Maria po'a mina boo meni' neu' Ramatua Yesus ei Na
12
Fai fo Yesus asa leo koro' Betania mai nana bei fai' nee bali besa' ko fai Paska. Lasarus asa leo rai naa. Lasarus, nana lahenda mana mate' fo ri' Yesus feen nasoda selu' a. 2 Ara tao tasa' fo hatun ria Yesus naa-ninu no si. Marta nalalau'. Lasarus natuu' nai mei a sama-sama no Yesus. 3 Maria hai na mina boo meni' tetea' mabeli boto esa, boe ma ana po'an neu' Yesus ei Na. De ana seka Yesus ei Na neni' laka-doo na. Uma ria naboo meni katema'.a b4 Tehuu Yesus ana mana tuka dean esa, nade Yudas Iskariot, fo ri' neu' ko ana se'o heni Yesus, ana dedea nae, 5 “Ubea' taon, de ria ta se'o mina boo meni' ia fa? Huu fo ria beli na sama leo' lahenda esa kadin teu' esa. Malole lena' se'on, fo fee doi na neu' lahenda manato'a-manataa' ara”c 6 Sekonaa te Yudas dedea nae leo' naa, nana ta huu ana sue-lai lahenda manato'a-manataa' ara. Huu fo ria nana na'odaa. Ana dadi Yesus asa mana homu doin, tehuu oda' kekete' na doi' neme mamana pepeda doi' a.
7 Tehuu Yesus nataa nae, “Pesi ina' ia neme' naa. Huu fo ana peda mina boo meni' ia, ela sadia ratoi reni' Au popora Ka. 8 Lahenda manato'a-manataa' ara rai emi talada kose-kose. Tehuu neu' ko Au ta sama-sama oo emi la'o naroo.”d
Malaka agama ra malaka nara saka eno' fo raisa Lasarus
9 Lahenda Yahudi dodou' bubulu' Yesus nai koro' Betania, de ara mai fo nau rita Ni. Ara nau mai rita Lasarus boe. Huu fo ara ramanene rae, Yesus fee Lasarus nasoda selu' neme mamate na mai. 10 Tehuu malaka agama ra malaka nara dedea-rao' saka eno' fo nau raisa Lasarus boe. 11 Huu fo lahenda dodou' ramanene la'e-neu' Lasarus tutui na, de ara ramahere Yesus. Ara ta ramanene lahenda Yahudi ra malaka nara so'.
Ramatua Yesus maso' kota Yerusalem sama leo' lahenda bau-ina'
12 Balahaa' boe ma lahenda makadoto' fo ri' mai tuka feta Paska nai kota Yerusalem ramanene rae, Yesus saka' leo naa' neu. 13 Ara reu beta palam doo', fo sipo' reni' Yesus mamai na, sama leo' Ria nana lahenda bau-ina'. Ara bobou' rame-rame rae,
“Hosana! Ita io-oa Manetualain!
Huu fo Ramatua' a natudu dale malole Na neu' Israel Manen,
fo ri' mai neni Ramatua' a nade Na!”e
14 Yesus hapu keledei tena' esa, boe ma sa'e neu' lain. Sama leo' mana dui' nai Manetualain Susura Makamoi Na nae,
15 “Emi lahenda kota Yerusalem, boso' bii-mamata'u!
Emi lahenda kota ‘Sion’, mete-relu leo ele' meu!f
Huu fo emi Mane ma mai!
Ana mai sa'e nai keledei tena' esa lain.”g
16 Yesus ana mana tuka dea nara ta bubulu' hihii-nanau' ia ra sosoa-raraan. Tehuu fai fo Yesus nasoda selu' neme mamate Na mai, ma Manetualain nadedema Ni, besa' ko ara rafarene hihii-nanau' fo mana dui' nai Manetualain Susura Makamoi Na, la'e-neu' Ana. Sira boe rafarene lahenda makadoto' ia ra nonoi-tataon soa-neu' Ana.
