Ramatua Yesus Tutui Malole Na
tuka
Lukas susura na
Ubea' taon de Lukas dui' tutui' ia
1
1-3 Papa Teofilusa susue'.Soda-mole'.
Lahenda dodou' soba dui' tutui' la'e-neu' hihii-nanau' fo ri' dadi nai ita talada. Ara dui' tutui' fo ri' ami bubulu' neme Ramatua Yesus lahenda nara, ma neme lahenda feke' fo rita mata' a. Tutui' ria tui-bekan nai ami talada neme masososan losa' besa' ia. Basa tutui' sira natetu na Manetualain hehelu Na neme ulu' mai.
Au parisa' besa-besa hihii-nanau' ria neme dadadi masososa oe na mai. Huu ria naa, au aetu' aan dui' atalolole si tuka momori-dadadin. No ria naa, papa bisa bubulu' matetu' mana dadi' ria. 4 Ma papa bisa mamahere hata fo lahenda tui fee a, nana tutui napuputa' ta ria. Tebe-tebe hapu basa sira!
Manetualain eila'o-limalopen nai nusatetu-ikutema' a nafada mema' Yohanis Mana Sarani' a boboki na
5 Tutui' ia masososa na leo ia': Tepo' fo mane' Herodes pareta nai Propensi Yudea, tou' esa nade Sakaria. Ria nana malaka agama Yahudi esa rian. Ma ria boe lima-ei' neme lahenda nabua' malaka agama ba'i Abia. Sakaria sao na nade Elisabet. Elisabet papa na malaka agama. Ria tititi-nonosi' neme ba'i Musa a'an Harun.b 6 Sira dua rasoda roo-tetu' tuka Manetualain pareta Na ma atoran nara katema'. Lahenda ra hada' asa. 7 Dua si ramalasi so, tehuu ana' ta'a, huu fo Elisabet nana teditei-tamadale'.
8 Lai' esa de Sakaria no Abia lahenda nabua nara fai nonoi-lakan nai Uma Mamaso Yahudi Ina a, nai kota Yerusalem. 9 Tuka sira biasa na, malaka agama ra hela lot, ela bubulu' fai ria bea ri' nonoi-lakan fo maso' leo Uma Mamaso Yahudi Ina a Kama Malalao-malalafu na neu. Nai naa lahenda ria muste hotu ai maboo meni' nai Manetualain mata Na. Fai ria Sakaria hela na lot a. 10 De ana maso' dale' neu. Fai ria ana hotu ai maboo meni' nai Kama ria dale', lahenda dodou' ara hule-haradoi rai uma a kintal. 11 Kekeneu te, Manetualain eila'o-limalopen esa neme nusatetu-ikutema' a mai, napadei nai mamana hohotu ai maboo meni' ria boboa ona na.
12 Sakaria nita leo' naa, boe ma ana bii naan seli losa' ta bubulu' tao ubea' so'. 13 Tehuu eila'o-limalope ria dedea nae, “Sakaria! Boso' bii'! Huu fo Manetualain namanene o huhule-haradoi ma. De neu' ko sao ma boki fee o ana tou' esa. O muste foin nade Yohanis. 14 Neu' ko lahenda dodou' ramaho'o sama-sama ro emi, huu no emi hapu ana'. Ana' ria neu' ko tao na o dale ma namaho'o-natadale. 15 Manetualain Dula-dale Malalao-malalafu Na kuasa na sama-sama no ni, mulai neme mama na nairu ni. Ana muste naluli ara-ralu. Tepo' fo nambau-ina, Manetualain pake ni dadi lahenda penting.c 16 Neu' ko lea-nore noo lahenda Israel dodou' ratafali tuka Manetualain fo ri' nanuu haak pareta si. 17 Ria leleo-lala'on ma kuasa na sama leo' Manetualain mana nesi matan, ba'i Elia. Ana mai naulu' ita Ramatua na. Ana tao na ina-ama a dale nara ratafali sue-lai ana nara. Ma lahenda fo hiru rasadea Manetualain, ana tao na si ratafali fo tuka Manetualain hihii-nanaun. No ria naa ana tao na lahenda ra sadia dale nara sipo' Ramatua' a mamai Na.”d
18 Tehuu Sakaria natane natafali' eila'o-limalope ria nae, “Hapu nai bea bisa leo naa'?! Au oo sao ka mamalasi so! Neme bea mai au bubulu' basa ia ra dadi?”
