Malaka agama Yahudi a malaka nara saka eno' nau raisa Ramatua Yesus
22
Lahenda Yahudi ra fai malolen fo ri' rae feta Roti Ta Pake Ralu Tetei' a nanenea' so. Nai fai malole ria, ara pau bibi-lopo fo tao feta Paska. Ara tao leo naa' ela rafarene fai a ulu na, tepo' fo bei-ba'i nara kalua reme Masir mai.a 2 Fai' ria, malaka agama Yahudi a malaka nara, ma mesen agama ra saka eno' fo nau raisa Yesus. Tehuu ara bii' lahenda makadoto' sira tao kaco, huu fo ara rahii' ramanene Ni.Yudas se'o heni Ramatua Yesus
3 Esa neme Yesus ana mana tuka dea kasanahulu dua nara, nade Yudas Iskariot. Fai fo malaka agama Yahudi malaka nara saka eno' ela raisa Yesus, nitu ra malaka na maso' neu' Yudas dale na. 4 De ana kalua neu saka malaka agama a malaka nara, ma manea Uma Mamaso Yahudi Ina a malaka na. Ana nau rala hara' fo se'o Yesus fee si. 5 Malaka sira ramanene Yudas dedea nae leo' naa, boe ma ara ramaho'o raan seli. Ara helu rae, “Kalu o se'o Yesus fee ami, tantu ami bae.” 6 Yudas nataa. Boe ma ana mulai saka eno' se'o nafufuni' Yesus fee si, ela lahenda kadodou-ina' ara boso' bubulu'.
Ramatua Yesus ana mana tuka dea nara sadia feta Paska
7 Losa lahenda Yahudi ra fai malolen fo ri' biasa ara pau bibi-lopo fo tao feta Paska. 8 Yesus nadenu Petrus no Yohanis nae, “Emi dua meu maulu' fo sadia fee ita nanaa' feta Paska, ela taa sama-sama.”
9 Dua si ratane Ni rae, “Papa! Ami meu' bea sadia mei a?”
10 Ana nataa nae, “Kalu emi maso' leo kota Yerusalem meu, neu' ko mita tou' esa nasaa neni kusi oe. Tuka ni leo uma meu. 11 Mafada manuu uma' ria mae, ‘Ami Papa Mesen ma hule kama, ela Ana paken fo tao feta Paska no ana mana tuka dea nara. Hapu, do?’ 12 Neu' ko manuu uma' a natudu emi kama maloa esa nai uma a tada' lai. Ana sadia na kama ria namadai so. De emi dua meu' na fo sadia nanaa'.”
13 Boe ma dua si reu. Ara rita basa-basan fo ri' Yesus nafada si' a. De ara sadia feta Paska reu' na.
Feta Paska
14 Fai' fo basan mana sadia', boe ma Yesus asa mai. Ana natuu' naa feta Paska sama-sama no ana mana tuka dea nara. 15 Yesus nafada si nae, “Au ahii' aan seli ua feta Paska oo emi, naulu' neme Au hapu doidoso. 16 Tanda matalolole ia. Huu fo basa ia, te Au ta ua feta Paska oo emi so'. Neu' ko lahenda bubulu' matetu' Au Papa Ka homu pareta, besa' ko Au ua selu' feta.”
17 Yesus hai na galaas fo ri' oe anggor nai dale'. Ana hule makasi neu' Manetualain, boe ma Ana loo fee si galaas ria. Ana dedea nae, “Sipo ma galaas ia, fo emi esa-esa minu. 18 Mafarerene'! Mulai neme hatun ia, Au ta inu oe anggor so'. Neu' ko lahenda bubulu' matetu' Au Papa Ka homu pareta, besa' ko Au inu bali.”
19 Ana hai na roti balo' esa, boe ma Ana hule makasi neu' Manetualain. Ana tetebi roti ria, de loo fee si. Ana nae, “Roti ia nana Au ao-paa Ka, fo ri' Au fee henin neu' emi basa. Fai bea ma emi mia roti ia, emi muste mafarene Au.” 20 Ara raa basa, boe ma Ana so'u na galaas fo oe anggor nai dale'. Ana dedea bali nae, “Anggor ia, nana Au daa Ka faa ela po'i-tata na emi. Manetualain pake daa ia ela tao hehelu-barataa bebeu' no emi.b
21 Tehuu besa-besa, te lahenda fo se'o heni Au a, ana natuu' sama-sama no Au nai mei ia.c 22 Tebe, Au Lahenda Dae-bafo' Tetea', muste mate tuka Manetualain hihii-nanaun. Tehuu soe neu' lahenda fo se'o heni Au a!”
23 Yesus ana mana tuka dea nara ramanene ra ria, boe ma ara mulai ratatane ao' rae, “Bea ri' tao tadalu leo naa' neu' Ana?”