17 Fai fo Yesus fee Lasarus nasoda selu' neme mamate na, ma naloo ni kalua neme rates dale' mai a, lahenda dodou' sama-sama ro Yesus. De besa' ia ara ratui' ii-ona' la'e-neu' hata fo maulu na rita mata'. 18 Huu ria naa, fai fo Yesus nanenea' Yerusalem, boe ma lahenda dodou' mai sipo' Ana, nana huu ara ramanene rae, Ria ri' tao tanda heran ria. 19 Boe ma lahenda Farisi ra esa nafada esa rae, “Mete dei! Basa lahenda rai dae-bafo' ia rapue raroo' a mai tuka Ni! Neu' ko mate'e na, ita susa! Kalu leo' naa, sona ita saka' tao ubea' bali?”
Lahenda Yunani hida nau raneta ro Ramatua Yesus
20 Lahenda Yunani hida sama-sama ro lahenda feke' ara leo kota Yerusalem reu, tuka feta Paska nai naa. Ara nau do'o-tabe Manetualain nai naa. 21 Boe ma ara mai dama Filipus, fo ri' neme koro Betsaida nai propensi Galilea. Ara hule ni rae, “A'a! Ami nau maneta moo Yesus.”
22 Filipus neu nafada Anderias. Boe ma dua si reu rafada Yesus. 23-24 Yesus nafada si nae, “Au ledo-fai Ki losa so. Huu ria naa Au muste mate dei, besa' ko Manetualain io-oa Au. Tebe-tebe! Ita tararaa' ana no bini-kee. Kalu ita sele hade deke' esa, sona muste purun nai dae dale', besa' ko mori fo kalua buna-boa' dodou'. Kalu ta leo naa', sona noi hade deke' esa' a nahere. 25 Lahenda bea ta tao dale' neu' Manetualain hihii-nanaun, nana huu ana talalu sue masoda na nai dae-bafo' ia, neu' ko soda' ria nalulutu'. Tehuu lahenda bea sadia fee heni soda na nai dae-bafo' ia, neu' ko ana hapu soda' matetu' mana basa taa'.h 26 Lahenda bea nau nalalau' Au, ana muste tuka nahere Au. Ri' Au nai bea, sona Au ata kara boe rai naa. Kalu lahenda bea nalalau' Au, neu' ko Au Papa Ka nai nusatetu-ikutema' a hada-horomata ni.”
Ramatua Yesus nafada mema' la'e-neu' Ria mamate Na
27 Yesus dedea tamba nae, “Besa' ia Au teisusa-dalehedi. Tehuu Au saka' ae leo' bea bali? Au muste hule ae, ‘Papa! Po'i-tata ma Au, ela hatemata' ia boso' Au mate,’ do? Ta'a! Au ta hule leo naa', huu fo Ana nadenu Au mai nana ela mate. 28 De Au hule a, leo ia': ‘Papa. Ela leo' bea na Au tuka noi Papa hihii-nanaum, ela basa lahenda ra io-oa Papa nade Ma.’”
Boe ma haraoe' esa neme lalai mai nae, “Au atudu rela-sa'a Ka, losa' lahenda dodou' io-oa nade Ka. Ma tantu atudu selu' ana losa' ara io-oa Au nade Ka bali.”
29 Lahenda makadoto' fo rapadei rai naa, ramanene haraoe' ria boe ma rae, “Tatas a!”
Lahenda ruma bali rae, “Ta'a! Manetualain eila'o-limalopen esa dedea no Ni.”
30 Tehuu Yesus nafada nae, “Bisinaa' a haraoe' ria soa-neu' emi, ta soa-neu' Au. 31 Besa' ia Manetualain huku lahenda dae-bafo' masala-masiko' ara. Ma Ria boe usi heni nitu ra malakan fo ri' homu pareta nai dae-bafo' ia. 32 Kalu lahenda londa Au nai ai kake' lain, neu' ko Au hela a katema' lahenda ra fo ramahere Au.” 33 (Ana dedea nae leo' naa, ela natudu nae neu' ko Ana mate neni' eno leo bea'.)
