Ara dedea rae leo' naa, huu fo bei fai' dua bali, te lahenda Yahudi ra fai malole na, fo ri' rae, ‘Fai Paska’ ma ‘Feta Roti Ta Pake Ralu Tetei'.’ Ma fai malole ria, nana ara rafarene fai a ulu na, tepo' fo bei-ba'i nara kalua reme dae Masir mai.^a

3 Nai koro Betania, lahenda esa, nade Simon. Maulu' na lahenda rahia' ana, nana huu hapu hedi kusta. Tehuu besa' ia te'e na aon so.

Bei ta losa fai malole ria, te Yesus asa reu raa-rinu nai Simon uma na. Fai ria ara raa-rinu, te ina' esa leo Yesus mai. Ana homu neni boto esa, taon neme batu a mai. Isi na mina boo meni tea' mabeli bera'.^b Ina' a beru natepa boto ria tatana na. Boe ma ana po'a mina ria neu' Yesus laka Na feen titi bai-bai dadi tanda nae, ana fee hada-horomata neu' Yesus.

4 Lahenda feke' hida raa-rinu rai naa boe. Ara rita ina' ria tao leo naa', boe ma ara ramanasa, de dedea koao' rae, “Ina' ubea' ia, de tu'u heni hihii' mina boo meni mabeli bera' ia! 5 Malole lena' ana se'o mina ria! Fo babati doi kadodou-ina' sira fee lahenda hata taa' ara! Huu fo mina boo meni' ria, beli na sama leo' lahenda kadi na teu' esa.” Boe ma ara rasa'ai ni.

6 Tehuu Yesus nataa si nae, “Emi boso' tao masususa' ina' ia! Neme' naa! Au amaho'o, nana huu ana po'a mina boo meni' ia neu' Au ao-ina Ka. 7 Lahenda kasian ara ro emi kose-kose. De emi bisa tulu-fali sira nai fai bea a. Tehuu Au, ta doo' a so', te Au ta sama-sama oo emi.^c 8 Au soda Ka ta doo' a so'. Ma bisinaa' a ina' ia po'a mina a, nana ana sadia na Au ao-paa Ka, sama leo' ria kari na laesa' rampe neu' Au popora Ka. 9 Mafarerene' matalolole! Nai mamana' bea a, Manetualain Tutui Malole Na tui-bekan rule-feo dae-bafo' ia, tantu sira boe tui ina' ia malole na. Ela basa lahenda rafarene ni.”

10 Esa neme Yesus ana mana tuka dea kasanahulu dua nara, nade Yudas Iskariot. Ana kalua neu saka malaka agama Yahudi malaka nara, fo se'o Yesus fee si. Ana losa, boe ma nafada ria maksud na. 11 Malaka ra ramanene Yudas dedea nae leo' naa, boe ma ramaho'o raan seli. Ara helu rae, “Kalu o nau se'o Yesus fee ami, tantu ami bae.” Yudas kalua, boe ma ana mulai saka eno' fo fee Yesus leo sira neu.

12 Fai ria, fai masososa' neme lahenda Yahudi ra fai malolen. Nai fai ria, ara biasa tunu roti ta pake ralu tetei', ma pau bibi-lopo boe. Yesus ana mana tuka dea nara ratane Ni rae, “Papa! Fai' ia, ita fai malole Paska na. De Papa nau ami meu' bea sadia mamana feta Paska?”

13 Yesus nadenu ana mana tuka dean dua nae, “Emi maulu' leo bendar meu. Nai naa neu' ko emi maneta mo tou' esa, nasaa neni oe neu' kusi ana' esa. Emi meu tuka ni. 14 Kalu ana kodi leo uma bea dale' neu, sona tuka leo naa' meu. Mafada manuu uma' ria mae, ‘Papa! Ami Papa Mesen ma hule mamana' esa, ela Ana paken fo tao feta Paska no ana mana tuka dea nara.’ 15 Neu' ko lahenda ria natudu fee emi kama maloa esa nai uma a tada' lai. Ana sadia na kama ria namadai so. De emi dua meu' naa fo sadia nanaa'.”

16 Boe ma dua si leo bendar a reu. Nai naa ara rita no mata' basa-basan fo Yesus nafada a. De ara sadia basa-basan, ela Yesus asa raa feta Paska reu' naa. Basa de dua si reu raloo Yesus asa.