19 Boe ma eila'o-limalope ria nataa nae, “Leo ia'! Au ia Gabriel, Manetualain lahenda nadedenun. Ria nadenu au mai afada o Tutui Malole ia.e 20 Tehuu o ta mamahere au dedea-nafada ki. De o hule a, tanda na leo ia'! Mulai neme besa' ia mai o dadi pakanaa', ta dedea losa' emi hapu ana' ria. Neu' ko o mita mata'. Huu no hata fo au afada ia, naraa la'e ledo-fai na te ana dadi.”
21 Lahenda kadodou' fo hule-haradoi rai uma a kintal na, roi ramakokoa' a, huu fo Sakaria ta kalua dea' mai. 22 Fai ria ana kalua dea' mai, te ta bisa dedea so'. Ana noi tudu' a, de ara bubulu', Manetualain natudu fee ni tanda heran nai Kama Malalao-malalafu' ria dale'.
23 Basa nonoi-laka' a, boe ma Sakaria fali leo uma na neu. 24-25 Ta doo bea boe' te Elisabet nairu. De nahani' uma na dale' losa' bula' lima. Ana dedea nae, “Io-oa Manetualain! Mate'e na Manetualain natudu dale malole Na neu' au. Kalu au hapu tititi-nonosi', sona lahenda ta ramamae' au.”
Manetualain eila'o-limalopen neme nusatetu-ikutema' a leo Maria neu
26 Elisabet nairu, tei na la'o bula' nee, boe ma Manetualain fee eila'o-limalopen esa neme nusatetu-ikutema' a mai, leo koro' esa neu, nade Nasaret, nai propensi Galilea. Eila'o-limalope ria nade Gabriel. 27 Nai Nasaret ana feto ana' esa nade Maria. Maria no tou' esa nade Yusuf dua si rahihii ao'. Yusuf nana mane' Daud tititi-nonosin. Gabriel leo ana feto ana Maria neu.f 28 Ana natudu ao na neu' ana feto' ria, ma nae, “Soda-mole' neu' o! Manetualain here na o, fo saka' tao fee o hihii-nanau' malole esa. Maria, Manetualain sama-sama no o.”
29 Maria namanene eila'o-limalope ria dedea na, boe ma noi namakokoa'. Ana ta bubulu' maksud na ubea'. 30 Eila'o-limalope ria sipo' nae,
“Maria! O boso' bii'.
Huu fo Manetualain natudu dale susue Na neu' o.
31 Ta doo' a so' te o mairu,
neu' ko boki ana tou' esa.
O muste foin nade,Yesus.g
32 Neu' ko Ana dadi neu' Lahenda bau-ina'.
Neu' ko Manetualain hule Ni nae, ‘Ria, Au Ana boki Ka.’
Ria nana Manetualain Madema a, Ana Na.
Neu' ko Manetualain so'u Ni pareta,
sama leo' ba'in mane' Daud.
33 Neu' ko Ana pareta naroo lahenda Israel ara.h
Huu fo Ria pareta Na ta etu-basan.”i
34 Tehuu Maria natane Gabriel nae, “Au bei ta parnaa suku abua oo tou' esa boe'! Tao leo' bea de au bisa airu?”
35 Boe ma Gabriel nataa nae, “Leo ia'! Manetualain Dula-dale Malalao-malalafu Na onda neu' o. Ma Manetualain Madema, kuasa Na nasuru-nahapa o. No ria naa, Ana' fo neu' ko o boki ni a, tebe-tebe malalao-malalafu'. Huu fo Ria nana Manetualain Anan.