34 Boe ma lahenda fo rai naa ratane rae, “Ami parnaa mamanene neme Manetualain Atoran Na nae, Kristus nasoda naroo. Ubea' taon, de Papa mae, ‘Neu' ko ara londa Lahenda Dae-bafo' Tetea' a nai ai kake' lain?’ Te Lahenda Dae-bafo' Tetea' ria nana, bea?”i
35 Yesus nataa si nae, “Ta doo' a, te Au makaledo Ka ta nahaa nai emi so'. De fai fo Au bei nai ia, sona emi muste masoda roo-tetu', ela tadalu' a boso' napoti na makaledo' fo nai emi dale mara. Huu fo lahenda bea leo-la'o nai maiu-mahatu', ana ta bubulu' leo bea' neu. 36 Fai fo bei hapu Au makaledo Ka, emi muste mamahere Au, ela emi dadi lahenda makaledo', de emi bubulu' saka' leo bea' meu.”
Yesus dedea basa nae leo' naa, boe ma Ana heo' heni aon neme lahenda makadoto' sira mai, ela mesa' Ana.
Lahenda Yahudi ra ta ramahere Ramatua Yesus
37 Leo mae Yesus tao tanda heran dodou' nai lahenda makadoto' sira matan, tehuu ara ta ramahere Ni. 38 Sama leo' Manetualain mana nesi matan Yesaya, parnaa nafada mema' nae,
“Ramatua'! Ta hapu lahenda ramahere ami tutui-bebekam!
Leo mae Ramatua' a matudu kuasa Ma,
tehuu lahenda ra ta rita hata esa boe'!”j
39 Huu ria naa, besa' ia lahenda Yahudi ruma ta bisa ramahere Manetualain, sama leo' Yesaya dui' nai babati-lalane feke' nae,
40 “Manetualain nae, ‘Au tao apoke mata nara,
ela ara ta bisa rita dae.
Au tao amepe dale nara,
ela boso' ara bubulu' matetu'.
Ataa' asa leo' naa,
ela boso' ara ratafali mai saka Au,
ma ela boso' Au puli si.”k
41 Yesaya dedea nae leo' naa, nana huu ana nita Yesus marela-masa'an, ma ana tui mema' la'e-neu' Yesus.
42 Leo mae leo' naa, tehuu lahenda dodou' ramahere Yesus. Ta noi lahenda biasa fa, lahenda Yahudi ra malaka nara ruma ramahere Ni boe. Tehuu ara ta manaku Yesus nai lahenda dodou' matan, nana huu ara bii' lahenda Farisi ra usi heni si reme uma mamaso' a mai. 43 Huu fo malaka sira rahii' sipo' noi i'io neme lahenda dae-bafo' a, te kalu Manetualain io si, sona ara ta tao dale' neu.
Ramatua Yesus Hara-dasin natudu lahenda a tetea na
44 Boe ma Yesus dedea nambera nae, “Lahenda bea namahere Au, ana ta namahere noi Au mesa' Ka, tehuu ria boe namahere Manetualain fo ri' nadenu Au. 45 Kalu lahenda bea nita Au, sona ria boe nita Manetualain fo ri' nadenu Au. 46 Au mai nai dae-bafo' ia dadi sama leo' makaledo'. Ela basa lahenda fo ramahere Au, ta rasoda rai maiu-mahatu' a. 47 Kalu lahenda fo namanene Au Dedea-nafada Ki, tehuu ta tao tukan, sona Au ta aetu' ria huhuku na. Huu fo Au leo dae-bafo' ia mai, ta ela aetu' lahenda ra huhukun, tehuu Au nau po'i-tata lahenda reme sala-siko nara mai. 48 Tehuu basa lahenda fo tipa-tola' Au, ma ta nau sipo' Au Dedea-nafada Ki, ria nanuu mana ee dedea' so. Losa dae-bafo' a nonoe na, te Hara-dasi' fo parnaa Au tui-beka si a, si' neu' ko raetu' lahenda rupa leo naa' a huhuku na. 49 Au ta parnaa dedea uni' Au nade Ka. Tehuu Au dedea uni' Papa Ka nai nusatetu-ikutema' a nade Na. Huu fo Ria ri' nadenu Au. Ma Ria ri' pareta Au muste dedea ubea'. 50 Au bubulu' Ria pareta Na neni soda' matetu mana basa taa'. Huu ria naa, Au dedea tuka matetu' hata fo Papa Ka nadenu Au dedea.”