Nitu ra malaka na soba Ramatua Yesus
4
Yohanis sarani basa Yesus, boe ma Yesus la'o ela lee Yarden. Manetualain Dula-dale Malalao-malalafu Na sama-sama no Ni. Dula-dale' ria noon leo mamana lino-nees neu. 2 Yesus leo nai naa losa fai' haa hulu. Tepo' ria ta naa-ninu hata esa boe', losa' Ana namalaa naan seli. Boe ma nitu ra malaka na mai soba Ni.3 Ana nafada Yesus nae, “Kalu tetebes ara O nana Manetualain Anan, O manuu kuasa. De bisa mafada batu ia ra dadi roti, fo mua.”
4 Tehuu Yesus nataa ni nae, “O ta mae tao boe' ma! Ta bubulu', do? Mana dui' nai Susura Makamoi' dale' nae,
‘Lahenda dae-bafo' a nasoda, nana ta noi neme nanaa-nininu' a mai!’”a
5-6 Boe ma nitu ra malaka na noo Yesus leo mamana madema esa neu, de natudu Ni basa mane' dae-ina' a nusa-namon. Ana nafada Yesus nae, “Basa kuasa sira ro rela-sa'an nana au nuu-ena ki. De au anuu haak fee bea boe neme au hihii ka mai. 7 Au nau fee O katema' asa. Tehuu O muste tao hihii-nanau' esa dei, besa' ko au fee. Muda' lai esa'! O do'o-tabe au. Noi ri naa' so!”
8 Tehuu Yesus nataa ni nae, “Hapun nai bea leo naa'? Huu fo mana dui' nai Susura Makamoi' dale' nae,
‘O muste do'o-tabe noi neu' Manetualain.
Ma o muste malalau' Ana.’”b
9 Basa de nitu ra malaka na noo Yesus leo kota Yerusalem neu. Nai naa, ana noo Yesus leo Uma Mamaso Yahudi Ina a puni na lain neu. Boe ma ana nae, “Kalu tebe-tebe O nana Manetualain Anan, sona parboku' dae' muu leo! 10 Huu fo mana dui' nai Susura Makamoi' dale' nae,
‘Manetualain neu' ko nadenu eila'o-limalopen reme nusatetu-ikutema' a mai,
ranea O.
11 Neu' ko ara ratanee ra O,
ela O ei ma ta teta' la'e batu ria bai' boe'.’”c
12 Tehuu Yesus nataa ni nae, “Mana dui' nai Susura Makamoi' dale' nae,
‘Boso' soba Manetualain!’”d
13 Nitu ra malaka na soba Yesus neni' eno rupa', tehuu ta nala Ni. Boe ma ana foa ela Yesus, fo nahani ledo-fai malole.
Ramatua Yesus leo Galilea neu, fo tui-beka fee lahenda la'e-neu' Manetualain Tutui Malole Na
14 Huu no Manetualain Dula-dale Malalao-malalafu Na kuasan, boe ma Yesus fali leo propensi Galilea neu. Ta doo bea boe', te Yesus nade Na tui-bekan rule-feo nusa' ria, de lahenda ra bubulu'. 15 Ana nanori-nafada nai lahenda Yahudi ra uma mamaso nara katema'. Boe ma lahenda ra io Ni rae, “Yesus nana Mana kuasa!”
Lahenda ra ta sipo' Ramatua Yesus nai Nasaret
16 Lai' esa de, Yesus leo Ria koron Nasaret neu. Naraa la'e lahenda Yahudi ra fai huhule-haradoin, ri' ‘fai Sabat’, Ana leo uma mamaso' dale' neu, sama leo' Ria biasa Na. Ana foa napadei' fo saka' lees neme Manetualain Susura Makamoi Na. 17 Ara fee Ni ba'i Yesaya susura na. Ana buka ni, de lees nai lalane' fo mana dui' nae,
18 “Manetualain Dula-dale Na kuasa Na nai Au.
Huu ria naa Ana tudu na Au,
fo tui-beka fee lahenda manato'a-manataa' ara, Manetualain Tutui Malole Na.
Ana nadenu Au,
ela tui-beka ae,
neu' ko po'i mana huku' ara;
neu' ko poke' ara rita dae;
neu' ko po'i mana hapu eese-rurumu' ara.
19 Ma besa' ia losa Ramatua' a ledo-fain,
fo po'i-tata lahenda Nara.”e f
20 Yesus lees basa susura' ria, boe ma lulu fali' ana de loo ni leo mana tao mamaso' a neu, boe ma Ana natuu'. Basa lahenda fo rai uma mamaso' ria dale' mete rahere Ni. 21 Boe ma Ana nafada si nae, “Hata fo bisinaa' a emi mamanene ni neme Manetualain Susura Makamoi Na mai a, besa' ia dadi so!”
22 Basa lahenda fo rai naa, mulai io Yesus rae, “Hata fo bisinaa' a Ana dedea ni a, malole na seli! Tehuu Ria nana, Yusuf ana na, hete? Ubea' taon de bisa leo naa'?”