Ramatua Yesus ana mana tuka dea nara ralelena ao' la'e-neu' bea ri' bau lena
24 Boe ma Yesus ana mana tuka dea nara mulai ralelena ao' rae, neme sira mai bea ri' bau lena.d 25 Tehuu Yesus nafada si nae, “Nai nusa' fo ta ralela' Manetualain, mane nara ese-rumu anaraun ara, ma pareta rala lena'. Sekonaa te ara nau anaraun nara raloo si rae, ‘Papa manatulu-manafali anaraun’. 26 Tehuu emi ta bole leo naa'. Bea nau dadi lahenda bau-ina', sona ria masoda na muste tetebes ara dadi sama leo' lahenda aana' fo nalalau' basa lahenda ra. Bea nau dadi malaka muste nalalau' sama leo' ata.e 27 Soba emi dodoo, lahenda bau-ina' a, ri' bea? Lahenda fo natuu' nai mei a, do nalalau' a? Tantu lahenda fo natuu' a, ria ri' lahenda bau-ina', hete? Sekonaa te, Au ta tao ao Ka leo naa'. Au mai alalau' emi.f
28 Emi sama-sama mo Au kose-kose nai fai' fo Au hapu doidoso. 29 Au Papa Ka so'u na Au fo homu pareta nai Ria nusa-namon. De besa' ia Au so'u a emi boe, 30 ela neu' ko emi mia-minu mo Au mei esa nai nusatetu-ikutema'. Au fee kuasa boe ela emi pareta leo Israel kasanahulu dua' ara.”g
Ramatua Yesus nafada nae, neu' ko Petrus nalena Ni
31 Yesus nafada Petrus nae, “Petrus. Malaka nitu a soba nau heo heni emi meme Au mai, sama leo' lahenda dai isi' de here heni kataa' ara.h 32 Tehuu Au hule-haradoi fee o, Petrus, ela mamahere maroo Au. Kalu o matafali leo Au mai, sona o muste matetea toranoo mara dale nara.”
33 Petrus nataa nae, “Ta'a, Ramatua'! Au ta foa ela Ramatua ka. Au sadia maso' bui a, ma oo Ramatua ka mate bela' boe malole.”
34 Tehuu Yesus nataa nae, “Petrus! Nenene matalolole. Hatun ia, manu' ara bei ta koko'oa, tehuu o malena lai' telu mae ta malela' Au.”
Ramatua Yesus lahenda nara muste sadia hapu doidoso
35 Boe ma Yesus dedea no si nae, “Fai naa ra, Au adenu emi meu tui-beka Au Tutui Malole Ka leo basa mamana' ara, Au ae boso' meni doi', tas, ma tabueis. Tepo' ria, emi kura-kopo ubea'?”
Ara rataa bela' a rae, “Fai' naa ra, ami ta kura-kopo hata esa boe'!”i
36 Boe ma Ana nafada si nae, “Tehuu besa' ia feke'. Kalu emi manuu doi', sona meni. Bea manuu tas sona meni boe. Kalu ta manuu tafa', sona se'o heni emi badum bei esa', fo asa. 37 Huu fo lahenda Yahudi ra tao Au neu' lahenda tadalu'. Selu baiana' ia te ara mai hopu Au. Nana huu ria natetu na hata fo ri' ba'i Yesaya dui' mema', nae:
‘Ara tao Ni sama leo' lahenda tadalu'!’”j
38 Ara rafada rae, “Ramatua'! Ami meni felas dua rai ia!”
Yesus nataa nae, “Dai so. Boso' boe dedea ria bali!”
Ramatua Yesus neu hule-haradoi nai lete Saitun
39 Raa basa Paska, boe ma Yesus no ana mana tuka dea nara kalua, reu hule-haradoi nai lete Saitun, sama leo' bale-bale. 40 Losa naa, boe ma Ana nafada si nae, “Emi muste hule-haradoi ela emi boso' hapu sosoba'.”
41 Boe ma Ana oru' ela si doo' a bai', de sunda' undulaka na, hule-haradoi nae, 42 “Ou, Ama'! Kalu Ama' a nau, sona hai heni doidoso ia neme Au mai. Tehuu boso' tuka Au hihii-nanau Ki; ela tuka noi Ama' a hihii-nanaum.” 43 [Boe ma Manetualain eila'o-limalopen esa neme nusatetu-ikutema' a mai natetea dale Na. 44 Huu fo Ana doidoso naan seli, losa' puse Na titi sama leo' daa.]k
45 Hule-haradoi basa, boe ma Ana foa de fali leo ana mana tuka dea nara neu. Tehuu ara suku, huu fo sota' raan seli, ma dale nara susa. 46 Yesus nafada si nae, “Ubea' taon de emi suku?! Malole lena' emi hule-haradoi fo ela boso' tuda mala sosoba' dale'.”
Ara hopu ra Ramatua Yesus
47 Yesus bei dedea nae leo' naa, te Yudas (esa neme ana mana tuka dea kasanahulu dua' ara), no lahenda dodou' mai. Ana nanenea' Yesus de holu Ni ma de'in. 48 Tehuu Yesus nafada ni nae, “Yudas! O se'o heni Lahenda Dae-bafo' Tetea' neni' dede'i, do?”
