2 Ara losa, boe ma gubernor Pilatus natane Yesus nae, “Leo' bea? Tebe O nana lahenda Yahudi ra Mane' na, do?”

Yesus nataa nae, “Tebe. Papa gubernor dedea la'e ria!”

3 Malaka agama Yahudi ra malaka nara dedea ro gubernor rae, “Lahenda ia tao sala' ta baiana' so'!” De ara tui Ria sala nara esa-esa.

4 Gubernor natane selu' Yesus nae, “O ta mamanene sira dedea nara fa? Ara fee O sala' ta baiana' so'. Soba O sefi sira dedea nara dei!”

5 Tehuu Yesus ta nataa hata-hata esa boe', losa' gubernor a heran.

6 Tuka-tuka teu', kalu lahenda Yahudi ra tao feta Paska, sona lahenda kadodou' ara biasa here lahenda mana huku' esa, ela gubernor po'i ni. 7 Tepo' ria, lahenda mana huku' esa, nade Barabas. Maulu na, hopu ra ni no nonoo nara, nana huu ana nalena-laka mana pareta Roma, ma naisa lahenda. 8 Huu no feta Paska a nanenea', boe ma lahenda kadodou' ara leo gubernor Pilatus reu, de hulen rae, “Papa gubernor! Fai Paska a nanenea' so. Kalu bisa, papa gubernor po'i lahenda mana huku' esa sama leo' bale-bale!”

9 Gubernor nataa nae, “Emi nau au po'i bea? Kalu au po'i Yesus, emi lahenda Yahudi a Manem ia, emi mataa, do?” 10 Gubernor dedea nae leo' naa, sekonaa te ana bubulu' malaka agama Yahudi ra malaka nara roo Yesus leo ria neu, nana huu ete' ao nara raan seli ro Yesus.

11 Tehuu malaka agama ra duduku-papau' lahenda kadodou' sira, hule gubernor a rae, “Ami ta mahii' Ana! Ami mahii' po'i Barabas!”

12 Gubernor natane selu' nae, “Kalu leo' naa, sona Yesus fo ri' raloon rae ‘Mane' lahenda Yahudi’ au taon leo' bea?”

13 Basa si rahara bela' a rae, “Maisan leo! Paku Ni neu' ai kake' a!”

14 Gubernor natane nae, “Te Ana nasala' ubea'? Au parisa' Ana so, tehuu au ta hapu Ni sala hata esa boe'!”

Tehuu basa si rahara rambera bali rae, “Maisa Ni! Paku Ni neu' ai kake' a leo!”

15 Huu no gubernor a nau tao naloloa lahenda kadodou' sira dale nara, de ana po'i Barabas, tuka sira hihii-nanaun. Boe ma ana pareta lahenda manea ra, fepa-li'u Yesus pake cambuk.^a Fepa-li'u basan, boe ma soldadu ra roo Yesus, reu paku raisan nai ai kake'.

16 Boe ma soldadu ra hela roo Yesus leo sira kintal maloa na neu.^b Nai na raloo ra sira nonoon batalion esa. 17 Ara olu fee Yesus badu pila barakeo' manaru esa, sama leo' mane' ara biasa pake a. Ara hai ra ai makou' a rana nara, de ralanen tao silaka. Ara poro' silaka koo-kau' ria neu' Yesus laka Na, do'o-tabe ramimina' Ana, sama leo' ara so'u mane' bebeu' de feen pake silaka mana pareta.

18 Boe ma basa si fee hada-horomata ramimina' Ana ma rae, “Soda-mole', mane' lahenda Yahudi!” 19 Ma ara sunda' undulaka nara nai Yesus matan, fo tao uni sira do'o-tabe Ni. Ara mudi ape neu' mata-idun. Ma ara fepa rasarerei Ni reni' ai. 20 Ara ramumulu-ramamae' basa Ni, boe ma ara olu heni badu manaru ria. De fee Ni pake selu' badu Na. Basa boe ma ara roo Ni leo kota Yerusalem dea' neu, ela londa-lake raisa Ni nai ai kake'.

21 Fai fo kalua reme kota Yerusalem mai, nai eno talada' raneta ro lahenda kota Kirene esa nade Simon. Ria nana Aleksander no Rufus papa na. Ana besa' ko saka' maso' leo Yerusalem neu, tehuu soldadu ra homu raan, de raseti ni nasaa Yesus ai kake' Na.^c 22 Ara roo Yesus losa mamana' esa, nade Golgotaa. (Sosoa na nae, ‘Mamana laka dui'’.) 23 Nai naa, ara fee Yesus ninu anggor maeis mana epo' no modo-aidoo, ela Ana nanenete hedis. Tehuu Yesus ta nau ninu. 24-25 Boe ma ara paku raleleka' Yesus neu' ai kake' a. Ara rapadei' ai kake' ria, nana bate li'u sio balahaa na. Soldadu ra hela lot, fo nau bubulu' bea ri' hapu Yesus kakao-papaken.^d 26 Ara dui' nai papa' esa, fo pakun nai Yesus laka Na poo' lain nae,

Ara pake eno' ria ela huku Yesus. 27 Nai ria boe, ara londa-lake ramate lahenda parampok dua. Esa nai Yesus boboa ona Na, ma esa nai boboa ii Na. 28 [No ria naa natetu na hata fo mana dui' nai Manetualain Susura Makamoi Na nae, “Ara tao raan sama leo' parampok.”]^{e f}

29 Basa lahenda fo la'o resi' naa, rita Yesus mana londa' nai ai kake' a. Ara leleu' laka nara, ma ramumulu-ramamae' Yesus rae, “O mae bisa fate heni Manetualain Uma Mamaso Yahudi Ina Na, boe ma noi fai' telu' a, te mafoa maan selu', hete?^g 30 Soba O onda meme ai kake' ria mai, fo po'i ma aom leo. Kalu leo' naa besa' ko ami mamahere, O nana Manetualain Anan.”

