Ara hopu ra Ramatua Yesus
18
Yesus hule-haradoi basa nae leo' naa, boe ma Ana kalua sama-sama no ana mana tuka dea nara. Ara leo oka' esa dale' reu, nai lee Kidron seri'.2-3 Fai ria, malaka agama Yahudi ra malaka nara, ma lahenda partei agama Farisi, ara fee soldadu ma manea hida leo Yudas reu. Huu fo ana nau se'o heni Yesus. Yudas bubulu' oka' ria, nana huu lai dodou' Yesus nabua no ana mana tuka dea nara rai naa. Boe ma Yudas asa leo oka' ria reu, reni obor, lantera ma tee-tafa tande'.
4 Sekonaa te Yesus bubulu' neu' ko basa-basan dadi soa-neu' Ana. Boe ma Ana tuturu mata neu de natane si nae, “Emi saka bea?”
5 Ara rataa rae, “Ami saka lahenda esa, nade Yesus, neme koro' Nasaret mai.”
Yesus nataa si nae, “Ri' Au ia.” Fai ria, Yudas napadei sama-sama no si. Ria ri' se'o heni Yesus. 6 Yesus nafada nae leo' naa, boe ma lahenda sira rasabubui dea', de ara tu'u reu.
7 Yesus natane selu' asa nae, “Emi saka bea?”
Ara rataa rae, “Yesus, lahenda Nasaret.”
8 Yesus dedea nae, “Bisinaa' a Au afada ae, Ri' Au ia. De kalu emi saka Au, sona hopu ma Au leo. Feke' ara sona neme' naa ela reu leo.” 9 (Ana dedea nae leo' naa, ela natetu na hata fo parnaa Ana nafada nae, “Papa. Basa lahenda fo Papa fee Au si a, ta mopo esa boe'.”)
10 Fai ria, Simon Petrus nasaue neni tafa' laka tuku' esa. Ana lesu naan fo nau tati lahenda. Ana tati naetu lahenda esa ridoo ona na. (Lahenda ria nade Malkus, nana malaka agama Yahudi ra malaka bau-ina na atan.) 11 Yesus nafada Petrus nae, “Petrus! Sodo' fali' o tafa ma neu' mana na. Huu fo Au Papa Ka nae Au muste hapu doidoso rupa leo ia'. Sama leo' Ana fee Au galaas esa isi na mali' a fo Au inu. De neme' naa! Ela Au inu henin.”a
Ara roo Yesus neu nataa malaka agama ra malaka bau-inan
12 Boe ma komendan, soldadu ra ma lahenda Yahudi ra manea nara, hopu ra Yesus, de ara heke Ni. 13 Ara ro Ni masososa leo Hanas neu. Hanas nana, Kayafas arama na. Teu' ria dalen, Kayafas dadi malaka agama Yahudi ra malaka bau-inan. 14 Kayafas parnaa fee lelea-nonore' neu' lahenda Yahudi ra malaka nara nae, “Malole lena' neu' emi, kalu noi lahenda esa mate soa-neu' basa lahenda ra.”b
Petrus nalena nae, ana ta nalela' Ramatua Yesus
15 Simon Petrus tuka Yesus dea Na, sama-sama no Yesus ana mana tuka dean esa, ri' au, Yohanis. Agama Yahudi a malaka bau-ina na nalela' au. Huu ria naa, au bisa maso' leo kintal dale' uu sama-sama oo Yesus. 16 Tehuu Petrus napadei nahani' dea', nanenea' oka bafa' a. Boe ma au dea' uu, de dedea oo ina' manea esa neme' naa, ela au bisa oo Petrus leo dale' neu. 17 Ina' ria natane Petrus nae, “Lahenda ria ana mana tuka dean esa on, hete?”
Tehuu Petrus nataa nae, “Ta'a!”
18 Fai ria masufu na seli. Huu ria naa, lahenda manea ra ma ata ra rapadei ramaneru ai. De Petrus neu' naa namaneru ai sama-sama no si.
Malaka agama ra malaka bau-ina na parisa' Ramatua Yesus
19 Fai ria boe, agama Yahudi ra malaka bau-ina paraa na parisa' Yesus la'e-neu' Ria nanori-nafadan, ma la'e-neu' Ria ana mana tuka dea nara.
20 Yesus nafada ni nae, “Au dedea ledo-ledo ela basa lahenda bisa ramanene. Au anori-afada kose-kose nai mamana' fo ita lahenda Yahudi a biasa tabua, ri' nai ita uma mamaso nara, ma Uma Mamaso Yahudi Ina dale'. Au ta parnaa dedea afufuni'. 21 Ubea' taon, de o matane Au? Matane lahenda fo ri' ramanene Au dedea Kara. Tantu ara bubulu' Au dedea ubea'.”
