Nitu ra malaka na soba Ramatua Yesus
4
Boe ma Manetualain Dula-dale Na napipipi-nalala'o noo Yesus leo mamana lino-nees neu, ela nitu ra malaka na soba Ni.a 2 Ana puasa nai naa hatu-leledon fai' haa hulu. De Ana namalaa naan seli. 3 Fai fo Ana namalaa, boe ma nitu ra malaka bau-ina na mai soba Ni nae, “O ia nana tebe-tebe Manetualain Ana Na, hete? Kalu tebe, sona pareta batu ia ra dadi reu' nanaa'.”4 Tehuu Yesus nataa nae, “Mana dui' nai Manetualain Susura Makamoi Na dale' nae:
‘Lahenda dae-bafo' a ta nasoda neme' noi nanaa-nininu' a mai.
Tehuu sira muste ramanene Manetualain Hara-dasin,
ma tao tuka Ria hihii-nanaun.’”b
5 Boe ma nitu ria noo Yesus leo kota Yerusalem neu, Manetualain kota malalao-malalafu Na. Ma noo Yesus leo mamana madema lain neu nai Uma Mamaso Yahudi Ina. 6 Nitu ria nae, “Kalu tebe-tebe Manetualain Anan O, sona soba paraboku dae' muu leo. Huu fo mana dui' nai Manetualain Susura Makamoi Na nae,
‘Neu' ko Manetualain pareta Ria eila'o-limalope nara rai nusatetu-ikutema' a,
ranea O.’
Nai Manetualain Susura Makamoi Na boe mana dui' nae,
‘Neu' ko ratanee ra O reni' lima nara,
Ela O ao-ina Ma boso' hedis a, ma ta teta' la'e batu a.’”c
7 Tehuu Yesus nataa nae, “Mana dui' nai Manetualain Susura Makamoi Na dale' nae,
‘Manetualain ri' nanuu haak pareta o.
Huu ria naa, o boso' soba Ni.’”d
8 Basa de nitu ria noo Yesus leo lete kadema ina esa lain neu. Ana natudu basa nusa' nai dae-bafo' a, ma sira lole-napun katema'. 9 Nitu ria natudu basa sira, ma nafada nae, “Sadi O sunda' undulaka ma do'o-tabe au, neu' ko au fee katema' sira reu' O.”
10 Tehuu Yesus nasapaa nae, “Nitu on! O maheo' meme ia' mai! Huu fo Manetualain Susura Makamoi Na nae,
‘O muste do'o-tabe Manetualain,
ma o muste malalau noi neu' Ana.’”e
11 Nitu ria namanene leo' naa, boe ma ana la'o ela Yesus. Tehuu Manetualain eila'o-limalope nara reme nusatetu-ikutema' a mai urus Ana.
Ramatua Yesus mulai nanori-nafada nai Galilea
12 Tepo' ria, mane' Herodes ena Yohanis Mana Sarani' a nai bui dale'. Yesus namanene leo' naa, boe ma Ana fali leo Galilea neu.f 13 Ana leo koro Nasaret na neu, basa de Ana la'o naroo neu leo nai koro Kapernaum. Koro' ria nai dano Galilea a suu na, nai Sebulon no Naftali oe-daen.g 14 No ria naa, Ana tao tuka hata fo Manetualain mana nesi matan Yesaya dui' mema' nae,
15 “Sebulon oe-daen, ma Naftali oe-daen
ranenea' dano Galilea, nai lee Yarden poo' muri.
Lahenda fo ta Yahudi, leo rai naa.
16 Ara rasoda nai maiu' dale',
tehuu besa' ia ara rita Makaledo' a.
Huu fo besa' ia, Makaledo' a nahaa
soa-neu' basa lahenda fo bei ta ralela' Manetualain.”h
17 Neme tepo' ria mai, Yesus mulai nanori-nafada lahenda nae, “Emi muste saledale-tu'etei mara, fo masoda lalao-lalafu'! Huu fo besa' ia basa lahenda ra bisa dadi reu' Manetualain lahendan.”i
Ramatua Yesus naloo lahenda manadolu-manadala haa fo tuka Ni
18 Fai' esa, boe ma Yesus la'o tuka dano Galilea a suu na. Ana nita lahenda dua a'a-fadi'. Esa nade Simon, tehuu lahenda biasa raloo ni rae, Petrus. Ma fadi na nade Anderias. Dua si dala ika' nai dano a, nana huu sira dua, manadolu-manadala. 19 Yesus naloo si nae, “Mai tuka Au! Emi biasa saka ika', tehuu besa' ia Au nau anori-afada emi, ela dadi meu' mana saka sumane'.” 20 Dua si ramanene leo' naa, boe ma foa ela sira dala na, de tuka tuti' Yesus.
21 Yesus asa la'o raroo selu' bai', boe ma Ana nita Sabadeus ana nara. A'a a nade Yakobis, ma fadi' a nade Yohanis. Dua si sama-sama ro papa na rahii ratalolole puka' nai ofa' dale'. Yesus naloo si fo tuka Ni. 22 Dua si ramanene leo' naa, boe ma ara foa ela papa na ma sira ofa na, de reu tuka tuti' Ana.
Ramatua Yesus nanori-nafada lahenda ma puli na lahenda kamahedis ara
23 Boe ma Yesus asa la'o rule-feo propensi Galilea, fo Ana nanori-nafada nai lahenda Yahudi ra uma mamaso nara. Ana nanori-nafada la'e-neu' Manetualain Tutui Malole Na, ma nafada eno na leo bea' lahenda bisa tuka Manetualain pareta Na. Ma Ana puli na basa lahenda ra reme hedi-raus rupa nara mai.j 24 Ta doo bea boe', te tutui' la'e-neu' Yesus tataon ria, tui-bekan losa rule-feo basa propensi Siria. Lahenda ra roo sira lahenda kamahedis rupa nara leo Ria neu. Ara roo lahenda nitu heke', mana hede' ma luku' ara. Ana puli na katema' asa. 25 Tepo' ria, lahenda dodou' mai tuka Ni. Ara reme propensi Galilea ma reme Dekapolis, fo ri' sosoa na nae, Kota Sanahulu. Ruma bali reme kota Yerusalem, reme propensi Yudea ma reme lee Yarden seri' mai.