2-6 Nai naa tou' esa nitu ra heke raan losa' namulun. Ana leo nai rates ara. Hatu-leledon lei'-lei nafeo basa lete' manai naa ra, ana po'irao', ma kasi-kasi mesan. Ma tututu na ao-ina na hina-hina' mesan neni' batu. Tehuu bara'ai na seli. Lahenda ta bisa heke ralan, leo mae reni' rante besi boe ta ralan. La'i-la'i lahenda heke ei-liman reni' rante besi, tehuu rui naetu rante besi, ma helu na tepa besi ria neme ei na mai. Bara'ai na seli losa' ta hapu lahenda esa bisa naparani soa' ana boe'.

Yesus asa onda reme ofa' lain mai de molo ei nara nai mada' lain, bei rai doo' a, te lahenda kamulus ria nita si so. Boe ma ana nalai kalua neme rates sira mai, leo Yesus neu de sunda' undulaka na neu Yesus mata Na. 7-8 Yesus nita lahenda ria mata-idun, boe ma nae, “Nitu makaresi' on! Kalua meme' lahenda ia mai leo!”

Boe ma lahenda ria kasi nambera-ina nae, “O nau tao au leo bea'! Au bubulu' O, nana tebe Yesus, Manetualain mana kuasa a Anan. Au hule O boso' ese-rumu au!”

9 Yesus natane ni nae, “O nade bea?”

Lahenda ria nataa nae, “Au nade Legion, huu fo ami dodou' maan seli, nonoo' leo soldadu batalion dodou'.”

10 Nitu ra pake lahenda ria fo hule Yesus boso' nadenu si kalua reme' nusa' ria mai.

11 Ta doo' a neme naa' mai lahenda hida ranea bafi roka esa. Bafi sira bate rifun dua. Ara totofi saka nanaa' nai lete' a suu na. 12 Nitu sira hule Yesus rae, “Madenu ami maso' leo bafi sira dale' meu.”

13 Yesus namanene leo' naa, boe ma nataa. De nitu sira kalua reme lahenda ria mai de maso leo bafi sira dale' reu. Bafi rifu kadua' sira ralai ratotofa' tuka lete' a suu na leo dano dale' reu, de mate basa si.

14 Manea bafi ra rita leo' naa, boe ma ara bii raan seli. Ara ralai reu rafada basa lahenda rai koro manenea' sira. De lahenda dodou' kalua mai reu rita hata mana dadi' ria. 15 Ara mai raneta ro Yesus, ma rita lahenda nitu heke' ria natuu' nai naa boe. Dudu'a-aafin malole a, ma ana pake bua-loas so. Lahenda sira rita leo' naa, boe ma basa si bii, nana huu ara bubulu' bea ri' bisa usi heni nitu dodou-ina' reme' lahenda ria mai, sona tebe ria lahenda kahere'. 16 De basa si tui rule-feo koro' ara rae, rita mata' lahenda kamulus ria te'e na aon, ma bafi sira mate basa si. 17 De lahenda koro isi' ara mai hule Yesus foa ela sira mamana na.

18 Fai fo Yesus saka' ae leo ofa' lain neu, boe ma lahenda nitu heke' bisinaa' a hule Ni fo ana tuka boe.

19 Tehuu Yesus ta nau. Ana nafada nae, “Malole lena' o fali fo mafada basa kileo-boboki mara, hata fo Manetualain taon soa-neu' o. Ma mafada mae Manetualain sue na o seli'.”

20 Boe ma lahenda ria fali neu nafeo basa nusa' esa no kota sanahulu fo ri' biasa rae, ‘Dekapolis’. Ana tui hata fo Yesus taon soa-neu' ana. Basa lahenda fo ramanene tutuin ria, ara heran raan seli rae, “Mema' tebe!”

