Ramatua Yesus puli na soldadu Roma a ata na
7
Yesus nanori-nafada basa, boe ma Ana leo kota Kapernaum neu. 2 Nai naa komendaan soldadu Roma esa, nanuu ata kamaheren esa. Ata ria, namahedi de noi mamaten. 3 Fai ria komendaan a namanene la'e-neu' Yesus, boe ma ana nadenu lasi' Yahudi hida reu hule Ni mai puli na atan ria. 4 Ara hule Yesus, fo tuka no si neu puli na lahenda ria. Ara hule Ni rae, “Ramatua'! Lahenda Roma ia, lahenda malole! Ria naraa, Ramatua' tulu-fali ni. 5 Huu fo ana tao fee ita uma mamaso', te ana sue-lai ita lahenda Yahudi.” 6 Boe ma Yesus tuka no si.Ara bei ta losa uma, tehuu komendaan ria fee nonoo nara mai rafada Yesus rae, “Ramatua' a boso' masosota aom mai bali, huu fo au ta araa sipo' Ramatua' a nai au uma ka. 7-8 Ma au ta araa leo Ramatua' a mai boe'. Makaledo na ri', Ramatua' a manuu kuasa. De sadi mafada meme' naa' mai, tantu au ata ka te'e na aon. Au bubulu' hihii-nanau' ia ra, huu fo au malaka kara ranuu kuasa fo pareta au. Ma au boe anuu kuasa fo pareta soldadu kara. Kalu au pareta soldadu esa ae, ‘Leo ele' muu!’ sona neu. Kalu au ae, ‘Mai dei!’ tantu ana mai. Ma kalu au adenu ata ka ae, ‘Moi ia!’ tantu ana noi-tao ni. De sadi Ramatua' a moi mafada' a, tantu au ata ki ria, te'e na aon.”
9 Yesus namanene na ria, boe ma Ana heran. Ana lipe aon nasare na lahenda kadodou' fo ri' tuka Ni a, boe ma nae, “Heran! Doo-naru basa ia, Au bei ta parnaa aneta oi lahenda Yahudi esa namahere tebe-tebe sama leo' lahenda Roma ia!”
10 De Yesus nahani' naa. Boe ma komendaan a nonoo nara fali reus. Losa komendaan uma na, te rita ata ria te'e na aon so.
Ramatua Yesus nafoa na fali' ina-falu esa ana na
11 Balahaa', boe ma Yesus no ana mana tuka dea nara leo koro' esa reu, nade Nain. Lahenda dodou' la'o sama-sama ro si. 12 Ara ranenea' koro' ria lelesu bafa na, boe ma lahenda bubua' esa rolo reni lahenda mana mate' esa reu ratoin. Mana mate' ria nana, ina-falu esa ana mane ise na. 13 Yesus nita ina-falu ria, boe ma noi sue' ana. De Ana nafada ina' ria nae, “Mama! Boso' boe dola bali!”
14 Yesus nanenea' leo mata neu, de oi la'e tandu fo rapeu' mana mate' a neu lain a. De lahenda fo ri' rolo mana mate' a ara rate'e. Yesus dedea no mana mate' ria nae, “Ana tou ana' on! Foa leo!” 15 Boe ma ana' ria nasoda selu', ana foa de natuu' ma mulai dedea no lahenda fo rapadei' eo ra ni a. Yesus nafada ina' ria nae, “Mama! Sipo' ma ana ma.”
16 Basa lahenda fo rai naa ara bii raan seli! Boe ma ara io-oa Manetualain rae, “Manetualain nadenu mana nesi mata kaheren esa mai soa-neu' ita!” Feke' ara bali rae, “Manetualain mai nai ita talada, fo natudu dale malole Na!” 17 Boe ma tutui' ria tui-bekan nai propensi Yudea, losa nusa feke' ara boe.
Yohanis Mana Sarani' a fee lahenda nadedenu' leo Ramatua Yesus reu
18-20 Yohanis Mana Sarani' a ana mana tuka dea nara ramanene hihii-nanau' fo Yesus tao a. De ara reu tui Yohanis nai bui dale'. Boe ma ana nadenu lahenda dua reu ratane Yesus rae, “Tebe-tebe Papa nana Kristus fo ri' ami mahanin a? Do, ami muste mahani lahenda feke'?”
