Ramatua Yesus safe ana mana tuka dea nara ei nara
13
Fai malole Paska a bei ta mulai, te Yesus bubulu' Ria ledo-fain losa so, de Ana muste la'o ela dae-bafo' ia, ma fali leo Ria Papa Na neu nai nusatetu-ikutema'. Tehuu Ana sue-lai lahenda nara rai dae-bafo' ia, losa' Ana fee heni masoda Na katema' soa-neu' asa.2 Nitu ra malaka na duduku-papau' Yudas, Simon Iskariot ana na, fo se'o heni Yesus. Fai fo Yesus asa ratuu' raa feta Paska, boe ma Yudas naetu' nau tao leo naa'.
3 Yesus bubulu' Manetualain nadenu Ni leo dae-bafo' ia mai, ma ta doo' a so', te Ana muste fali selu' leo Manetualain neu. Ma Ana bubulu' Papa Na nai nusatetu-ikutema' a fee basa-basan reu' Ria lima Na. 4 Boe ma Yesus foa neme mei a mai, de olu heni badu manaru Na. Ana hai na handuk esa, de heke neu' ere Na. 5 Ana po'a oe neu' bokor ana' esa dale'. Boe ma Ana mulai safe ana mana tuka dea nara ei nara. Safe basa esa, sona Ana seka namadan neni' handuk fo ri' mana heke' nai ere Na. 6 Ana safe sira esa-esa ei nara. Losa Simon Petrus, boe ma ana natane Ni nae, “Ramatua' a saka' safe au ei ka boe, do?”
7 Yesus nataa ni nae, “Besa' ia, o bei ta bubulu' la'e-neu' hata fo Au tao a. Tehuu mate'e na neu' ko o bubulu'.”
8 Tehuu Petrus nafada Ni nae, “Boso' leo naa', Ramatua'! Au ta ataa' Ramatua' a safe au ei ka.”
Yesus nataa nae, “Kalu Au ta safe makamomoi o ei ma, sona o ta mabua-maesa mo Au.”
9 Simon Petrus nataa Ni nae, “Kalu leo' naa, sona Ramatua' a boso' safe noi au ei kara. Safe au lima kara, ma laka ka boe!”
10 Yesus nafadan ni nae, “Lahenda bea nadiu basa oe, sona parluu safe noi ei nara. Huu fo ao-ina na makamoi' a so. Tebe, emi dale mara makamoi' a, tehuu ta basan makamoi' a.” 11 (Yesus dedea nae leo' naa, nana huu Ana bubulu' bea ri' nau se'o heni Ni. Huu ria naa, Ana nafada nae, “Ta basan makamoi' a.”)
12 Yesus safe basa sira ei nara, boe ma Ana pake selu' badu manarun ria, de fali neu natuu' nai mei a. Ana natane si nae, “Leo' bea? Bisinaa' a Au safe emi ei mara a, emi bubulu' Au tatao Ki ria do, ta'a? 13 Emi hule Au mae, ‘Papa Mesen’ ma ‘Ramatua'’. La'e ria, huu fo tebe Au leo naa'. 14 Tehuu kalu emi Mesen ma no Ramatua ma, safe ei mara sama leo' ata esa, sona emi leo' bea? Emi boe muste malalau' esa no esa; conto leo-leo': emi boe muste esa safe esa ein. 15 Huu fo Au dadi conto soa-neu' emi. Au tao leo bea', sona emi tao leo naa' boe.a 16 Tebe-tebe! Au afada emi. Ata esa ta kahere' lena heni ria malaka na. Ma lahenda nadedenu' esa ta kahere' lena heni lahenda fo nadenun a.b 17 Huu no emi bubulu' hihii-nanau' ia ra, de kalu emi tao tuka leo naa', sona emi maua-manale.
