3 Fai ria, malaka agama Yahudi malaka nara, ma lasi' ara rabua rai Kayafas uman. Kayafas nana malaka agama Yahudi malaka bau-ina na. 4 Ara rasaka eno' nau hopu ramaninino' Yesus, fo raisa Ni. 5 Tehuu ara ator eno na rae, “Mahani dei! Ita boso' talale hopu Ni, nana huu fai malole a nanenea' so. Boso' losa lahenda makadoto' fo rahii' Ana, tao kaco.”

6 Fai ria boe, Yesus asa reu raa-rinu nai lahenda esa nade Simon, uma na nai koro Betania. Maulu na, lahenda rahia' Simon, nana huu ana hapu hedis kusta. Tehuu besa' ia te'e na aon so. 7 Fai ria ara bei raa-rinu, te ina' esa leo Yesus mai. Ana homu neni boto esa, taon neme batu mabeli a mai.^b Boto ria isi na mina boo meni tea' mabeli bera'. Ina' a beru natepa boto ria tatana na. Boe ma ana po'a mina ria neu' Yesus laka Na feen titi bai-bai dadi tanda nae ana fee hada-horomata neu' Yesus.

8 Yesus ana mana tuka dea nara rita ina' ria tao leo naa', boe ma ara ramanasa, de dedea-rao nara rae, “Boso' tu'u heni hihii' mina boo meni' mabeli bera' ria! 9 Malole lena' ana se'o mina ria! Fo ela bati doi na, fee lahenda manato'a-manataa' ara!”

10 Tehuu Yesus bubulu' sira dudu'a-aafin, de Ana dedea nae, “Emi boso' tao masususa' ina' ia! Pesin neme' naa! Au amaho'o, nana huu ana po'a mina boo meni' ia neu' Au ao-ina Ka. 11 Huu fo lahenda manato'a-manataa' ara tuka-tuka fai' rai emi talada. Tehuu ta doo' a, te Au ta sama-sama oo emi so'.^c 12 Ma ina' a po'a mina ia neu' Au, nana ana sadia na Au ao-ina Ka, sama leo' ria kari rampe neu' Au popora Ka. Huu fo Au masoda ka ta doo' a so'. 13 Mafarene matalolole! Nai mamana' bea a, Manetualain Tutui Malole Na tui-bekan rule-feo dae-bafo' ia, tantu sira boe tui ina' ia malole na, ela basa lahenda ra rafarene ni.”

14 Lahenda esa neme Yesus ana mana tuka dea kasanahulu dua nara, nade Yudas Iskariot. Fai ria boe, ana kalua neu saka malaka agama Yahudi malaka nara, fo nau fee Yesus leo sira neu. 15 Ana losa, boe ma natane si nae, “Papa kara! Kalu au fali emi fo hopu Yesus, sona emi fee au ubea'?”

Ara rataa rae, “Kalu o nau se'o Ni fee ami, sona ami bae.” Boe ma ara reke ra doi lilo fula' telu hulu fee Yudas.^d 16 Yudas kalua, boe ma ana mulai saka eno' fo nau fee Yesus leo sira neu.

17 Tuka-tuka teu', lahenda Yahudi ra fai malolen fo ri' fetan fai' hitu. Ara hule fai malole ria rae, ‘Feta Roti Ta Pake Ralu Tetei'’.^e Fai fo saka' mulai feta Paska ria, Yesus ana mana tuka dea nara mai ratane Ni rae, “Papa! Hatun ia ita muste mulai tao ita fai malole na. De Papa nau ami meu pau bibi-lopo, ma sadia mamana feta Paska nai bean?”

18 Ana nataa nae, “Emi leo bendar a meu, neu' ko maneta mo tou' esa. Mafadan mae leo ia', ‘A'a! Papa Mesen nameda naan ta doo' a so' te Ana mate. Ana hule mamana' nai a'a uma na, ela Ana paken fo tao feta Paska no ana mana tuka dea nara.’”

19 Ana mana tuka dea nara ramanene leo' naa, boe ma ara tao tuka Ria dedea Na, de ara sadia feta Paska nai naa.

20 Nahatu, boe ma Yesus no ana mana tuka dean sanahulu duas ratuu' raa feta. 21 Ara raa, boe ma Ana dedea nae, “Emi nenene! Neme emi mai, neu' ko esa se'o heni Au leo lahenda feke' ara uu.”