Lahenda sira dua losa Yesus, boe ma ratanen rae leo' naa.
21 Fai ria lahenda nadedenu' sira rai naa, nana Yesus puli na lahenda dodou' reme hedis rupa nara. Ma usi kalua nitu reme lahenda nitu heke' ara mai. Puli na lahenda poke' ara de bisa rita dae.
22 Boe ma Yesus nafada Yohanis ana mana tuka dea nara nae, “Emi fali meu mafada a'a Yohanis basa-basan fo ri' emi mita mata' ma mamanene, sama leo' Manetualain mana nesi matan Yesaya dui' nae,
‘Lahenda poke' a, nita dae.
Lahenda luku' a, foa fo la'o.
Lahenda kamahedis kusta, dadi makamoi'.
Lahenda pake' a, namanene.
Lahenda mana mate' a, nasoda selu'.
Lahenda kasian a, namanene Tutui Malole.’a
23 Ma fali meu mafada a'a Yohanis mae, ‘Tebe maua-manale' neu' lahenda fo namahere tebe-tebe neu' Au.’”
24 Yohanis ana mana tuka dea nara fali, boe ma Yesus dedea no lahenda kadodou-ina' sira la'e-neu' Yohanis nae, “Tepo' fo emi meu saka Yohanis nai mamana lino-nees a, emi afi mae nau meu mita lahenda dae-bafo' rupa-lole leo bea'? Emi bubulu' ria ta lahenda noe-na'u sama leo' mila' a, de ani a fuun sona liu' neu-mai! 25 Emi ta meu mita lahenda pake bua-loas mabeli, huu fo lahenda rupa' leo naa' a leo nai uma mane'. 26 De emi meu dama bea nai naa? Emi afi mae meu saka Manetualain mana nesi matan? Tebe! Tehuu ria nana mana nesi mata nanuu kuasa bau-ina'. 27 Huu fo mana dui' mema' nai Susura Makamoi' a la'e-neu' Yohanis nae,
‘Nenene! Au adenu lahenda Ki,
fo soi eno' soa-neu' O.’b
28 Nai dae-bafo' ia, ta hapu lahenda esa kahere' lena Yohanis boe'. Tehuu nai Manetualain nusa-namon, lahenda hihika-rereke taa' a nanuu kuasa lena neme Yohanis.”
29 Lahenda kadodou' sira ma mana susu doi-bea ra ramanene Yesus dedea-nafadan, boe ma bubulu' rae, Manetualain nana eno masoda roo-tetu'. Huu fo maulu na Yohanis sarani si ma nanori-nafadas. 30 Tehuu lahenda agama Farisi, ma lahenda malela atoran agama Yahudi ra, ta nau tuka Manetualain hihii-nanaun. Huu ria naa, ara ta hule Yohanis sarani si.c
31 Yesus natane nae, “Au araraa' lahenda besa' ia a, no ubea'? Lahenda dae-bafo' rupa leo bea' ia ra? 32 Sira sama leo' ana' ara ratuu' rai pasar. Ara raloo bou-bou ma esa namuu esa rae,
‘Ami basa fuu suling rame-rame,
tehuu emi ta roke-foti mamaho'o-matadale.
Ami soda sosoda luumata-pinuidu,
tehuu emi ta dola.’
33 Huu fo Yohanis Mana Sarani' a ta ninu anggor, ma puasa sona emi mae, ‘Nitu heke'!’ 34 Tehuu besa' ia, Au Lahenda Dae-bafo' Tetea', inu anggor ma ua roti leo' bale-bale. Boe ma emi mae, ‘Lahenda dae-bafo' maoro'! Mana mafu'! Neu natia' no mana susu doi-bea ra! Partei esa no lahenda papake taa' ara! Ta dodoo aon!’ 35 Tehuu emi tanda Au dedea-nafada Ki! Lahenda fo bubulu' matetu', ara tuka Manetualain hihii-nanaun.”