31 Malaka agama Yahudi malaka nara ma mesen agama ra boe ramumulu-ramamae' Yesus, ma beidea rae, “Ana po'i-tata na lahenda feke' a, tehuu ta bisa po'i-tata na ao-ina heheli Na. 32 Hule aon nae, Ria nana ‘Kristus’, Lahenda fo Manetualain helu mema' neme ulu' mai. Lahenda feke' ara rae, Ria nana lahenda Israel Mane' na. Kalu tetebes ara leo' naa, sona ela Ana onda neme ai kake' a mai, fo ita tita dei. Leo' naa sona besa' ko ita tamahere Ni.”

Lahenda kadua' sira fo ri' londa bela asa ro Yesus nai ai kake' a, ara ramumulu-ramamae' Ana boe.

33 Boe ma maiu' a napoti na mamana' ria neme ledo namatetun ria losa li'u telu leodaen.

34 Naraa la'e li'u telu leodaen, boe ma Yesus naloo nambera pake dedea Aram nae, “Eloi! Eloi! Lema sabaktani?” (Sosoa na nae, “Au Manetualain Ka! Au Manetualain Ka! Ubea' taon, Papa foa ela Au leo' ia?”)^h

35 Lahenda hida ranenea' rai naa, ramanene Yesus hara Na. De rae, “Emi nenene dei. Ana naloo Elia, Manetualain mana nesi mata fai ulu na.” 36 Lahenda esa nalai neu hai na lopu, de naboron leo anggor maeis dale' neu. Ana nato lopu ria neu' tete'e a peda na, de loo ni neu' Yesus bafa Na, ela Ana nasamusi. Boe ma lahenda ria dedea nae, “Tahani ela mete tasudi! Bea bubulu' bate Elia mai naonda Ni neme ai kake' a mai.”ⁱ

37 Yesus naloo nambera selu', boe ma mate Ni.

38 Nai Uma Mamaso Yahudi Ina a, tema' maloa ina esa mana pepele' babaa Manetualain Kama Malalao-malalafu Naan Seli. Naraa la'e Yesus maten, boe ma tema' ria sii batin neu' dua, neme lain losa dae'.^j

39 Nai Golgotaa, komendaan esa napadei' nanea nai Yesus ai kake Na. Ana nita Yesus mamate Na, boe ma kekes ara. De nae, “Tebe-tebe Lahenda ia, Manetualain Ana Na!”

40-41 Ma ina' hida rita Yesus mamate Na, tehuu mete reme doo' a mai. Sira nana, maulu na ralalau' Yesus asa rai Galilea. Si' Salome, Maria neme nusa Magdala, ma Maria esa bali (fo ri' Yakobis tate ana' a no Yoses^k maman), ma ina' feke' fo ri' tuka ro Yesus sama-sama leo Yerusalem reu.^l

42-43 Boe ma lahenda esa saka eno', fo nau naonda na Yesus popora Na neme ai kake' ria mai. Lahenda ria nade Yusuf, lahenda kota Arimatea. Ma ria boe ei-lima' neme mana ee dedea agama Yahudi. Dale na malole a. Ana nahani Manetualain pareta na mamain.

Yesus maten la'e soda Lima'. Balahaa' la'e lahenda Yahudi ra fai huhule-haradoin. Huu ria naa, soda Lima na Yusuf nau naonda naulu' Yesus popora Na. Ana napararani dale na, neu hule Yesus popora Na nai gubernor Pilatus. 44 Gubernor namanene Yusuf hule nae leo' naa, boe ma ana heran. De nae, “Te lahenda ria maten lai-lai a! Au aendobuko ta leo naa'!”

Boe ma ana nadenu lahenda reu raloo komendaan ria, de natane ni nae, “Leo' bea? Yesus maten so, do bei'?”

45 Komendaan ria nataa nae, “Mema' mate Ni ri' bisinaa' a papa.” Gubernor namanene leo' naa, boe ma ana fee Yusuf isin, neu naonda na Yesus popora Na.

46 Yusuf neu asa tema' manaru mabeli. Boe ma ana leo Golgotaa neu naonda Yesus popora Na neme' ai kake' a mai. Ana poti natalolole popora' ria neni' tema' bebeu'. Tepo' ria, ara besa' ko paa basa bolo mamates esa nai lete batu. Ara o'o reni Yesus popora Na de rapeu' Ana neu' bolo' ria dale'. Ara loli ra batu bebela bau-ina' esa, de tatana ratalolole bolo' ria bafa na. Basa boe ma Yusuf asa fali.

47 Fai ria Maria neme Magdala ma Maria feke' (fo ri Yoses mama na), tuka losa naa boe. Dua si rita ma rafarerene' ratalolole mamana' fo ri' rapeu' Yesus popora Na.