22 Ara ramanene leo' naa, boe ma dale nara ta tama so'. De sira esa-esa ratane Yesus rae, “Lahenda fo ri' Papa mafada a, ta au fa, hete?”

23 Ana nataa nae, “Lahenda fo naboro roti na leo mako ia dale' neu sama-sama no Au, ria ri' neu' ko se'o heni Au.^f 24 Mafarerene'! Au, Lahenda Dae-bafo' Tetea' ia, muste mate sama leo' ara dui' mema' nai Manetualain Susura Makamoi Na dale'. Tehuu besa-besa! Lahenda fo nau se'o heni Au a, neu' ko lepa naa soe a! Malole lena' kalu mama na ta boki ni.”

25 Yudas boe natane nae, “Tantu lahenda fo Papa mafada a, ta au fa, hete?”

Yesus nataa nae, “Tebe o ri' mafada mae leo naa'. Te bea bali?”

26 Ara bei raa, boe ma Yesus hai naa roti balo' esa, de hule makasi neu' Manetualain. Ana tetebi roti ria, de loo fee ana mana tuka dea nara, ma nafada nae, “Roti ia, nana Au ao-paa Ka. Emi hai maan fo mia leo!”

27 Basa de Ana hai naa galaas esa henu' no oe anggor, boe ma Ana hule makasi neu' Manetualain. Ana loo fee ana mana tuka dea nara, ma nafada nae, “Emi basa hai maan fo minu. 28 Huu fo oe anggor ia, nana Au daa Ka. Neu' ko Au mate, Au daa Ka faa ela po'i-tata naa lahenda dodou' reme sala-siko nara mai. Au daa Ka besa' ia natetu na hata fo Manetualain helu mema' neme' fai a ulu na mai. Hai maan fo minu leo!^g 29 Tehuu nenene matalolole! Mulai neme hatun ia mai, Au ta inu oe anggor so'. Neu' ko Au oo Papa Ka nai nusatetu-ikutema' matuu' homu pareta, sona besa' ko Au inu oo emi bali.”

30 Boe ma ara soda sosoda' esa io-oa Manetualain. Hatun ria boe, ara kalua leo lete Saitun reu.

31 Ara la'o, boe ma Yesus nafada mema' ana mana tuka dea nara nae, “Neu' ko hatun ia, emi basa malai ela Au. Huu fo ara dui' mema' nai Manetualain Susura Makamoi Na nae,

32 Tebe Au mate. Tehuu kalu Au asoda selu', sona Au uu ahani emi nai propensi Galilea.”ⁱ

33 Petrus nadedea laka nae, “Papa! Leo mae lahenda feke' ara basa si ralai ela Papa, tehuu au ta'a!”

34 Yesus nataa nae, “Petrus! Leo' naa do? Mamahere Au! Hatun ia, manu' a bei ta koko'oa fa, te o mafada lai' telu so, mae o ta malelela' Au!”

35 Tehuu Petrus nafada tetea' nae, “Papa! Kalu Papa mate, au boe mate sama-sama. Au ta alai ela Papa fa!” Petrus nonoo feke nara boe esa' ko nafada' aon nae leo' naa.

36 Yesus asa la'o raroo leo lete Saitun reu, ara losa oka' esa, nade Getsemani.^j Nai naa, Ana nafada ana mana tuka dea nara nae, “Emi matuu mahani' ia, huu fo Au saka' uu' ele hule-haradoi.” 37 Ana naloo na Petrus, Yakobis, ma Yohanis, fo telu si sama-sama ro Ni reu. Mulai neme oras ria mai, boe ma dale Na susa ma ta tama so'. 38 Ara la'o raola bai', boe ma Ana nafada si nae, “Au dale Ka susa naan seli! Au ameda aan nonoo' nae Au saka' mate. Emi matuu' mai' ia, ma manea mo Au.”

39 Ana lali doo' a bai' leo mata neu, boe ma sunda' undulaka Na fo hule-haradoi nae, “Papa manasue-manalai! Kalu Papa mataa, sona boso' Au lepa-asaa doidoso ia. Tehuu boso' tuka Au hihii-nanau Ki; ela tuka noi Papa hihii-nanaum.”

40 Ana hule-haradoi basa, boe ma fali leo ana mana tuka dean sira telu neu. Tehuu ara suku ramanee. Ana fafae nafoa si, boe ma dedea no Petrus nae, “Petrus! Ubea' taon, de emi suku? Au nai naa noi hatemata', tehuu emi ta bisa manea bai' boe'! 41 Madidila' mata mara dei, ma foa fo manea mo Au! Huu fo tebe emi dale mara rahii' tao malole, tehuu ao-paa' a ta nabe'i. De malole lena' hule-haradoi, ela kalu emi hapu sosoba' boe oo, bisa manenete.”

