Ramatua Yesus fee dedea nasasama' la'e-neu' bini-kee nai dae rupa' ara
4
Lai' esa de, Yesus leo dano Galilea a neu selu'. Lahenda dodou' mai eo ra Ni. Boe ma Ana ae leo ofa mana nafu' esa nai naa lain neu, de natuu' nanori-nafada. Basa lahenda manai mada' lain ramanene neu' Ana.a
Markus 4:1-20
3 “Emi nenene matalolole! Lahenda esa kari bini-kee nai ria oka-tinen. 4 Fai fo ana kari bini-kee sira, ruma tuda rai eno'. Boe ma manupui' ara mai, de seseu rabasa bini-kee sira. 5 Bini-kee ruma tuda rai dae batu. Bini-kee sira mori lalai', nana huu dae a niis a. 6 Tehuu ledo a nahaa, boe ma nupu nara mamale de mate si. Huu fo oka nara ta tora losa dae dale'.
7 Bini-kee ruma bali tuda rai matema' a. De matema' a amu naisa nupu' sira losa' ta bisa raboa. 8 Tehuu bini-kee ruma tuda rai dae isi'. Bini-kee sira mori, boe ma rambau-ina losa' rabuna-raboa. Ruma reni buna-boa' desi lena lai' telu hulu, ruma desi lena lai' nee hulu ma ruma desi lena lai' natun esa.
9 De emi bea manuu ridoo', sona, nenene matalolole!”
Ubea' taon de Ramatua Yesus pake dedea nasasama'
10 Fai' fo Yesus mesa' ana, ana mana tuka dea kasanahulu dua nara, ma lahenda feke' hida fo ri' ramanene Yesus nanori-nafadan a, ara mai raneta ro Ni. Ara hule fo Ana nafada dedea nasasama' ria sosoa na. 11 Yesus nataa nae, “Huu no emi nau bubulu' matetu' Manetualain pareta Na, de Au afada mema' dedea nasasama' ria sosoa na. Tehuu kalu lahenda feke', sona Au anori-afada si pake dedea nasasama'. 12 Lahenda feke' sira sama leo' Manetualain mana nesi mata Na dui' mema' nae,
‘Ara rita, tehuu ta ralela'.
Ara ramanene, tehuu ta bubulu'.
Neme' naa ela boso' ramahere Manetualain,
fo Manetualain ta parluu fee ampon neu' asa.’”b
Ramatua Yesus nafada dedea nasasama' la'e-neu' bini-kee ria sosoa na
13 Boe ma Yesus nafada si dedea nasasama' ria sosoa na nae, “Kalu emi bei ta mala dedea nasasama' ria sosoa na, sona tao leo' bea fo emi bisa mala dedea nasasama feke' ara sosoa na? 14 De ria sosoa na leo ia': lahenda fo kari bini-kee ria, nana sama leo' lahenda fo tui-beka Manetualain Hara-dasin. 15 Ma bini-kee fo tuda rai eno' losa' manupui' ara raa henis, sama leo' lahenda fo namanene Manetualain Hara-dasin. Tehuu ta doo bea boe', te nitu ra malaka na mai de hai neni Hara-dasi' a neme' lahenda ria dale na mai. 16 Bini-kee fo tuda rai dae batu, sama leo' lahenda fo namanene, ma sipo' Hara-dasi' ria no namaho'o. 17 Tehuu Hara-dasi' ria ta naoka-nasamu. Huu ria naa, ta nana peda' nala' doo' a nai lahenda ria dale na. Fai fo lahenda feke' tao nasususa' ana, nana huu sipo' Hara-dasi' ria, boe ma ana tu'u-tapa henin tuti' a. 18 Ma bini-kee fo tuda nai matema' a talada, sama leo' lahenda fo namanene Hara-dasi' ria. 19 Tehuu ana nasapute no urusan rupa' ara, ela nasoda tuka lole-napu dae-bafo'. De basa nasapute' sira, seti heni Hara-dasi' ria neme dale na mai, losa' ta hapu buna-boa'. 20 Tehuu bini-kee fo tuda rai dae isi', sama leo' lahenda fo pasa' ridoo na ela sipo' Hara-dasi' ria, ma tuka Manetualain hihii-nanaun. De ana tao noi hihii-nanau' malole ra, sama leo' bini-kee mabuna-maboa' ria. Ruma rabuna-raboa desi lena lai' telu hulu, ruma desi lena lai' nee hulu ma ruma desi lena lai' natun esa.”
