa ruma rai uma mamaso' ara dale', ma ruma bali emi ese-rumu si losa' ara ralai reme kota esa mai leo kota feke' reu. 35 Fai a ulu na emi bei-ba'im naisa Habel. Sekonaa te ria, lahenda dale roo-tetu'. Emi bei-ba'im raisa la'o raroo lahenda dale roo-tetu' a neme tititi-nonosi' esa leo tititi-nonosi feke'. Losa leo Sakaria, Barakia ana na. Ara raisa ni nai Uma Mamaso Yahudi Ina a kintal na, nanenea' mei tutunu-hohotu'. Huu no emi tuka bei-ba'i mara tadalu na, de emi muste lepa-masaa ma lahenda dale roo-tetu' sira daa na katema'. 36 Tebe! Emi fo ri' bei masoda nai besa' ia neu' ko hapu huhuku', nana huu emi bei-ba'i mara tao hihii-nanau' tadalu' sira nai fai a ulu na.”
Ramatua Yesus kasian neu' lahenda Yerusalem ara
37 “Lahenda Yerusalem emin! Emi maisa Manetualain mana nesi mata nara, ma pia maisa lahenda nadedenu' fo ri' mai tulu-fali emi a. No ria naa, au lele'o emi kose-kose fo leo Au mai, sama leo' manu ina' a nasuru-nahapa' ana nara rai dila na dale'. Tehuu emi ta nau. 38 Huu ria naa, Manetualain ta nau tao dale' neu' emi kotam ma Uma Mamaso Yahudi Inam so'. De balahaa-binesa', te dadi lino-nees. 39 Nenene matalolole! Ta doo' a so' te emi ta mita Au, tehuu neu' ko fai bea ma Au atafali selu' mai, sona emi io-oa Au ia Manetualain Anan. Emi manaku leo naa', besa' ko emi mita selu' Au.”