42 Ana neu hule-haradoi selu' nae, “Papa! Kalu Au muste lepa-asaa doidoso ia, sona ela tuka Papa hihii-nanaum.” 43 Hule-haradoi basa, boe ma Ana fali leo ana mana tuka dean sira telu neu. Tehuu ara suku selu' bali, huu fo mata nara rambera.

44 Ana foa ela si, de neu hule-haradoi selu' lai' esa bali. Ana hule selu' Papa Na, fo boso' nataa' Ana lepa-nasaa doidoso ria, tehuu ela tuka noi Papa hihii-nanaun. 45 Hule-haradoi basa, boe ma Ana fali neu fafae ana mana tuka dea nara nae, “Emi bei suku maroo, do? Foa leo! Lahenda fo nau se'o heni Au, Lahenda Dae-bafo' Tetea' ia, nanenea' so. Besa' ia ara nau hopu ra Au, fo fee Au leo lahenda tadalu' ara uu. 46 Foa leo! Madidila' mata mara fo soba mete leo ele' meu dei! Te lahenda fo ri' se'o heni Au a, ana mai so.”

47 Yesus bei dedea nae leo naa', te Yudas no lahenda dodou' mai. Ara reni tafa', ma ai tutuku', fo saka' hopu Ni. Ara tao leo naa', tuka pareta neme malaka agama Yahudi malaka nara ma lasi' ara. 48 Yudas nafada mema' asa nae, “Emi mete matalolole! Au de'i lahenda bea, sona emi hopu maan leo! Huu fo emi saka lahenda a nana, ri naa'!”

49 Ara losa Yesus, boe ma Yudas la'o naroo mata Na neu, ma nae, “Soda-mole', Papa Mesen!” Boe ma Yudas holu Ni ma de'in.

50 Yesus natane ni nae, “Yudas! O holu ma de'i Au nana maksud na ria', do?” Boe ma lahenda kadodou' sira tuturu mata reu, hopu Ni.

51 Kekeneu te, Yesus ana mana tuka dean esa lesu na tafa na, de tati naetu lahenda esa ridoo na. (Lahenda fo ri' hapu hina' a, nana malaka agama Yahudi malaka bau-ina na atan.) 52 Yesus nita leo' naa, boe ma nafada ni nae, “Sodo' fali' tafa ma neu' mana na. Huu fo lahenda bea nai masoda na namina' tafa', neu' ko raisan reni' tafa' boe. 53 O ta bubulu', do? Au bisa hule Papa Ka fee Ria eila'o-limalopen rifu-natun^k reme nusatetu-ikutema' a mai, ela ara tulu-fali Au. 54 Tehuu boso'. Neme' naa, ela lahenda ia ra hopu ra Au. Huu fo basa-basan mana dui' mema' nai Manetualain Susura Makamoi Na la'e-neu' Au a, muste dadi.”

55 Boe ma Yesus dedea no lahenda fo ri' mai hopu Ni nae, “Bate emi mae Au ia lahenda tadalu', de emi meni tafa' ma ai tutuku' mai hopu Au? Sekonaa te, tuka-tuka fai' Au anori-afada emi nai Manetualain Uma Mamaso Yahudi Ina Na, tehuu ta hapu lahenda esa tao Au leo' bea boe'.^l 56 Tehuu neme' naa! Mai hopu ma Au leo! Huu fo basa-basa ia ra mana dui' mema' neme ulu' mai nai Manetualain Susura Makamoi Na.”

Yesus ana mana tuka dea nara rita leo' naa, boe ma bii raan seli, de ara ralai ela Ni.