21 Yesus asa sa'e ofa' fali leo dano a seri' reu. Fai ria ara onda reme ofa' lain mai, lahenda dodou-ina' mai eo ra Ni.

22 Nai naa boe lahenda esa nade Yairus. Ria nana malaka uma mamaso' nai kota ria. Ana bei nita Yesus, boe ma sunda' undulaka na neu Yesus mata Na 23 de ana hule nae, “Papa! Au ana feto ana ka besa' ko teu ni sanahulu dua, namahedi noi mamaten. Papa tulu-fali fo muu puli maan dei.”^a

24 Boe ma Yesus tuka leo Yairus uma na neu.

Tehuu ara mulai la'o, lahenda dodou' tuka Ni, losa' ara raseseti ao neme poo ii ma poo ona Na mai.

25 Nai lahenda kadodou-ina' sira talada, ina' esa namahedi po'a daa teu' sanahulu dua so. 26 Ana nabasa doi-talin ma hata-heton fo bae doter ara. Tehuu ta hapu esa bisa puli naan boe', hedin ria ta te'e. 27-29 Ina' ria namanene dodou' la'e-neu' Yesus. De ana naseseti nai lahenda kadodou' sira talada, fo nau nanenea' nesi' Yesus dea Na. Ana afi nai dale na nae, “Sadi au afaroe la'e badu Na boe, au te'e ao ki.”

Ana bei nafaroe la'e Yesus badu Na, kekeneu te hedis po'a daa na te'e tuti' a. Nameda naan te'e matetu'.

30 Naraa no besa' ria boe, Yesus nameda naan bara'ai kalua neme ao Na dale' mai. Boe ma Ana lipe dea Na de mete lahenda kadodou' sira. Ana natane nae, “Emi bea ri' nafaroe la'e Au badu Ka?”

31 Ana mana tuka dea nara rataa rae, “Papa mete aom leo. Lahenda desi-desi basa ia raseseti ao na. Papa matane mae, ‘Bea ri' nafaroe la'e Au badu Ka?’”

32 Tehuu Yesus mete nalelei', ela bubulu' bea ri' bisinaa' a nafaroe la'e Ni. 33 Ina' ria namanene Yesus natane nae leo' naa, boe ma ana bii naan seli. De ana sunda' undulaka na neu' Yesus mata Na manaku basa-basan nae, “Papa! Au ri' afaroe la'e Papa badu Ma.”

34 Yesus nataa ni nae, “Huu no mama mamahere tebe-tebe neu' Au, de mama te'e ma aom. Besa' ia, mama fali no namaho'o leo.”

35 Yesus bei dea-dea nae leo' naa, te lahenda esa neme Yairus uma na mai, nafada nae, “Kasian, ana feto ana' a maten so. De boso' tao masosota Papa Mesen, fo boso' neu bali.”

36 Tehuu Yesus ta tao dale' neu lahenda ria dedea na. De Ana nafada Yairus nae, “O boso' bii'! Mamahere Manetualain.” 37 Boe ma Yesus la'o ela ana mana tuka dea feke nara. Tehuu noo Petrus, Yakobis no fadin Yohanis, la'o raroo. 38 Fai ria ara losa Yairus uma na, ara rita lahenda dodou' rapue raan seli', ma ramanene ruma boreu. 39 Yesus kodi uma dale' neu. Boe ma Ana natane si nae, “Ubea' taon de emi mapue ma boreu leo' ia? Ana' ia ta maten fa. Ana suku ria!”

40 Ara ramanene Yesus dedea nae leo' naa, boe ma basa si hi'a ma ramumulu-ramamae' Ana.

Ana nadenu basa si dea' reu. Boe ma Ana naloo na ana' ria ina-ama nara, ma ana mana tuka dean telu, de basa si maso' leo kama dale' reu. 41 Yesus tai na ana' ria lima na, ma Ana dedea neu' ana' a pake dedea Aram nae, “Talita kum!” (Sosoa na nae, “Ana feto on! Foa leo!”)

42-43 Kekeneu te, ana feto ria foa de lala'o. Yesus nadenu ana' a mama na nae, “Fee ni naa leo!”

Basa lahenda fo rita mana dadi' ria, ara heran. Tehuu Yesus horo si nae, “Emi boso' mafada lahenda esa boe mae, Au fee ni nasoda selu'!”