49 Yesus ana mana tuka dea feke nara bubulu' Yudas dudu'a-aafi tadalun ria, boe ma ara ratane Yesus rae, “Ramatua'! Ami soa' asa meni tafa' dei!” 50 Boe ma sira esa lesu na tafa' na, de tati naetu malaka agama Yahudi malaka bau-inan ata na, ridoo ona na.
51 Tehuu Yesus nafada nae, “Neme' naa leo! Boso' soa' asa!” Boe ma Ana nafaroe lahenda ria ridoo na, de puli naan.
52 Lahenda fo mai hopu Yesus nana si': malaka agama Yahudi malaka nara, lasi' ara, Uma Mamaso Yahudi Ina a manea nara ma lahenda feke' bali. Yesus natane si nae, “Leo' bea? Emi mae Au lahenda tadalu', losa' emi meni tafa' ma ai tutuku' mai hopu Au? 53 Tuka-tuka fai' Au anori-afada emi nai Uma Mamaso Yahudi Ina a, tehuu ta hapu lahenda esa hopu na Au boe'. Tehuu neme' naa! Ia, nana emi ledo-faim. Besa' ia nitu ra malaka na kuasan ia!”l
Petrus nalena Ramatua Yesus
54 Ara hopu ra Yesus, de hela roo Ni leo malaka agama Yahudi malaka bau-ina na uma na neu. Petrus boe tuka nafufuni' nesi' bui'. 55 Nai uma ria kintal na lahenda rasera' ai. Petrus neu' namaneru ai boe. 56 Ata ina' esa nita Petrus natuu' namaneru ai. Ana bebesa natalolole Petrus mata-idun, boe ma nafada lahenda feke' fo rai naa nae, “Lahenda ia boe ana tutuka' Yesus!”
57 Tehuu Petrus nalena nae, “Ta'a! Au ta alela' Lahenda ria. O bubulu' ubea?”
58 Ta doo bea boe', te lahenda esa mete leo Petrus neu, boe ma dedea nae, “Tebe, o nana Yesus lahenda nara esa ian, hete?”
Tehuu Petrus nadedea laka nae, “Ta'a! O mafarara'u!”
59 Bate basa jam esa, boe ma lahenda feke' esa dedea bali nae, “Au bubulu', lahenda ia nana Yesus ana mana tuka dean esa ian, huu fo ria boe lahenda Galilea.”
60 Tehuu Petrus nalena mamate' nae, “O maa ma ria!” La'e Petrus dedea nae leo' naa, boe ma manu' a koko'oa.
61 Yesus lipe aon fo mete ni. Boe ma Petrus nafarene Yesus nafada ni nae, “Hatun ia, manu' a bei ta koko'oa boe', tehuu o malena Au lai' telu so.” 62 Petrus nafarene na ria, boe ma ana kalua neme uma a kintal na mai ma dola nasae'edu.
Ara popo'o ma ramumulu-ramamae' Ramatua Yesus
63 Boe ma lahenda fo ranea Yesus a, ara mulai ramamae' Ana ma fepa-li'u Ni. 64 Ara poti etu mata Na pake tema', ma ratanen rae, “Kalu O nana Manetualain mana nesi matan, sona maneu' masudin! Bea ri' popo'o O ia?” 65 Ara ramumulu-ramamae' rahedi Ni.
Ramatua Yesus nai mamana parisa dedea agama
66 Balahaa anan ria, malaka agama Yahudi malaka nara, mesen agama, ma lasi' ara tesa fo parisa' Yesus dedea Na. Ara radenu lahenda ra, hela roo Yesus leo mamana parisa dedea agama a neu. 67 Ana maso' leo dale' neu, boe ma ara ratane Ni rae, “Soba O mafada dei! O nana tebe-tebe Kristus, do?”
Tehuu Yesus nataa nae, “Leo mae Au ataa ae tebe boe, emi ta mamahere. 68 Ma kalu Au atane atafali' emi hihii-nanau' esa, tantu emi ta mataa Au. 69 Ta doo' a so', te Manetualain pake Ria kuasa marela-masa'an, fo nahene-naae' Au, Lahenda Dae-bafo' Tetea' ia. Boe ma Au atuu' nai Ria boboa ona Na fo oo Ni sama-sama pareta.”m
70 Basa si ramanene leo' naa, boe ma ratane Ni rae, “Kalu leo' naa, sona O nana Manetualain Anan, do?”
Yesus nataa nae, “Mema', tebe leo' emi dedeam ria.”
71 Lahenda mana parisa dedea' sira rahara bela' a rae, “Ita basa tamanene mata', hete? Ana so'u aon nae Ria nana Manetualain Anan. Namumulu-namamae' ia! Tuka ita atoran agama na, kalu lahenda tao aon sama no Manetualain, lahenda ria muste mate. De leo' bea? Ita ta parluu mana sakasii so'. Huku mate' Ana leo.”