2 Boe ma lahenda reme' basa mamana' ain mai, tesa rahenu uma dale', rakaseke' losa uma a bafa na. Yesus nafada si Manetualain hihii-nanaun.

3 Ana bei dea-dea, te lahenda haa rolo reni tou luku' esa leo Yesus mai. 4 Tehuu no lahenda dodou', de ara ta bisa roo lahenda ria losa Yesus mata Na. Boe ma ara ae leo uma lain reu, de ara fate heni uma a puni na, naraa no Yesus laka Na. Ara fate henin boe ma raonda lahenda luku' ria no nea na.^a 5 Yesus nita lahenda sira, Ana bubulu' ara ramahere matetu' neu' Ana. Boe ma Ana nafada lahenda luku' ria nae, “Ana Ki on! Au fee ampon neu' o sala-siko mara!”

6 Tehuu mesen agama Yahudi hida ratuu' rai naa. Ara ramanene Yesus nafada nae leo' naa, boe ma dale nara rababale. 7 Ara beidea rae, “Lahenda ia naparani dedea nae leo' naa! Noi Manetualain bisa fee ampon neu' lahenda salan. Tehuu lahenda ia dedean ria, tao aon sama leo' Manetualain. Ana namumulu-namamae' Manetualain ria so!”

8 Tehuu Yesus bubulu' mema' sira dale nara. De Ana nafada nae, “Emi boso' afi leo naa'! 9-10 Muda na ri' ubea'? Kalu Au afada lahenda luku' ia ae, ‘O sala ma hapu ampon so,’ emi ta bubulu' kalu dadi leo' naa, do ta'a. Tehuu kalu Au ae, ‘Foa leo! Hai ma nea ma fo fali leo.’ Kalu ana foa tuti' a, emi besa' ko mita buti mae, Au ia nana, Lahenda Dae-bafo' Tetea'. Ma Au anuu kuasa ma haak fee ampon neu' lahenda sala-sikon.”

Boe ma Yesus nafada lahenda luku' ria nae, 11 “O nenene! Besa' ia o te'e ma aom so! Foa, hai ma nea ma fo fali leo.”

12 Lahenda ria namanene leo' naa, boe ma foa tuti' a. Ana lulu na nea na, de la'o dea' neu. Basa lahenda fo rai naa, rita no mata'. Roi ramakokoa' a de rae, “Awii! Ita besa' ko parnaa tita leo ia'! Manetualain tebe kuasa Na bau na seli!”

13 Basa de Yesus fali selu' leo dano Galilea a suu na neu. Lahenda dodou' mai raneta ro Ni, boe ma Ana nafada si Manetualain hihii-nanaun.

14 Nai naa, lahenda esa nade Lewi, Alpius ana na. Ria mana susu doi-bea fee mana pareta Roma, ana nai mamana babae doi-bea. Yesus la'o nesi' naa, de nita Lewi. Boe ma nae, “Mai tuka Au!”

Lewi namanene Yesus nae leo' naa, boe ma ana foa neu tuka tuti' Ana.

15 Basa de Yesus asa ratuu' raa-rinu nai Lewi uman, sama-sama ro Lewi nonoo mana susu doi-bea nara. Lahenda feke' fo lahenda Yahudi ra rae sira tadalu', ara raa-rinu ro si. Neme lahenda fo ratuu' raa-rinu a, kadodou na rahii' ramanene Yesus.

16 Fai ria, mesen agama lahenda hida reme' partei Farisi, rita Yesus naa-ninu no lahenda mana susu doi-bea, ma lahenda tadalu' ara. De ara ratane Yesus ana mana tuka dea nara rae, “Ubea' taon de emi Mesen ma naa-ninu no mana susu doi-bea ma lahenda tadalu' ara?”

17 Tehuu Yesus namanene sira natane na, boe ma nataa nae, “Mema' lahenda kamahedis ara parluu doter, tehuu lahenda soda' a ta parluu fa. Au mai urus lahenda masala-masiko' ara. Tehuu ta mai urus lahenda fo tao ao nara dadi' lahenda roo-tetu'.”

18 Fai' esa, boe ma lahenda agama Farisi ra puasa. Ara rita Yohanis Mana Sarani' a, ana mana tuka dea nara puasa boe. Tehuu ara ta rita Yesus ana mana tuka dea nara puasa sama leo' sira. Boe ma lahenda nara leo Yesus mai, de ratanen rae, “Papa. Ami puasa. Yohanis lahenda nara boe puasa. Tehuu, ubea' taon de Papa ana mana tuka dea mara ta puasa fa?”

19 Yesus nataa nae, “Tebe emi bubulu', kalu feta kakabi', fui ra ta puasa fa, tehuu ara raa-rinu rabete. Kalu mana kabi tou' a bei nai naa, sona basa si raa-rinu bela' a. 20 Tehuu neu' ko fai' esa nai naa, kalu lahenda roo mana kabi tou' a la'o dei, sona tia-lai nara rameda susa, besa' ko ara puasa.”

21 Yesus tamba dedea nasasama' esa nae, “Lahenda ta tapa rabua tema' bebeu' a neu' badu paraa' a. Huu fo safe ni, te tema' bebeu' ria u'ulu fo tao na badu paraa' a sii nambera. 22 Leo' naa boe, lahenda ta disi tua bebeu' neu' hai paraa' a. Huu fo neu' ko hai' ria hea ni, boe ma tua' a nosi henin. De tua bebeu' sona disi ni neu' hai bebeu'.”^b [No ria naa, Yesus nanori-nafada si nae, Ria nanori-nafada bebeu Na, boso' epo-seo' ana no lahenda Farisi ra nanori-nafada paraan.]

23 Fai' esa, naraa la'e lahenda Yahudi ra fai huhule-haradoin, Yesus la'o nesi' oka' dale'. Boe ma ana mana tuka dea nara etu hade-gandum fo raa.^c 24 Tehuu lahenda Farisi a rita si, de ara rafada Yesus rae, “Ubea' taon de O ana mana tuka dea mara ralena laka neu' ita atoran agama na? Ara etu hade-gandum naraa la'e fai hahae ao'! Emi ta bole tao leo' naa fa!”

25-26 Ana nataa nae, “Leo' bea? Emi ta mafarene ba'i Daud tutui na. Tepo' fo Abiatar dadi malaka agama Yahudi ra malaka bau-ina na. Ba'i Daud no ana mana tuka dea nara ramalaa raan seli. Boe ma ara maso' leo Manetualain Laa' Huhule-haradoin dale' reu, de hai ra roti fo ri' malaka agama ra fee basan neu' Manetualain a de raa. Sekonaa te noi malaka agama ra si' bole raa, tehuu lahenda feke' sona ta bole fa. Ba'i Daud asa raa, tehuu ta hapu lahenda sale si.”^d

27 Yesus nafada tamba bali nae, “Emi boso' mafarene henin, te Manetualain tao fai hahae ao' fo dadi ua-nale' ela tulu-fali ita lahenda dae-bafo' a. Tehuu Ana ta adu ita lahenda dae-bafo' a fo tuka noi fai hahae ao' a atoran na. 28 De Au, Lahenda Dae-bafo' Tetea'. Au anuu haak fo ae lahenda bole, do ta bole tao hata-hata esa naraa la'e fai hahae ao'.”