Boso' tatana etu dedede ana' neni' lapaneu
21 Yesus dedea naroo neme' ofa' ria lain mai. Ana fee tamba dedea nasasama' esa bali nae, “Leo' bea! Lahenda dede na dedede ana' a, boe ma tatana etu ni nai lapaneu dale', emi parnaa mita, do ta'a! Do, tao ni neu' roa' a fiki dale na? Ta'a, hete? Kalu tao leo naa', sona ta nahaa so'. Lahenda muste tao dedede' ria neu' mamana madema ela nahaa.c
Markus 4:21-41
22 De hata fo besa' ia nafuni', neu' ko nananita'. Ma hata fo besa' ia lahenda ta ralela' ana, neu' ko ralela' ana.d 23 Bea nanuu ridoo', sona nenene matalolole.
24 Afi matalolole! Kalu emi uku-sudi lahenda feke' nonoi-tataon, sona lahenda uku-sudi emi leo' naa boe. Manetualain boe uku-sudi emi leo naa'. Tehuu Ria uuku-susudin bera lena bali.e
25 Kalu lahenda saka matetu' Manetualain hihii-nanaun, sona ana boe-boe malela'. Tehuu kalu lahenda ta tao dale' neu' Manetualain hihii-nanaun, sona ana boe-boe pakanaa.”f
Ramatua Yesus fee dedea nasasama' la'e-neu' bini-kee mana mori ao'
26 Yesus dedea tamba bali nae, “Manetualain nusa Na tamba bau-ina' sama leo' bini-kee fo ri' lahenda sele-karin nai oka-tine. 27 Leo mae lahenda ria fali fo suku do foa, ta nafarene bini-kee sira so'. Tehuu bini-kee sira ranupu ma boe-boe rambau-ina. 28 Huu fo bini-kee sira mori ao nara, mulai rarana, rabuna, raboa losa' raisi. 29 Kalu hade a namatasa, sona manuu oka' a noi mai etu-oru' a. Manetualain nusa Na leo' naa boe. Basa sira nana, Manetualain ri' noi-tao.”g
Ramatua Yesus fee dedea nasasama' la'e-neu' ai deke' lutu ana'
30 Yesus dedea bali nae, “Au tamba selu' dedea nasasama' esa, leo ia': emi bisa masasama' Manetualain lahenda nara. Masososa' na noi baiana' asa, tehuu mate'e na boe ma dodou' asa. 31 Ria sama leo' ai deke' lutu ana'. 32 Tehuu kalu ita sele ai deke' ria, ana mori ma nambau-ina te dadi ai huu bau-ina'. Boe ma manupui' ara mai saka ai lao' de rarunu reu' naa.”
33 Ria nana Yesus eno nanori-nafadan neu' asa tuka sira dudu'a-aafin. 34 Kalu nanori-nafada lahenda ra, sona Ana pake dedea nasasama'. Tehuu kalu Ana nanori-nafada ana mana tuka dea nara, sona nafada dedea nasasama' ria sosoa-raraan katema'.
Ramatua Yesus tao na ani ina' a namate
35 Ledo leodaen ria, Yesus bei nai ofa' lain. Ana nadenu ana mana tuka dea nara nae, “Hela laa fo ita leo seri' teu.”
36 Boe ma ara sa'e ofa' sama-sama ro Yesus. De ara la'o ela lahenda kadodou-ina' sira reu' naa. Tehuu ruma sa'e tuka ofa feke'. 37-38 Fai ria, Yesus fua laka Na neu' ainulu a de suku namanee nai ofa bui'. Ta doo bea boe' te ani ina' a foa. Nafa ra toto'o, de oe a nala Yesus asa ofan dale', losa' kura bai' henun. De ana mana tuka dea ra bii raan seli. Boe ma ara fafae Yesus rae, “Papa! Foa dei! Ita saka' bolo ria' so. Tehuu Papa ta tao' dale' neu' ami!”
39 Yesus namanene leo' naa, boe ma Ana foa, de nahara neu' ani a nae, “Mamate leo'!” Ana pareta dano ria nae, “Tena leo!” Ani a namate ma dano a tena tuti' a. 40 Boe ma Yesus nafada ana mana tuka dea nara nae, “Ubea' taon de emi basa bii'? Emi ta mamahere Au, do?”
41 Basa si bii' ma heran, de ara beidea rae, “Te lahenda ia nana bea ia? Losa' nafa-ani ramanene neu' Ana!”