2 Au io emi, nana huu leo mae leo' bea boe emi mafarene au la'o naroo. Ma emi bei tao tuka basa hihii-nanau' fo ri' au anori-afadan soa-neu' emi. Malole na seli! 3 Tehuu au nau afarerene' fee emi hihii-nanau' esa leo ia': boso' mafarene henin emi momori-dadadim neme bea' mai. Tou' kamahere' a, naoka-nasamu nai Kristus fo ri' dadi laka' neu' ana. Ina' a dadi neme tou' a. Ma Kristus neme Manetualain.^b

4 Fai fo tou' a hule-haradoi, do ana tui-beka Manetualain hehelu-barataan, sona boso' poti laka na. Ria sama leo' ana tao namamae' Kristus, nana huu ana ta fee hada-horomata tuka ita biasa na. 5 Tehuu fai fo ina' a hule-haradoi, do ana tui-beka Manetualain hehelu-barataan ana muste poti laka na. Kalu ta'a, sona ria sama leo' tao namamae' sao na, nana huu ana ta fee hada-horomata tuka ita biasa na. Ma ria tao namamae' ao-ina heheli na, sama leo' ina' a keu kusi' laka na. 6 Huu fo kalu ina' a ta poti laka na ela dadi tanda nae, ria hada' neu' sao na, sona malole lena' keu kusi' laka na. Tehuu kalu ana nameda naan, laka kusi na tao namamae' ana, sona malole lena' poti etu laka na.

7 Soba afi leo ia': tou' a ta parluu poti laka na, huu fo Manetualain adu tou' a sama leo' Ana boe. Huu ria naa, tou' a dadi buna-boa' natudu Manetualain marela-masa'an. Ma ina' a boe dadi buna-boa' natudu tou a kahere na.^c 8 Huu fo Manetualain adu dae-bafo' ia, Ana ta adu tou' a neme ina' a mai. Tehuu Ana adu ina' a neme tou' a mai. 9 Ma Ana ta adu tou' fee ina'. Tehuu Ana adu ina' fee tou'.^d 10 De malole lena' ina' a poti laka na, ela lahenda bubulu' ria pake haak na fo hule-haradoi ma tui-beka Manetualain hehelu-barataan, tuka matetu na. Eila'o-limalope rai nusatetu-ikutema' a boe bubulu'. 11 Tehuu kalu sira rabua-raesa ro Manetualain, sona ina-tou' ratulu-rafali ao. 12 Masososa na, Manetualain adu ina' a neme tou' a mai. Tehuu ina' a ri' boki tou'. Ma Manetualain ri' adu-tao na basa-basan dadi.

13 Soba emi dodoo! Kalu ina' a hule-haradoi neu' Manetualain ma ta poti laka na, tuka emi sona ria malole a do, ta'a? 14 Tuka emi hadas ma nai kota Korintus, kalu tou' a laka-doo na naru' a, ria tao namamae' ana, do? 15 Ma kalu ina' a laka-doo na naru' a, sona ria malole naa seli, hete? Manetualain fee ni laka-doo naru' ela napoti etu laka na. Ria ri' la'e.

16 Tehuu kalu bea nau nalelena ao' naroo la'e-neu' hihii-nanau' ia ra, mafarerene', te ami mauli-malaka, ma jama'at ara, biasam ria.

17 Besa' ia, au nau dedea hihii-nanau' esa bali. Nai hihii-nanau' ia dale' au ta bisa io emi. Huu fo emi mabua, emi ta tao tuka matetu na, tehuu emi boe-boe tao kaco.

18 Masososa na, au amanene rae, fai bea ma emi mabua fo maso-kasasi, sona emi fifika-fafae. Au amanene dedea' sira, tantu ruma tebe leo' naa. 19 (Mema', huu no emi fifika-fafaem ria, de neu' ko nana nita' bea ri' tebe-tebe namanene neu' ita Ramatua na ma bea ri' ta'a.)