36 Boso' heran! Huu fo o toranoom Elisabet, nairu so. Lahenda rae ana ta boki, nana huu namalasi so. Tehuu besa' ia ana nairu la'o bula' nee ian. 37 Huu fo soa-neu' Manetualain, basan bisa dadi!”j
38 Maria sipo' nae, “Malole. Au nana Manetualain atan. De ela basan dadi tuka papa dedea ma. Au sadia tuka Manetualain hihii-nanaun.”
Boe ma eila'o-limalope ria la'o ela ni.
Maria neu dama Elisabet
39-40 Basa fai' hida, boe ma Maria neme Nasaret mai nalale leo Sakaria koro na neu, nai propensi Yudea nusa lete malelepi nara. Losa naa boe ma ana kodi leo Sakaria uman dale' neu, ma nafada Elisabet nae, soda-mole'.
41 Elisabet namanene Maria haraoe soda-molen ria, boe ma ana' fo nai Elisabet tein dale' a natitika. Ma Manetualain Dula-dale Malalao-malalafu Na onda neu' Elisabet. 42 Boe ma ana nahara nae, “Maria! Neu' ko lahenda radedema o nade ma lena basa ina' nai dae-bafo' ia! Neu' ko lahenda radedema Ana' fo nai o teim dale'! 43 Au boe nanaso'u-nanafua', huu fo au Ramatua ka mama Na mai dama au. 44 O bei kodi losa uma dale' de fee haraoe soda-mole' neu' au, tuti' a ana' fo nai au tei ki dale' a, nababale nana huu namaho'o-natadale. 45 Manetualain natudu dale susue Na neu' o, huu fo o mamahere mae, Ana tao tuka Ria hehelu Na.”
Maria io-oa Manetualain
46 Maria dedea nae,
“Neme au dale ka mai,
au io-oa Manetualain!
47 Au dale ka namaho'o-natadale,
huu fo Manetualain au manapo'i-manatata ka!
48 Ana relu-natanae au,
Ria ata sosoa-raraa taan ia.
Mulai neme besa' ia, neu' ko basa lahenda ra tao au neu',
ina maua-manale',k
49 huu fo Manetualain tao hihii-nanau' bau-ina' soa-neu' au.
Ria Mana Kuasa ma Malalao-malalafu'.
50 Manetualain natudu dale kasian Na neu' basa lahenda fo hada-horomata ma do'o-tabe Ni,
neme tititi-nonosi' esa leo tititi-nonosi' esa neu.
51 Ana pake kuasa Na,
de tao na lahenda mana koao' ara rasida'.
52 Ana naonda heni mana pareta ra,
huu no natutua-nadedema ao nara.
Tehuu Ana so'u-fua lahenda dale maloe-madae ao' ara.l
53 Ana nahao lahenda mamalaa-maparoe' ara losa rabete,
tehuu Ana usi heni lahenda kamasu'i ara
fali no lima rou'.
54 Ana tulu-fali Ria lahenda Israel nara,
ma natudu kokosen dale kasian Na neu' asa.
55 Maulu na Ana tao hekenee-barataa' no ita bei-ba'i nara,
ri' ba'i Abraham no basa tititi-nonosi nara.
Besa' ia hekenee-barataa' ria mana heke' no si losa doo na neu.”m
56 Boe ma Maria leo no Elisabet losa bula' telu. Basa de ana fali leo uma na neu nai Nasaret.
Elisabet boki Yohanis
57 Ledo-fain losa, boe ma Elisabet boki ana tou' esa. 58 Kileo-boboki nara ro koro isi' ara ramanene tutui' ria rae, Manetualain natudu dale malole Na, ma fee Elisabet ana' esa. De basa si ramaho'o.
