Ramatua Yesus fee dedea nasasama' la'e-neu' lahenda sele-kari bini-kee nai dae rupa'
13
Fai ria boe Yesus kalua neme uma ria mai, de neu natuu' nai dano Galilea suu na. 2 Boe ma lahenda dodou' mai eo raa Ni. Ana ae leo ofa mana nafu' esa nai naa lain neu, de natuu' fo nanori-nafada. Basa lahenda fo rai mada' lain ara ramanene neu' Ana.a 3 Ana nanori-nafada si pake dedea nasasama' dodou'. Ana tui nae, “Lahenda maue-maosa esa kari bini-kee nai ria oka-tinen. 4 Fai fo ana kari bini-kee sira, ruma tuda rai eno'. Boe ma manupui' ara seseu rabasa bini-kee sira.5 Bini-kee ruma tuda rai dae batu. Bini-kee sira mori lalai', nana huu dae a niis a. 6 Tehuu ledo a nahaa, boe ma nupu nara mamale, de mate si. Huu fo oka nara ta tora losa dae dale'.
7 Bini-kee ruma bali tuda rai matema' a talada. De matema' a amu naisa nupu' sira.
8 Tehuu bini-kee ruma tuda rai dae isi'. Bini-kee sira mori, boe ma rambau-ina losa' rabuna-raboa. Ruma reni buna-boa' desi lena lai' telu hulu, ruma desi lena lai' nee hulu, ma ruma desi lena lai' natun esa.
9 Bea nanuu ridoo', sona nenene matalolole!”
Ramatua Yesus nafada nae ubea' taon de Ana nanori-nafada pake dedea nasasama'
10 Boe ma Yesus ana mana tuka dea nara ratane Ni rae, “Ubea' taon, de Papa manori-mafada lahenda kadodou' sira pake dedea nasasama'?”
11 Yesus nataa nae, “Huu no emi nau bubulu' matetu' Manetualain pareta Na, de Au afada mema' dedea nasasama' ria sosoa na. Tehuu kalu lahenda feke', sona Au anori-afada pake dedea nasasama'. 12 Huu fo lahenda bea saka matetu' Manetualain hihii-nanaun, neu' ko Ana fee ni boe-boe nalela'. Tehuu lahenda fo ta tao dale' neu' Manetualain hihii-nanaun, neu' ko Ana tao naan dadi pakanaa'.b 13 Au anori-afada si pake dedea nasasama', nana huu:
‘Ara rita,
tehuu ta ralela'.
Ara ramanene,
tehuu ta bubulu'.’
14 Sira sama leo' lahenda fo ri' Manetualain mana nesi matan Yesaya dui' nae,
‘Neu' ko emi mamanene,
tehuu emi ta malela'.
Neu' ko emi mita,
tehuu emi ta bubulu' hata fo dadi a.
15 Huu fo lahenda ia ra dale nara tea-mepe',
ara tao rapake ridoo nara,
ara tao rapoke mata nara.
De neme' naa ela ridoo nara pake si,
ma neme' na ela mata nara poke si.
Neme' naa ela Au boso' puli a si,
nana huu ara ta tao dale' neu' Au.’c
16 Tehuu emi, maua-manale! Huu fo emi mata mara rita, ma emi ridoo mara ramanene. 17 Mamahere Au! Fai a ulu na Manetualain mana nesi mata nara, ma lahenda dale roo-tetu' ara rahii' rita hata fo ri' emi mitan, tehuu ara ta bisa. Sira boe rahii' ramanene hata fo ri' emi mamanenen, tehuu ara ta bisa.”d
Ramatua Yesus nafada dedea nasasama' la'e-neu' bini-kee ria sosoa na
18 Yesus dedea basa leo' naa, boe ma nafada si nae, “Besa' ia emi nenene dedea nasasama' ria sosoa na. 19 Bini-kee fo tuda rai eno' a, nana ri' lahenda fo namanene Hara-dasi' la'e-neu' Manetualain hohomu pareta Na, tehuu ana ta nalela' matetu'. Boe ma nitu ra malaka na nalea neni Hara-dasi' a neme lahenda ria dale na mai.
20 Bini-kee fo tuda rai dae batu, nana ri' lahenda fo namanene Manetualain Hara-dasin, ma ana sipo' no dale namaho'o. 21 Tehuu Hara-dasi' ria ta naoka-nasamu. Huu ria naa, ta nana peda' nala' doo' a nai lahenda dale na. Fai fo lahenda feke' tao nasususa' ana nana huu sipo Hara-dasi' ria, boe ma ana tu'u-tapa henin tuti' a.
22 Ma bini-kee fo tuda rai matema' a talada, sama leo' lahenda fo namanene Hara-dasi' ria. Tehuu ana nasapute no urusan rupa' ara, ela nasoda tuka lole-napu dae-bafo'. De nasapute' sira seti heni Hara-dasi' ria neme dale na mai, losa' ta nanuu sosoa-raraa'.