17 Ledo a tena, boe ma Yesus no ana mana tuka dean sanahulu dua si leo naa' reu.

18 Ara ratuu' raa-rinu sama-sama. Ara bei raa, te Yesus dedea nae, “Emi nenene! Lahenda esa neme emi mai, neu' ko ana se'o Au leo lahenda feke' ara uu.”^d

19 Ara ramanene leo' naa, boe ma dale nara ta tama so'. De sira esa-esa ratane Yesus rae, “Lahenda fo ri' Papa mafada a, ta au fa, hete?”

20 Yesus nataa nae, “Lahenda fo naboro roti na leo mako ia dale' neu sama-sama no Au, ria ri' neu' ko se'o heni Au. 21 Mafarerene'! Au, Lahenda Dae-bafo' Tetea', muste mate sama leo' ara dui' mema' nai Manetualain Susura Makamoi Na dale'. Tehuu besa-besa! Lahenda fo se'o heni Au a, neu' ko lepa na soe a! Malole lena' kalu mama na ta boki ni!”

22 Ara bei raa, boe ma Yesus hai na roti balo' esa, de hule makasi neu' Manetualain. Ana tetebi roti ria, de loo fee ana mana tuka dea nara, ma nafada nae, “Roti ia, nana Au ao-paa Ka. Hai maan fo mia leo.”

23 Basa de Ana hai na galaas fo oe anggor nai dale'. Ma Ana hule makasi neu' Manetualain. Ana loo galaas ria leo ana mana tuka dea nara neu fo rinu. 24 Ana nae, “Anggor ia, nana Au daa Ka. Neu' ko faa ela po'i-tata na lahenda dodou'. Au daa Ka besa' ia natetu na hata fo Manetualain helu mema' neme' fai a ulu na mai. Hai maan fo minu leo.^e

25 Nenene matalolole! Mulai neme hatun ia, Au ta inu oe anggor so'. Losa' Au atuu' pareta sama-sama oo Papa Ka nai nusatetu-ikutema' a, besa' ko Au inu bali.”

26 Boe ma ara soda sosoda' esa, io-oa Manetualain. Hatun ria boe, ara kalua leo lete Saitun reu.

27 Ara bei la'o-la'o, te Yesus nafada mema' asa nae, “Neu' ko selubai' hatun ia, emi basa malai ela Au. Ria sama leo' mana dui' mema' nai Susura Makamoi' dale' nae,

29 Petrus nadedea laka nae, “Papa! Leo mae lahenda feke' ara basa si ralai ela Papa, tehuu au ta'a.”

30 Yesus nataa nae, “Petrus! Mafarerene'! Hatun ia, manu' ara bei ta koko'oa kalai' dua na, te o mafada lai' telu mae, ta malela' Au.”

31 Tehuu Petrus nataa no hara bera nae, “Ta'a, Papa! Kalu Papa mate, au boe mate sama-sama. Au ta alai ela Papa, ma ta alena Papa boe'.”

Petrus nonoo feke nara boe esa' ko nafada' aon nae leo' naa.

32 Yesus asa losa oka' esa nai lete Saitun, nade ‘Getsemani’. Yesus nafada ana mana tuka dea nara nae, “Emi matuu mahani' ia! Au saka' uu' ele hule-haradoi.”

33 Yesus naloo na Petrus, Yakobis ma Yohanis, fo sama-sama ro Ni. Mulai neme oras ria, boe ma dale Na susa ma ta tama so'. 34 Ana nafada si nae, “Au dale Ka susa naan seli. Au ameda aan nonoo' nae Au saka' mate! Emi matuu' manea nai ia dei!”

35-36 Ana lali doo' a bai' leo mata neu, boe ma sunda' undulaka Na, Ana hule-haradoi nae, “Papa manasue-manalai! Kalu Papa mataa, sona boso' Au lepa-asaa doidoso rupa leo ia' losa' mate. Au bubulu' mema' ae, ta hapu hata esa fo Papa ta bisa taon fa. De kalu bisa sona, Papa tu'u madoo doidoso ia neme Au mai. Tehuu boso' tuka Au hihii-nanau Ki; ela tuka noi Papa hihii-nanaum.”