59 Ana' ria fai' falu, boe ma ara sunat ana, tuka lahenda Yahudi ra atoran. Ara nau foi ana' ria nade Sakaria, tuka papa na nade na.n 60 Tehuu mama na ta nataa, ana nae, “Muste foin nade Yohanis!”
61 Tehuu ara sipo' rae, “Ubea' taon de here nade' Yohanis? Ta hapu lahenda esa nai emi kileo-boboki mara pake nade' ria!” 62 Boe ma ara tudu Sakaria, fo nau bubulu' ana foi ana' ria nade bea.
63 Sakaria tudu fo hule lei no garefe. Ara feen, boe ma ana dui' nae, “Yohanis!” Basa lahenda ra heran.
64 Kekeneu te Sakaria bisa dedea selu'. De ana io-oa Manetualain. 65 Basa lahenda fo leo ranenea' rai naa, ara bii ma heran. Ma mana dadi' ria tui-bekan nai sira talada, losa' basa lahenda rai propensi Yudea lete malelepi nara boe, ratui hihii-nanau' ia. 66 Lahenda fo ramanene tutui' ria, afi rae, “Makaledo' so, Manetualain kuasa Na sama-sama no ana' ria. Neu' ko nambau-ina, te ana dadi lahenda dae-bafo' ubea'?”
Sakaria io-oa Manetualain
67 Boe ma Manetualain Dula-dale Malalao-malalafu Na onda neu' Sakaria. Huu ria naa ana dedea nae,
68 “Io-oa Ramatua', lahenda Israel ara Manetualain na!
Nana huu Ana mai soi-tefa na lahenda nara,
ela ara boso' sama leo' ata.
69 Manetualain so'u na Lahenda esa kuasa Na marela-masa'a,
de neu' ko po'i-tata na ita.
Ria neme mane' Daud tititi-nonosin mai.
70 Manetualain helu mema' basa ia ra neme ulu' mai,
pake Ria lahenda mana nesi mata teteka-hehere nara.
71 Besa' ia Ana po'i-tata na ita,
teme ita musu-noo nara mai,
ma teme lahenda fo ete' ao nara ro ita.
72-73 Ana natudu dale malole Na neu' ita bei-ba'i nara,
nana huu Ana nafarene nahere hehelu Na neu' asa,
fo ri' Ana hekenee-barataa no ba'i Abraham.
74 Ana po'i-tata na ita teme musu-noo' ara mai,
ela ita bisa do'o-tabe Ni,
ma ta bii-tamata'u.
75 Ana po'i-tata na ita,
ela ita bisa tasoda malalao-malalafu' ma roo-tetu' la'o naroo nai Ria mata Na.
76 Yohanis! O nana au ana ki.
Neu' ko lahenda ralela', o nana Manetualain Madema mana nesi mata Na.
Neu' ko muu mafada lahenda ra,
fo ara sipo' Ramatua' a mamai Na.o
77 Neu' ko muu matudu eno' fee Manetualain lahenda nara,
ela ara bubulu', sira hapu popo'i-tatata',
nana huu Manetualain sae-safe heni sala nara.
78-79 Huu no Manetualain dale balaroe-balanaun ma kasian Na neu' ita,
de Ana fee ita lela',
sama leo' ledo a tii neni makaledo bebeu'.
Ita fo ri' leo-la'o nai maiu' a,
ma bii' mamates a,
nana huu bei ta malole to Manetualain,
neu' ko hapu makaledo' a, fo napipipi-nalala'o ita leo eno mole-dame a teu.”p
80 Yohanis tamba fai', tamba nambau-ina. Ma Manetualain Dula-dale Na feen mapii-bara'ai'. Ana nambau-ina, boe ma neu leo nai mamana lino-nees, losa' ana mulai noi ria nonoi-laka na fee lahenda Israel ara.