18 Au ta dedea la'e-neu' emi basa. Au alela' matetu' lahenda fo Au teka-here si a. Leo mae leo' naa, tehuu ria muste natetu na mana dui' nai Manetualain Susura Makamoi Na nae, ‘Lahenda fo natuu' naa-ninu sama-sama no Au, ana hiru nasadea Au.’c 19 Au afada mema' emi, te kalu lahenda la'o ela Au leo' naa, sona emi bisa mamahere mae, Au ia Kristus. 20 Tebe-tebe! Au afada ae, bea sipo' no malole lahenda fo Au adenu ni a, sona ana sipo' Au ria boe. Ma bea sipo' Au, sona ria boe sipo' Manetualain fo ri' nadenu Au a.”d
Ramatua Yesus nafada mema' nae, neu' ko esa se'o heni Ni
21 Yesus dedea basa nae leo' naa, boe ma dale Na ta tama so'. Ana nafada ana mana tuka dea nara nae, “Tebe-tebe Au afada. Neme emi mai neu' ko esa se'o heni Au.”
22 Ria ana mana tuka dea nara ramanene leo' naa, boe ma sira esa relu esa, huu fo ara roi ramakokoa' a. Ara ta bubulu' maksud Na, nana bea. 23 Neme sira mai, esa Yesus sue ni (ri' au, Yohanis mana dui' susura' ia).e Au atuu' nai Yesus boboa Na. 24 Boe ma Simon Petrus aau' laka no au, fo atane Yesus maksud Na nana bea ria.
25 De au anenea' leo Yesus uu, boe ma atane Ni ae, “Ramatua', te lahenda ria nana bea?”
26 Yesus nataa nae, “Leo ia'. Au hai a roti bibia' esa, aboron neu' mako dale', boe ma Au feen leo lahenda ria neu.” Ana naboro basa roti a, boe ma Ana feen neu' Yudas, Simon Iskariot ana na. 27 Yudas sipo na roti ria, boe ma nitu ra malaka na maso' neu' dale na tuti' a. Yesus nafada ni nae, “O saka' tao ubea', sona malale taon leo. Boso' mahani bali.” 28 Tehuu lahenda feke' fo ratuu rai naa, ara ta bubulu' ubea' taon, de Yesus dedea nae leo' naa. 29 Huu fo Yudas dadi mana homu doi', de ruma afi rae Yesus maksud Na nadenu Yudas, “Neu asa hata soa-neu' feta Paska.” Ma ruma afi rae, Ana nadenu ni, “Neni fee lahenda manato'a-manataa' ara doi' bai'.”
30 Yudas sipo na roti ria, boe ma ana napue naroo' a leo dea' neu. Ana dea' neu a, nana hatu' so.
Pareta bebeu'
31 Yudas kalua, boe ma Yesus nafada nae, “Au, Lahenda Dae-bafo' Tetea'. Besa' ia losa ledo-fain fo Manetualain io-oa Au. Ma no eno' ria, neu' ko tao na lahenda bisa rita Manetualain marela-masa'an. 32 Huu no Au abua-aesa oo Manetualain, ma atudu Ria marela-masa'an, de besa' ia losa ledo-fain fo Ana io-oa Au.
33 Ana kara emin! Leo mae Au sue a emi seli, tehuu selu' baiana', te Au ta abua oo emi so'. Neu' ko emi saka Au, tehuu ta hapu Au. Au afada emi, sama leo' Au afadan neu' lahenda Yahudi ra malaka nara ae, ‘Au leo mamana' esa uu, emi ta bisa tuka naa' meu.’f 34 Au fee emi pareta bebeu' esa, leo ia': emi muste masue-malai ao esa no esa, sama leo' Au sue-lai emi. De emi muste masue-malai ao esa no esa.g 35 Kalu emi masue-malai ao leo' naa, sona basa lahenda bisa bubulu' emi nana Au ana mana tuka dea kara.”
Ramatua Yesus nafada mema' nae, Petrus saka' nalena Ni
36 Simon Petrus natane Ni nae, “Te Ramatua' a saka' leo bea' muu?”
Yesus nafada nae, “Au leo mamana' esa uu, o bei ta bisa tuka muu besa' ia. Tehuu mate'e na o leo naa' muu boe.”
37 Petrus natane Ni nae, “Ramatua'! Ubea' taon, de besa' ia Au bei ta bisa tuka uu? Au sadia mate soa-neu' Ramatua' a!”
38 Yesus nataa nae, “Tebe, do? O nau fee heni masoda ma fo mate soa-neu' Au? Matetu na leo ia': manu' a bei ta koko'oa, te o malena Au lai' telu so.”