20 Fai bea ma emi lahenda sarani' a mabua fo matuu' mia nai Ramatua' a mei Na, emi muste mafarene Ramatua Yesus. Ria ri' la'e. Tehuu emi ta leo naa'. 21 Buti na ri', fai fo emi matuu' mia-minu, ruma ta rahani lahenda feke', ruma raa safa-safa mesan, ma feke' ara bali rinu mafu'. Losa' lahenda feke' a ta hapu babati', de ramalaa. 22 Leo bea' ia? Emi ta manuu uma fo mia-minu nai naa, do? Do, emi nau mamumulu-mamamae' Ramatua' a jama'at Nara? Emi nau tao mamamae' lahenda hata taa' ara? Emi nau au dedea ae leo' bea? Nau au io emi nai hihii-nanau' ia dale', do? Boso' mamahena!

23 Ramatua Yesus nafada mema' hihii-nanau' leo ia' neu' au, ma au feen neu' emi bali. Fai fo lahenda ra sadia saka' raisa Ni, hatun ria Ana hai na roti balo' esa. 24 Ana hule-haradoi hule makasi neu' Manetualain. Boe ma Ana nafada ana mana tuka dea nara nae, “Mia roti ia. Huu fo ia nana Au ao-paa Ka. Neu' ko ara tao ralulutu' Au ao-paa Ka soa-neu' emi. De emi muste mia roti ia, ela mafarene Au.”

25 Ara raa basa, boe ma Ana tao leo naa' neu' galaas oe anggor a boe nae, “Anggor ia sosoa na ri': Manetualain nau tao hehelu bebeu' no emi. Ma Au muste atiti-anosi' daa Ka losa' Au mate, besa' ko hehelu' ria bisa dadi. De fai bea ma emi minu anggor leo' ia, sona emi muste mafarene Au mamate Ka.”^e 26 Fai bea ma emi perjamuan fo mia roti leo' ia, ma minu neme galaas leo' ia, ria sama leo' emi tui-beka selu' Ramatua' a mamate Na, losa' Ana natafali mai.

27 De lahenda bea naa roti ria ma ninu neme galaas ria, ela dadi nafarerene' neu' ita Ramatua na, tehuu ria dale na ta roo-tetu', neu' ko Manetualain huku ni. Huu fo ria nana Ramatua Yesus ao-paan, ma daa Na. De kalu lahenda dale na ta roo-tetu', sona ria ta naraa naa ma ninu nai naa, huu fo ria tao nadadae Ramatua Yesus. 28 Malole lena', lahenda ra esa' ko parisa' ria dale na dei. Kalu namahere tebe-tebe nae dale na roo-tetu', besa' ko ana bisa naa roti ma ninu anggor ria. 29 Tehuu lahenda ruma raa ma rinu ta reni' dale roo-tetu'. Huu fo ara afi rae, “Yesus mamate Na, sosoa-raraa' ta'a. Yesus ao-paa Na ta nanuu sosoa-raraa' soa-neu' au.” Lahenda leo naa' a, lepa aon sira nonoi-tataon, nana huu neu' ko sira hapu huhuku'. 30 Huu ria naa, nai emi talada, ruma ta tea-mepe', ruma hedi'-hedi, ma mate ruma.

31 Tehuu kalu ita parisa' tatalolole ita dale nara, ita ta hapu huhuku' leo naa'. 32 Kalu ita Ramatua na huku ita, Ana tao leo naa' ela nanori-nafada ita tuka eno roo-tetu' a. Ana ta nau ita hapu huhuku', ma talulutu' sama-sama to basa lahenda nai dae-bafo' ia.

33 De toranoo susue kara! Kalu emi mabua fo matuu' mia nai Ramatua' a mei Na, sona esa muste nahani esa. 34 Kalu bea namalaa naan seli, sona malole lena' naa-ninu nai uma dei, ela fai bea ma emi mabua, boso' hapu huhuku'.

La'e-neu' hihii-nanau' feke' fo ri' emi matane, neu' ko au leo naa' uu, besa' ko au ator.