Tepo' ria boe Hanas no Kayafas dadi malaka agama bau-ina fee malaka agama Yahudi nai kota Yerusalem.

Tepo' ria ri' Manetualain nalosa' Hara-dasin neu' Yohanis, Sakaria ana na nai mamana lino-nees. 3 Yohanis namanene naan, boe ma ana leo basa koro' fo ranenea' lee Yarden, de nafada lahenda ra nae, “Emi muste saledale-tu'etei mara, ela Manetualain sae-safe heni emi sala-sikom. Ma emi muste sarani fo dadi tanda nae, emi malolole mo Manetualain.”

4 Fai a ulu na, Manetualain mana nesi matan ba'i Yesaya dui' la'e-neu' Yohanis ia nae,

7 Lahenda dodou' reme basa mamana' ain mai hule Yohanis sarani si. Tehuu ana nasapaa si nae, “Maedi-mafule' emin! Emi sama leo' meke ma'aa'! Mana saledale-tu'etei fufudi' emin, boso mae emi lui meme Manetualain huhuku Na mai. Ta doo' a so', te Manetualain huku lahenda fo ta saledale-tu'etein no matetu'.^c 8 Boso' emi afi mae, ‘Emi nana ba'i Abraham tititi-nonosin’. Dudu'a-aafi sira ta bisa tulu-fali emi, nana huu ta bisa tao nalalao-nalalafu' emi. Manetualain bisa adu na batu ia ra dadi reu' ba'i Abraham tititi-nonosin. Au afada emi! Matudu nai leleo-lala'om mae, emi saledale-tu'etei mara de tuka Manetualain.^d 9 Emi muste tao hihii-nanau' malole. Ta'a sona Manetualain huku emi bera' a, sama leo' lahenda pake ta'a, fo lo'o heni ai huu' a neme oka na mai. Ai huu' fo ta neni buna-boa malole, sosoa-raraa' ta'a. De malole lena' lo'o henin fo tu'un leo ai-pila' dale' neu.”^e

10 Boe ma lahenda kadodou-ina' sira ratane Yohanis rae, “De ami muste tao ubea'?”

11 Ana nataa nae, “Kalu o manuu badu dua, sona fee esa leo lahenda fo ta nanuu badu. Kalu o hapu nanaa', sona bati fee lahenda fo ta nanuu nanaa'.”

12 Mana susu doi-bea ra boe mai hule Yohanis sarani si. Ara ratane rae, “Papa mesen! Ami muste tao ubea?”^f

13 Ana nataa nae, “Kalu mana pareta raetu' ra anaraun ara doi-bea na hida, sona ara bae tuka ria.”

14 Soldadu hida rai naa boe. Ara ratane Yohanis rae, “Kalu ami, leo bea'? Ami muste tao ubea'?”

Ana nataa nae, “Boso' masala'o kokose lahenda doi-talin tuka emi hihii mara. Ma boso' mafarara'u kolaa' lahenda. Emi muste hule makasi ma sipo noi kadi mara, ria dai so.”

15 Lahenda ra ramanene dedean sira, boe ma sira esa duku' esa rae, “Bate Yohanis ia, nana Kristus, fo ri' neme ulu' mai Manetualain helu fee Ni mai a!”

16 Tehuu Yohanis nasa'ai si nae, “Nenene matalolole! Neu' ko Lahenda esa matua-madema lena au, saka' mai. Leo mae au dadi noi neu' Ria atan boe, au ta araa.^g Au sarani emi pake oe, tehuu neu' ko Ana tao lena au, huu fo tao na henu emi dale mara neni' Manetualain Dula-dale Malalao-malalafu Na. Neu' ko Ana tao makamomoi emi, sama leo' lahenda hotu heni kadafu' ara. 17 Ana huku lahenda mana tao sala' ara, sama leo' lahenda manaetu-manaoru a tee' heni hade a kikili-kauan. Basa te Ana nadai hade neu' ara reu' so'a ra dale', tehuu hotu heni kikili-kauan. Leo' naa boe, neu' ko Kristus huku lahenda mana tao sala' ara, ma tu'u si leo ai-pila' mana basa taa' a dale' reu.”

18 No ria naa, Yohanis nafarerene' fee lahenda ra hihii-nanau' rupa', ma tui-beka fee si Manetualain Tutui Malole Na.

19-20 Tepo' ria boe, Yohanis dedea leleka' la'e-neu' Herodes nonoi-tataon. Dedea na leo ia': Herodes gubernor nai propensi Galilea. Ria sala na dodou'. Leo-leo' ana tonda na fadi na sao ina na, nade Herodias. Sekonaa te, fadi na bei nasoda, ma bei ta namaetu' no Herodias. Herodes leleo-lala'on ta la'e, de Yohanis nasa'ai leleka' ana, losa' Herodes ete' aon. Boe ma Herodes hopu naan, de tee ni leo bui dale' neu.^h

21 Maulu na, tepo' fo bei ta hopu ra Yohanis, ana sarani lahenda dodou'. Ma ana sarani Yesus boe. Basa de Yesus hule-haradoi, boe ma lalai natahu'a. 22 Tuti' a Manetualain Dula-dale Malalao-malalafu Na onda neu' Ana. Dula-dale' ria rupa na sama leo' manupui kalasi. Boe ma haraoe' esa neme lalai mai nae,

23 Yesus teun bate telu hulu, boe ma Ana mulai tui-beka fee lahenda ra la'e-neu' Manetualain eno masoda Na. Lahenda ralela' rae, Yesus nana Yusuf Anan. Yusuf bei-ba'i nara si':