57 Lahenda sira hopu ra Yesus, boe ma roo Ni leo Kayafas fo ri' malaka agama Yahudi malaka bau-ina na uman neu, nana huu lahenda bau-ina' ara tesa rai naa so. Sira nana, malaka agama Yahudi malaka nara, mesen agama ra ma lasi' ara. 58 Fai ria ara hopu roo Yesus, Petrus boe tuka nafufuni' losa malaka bau-ina' a uma na. Petrus maso' leo kintal dale' neu, de natuu' sama-sama no lahenda fo rai naa. Huu fo ana nau bubulu' neu' ko hata ubea' dadi. 59 Nai uma ria dale', malaka agama Yahudi malaka nara dedea-rao' ro basa lahenda fo urus dedea agama. Basa si saka buti ela huku ramate Yesus. 60 Leo mae sira ratutulu' sakasii pepeko' dodou', tehuu ara ta hapu buti esa boe', fo bisa paken. Mate'e na ara hapu lahenda dua sakasii. 61 Dua si sakasii rae, “Ami parnaa mamanene Lahenda ia dedea nae, ‘Neu' ko Au fate heni Uma Mamaso Yahudi Ina a. Tehuu nai fai' telu dalen te, neu' ko Au afoa aan selu'.’”^m

62 Malaka agama Yahudi malaka bau-ina na foa napadei neu' basa lahenda matuu' sira matan, boe ma ana natane Yesus nae, “O mamanene lahenda dodou' kolaa' O so. Ubea' taon, de O moi nenee' a?” 63 Tehuu Yesus ta nataa hata-hata esa boe'. Boe ma malaka bau-ina' ria natane bali nae, “Au nau atane! Tehuu O muste mataa tetea' sama leo' O mataa neu' Manetualain masoda' nai nusatetu-ikutema' a. Lahenda rae, O ia nana Kristus, Manetualain Anan fo ri' Ana helu mema' neme fai a ulu na mai a. Tebe, do?”

64 Yesus nataa ni nae, “Tebe, sama leo' papa dedea ma. Tehuu mafarerene'! Neu' ko emi basa mita Au, Lahenda Dae-bafo' Tetea' ia. Neu' ko Au atuu' nai nusatetu-ikutema' a nai Manetualain boboa ona Na, fo homu pareta sama-sama oo Ria fo ri' mana kuasa. Boe ma neu' ko Au onda fali mai oo oa' a.”ⁿ

65 Malaka bau-ina' ria namanene Ni dedea nae leo' naa, boe ma namanasa naan seli, de noi sii' badu manaru na. Ana dedea nambera, ma nafada basa lahenda fo ratuu rai naa nae, “Ita ta parluu mana sakasii so'! Emi mamanene Ria dedea Na so. Ana so'u aon dadi neu' Manetualain Anan. Ana namumulu-namamae' Manetualain ia so! Emi basa bubulu', tuka ita atoran agama na, kalu bea tao aon sama no Manetualain, sona lahenda ria muste mate! 66 De besa' ia emi maetu', leo' bea?”

Basa si rataa rambera rae, “Tebe lahenda ia sala! De Ana muste hapu huhuku mamates!”^o

67 Boe ma lahenda hida oru' mata reu fo mudi radiu Yesus ape. Ara popo'o ramimina' Ana ma fapa Ni.^p 68 Ara ramumulu-ramamae' Ana rae, “O ia Kristus, hete? Soba O maneu' masudin dei! Bea ri' poko O ia?”

69 Fai ria Petrus bei natuu nai kintal. Ata ina' esa mai dedea no ni nae, “Bisinaa' a o boe sama-sama mo Yesus, lahenda Nasaret ria, hete?”

70 Tehuu ana nalena nai lahenda kadodou' sira matan nae, “Ta'a! Ubea' taon, o matane leo naa'! Au ta alela' Ana.” 71 Petrus dea' neu de napadei' nai lelesu bafa' a.

Boe ma ina' feke' esa nita ni nai naa, de ana nafada lahenda fo ri' rai naa nae, “Bisinaa' a au ita lahenda ia sama-sama no Yesus, lahenda Nasaret ria.”

72 Boe ma Petrus nadedea laka nae, “O bate mamulu! Au soo-supa! Au ta alela' Lahenda ria!”

73 Ta doo bea boe', te lahenda feke' fo rai naa dedea ro ni rae, “O boso' boe tipu mae, o ta sama-sama mo lahenda ria! Huu fo ami mamanene o dedea ma, leo' lahenda Galilea!”

74 Tehuu ana mulai nadedea laka nae, “Au soo-supa pake Manetualain nade Na! Au ta alela' Lahenda ria fa!” Naraa la'e ana dedea nae leo' naa, boe ma manu' a koko'oa.

75 Petrus namanene manu' a koko'oa, boe ma nafarene bisinaa' a Yesus dedea Na nae, “Manu' a bei ta koko'oa fa, te o mafada lai' telu mae, o ta malela' Au.” Ana nafarene leo' naa, boe ma leo dea' neu de dola nasae'edu.