22 Ana dedea nae leo' naa, te lahenda manea esa napadei nai naa, de ana fapa Yesus ma nae, “O boso' dedea leo naa' mo malaka bau-ina' a!”
23 Yesus nafada ni nae, “Kalu Au dedea sala, sona matudu sala na ri' ubea'. Tehuu kalu Au dedea la'e, sona ubea' taon, de o fapa Au?”
24 Boe ma Anas pareta si roo Yesus leo Kayafas fo ri' dadi agama Yahudi malaka bau-ina na. Ara roo Ni neu a, nana lima nara bei mana heke'.
Petrus nalena selu' Ramatua Yesus bali
25 Fai ria, Simon Petrus bei napadei namaneru ai. Lahenda feke' fo ri' rapadei rai naa, ara ratane ni rae, “Ria ana mana tuka dean esa on, hete?”
Tehuu Petrus nalena nae, “Ta'a!”
26 Agama Yahudi malaka bau-ina na atan esa nai naa boe. Ria boe kileo-boboki' neme lahenda fo ri' Petrus tati naetu ridoo na. Ana natane ni nae, “Bisinaa' a o nai oka' ria boe, hete? Au ita o nai naa!”
27 Tehuu Petrus nalena bali, boe ma manu' a koko'oa tuti' a.
Ramatua Yesus neu nataa gubernor Pilatus
28 Bei balahaa ana', te ara roo Yesus neme Kayafas mai, leo gubernor uma mana pareta na, nai soldadu Roma ra benteng na.c Lahenda Yahudi ra ta maso' leo lahenda Roma ra mamana na reu, ela boso' tao nakekeo-nakakanu' si, huu fo ara saka' raa feta Paska. 29 Huu ria naa, gubernor Pilatus dea' mai, naneta no lahenda Yahudi ra. Ana natane si nae, “Emi kolaa' Lahenda ia nana sala' ubea'?”
30 Ara rataa ni rae, “Leo ia', pak. Kalu Ria ta lahenda tadalu', tantu ami ta moo Ni leo pak mai.”
31 Gubernor a nafada si nae, “Leo ia'. Ela emi ri' parisa' Ria dedea na, tuka emi lahenda Yahudi a atoran ma.”
Lahenda Yahudi ra malaka nara rafada rae, “Ta bisa fa, pak. Ami lahenda Yahudi a ta manuu haak, maetu' huhuku mamates. Noi emi mana pareta Roma a ri' manuu haak leo naa'.” 32 (Ara dedea rae leo' naa, natetu na hata fo parnaa Yesus nafada nai maulu. Ana nafada lahenda nara nae, neu' ko Ana mate tuka mana pareta Roma a eno na, huu ria naa ara paku Ni nai ai kake'.)d
33 Boe ma gubernor a fali selu' leo soldadu ra benteng na dale' neu. Ana naloo na Yesus, de natane Ni nae, “Leo' bea? O nana mane' lahenda Yahudi, do?”
34 Yesus nataa ni nae, “Pak natane mesam ria do, lahenda feke' ri' nafada pak la'e-neu' Au?”
35 Gubernor nataa nae, “Au ta lahenda Yahudi, hete? O lahenda nusa isi mara, ro malaka agama ra malaka nara si' fee o leo au mai. Te o tao ubea'? Soba o mafada dei!”
36 Yesus nafada nae, “Au ta mane' neme dae-bafo' ia mai. Kalu Au dadi mane' leo' naa, tantu Au ata kara soa' lahenda Yahudi ra, de ara ta dadi hopu Au. Tebe Au dadi Mane'. Tehuu ta hapu lahenda esa nai dae-bafo' ia ri' so'u Au leo naa'.”
37 Gubernor a natane selu' Ana nae, “De O nana Mane', do?”
Yesus nataa nae, “Pak a ri' mafada aom mae Au nana Mane'. Matetu na boki Au leo dae-bafo' ia mai nana ela dadi Mane', fo afada la'e-neu' hihii-nanau' roo-tetu' ara. Basa lahenda fo homu rahere hihii-nanau' roo-tetu', sona ara ramanene neu' Au.”
38a Boe ma gubernor a natane Ni nae, “Roo-tetu' ria ri', ubea'?”
Ara raetu' huku ramate Ramatua Yesus
38b Gubernor Pilatus dedea basa nae leo' naa, boe ma ana kalua selu' leo lahenda Yahudi ra neu. Ana dedea nae, “Au parisa' Ana so, tehuu au ta hapu Ni sala hata esa boe'.
39 Tehuu emi biasa ma, tuka teu' nai feta Paska, sona au muste po'i lahenda mana huku' esa soa-neu' emi. De teu' ia, emi nau au po'i lahenda Yahudi ra mane' na, do leo' bea?”
40 Basa si rahara bela' a rae, “Boso' po'i Lahenda ia! Po'i Barabas!” Sekonaa te Barabas nana, lahenda makaresi'.e