Ramatua Yesus nasoda selu'!
28
Mamaso na balahaan, boe ma Maria neme Magdala ma Maria feke' a, reu dama rates ria. 2 Kekeneu te, dae-ina' a natakeko naan seli. Manetualain eila'o-limalopen rai nusatetu-ikutema' a, esa onda mai, de ana loli heni batu bau-ina' fo ri' mana tatana' nai bolo' a. Boe ma ana natuu' neu' batu ria lain. 3 Eila'o-limalope' ria mata-idun nahaa sama leo' relas, ma kakao-papaken fula makadila. 4 Lahenda manea sira bii raan seli losa' dere sa'u-sa'u, ma ara ta bisa rababale, sama leo' lahenda mana mate'.5 Eila'o-limalope nai nusatetu-ikutema' fo ri' mai a, nafada ina' sira nae, “Emi boso' bii! Au bubulu' emi mai saka Yesus, Lahenda fo ri' ara paku ramaten nai ai kake' a. 6 Ana ta nai ia so'. Huu fo Ana nasoda selu', sama leo' nafada a. Mai' ia mita mata' mamana' fo ara rapeu' Ria popora Na. Mamana' ria rou' so! 7 Besa' ia emi malale fali leo! Meu mafada Ria ana mana tuka dea nara mae, Yesus nasoda selu' so. Ana naulu' leo Galilea neu so. Ara muste reu raneta ro Ni nai naa, sama leo' maulu na Ana helu si a. Mamahere leo! Fali leo, ela tui hata fo ri' au afada a!”
8 Boe ma ina' sira la'o ela mamana' ria. Ara bii, tehuu sira boe ramaho'o. Ara ralale fali reu tui basa hihii-nanau' sira reu' Yesus ana mana tuka dea nara.
9 Tehuu losa eno talada', boe ma kekeneu te Yesus mai naneta no si. Ana dedea nae, “Soda-mole'!” Ara rita leo' naa, boe ma ranenea' mata reu de holu ra ei Na, ma do'o-tabe Ni. 10 Ana dedea nae, “Boso bii'! Meu mafada Au ana mana tuka dea kara, reu rahani Au nai Galilea.”
Lahenda manea ra reu tui la'e-neu' hata mana dadi' nai mamana' fo rapeu' Yesus popora Na
11 Ina' sira bei rai eno' talada', te lahenda manea ra fali leo bendar a reu. Ara reu tui malaka agama Yahudi malaka nara, basa hihii-nanau' mana dadi sira. 12 Boe ma malaka sira ro lasi' ara ator ra eno na, de ena-oo lahenda manea ra bafa nara reni' doi dodou'. 13 Malaka sira rafada rae, “Leo ia'. Kalu lahenda ratane, sona emi muste mataa mae, hatu na emi suku mamanee. Boe ma Ria ana mana tuka dea nara ramana'o reni popora Na. 14 Ma kalu papa gubernor namanene hihii-nanau' ria, sona emi boso' bii, huu fo neu' ko ami ator tou lasi' a.”
15 De lahenda manea sira sipo ra doi' ria. Ara tao tuka malaka sira hihii-nanaun. Huu ria naa, losa' besa' ia lahenda Yahudi ra bei ramahere tutui napuputa' ria.
Ramatua Yesus neu natudu ao-ina Na neu' ana mana tuka dea nara
16 Yesus ana mana tuka dean lahenda kasanahulu esa' ara, ramanene ina' sira tutui na, boe ma ara leo propensi Galilea reu, ela raneta ro Ni nai lete' esa, tuka Ria hehelu Na.a 17 Ara rita Ni nai naa, de ara do'o-taben. Tehuu sira ruma dale nara bei kadudua.
18 Boe ma Ana nanenea' no si, ma dedea nae, “Manetualain fee Au kuasa, de Au pareta basa-basan fo rai lalai, ma basa-basan fo rai dae-bafo' a. 19 De emi leo basa mamana' ain meu, sona emi muste tui-beka Au Tutui Malole Ka soa-neu' basa lahenda nusa' ara. Emi muste manori-mafada matalolole si, fo ela ara dadi reu' Au ana mana tuka dea kara. Ma emi muste sarani si fo dadi tanda nae, sira rabua-raesa ro Ama' a, ma Ria Ana Na, ma Ria Dula-dale Malalao-malalafu Na.b 20 Ma manori-mafada si, ela ara tao tuka basa pareta fo Au afadan neu' emi a. Mafarerene'! Au sama-sama oo emi, losa' dae-bafo' ia noe.”