23 Tehuu bini-kee fo tuda rai dae isi' a, sama leo' lahenda fo pasa' ridoo na sipo' Hara-dasi' ria, ma tuka Manetualain hihii-nanaun. De ana tao noi hihii-nanau' malole ra, sama leo' bini-kee mabuna-maboa' ria. Ruma rabuna-raboa desi lena lai' telu hulu, ruma desi lena lai' nee hulu, ma ruma desi lena lai' natun esa.”
Ramatua Yesus fee dedea nasasama' la'e-neu' fii a nai oka-tine a talada
24 Yesus nafada selu' dedea nasasama' esa nae, “Manetualain hohomu pareta Na, sama leo' lahenda esa kari bini-kee malole nai ria oka-tinen. 25 Nahatu de basa lahenda ra suku ramanee, boe ma lahenda tadalu' a mai, de kari fii nai oka-tine ria. 26 Fai fo oka-tine ria mulai kalua buna-boan, boe ma ata ra rita fii a mori sama-sama ro hade-gandum rai naa. 27 De ara rafada manuu oka-tine a rae, ‘Papa! Fai' naa ra, ami sele-kari bini-kee malole nai papa oka-tinem, hete? Ubea' taon, de besa' ia hapu fii dodou'?’
28 Malaka ria nataa nae, ‘Ria nana, lahenda tadalu' a nonoi-tataon.’
Lahenda mana noi ra rafadan rae, ‘Papa, ami fe'a heni fii sira, do?’
29 Tehuu ana nataa nae, ‘Boso'! Huu fo emi fe'a fii ra, te neu' ko fe'a meni no hade-gandum ara boe. 30 Neme' naa ela ara mori sama-sama losa ledo-fai e'etu-o'oru'. Neu' ko fai ria, besa' ko au afada lahenda mana oru ra ae, “Emi mabubua ma fii sira, ma puputu mabua si, fo hotu henis. Basa besa' ko mabubua ma buna-boa malole ra, fo madai si reu' mamana pepeda-fufua' dale'.’””
Ramatua Yesus fee dedea nasasama' la'e-neu' ai deke lutu ana'
31 Boe ma Yesus dedea bali nae, “Au tamba selu' dedea nasasama' esa bali, ela emi bubulu' mae Manetualain dadi Mane' soa-neu' lahenda dodou'. Ria lahenda nara, mulai masososa na baiana', sama leo' ai deke lutu ana' fo ri' lahenda selen nai oka-tine. 32 Leo mae ai deke' ria, lutu ana' a naan seli, tehuu kalu ana mori ma nambau-ina, te dadi neu' ai huu bau-ina' nai oka-tine. Losa' manupui' ara rarunu rai doo-ranan.”
Ramatua Yesus fee dedea nasasama' la'e-neu' ralu tetei'
33 Yesus tamba selu' dedea nasasama' esa nae, “Manetualain lahenda nara, sama leo' ralu tetei' fo ina' esa ame nabuan no uu' saku esa.e Boe ma roti a ae losa' bau' basa, huu no ralu tetei kabaiana' ria.”
Ramatua Yesus pake dedea nasasama', ela nanori-nafada hihii-nanau' bebeu' fo lahenda bei ta parnaa ramanenen
34 Yesus nanori-nafada lahenda dodou' pake tutui' dodou' leo naa'. Ana nanori-nafada lahenda dodou' pake dedea nasasama'. 35 Ana nanori-nafada leo naa' tuka hata fo Manetualain mana nesi matan dui' mema' nae,
“Neu' ko Au anori-afada pake dedea nasasama'.
Neu' ko Au afada hihii-nanau' fo lahenda bei ta parnaa ramanenen,
mulai neme Manetualain adu dae-bafo' a losa' besa' ia.”f
Ramatua Yesus nafada dedea nasasama' la'e-neu' fii a nai oka-tine talada a sosoa na
36 Yesus la'o ela lahenda kadodou' sira, de fali leo uma neu. Boe ma ana mana tuka dea nara hule Ni rae, “Papa! Mafada fee ami dedea nasasama' la'e-neu' fii a sosoa na!”