37 Basa de Ana fali leo ana mana tuka dean sira telu neu, tehuu ara suku ramanee. Ana fafae nafoa si, de nafada Petrus nae, “Petrus!^h O suku, do? Au nai naa noi hatemata', tehuu emi ta bisa manea bai' boe'! 38 Madidila' mata mara dei. Foa fo manea mo Au! Emi dale mara rahii' tao malole, tehuu ao-paa' a ta nabe'i. De malole lena' hule-haradoi, ela kalu hapu sosoba' boe, ta naseki emi.”ⁱ

39 Yesus neu hule-haradoi lai' esa bali. Ana hule selu' neu' Manetualain, fo boso' nataa' Ana lepa-nasaa doidoso ria. 40 Basa de Ana fali leo ana mana tuka dean sira telu neu. Tehuu ara suku selu', huu fo mata nara rambera. Ana fafae nafoa si, tehuu ara ta bubulu' rataa Ni rae leo' bea so'.

41 Yesus neu hule-haradoi selu' kalai' telu na. Basa de Ana fali, boe ma fafae nafoa si. Ana nae, “Emi bei suku bali? Dai so! Foa leo! Lahenda fo nau se'o heni Au, Lahenda Dae-bafo' Tetea' ia, nanenea' so. Besa' ia ara nau hopu ra Au, fo fee Au leo lahenda tadalu' ara uu. 42 Foa leo! Madidila' mata mara fo mete leo ele' meu! Lahenda fo nau se'o heni Au a, mai so. Mai ita teu soru' asa!”

43 Yesus bei dedea nae leo naa', te Yudas no lahenda dodou' mai. Ara reni tafa' ma ai tutuku', fo saka' hopu Yesus. Ara tao leo naa' tuka pareta neme malaka Yahudi ra. Sira nana malaka agama ra malaka nara, mesen agama ra, ma lasi' ara. 44 Yudas nafada mema' asa nae, “Emi mete matalolole! Au de'i bea, sona emi hopu maan leo! Huu fo emi saka lahenda a nana ri naa'.”

45 Fai ria Yudas asa losa naa, boe ma ana nasuu tino' Yesus. Ana nae, “Papa Mesen!” Boe ma Yudas holu Ni ma de'in. 46 Lahenda kadodou' sira tuturu mata reu hopu Yesus.

47 Tehuu Yesus lahendan esa lesu na tafa' laka tuku na, de tati naetu lahenda esa ridoo na. Lahenda fo ri' hapu hina' a, nana malaka agama Yahudi malaka bau-ina na atan. 48 Yesus dedea no lahenda fo ara mai hopu Ni a nae, “Leo' bea? Emi mae Au lahenda tadalu', de emi meni tafa' ma ai tutuku' mai hopu Au? 49 Tuka-tuka fai' Au anori-afada emi nai Manetualain Uma Mamaso Yahudi Ina Na dale', tehuu ta hapu lahenda esa hopu na Au boe'. Mai hopu ma Au leo! Huu fo basa-basa ia ra mana dui' mema' neme ulu' mai nai Manetualain Susura Makamoi Na.”^j

50 Yesus ana mana tuka dea nara bii raan seli. De ara ralai foa elan mesa' Ana.

51 Nai naa boe, ana tou muri-ana' esa, tutuka' Yesus dea na. Ana naluse lafa-tende ana' esa. Lahenda sira nau hopu ni boe. 52 Tehuu ara rano ra noi lafa-tende na. De ana nalai po'irao' neu ni, huu fo bii naan seli.

53 Boe ma ara hela roo Yesus leo malaka agama Yahudi malaka bau-ina na uma na neu. Nai naa, lahenda bau-ina' ara tesa so. Si' malaka agama ra malaka nara, mesen agama ra ma lasi' ara.

54 Fai ria hopu roo Yesus, Petrus boe tuka nafufuni' nesi bui', losa malaka agama Yahudi malaka bau-ina' a uma na. Ana maso' leo kintal dale' neu, de natuu' namaneru ai sama-sama no lahenda manea fo rai naa.

55 Nai uma ria dale', malaka agama ra malaka nara dedea-rao' ro lahenda fo ratuu' rai mamana naetu dedea agama. Basa si saka buti fo nau fee sala' neu Yesus, nana huu ara nau huku raisa Ni. Tehuu ara ta hapu buti esa boe'. 56 De raloo ra sakasii dodou' fo nau ratuda Yesus. Tehuu sira dedean ria, esa ta naraa no esa boe'.