Ramatua Yesus naa-ninu nai Simon uma na
36 Nai kota ria, lahenda Farisi esa, nade, Simon. Lai' esa de, ana hule Yesus asa mai raa-rinu nai uma na. Yesus asa sipo ra naloo' ria, boe ma ara reu fo ratuu' raa-rinu. 37 Fai ria, ina mana sosoa esa namanene nae, Yesus naa-ninu nai naa. Boe ma ana mai, ma homu neni mina maboo meni mabeli boto esa. 38 Ana nanenea' leo Yesus neu, nesi' dea Na. Ana sunda' undulaka na nai Yesus ei dae Na. Tuti' a ana dola losa' luu na titi la'e Yesus ei Na. Ana seka Yesus ei Na neni' laka-doo na, ma de'i nasarerei Yesus ei Na. Boe ma ana po'a mina maboo meni' ria neu' Yesus ei Na.d
39 Simon bubulu' ina' ria leleo-lala'on, de nita leo' naa, boe ma dodoo nai dale na nae, “Kalu tebe-tebe Yesus nana Manetualain mana nesi matan, sona Ana bubulu' ina' fo ri' tatai la'e Ni a, ina mana sosoa. Ia dadi buti so, Manetualain mana nesi matan ta ia! Huu fo lahenda malalao-malalafu' ta bole nabua no lahenda masala-masiko'!”
40 Tehuu Yesus bubulu' hata fo Simon afi naan, boe ma Ana nae, “A'a Simon! Leo ia'. Au saka' afada a'a ka hihii-nanau' esa.”
Simon nataa nae, “Neu'! Papa Mesen, mafada leo.”
41 Tuti' a Yesus tu'u dedea' fee ni nae, “Lahenda esa, biasa fee lahenda feke' a tonda doi nara. Ana parnaa fee lahenda dua tonda doi nara. Esa tonda doi lilo fula' natun lima, ma esa sona noi lima hulu' a. 42 Tehuu losa fai na, boe ma dua si ta rabe'i fee fali' doi' sira so'. Huu ria naa, lahenda fo ri' fee dua si tonda doi' a noi sue' asa, de ana ta fee dua si bae huta nara so'. Kalu tuka a'a Simon dale dodoo ma, neme lahenda mana tonda doi' sira dua, bea ri' sue-lai kadodou na neu' lahenda fo ri' fee si tonda doi' a?”
43 Simon nataa tuti' a nae, “Tantu lahenda fo ri' huta na dodou' a!”
Yesus nataa nae, “Tebe leo' naa, a'a!”
44 Boe ma Ana lipe aon, nasare na ina' ria, ma nafada Simon nae, “Soba a'a Simon mete masudi ina' ia. Bisinaa' a Au maso' leo o uma ma mai a, a'a ta sadia oe, ela Au safe ei ka tuka ita hadas na. Tehuu ina' ia, naoe Au ei ka neni' ria luu na, ma ana seka makamomoin neni' laka-doo na. 45 Ma bisinaa' a, a'a Simon sipo' Au leo uma ma dale' mai a, ta de'i Au tuka ita biasa na. Tehuu mulai Au maso' leo uma ia dale' mai, ina' ia ta hahae dede'i Au ei ka. 46 Bisinaa' a Au maso' mai a, a'a Simon mafarene heni hadas a, de ta po'a mina neu' Au laka Ka. Tehuu ina' ia po'a mina maboo meni mabeli neu' Au ei Ka. 47 A'a Simon nenene matalolole! Tebe ina' ia sala-sikon dodou', tehuu Manetualain sae-safe heni si, huu fo Ana natudu susue na no tanda makasi kadodou na neu' Au. Lahenda fo nameda aon nae, ana ta tao sala' dodou', sona ria boe ta hapu ampon dodou'. Huu ria naa, ana ta sue-lai ma ta hule makasi neu' Manetualain.”
48 Boe ma Yesus nafada ina' ria nae, “Au sae-safe heni o sala-sikom so!”
49 Lahenda fo ratuu' raa-rinu bela' a rai naa a, esa naboboto' esa rae, “Te nae Ria nana bea? Ana naparani fee ampon neu' lahenda sala-sikon! Sekonaa te noi Manetualain nanuu haak fo sae-safe heni lahenda sala-sikon!”
50 Tehuu Yesus nafada ina' ria nae, “Huu no o mamahere Au, de Manetualain po'i-tata na o. Fali muuko no mole-dame!”