23 Boe ma Yesus nafada si nae, “Tantu emi basa moi tao' Au meni' dedea' lasi' a nae, ‘Doter! Puli-mamodo ma ao-ina heheli ma dei!’ ‘Ubea' taon de O ta tao tanda heran esa fee ami nai ia boe', sama leo' O tao nai kota Kapernaum?’ 24 Matetu na leo ia': lahenda ta sipo' Manetualain mana nesi matan nai ria koro-tadun.g 25-26 Hai conto neme Manetualain mana nesi matan, ba'i Elia. Lai' esa de uda a ta mai teu' telu seseri'. Tepo' ria ina-falu dodou' rai Israel. Tehuu Manetualain ta fee Elia neu tulu-fali lahenda Israel ara. Manetualain fee ni leo ina-falu esa neu, nai koro Sarfat nanenea' kota Sidon. Sekonaa te ina' ria, lahenda ta Yahudi. Tehuu ana namahere Manetualain kuasa Na.h
27 Hai conto feke' neme Manetualain mana nesi matan Elisa. Tepo' ria, lahenda Yahudi dodou' ramahedi hedis kusta rai Israel. Tehuu Manetualain ta puli naa si. Manetualain nadenu noi Elisa puli naa lahenda kamahedis kusta esa, nade Naaman. Sekonaa te, ria lahenda Siria, ta lahenda Yahudi. Tehuu ana namahere Manetualain kuasa Na.”i
28 Bei ramanene Yesus dedea nae leo' naa, boe ma basa si nasa nara lua. 29 Ara foa bela' a, de usi heni Ni neme uma mamaso' dale' mai. Ara hela roo Ni leo koro' a dea' neu, fo nau ruan leo pere dale' neu. 30 Tehuu Ana kalua la'o nesi' lahenda kadodou' sira talada, de foa ela si reu' naa.
Ramatua Yesus usi heni nitu neme lahenda esa
31 Boe ma Yesus onda leo Kapernaum neu, nai dano Galilea a suu na. Tuka-tuka fai huhule-haradoi', Ana nanori-nafada lahenda rai uma mamaso' dale'. 32 Lahenda ra heran ramanene Ria dedea-nafadan, huu fo Ana nalela' matetu' nanori-nafada' ria isi-liin.j
33 Lai' esa de Yesus nanori-nafada nai uma mamaso' dale', lahenda nitu heke' esa naloo nambera-ina nae, 34 “Yesus, Lahenda Nasaret! O manuu urusan ubea' mo ami! O mai tao malulutu' ami, do? Ami malela' O. Lahenda Malalao-malalafu' fo ri' fai a ulu na Manetualain helu fee Ni mai.”
35 Tehuu Yesus nasapaa ni nae, “Maau' bafa ma! Kalua meme lahenda ria mai!” Kekeneu te nitu a lokopiro lahenda ria neu' dae', nai lahenda ra talada. Boe ma ana foa ela ni, ma ta nahehedi' ana so'.
36 Basa lahenda ra roi ramakokoa' a rae, “Heran lai esa'! Lahenda ia dedea Na, nanuu kuasa bau-ina'! Losa' nitu ra tuka pareta Na, de kalua reme lahenda ria mai!” 37 Boe ma tutui' la'e-neu' Yesus, mulai tui-bekan nai nusa' ria katema'.
Ramatua Yesus puli na Simon arinan, ma lahenda dodou' bali
38 Fai fo ara kalua reme uma mamaso' ria mai, boe ma Yesus leo Simon uma na neu.k Simon arina na namahedi ao luumai', de ao-ina na nanaa na seli. Boe ma ara hule Yesus rae, “Ramatua'! Puli ma ina lasi' a dei!” 39 Yesus neu de napadei neu' koi a suu na, boe ma usi kalua ina lasi' a ao luumai na. Hatemata' ria boe, ina' a ao luumai na mopon tuti'. Boe ma ana foa, de sadia nanaa-nininu' fee si.
40 Ledo a saka' tena, boe ma lahenda ra roo basa kamahedis ara leo Yesus reu. Hedis nara rupa' ara. Ana fua lima Na neu' lahenda kamahedis ara de puli na katema' asa. 41 Lahenda kamahedis sira, ruma nitu heke'. De Yesus pareta nitu ra kalua reme lahenda sira mai. Ara kalua ma rahara rae, “O nana Manetualain Anan!” Huu fo nitu sira bubulu' Ria nana Kristus, fo neme fai a ulu na mai Manetualain helu fee Ni mai. Huu ria naa, Yesus horo si ta bole dedea hata esa la'e-neu' ao-ina Na boe'.
Ramatua Yesus tui-beka Tutui Malole nai uma mamaso' ara
42 Balahaa' dulupila na, boe ma Yesus foa de leo mamana lino-nees esa neu, nai kota dea'. Lahenda ra saka ralelei' Ana. Ara raneta roon, boe ma hule Ni rae, “Papa leo mo ami! Boso' leo mamana feke' muu bali!”
43 Tehuu Ana sipo' asa nae, “Au muste leo koro feke' ara uu, fo tui-beka Tutui Malole la'e-neu' Manetualain pareta Na. Huu fo Manetualain nadenu Au alala'o nonoi-laka' ria.”
44 Boe ma Ana la'o neme koro' esa mai leo koro' esa neu, fo nanori-nafada nai uma mamaso' ara nai propensi Yudea.