57 Sakasii hida foa rapadei' de tui rapuputa' rae, 58 “Ami mamanene lahenda ia dedea nae, ‘Neu' ko Au fate heni Uma Mamaso Yahudi Ina fo ri' rafoan pake lahenda dae-bafo' a lima na. Basa fai' telu bali, neu' ko Au afoa fali' Uma ria, tehuu ta pake lahenda dae-bafo' a lima na.’”^k 59 Tehuu sira dedean ria, esa ta naraa no esa boe'.

60 Malaka agama Yahudi malaka bau-ina na foa napadei' neu' lahenda mana ee dedea' ara matan, de natane Yesus nae, “Lahenda dodou' kolaa' O so. Tehuu ubea' taon de O moi nenee' a?”

61 Yesus ta nahahara bai' boe'. Boe ma malaka agama Yahudi malaka bau-ina na natane selu' Ana nae, “Soba O mafada dei! Tetebes ara O nana Kristus, Manetualain Anan fo Ana helu mema' neme fai a ulu na mai a, do?”

62 Yesus nataa nae, “Mema' tebe. Ria nana, ri' Au ia. Neu' ko emi basa mita Au, Lahenda Dae-bafo' Tetea' ia, atuu' nai nusatetu-ikutema' a nai Manetualain boboa ona Na. Ria kuasa Na marela-masa'a! Neu' ko Au oo Ni sama-sama homu pareta! Boe ma neu' ko Au onda eme' nusatetu-ikutema' a mai, oo oa' a.”^l

63 Malaka agama Yahudi malaka bau-ina na namanene Yesus dedea nae leo' naa, namanasa naan seli, losa' noi sii' badu manaru na. Ana dedea nambera, nafada basa lahenda fo ratuu' rai mamana naetu dedea' ria nae, “Ita ta parluu mana sakasii so'! 64 Emi mamanene mata', Ria ri' nafada aon, hete? Ana so'u aon dadi neu' Manetualain Anan. Dedea namumulu-namamae' bau-ina' ia! Tuka atoran agama a, kalu lahenda tao aon sama no Manetualain, lahenda ria muste mate! De besa' ia emi maetu' mae, leo' bea?”

Basa si raetu' rae, “Lahenda ia mema' sala! De ana muste hapu huhuku mamates!”^m

65 Boe ma lahenda hida oru' mata reu, fo mudi radiu Yesus ape. Ara poti etu mata Na, ma popo'o Ni. Ara ratane Ni rae, “Kalu O nana Manetualain mana nesi matan, sona soba maneu', bea ri' popo'o O ia?” Boe ma ara pareta lahenda manea Uma Mamaso Yahudi Ina a, fo hela roo Yesus. Ara roo Ni la'o ma fepa ramimina' Ana.

66-67 Fai ria, Petrus bei natuu' nai kintal. Malaka agama Yahudi a malaka bau-ina na ata inan esa nita ni namaneru ai. Ana bebesa natalolole Petrus mata-idun, boe ma dedea nae, “Bisinaa' a, o boe sama-sama mo Yesus, lahenda Nasaret ria, hete?”

68 Tehuu Petrus nataa nae, “Ta'a! Ubea' taon de o matane mae leo' naa? Au ta alela' Ana.” Petrus dea' neu, de napadei' nai lelesu bafa' a. [Naraa la'e oras ria, boe ma manu' a koko'oa.]ⁿ

69 Boe ma ata ria nita selu' Petrus. De ana nafada lahenda fo rai naa nae, “Tou' ia nana esa neme lahenda sira mai boe.”

70 Petrus nadedea laka nae, “O bate mamulu? Au ta alela' Lahenda ria!”

Ta doo bea boe' te, lahenda feke' esa nai naa nafada Petrus nae, “O bei masararali bali mae, o ta sama-sama mo lahenda sira! Emi basa lahenda Galilea, hete?”

71 Tehuu Petrus nalena bali nae, “Au soo-supa! Au ta alela' lahenda Ria!”

72 Naraa la'e ana dedea nae leo' naa, boe ma manu' a koko'oa kadua na. Petrus nafarene Yesus dedea bisinaa Na nae, “Manu' a bei ta koko'oa lai' dua, te o malena Au la'i telu so.”

Petrus nafarene leo' naa, boe ma ana dola nasae'edu.