37 Yesus nataa nae, “Lahenda fo kari bini-kee malole a, nana Au, Lahenda Dae-bafo' Tetea' ia. 38 Ma oka-tine a, nana ri' dae-bafo' ia. Bini-kee malole a, nana ri' lahenda fo dadi reu' Manetualain lahendan. Ma fii a, nana ri' nitu ra malaka na lahenda nara. 39 Lahenda tadalu' fo ri' kari fii a, nana ri' nitu ra malaka na. Ma ledo-fai e'etu-o'oru' a, nana ri' dae-bafo' a nonoe na. Lahenda manaetu-manaoru buna-boa' a, nana si' Manetualain eila'o-limalopen rai nusatetu-ikutema' a. 40 Tepo' fo dae-bafo' a nonoe na, ara rabubua ra fii sira ela hotu henis. 41 Au, Lahenda Dae-bafo' Tetea' ia, neu' ko fee eila'o-limalope reme nusatetu-ikutema' a mai. Neu' ko ara rabubua ra basa lahenda fo ta tuka Manetualain pareta Na. Ma sira boe rabubua ra basa lahenda fo duduku-papau' lahenda feke', ela boso' tuka Manetualain pareta Na. 42 Neu' ko ara tu'u lahenda tadalu' sira basa si leo ai-pila naraka a reu, sama leo' hotu heni fii ra. Nai naa, besa' ko ara doidoso raan seli, ma dola-ramatani losa doo na neu. 43 Tehuu lahenda bea nasoda roo-tetu' tuka Manetualain hihii-nanaun, neu' ko ara leo rahere ro sira Papa Mane na nai nusatetu-ikutema' a. Nai naa, ara rahaa-rakaledo sama leo' ledo a. Lahenda bea nau bubulu' neu Au, pasa' natalolole ridoo na!”
Ramatua Yesus fee dedea nasasama' la'e-neu' hata mabeli
44 Yesus tamba selu' dedea nasasama' esa nae, “Lahenda fo nau bubulu' Manetualain hohomu pareta Na, sama leo' lahenda fo nahii' hapu hata mabeli, lahenda parnaa nafunin nai dae bibia ana' esa dale'. Lahenda ria ali, boe ma ana hapu hata ria nai naa, huu ria naa namaho'o naan seli. Ana nadofu fali' hata ria. De ana nalale fali neun fo se'o heni ria hata-heton katema'. Boe ma ana neu asa na dae ria, ela ana bisa nanuu mema' hata mabeli ria.”
Ramatua Yesus fee dedea nasasama' la'e-neu' mutiara mabeli
45 Yesus dedea selu' nae, “Lahenda fo nau bubulu' Manetualain hohomu pareta Na, sama leo' lahenda papalele esa nahii' hapu mutiara mabeli. De ana saka mutiara fo asa. 46 Fai fo ana nita mutiara malole ina' esa, boe ma ana nalale fali neun fo se'o heni ria hata-heton katema'. Boe ma ana asa na mutiara ria, ela ana bisa nanuu ni.”
Ramatua Yesus fee dedea nasasama' la'e-neu' rahii puka'
47 Yesus dedea selu' nae, “Manetualain hohomu pareta Na, sama leo' manadolu-manadala ra po'i puka' esa nai dano a. Puka' ria nala ika rupa' ara. 48 Ika' henu puka' a, boe ma manadolu-manadala ra hela reni puka' ria leo dano a suu na neu. Boe ma ara ratuu' de rahii ika' neme puka' a mai. Ika malole, sona ara peda si reu' sosoro' dale'. Tehuu ika' ta malole, ara tu'u henis.
49 Leo' naa boe dae-bafo' a nonoe na. Neu' ko Manetualain eila'o-limalopen reme nusatetu-ikutema' a mai heo heni lahenda tadalu' ara reme lahenda dale roo-tetu' a mai. 50 Neu' ko ara tu'u basa lahenda tadalu' sira leo ai-pila naraka a reu. Nai naa, besa' ko ara doidoso raan seli, ma dola-ramatani losa doo na neu.”
Ramatua Yesus nanori-nafada la'e-neu' nanori paraa', ma nanori bebeu'
51 Yesus dedea basa nae leo' naa, boe ma natane si nae, “Emi malela' basa-basan fo ri' bisinaa' a Au dedea a, do?”
Ara rataa rae, “Malela', Papa!”
52 Yesus nataa natafali' asa nae, “Malole! Huu fo mesen agama fo homu nahere Musa atoran fo ri' mana dui' mema' neme fai a ulu na mai, ma ana homu nahere Au nanori-nafada besa' ia ka, sona ria sama leo' manuu uma' esa nahii' soi mamana pepeda-fufuan, ela natudu ria hata-heto paraa nara, ma hata-heto bebeu nara.”
Lahenda Nasaret ara tipa-tola' Ramatua Yesus
53 Yesus nanori-nafada lahenda kadodou' ara pake dedea nasasama', basa boe ma Ana la'o ela mamana' ria, 54 de fali leo Ria koro Na neu. Nai naa, Ana leo uma mamaso' dale' neu nanori-nafada lahenda ra. Basa lahenda fo ramanene Ni, ara heran raan seli. Ara beidea rae, “Lahenda ia malela na seli! Ana nanori nai bea ia? Tao leo' bea, de Ana bisa tao tanda heran sira? 55 Sekonaa te Ria noi tukan ai a ana na. Ita talela' Ria maman, Maria; ma fadi nara, si' Yakobis, Yusuf, Yudas ma Simon. 56 Ita talela' Ria feto nara boe, huu fo ita basa leo nai koro' esa! De Ana hapu malelan ria, neme bea' mai bali? Ma Ana hapu kuasa bau-ina' ria, neme bea' mai bali?” 57 Huu ria naa, bolii nara puru', losa' ara ta ramanene Ni so'.