Lasarus mamate na
11
1-2 Lahenda esa, nade Lasarus. Ana leo nai koro' Betania, sama-sama no feton dua, Maria ma Marta. (Maria ia ri', po'a mina boo meni' neu' Ramatua Yesus ei Na, ma ana seka neni' laka-doo na.) Lai' esa de, Lasarus hedi bera'.a 3 Boe ma feto nara fee hara' leo Yesus neu rae, “Ramatua' a tiam Lasarus hedi bera'.”4 Yesus namanene hara' ria, boe ma Ana dedea nae, “Hedis ia ta namate ni. Manetualain nau pake hihii-nanau' ia fo natudu Ria marela-masa'an. Ela lahenda ra io-oa Au, Manetualain Ana Na.”
5 Yesus sue-lai Marta, no fadin Maria, ma dua si fadin Lasarus. 6 Fai fo Ana namanene rae, Lasarus namahedi, Ana bei nahani' lee Yarden seri' fai' dua bali. 7 Boe ma nafada Ria ana mana tuka dea nara nae, “Mai ita fali selu' leo Lasarus nusa-namon nai propensi Yudea.”
8 Tehuu Ria ana mana tuka dea nara rafada Ni rae, “Papa Mesen. Bei lalai' ia, lahenda Yahudi ra malaka nara nau pia raisa Papa nai naa. Tehuu besa' ia Papa nau fali selu' naa' muu bali?”
9 Yesus nataa nae, “Boso' bii'! Tuka-tuka fai', ledo a nahaa neme balahaan losa leodaen. Ria jam sanahulu dua, hete? Kalu lahenda la'o nai makaledo', sona ta natundu fa. Huu fo makaledo' a nahaa nai dae-bafo' a, ela lahenda bisa rita dae. 10 Tehuu kalu lahenda la'o nai maiu', ana natundu nasarerei, huu fo ana ta nanuu makaledo'.”b
11 Yesus dedea basa nae leo' naa, boe ma Ana nafada si nae, “Ita tia-lain Lasarus suku so. Tehuu neu' ko Au fafae afoa ni.”
12 Boe ma ana mana tuka dea nara rae, “Papa. Kalu ana suku, sona sosoa na nae neu' ko te'e na aon, hete?”
13 Ara dedea rae leo' naa, nana huu afi rae Yesus dedea la'e-neu' susuku' a. Sekonaa te Ana dedea la'e-neu' Lasarus mamate na. 14 Boe ma Yesus nafada neu' tea na nae, “Leo ia'. Lasarus maten so. 15 Leo mae ana mate a, Au ne'e ka naa ta hata-hata, huu fo besa' ia mana dadi' ria tao na emi bisa mamahere Au. Mai ita teu leo!”
16 Boe ma Tomas fo ri' hulen rae, “ana kadua',” nafada ana mana tuka dea feke' ara nae, “Mai leo! Malole lena' ita basa tuka teu, huu fo ita sadia mate too Ni boe.”
Ramatua Yesus leo Betania neu, o'oe-nanasi Marta
17-19 Boe ma Yesus asa leo koro Betania reu.
Koro' ria dodoo na neme kota Yerusalem mai noi kilo telu' a. Lahenda Yahudi dodou' reme naa' mai mete, ma o'oe-nanasi Marta no Maria.
Yesus asa losa naa, boe ma besa' ko ara bubulu', lahenda ra ratoi heni Lasarus fai' haa so.
20 Marta namanene rae, Yesus mai, boe ma ana kalua neu soru' Yesus. Tehuu Maria nahani' uma dale'. 21 Marta nafada Yesus nae, “Adoo, Ramatua'! Leo Ramatua' a nai ia, sona tantu au fadi ka ta mate ni. 22 Tehuu au amahere, Ramatua' a hule Manetualain ubea', sona tantu Ramatua' a hapu.”
23 Yesus nafada ni nae, “Marta! Neu' ko o fadi ma nasoda selu'.”
24 Marta manaku neu' Ana nae, “Au bubulu', nai dae-bafo' a nonoe na, kalu Manetualain fee basa lahenda mana mate' ara rasoda selu', neu' ko Ana fee au fadi ka nasoda selu' boe.”
25 Yesus nafada nae, “Au ri' fee lahenda mana mate' a nasoda selu'. Au ri' fee soda matetu' a. De lahenda bea namahere Au, leo mae mate ni boe, neu' ko ana nasoda. 26 Ma lahenda fo hapu soda matetu' ria, ma namahere Au, neu' ko nasoda naroo. Marta mamahere Au dedea Ka, do?”
27 Ana nataa nae, “Ia Ramatua'! Au amahere Ramatua' a nana, Kristus, Lahenda fo ri' Manetualain tudu mema' Ana neme ulu' mai. Ma Ramatua' a nana, Manetualain Anan, fo ri' Ana helu nau feen leo dae-bafo' ia mai.”
Ramatua Yesus dola
28 Marta dedea basa nae leo' naa, boe ma fali neu naloo fadin Maria, de naboboto' ana nae, “Papa Mesen mai so. Ana nau naneta no o.” 29-31 Maria namanene leo' naa, boe ma nalale foa neu saka Yesus. Lahenda Yahudi fo ri' o'oe-nanasi Maria nai uma dale' a, rita ni nalale foa dea' neu, boe ma ara tuka ni. Ara afi rae, ana saka' neu dola nai rates a.
