Ramatua Yesus Tutui Malole Na
tuka
Mateos susura na
Ramatua Yesus bei-ba'in nade nara
1
1-2 Susura' ia tui la'e-neu' Yesus Kristus, Lahenda fo ri' neme' ulu' mai Manetualain helu mema' nau fee Ni mai. Ria nana, mane' Daud ma ba'i Abraham tititi-nonosin.Mulai neme ba'i Abraham losa mane' Daud, nana tititi-nonosi' sanahulu haa. Ria bei-ba'in nade nara si':
Abraham boki Isak,
Isak boki Yakob,
Yakob boki Yahuda no a'a-fadi nara,
3 Yahuda boki Peres ma Sera (sira mama na, nade Tamar),
Peres boki Herson,
Herson boki Ram,
4 Ram boki Aminadab,
Aminadab boki Nahason,
Nahason boki Salmon,
5 Salmon boki Boas (ria mama na, nade Rahab),
Boas boki Obet (ria mama na, nade Rut),
Obet boki Isai,
6a Isai boki Daud.
6b-11 Neme Daud losa tepo' fo lahenda nusa Israel nana tu'u leo Babel reu, nana tititi-nonosi' sanahulu haa, si':
Daud boki Soleman (ria mama na, ri' maulu na Uria sao na).
Soleman boki Rehabeam,
Rehabeam boki Abia,
Abia boki Asaf,
Asafa boki Yosafat,
Yosafat boki Yoram,
Yoram boki Usia,
Usia boki Yotam,
Yotam boki Ahas,
Ahas boki Heskia,
Heskia boki Manase,
Manase boki Amos,b
Amos boki Yosias,
Yosias boki Yekonya no fadi nara tepo' fo sira nana tu'u leo Babel reu.c
12-16 Tepo' fo sira nana tu'u leo Babel reu losa Yesus, nana tititi-nonosi' sanahulu haa, si':
Yekonya boki Saltiel,
Saltiel boki Serubabel,
Serubabel boki Abihut,
Abihut boki Elyakim,
Elyakim boki Asor,
Asor boki Sadok,
Sadok boki Akim,
Akim boki Eliut,
Eliut boki Eliasar,
Eliasar boki Matan,
Matan boki Yakob,
Yakob boki Yusuf.
Yusuf, sao Maria. Maria ri' boki Yesus Kristus.
17 De mulai neme Abraham losa Daud, nana tititi-nonosi' sanahulu haa; neme Daud losa sira nana tu'u leo Babel reu tititi-nonosi' sanahulu haa; ma neme Babel mai losa boki Kristus, nana tititi-nonosi' sanahulu haa.
Maria boki Ramatua Yesus
18 Maria boki Yesus a, tutui na leo ia':
Maria no Yusuf rahihii ao'. Dua si bei ta parnaa suku rabua sama leo' sao tou' no sao ina', matetu' na Maria nairu neme Manetualain Dula-dale Malalao-malalafu Na mai.d 19 Tepo' fo Yusuf bubulu' Maria nairu, boe ma ana nau namaetu' noo ni. Tehuu ana ta nau tao namamae' Maria nai lahenda dodou' matan, nana huu ria nanuu dale lalao-lalafu'. De ana nau namaetu' namaninino'.
20 Ana bei afi neu-mai, hatu' esa boe ma ana nalamei. Nai meis ria, ana nita Manetualain eila'o-limalopen nai nusatetu-ikutema' a mai nafada ni nae, “Yusuf! O ia, mane' Daud a tititi-nonosin. O dale ma boso' doda' sao Maria. Huu fo ana nairu ana' ria, nana huu Manetualain Dula-dale Na kuasan. 21 Neu' ko Maria boki ana tou' esa. O muste foi Ni, nade Yesus, huu fo Ria neu' ko po'i-tata naa Manetualain lahenda nara reme sala-siko nara mai.”e f
22 Hihii-nanau' ia neu' ko dadi leo' naa, nana huu Manetualain nafada mema' neme ulu' mai. Ana parnaa pake mana nesi matan Yesaya fo dui' nae,
23 “Emi nenene! Neu' ko ana feto esa bei ao-tema,
tehuu nairu so.
Boe ma boki naa Ana tou' esa.
Ara foi Ni nade, Imanuel.”
(Nai dedea Ibrani, ‘Imanuel’ sosoa na:
Manetualain sama-sama no ita.)g