Oras ria Yesus bei ta maso' leo koro' dale' neu. Ana bei nai mamana' fo ri' Marta naneta no Ni a. 32 Maria losa mamana' ria de nita Yesus, boe ma ana sunda' undulaka na neu' Yesus ei dae Na. Ana nafada Ni nae, “Adoo, Ramatua'! Leo Ramatua' a nai ia, sona tantu au fadi ka ta mate ni.”
33 Yesus nita Maria dola, ma lahenda Yahudi fo tuka ni a ara rasa'edu-boreu, boe ma Ana dale hedi, ma susa naan seli. 34 Ana natane nae, “Emi matoin nai bea?”
Ara rataa rae, “Ramatua', mai mete aom.”
37 Tehuu ruma bali dedea rae, “Lahenda ia, ri' tao na lahenda poke' a bisa nita dae. Ubea' taon, de Ana nataa' Lasarus mate ni?”
Lasarus nasoda selu'
38 Yesus dale hedi naan seli' bali. Boe ma Ana nanenea' leo lea' fo ri' ratoi Lasarus. Ara tatana etu lea' ria pake batu bau-ina' esa. 39 Yesus nadenu lahenda fo rai naa nae, “Eso heni batu ia neme' lea' a bafa na mai dei!”
Tehuu Marta, lahenda mana mate' a a'a na, nafada Ni nae, “Ramatua'! Ria maten fai' haa so! Tantu naboo' so.”
40 Yesus nafarerene' feen nae, “Mafarene bisinaa' a, hete? Au afada mema' ae, kalu tebe-tebe Marta mamahere Au, sona neu' ko bisa mita Manetualain marela-masa'an.”
41 Lahenda hida eso heni batu ria neme lea' a mai. Boe ma Yesus nakanaro leo lalai neu, ma nae, “Papa! Au hule makasi, nana huu Papa mamanene Au. 42 Neme ulu' mai Au bubulu', Papa mamanene Au la'o naroo. Tehuu besa' ia Au dedea ae leo' naa, ela lahenda fo rapadei rai ia bisa bubulu' Papa ri' madenu Au.” 43 Ana dedea basa nae leo' naa, boe ma naloo nambera nae, “Lasarus! Kalua leo!”
44 Boe ma lahenda mana mate' ria kalua neme lea' a mai. Lima-ein mana feo' neni' tema' tuka lahenda Yahudi ra hadan. Mata-idun nana poti' neni' tema' boe. Yesus nadenu lahenda fo rai naa nae, “Buka heni tema' sira, ela ana la'o!”
Ara saka eno' fo raisa Ramatua Yesus
45 Ara rita Yesus nonoi-tataon ria, boe ma lahenda Yahudi fo mai tiro-dama Maria, kadodou na ramahere Yesus. 46 Tehuu ruma bali leo lahenda partei Farisi ra reu, de tui si Yesus nonoi-tataon ria.
47 Malaka agama ra malaka nara, ro lahenda Farisi ra rabua fo dedea-rao'. Ara ratatane ao' rae, “Lahenda ria, tao tanda heran rupa'! De ita muste tao ubea' bali? 48 Kalu ita tataa' Ana, sona neu' ko basa lahenda ramahena Ni, sama leo' Ria dadi sira mane na. No ria naa, neu' ko mana pareta Roma soldadu nara mai tao ralulutu' ita Uma Mamaso Yahudi Ina na, ma ita lahenda nusan.”
49 Teu' ria, Kayafas dadi malaka agama ra malaka bau-inan. Ana nafada si nae, “Pakanaa' emin! Emi ta bubulu' hata esa boe'! 50 Huu fo malole lena' neu' emi, kalu noi lahenda esa' a mate soa-neu' basa lahenda ra. Kalu ta'a, sona neu' ko soldadu Roma ra tao ralulutu' lahenda nusa Yahudi a katema'!” 51 Kayafas ta dedea tuka noi ria hihii-nanau mesan. Manetualain pake ria bafa na, nana huu nai teu' na dalen, ria dadi malaka agama ra malaka bau-inan. Huu ria naa, Kayafas nafada mema' nae, neu' ko Yesus mate soa-neu' basa lahenda Yahudi ra. 52 Sekonaa te Ana ta mate soa-neu' noi lahenda nusa Yahudi ra, tehuu soa-neu' basa Manetualain anan fo kofela rai dae-bafo' a. Neu' ko Ana tao sira basa dadi lahenda nusa' esa.
53 Huu no Kayafas dedean ria, de mulai neme fai ria lahenda Yahudi ra malaka nara saka eno' fo raisa Yesus.
54 De Yesus ta natoda' aon nai lahenda Yahudi ra malaka nara talada. Ria no ana mana tuka dea nara la'o heni ao nara, leo kota esa reu, nade Efraim nanenea' mamana lino-nees. Boe ma ara leo lalai reu' naa.c
55 Tepo' ria agama Yahudi a fai malole Paska na nanenea'. Biasa lahenda dea dodou' mai rabua rai kota Yerusalem, ela tuka feta Paska rai naa. Ara mai raulu', fo tao makamoi ao-ina nara tuka atoran agama. 56 Lahenda makadoto' fo mai rai Yerusalem, ara saka Yesus nai naa. Ara rapadei rai Uma Mamaso Yahudi Ina a kintal na, ara ratatane ao' rae, “Tuka emi, sona leo' bea? Emi dodoo maan nana, Yesus mai tuka feta agama ia do, ta'a?” 57 Tehuu malaka agama ra malaka nara, ma lahenda Farisi ra pareta rae, “Kalu hapu lahenda bubulu' Yesus nai bea, sona mafada ami dei!” Sekonaa te maksud nara nana ara saka' hopu Ni.