Ara puka rala ika' dodou'
5
Lai' esa de Yesus nanori-nafada lahenda ra nai dano Galilea suu na.a Lahenda dodou' mai nenene Manetualain Hara-dasin, losa' ara raseseti ao, eo ra Yesus. 2 Nanenea' nai naa manadolu-manadala hida, ralaisi makamomoi dala nara rai mada' lain. Yesus nita ofa' rou' dua mana nafu' rai naa. 3 Neme ofa kadua' sira mai, Simon nuun esa. Yesus ae leo Simon ofan lain neu, Ana hule si fo tipa ofa' a leo oe dema' a neu. Boe ma Ana natuu' de nanori-nafada lahenda kadodou-ina' sira.b4 Ana nanori-nafada basa, boe ma nafada Simon nae, “Simon! Tulu' leo mamana' fo oe na dema' a selu' bai', fo po'i puka' a neu' naa. Huu fo neu' ko emi hapu ika' dodou'.”
5 Simon sipo' nae, “Ramatua'! Ami puka hatu' esa katema', tehuu ta hapu ika' boa' esa boe'! Neu, Ramatua' a mafada de au po'i selu' puka' a.”c 6 Boe ma ara po'i puka' a. Ara saka' hela fali' ana leo lain mai, te puka' ria ika' henun, losa' kura bai' sii heni puka' a.d 7 Simon naloo nonoo nara reme ofa feke' mai fali si. Ara po'a rahenu ofa kadua' sira ika', de hisadei na ara bolo. 8-10 Sabadeus anan Yakobis no Yohanis, Simon nonoo manadolu-manadalan rai naa boe. Ara heran raan seli, huu fo ara hapu ika' dodou'. Simon Petrus bei nita mana dadi' ria, tuti' a sunda' undulaka na neu' Yesus mata Na nae, “Au lahenda masala-masiko'. De malole lena' Ramatua' a boso' manenea' mo au.”e
Tehuu Yesus nataa nae, “Simon! Boso' mae leo' naa, emi biasa puka ika', tehuu besa' ia Au anori-afada emi saka lahenda fo tuka Au.”
11 No besa' ria boe, ara hela sira ofa na leo mada' lain neu. Boe ma ara foa ela basa-basan, de tuka Yesus.
Ramatua Yesus puli na lahenda kamahedis kusta esa
12 Nai koro' esa, lahenda esa ao-ina na hedis kusta mesan. Ana nita Yesus, boe ma sunda' undulakan neu' Yesus mata Na losa' mata-idun neta dae a. Ana nae, “Ramatua'! Kalu nau, sona tulu-fali au dei! Huu fo au bubulu', Ramatua' a bisa puli ma au hedis ka, ela boso' lahenda rahia' au.”
13 Yesus loo' lima Na neu de nafaroe lahenda ria, ma Ana dedea nae, “Au nau! O te'e ma aom leo!” Hatemata' ria boe, lahenda ria hedis kusta na mopo' ana. 14 Boe ma Yesus feen nafarerene' nae, “Mafarerene' matalolole! O te'e ma aom so, tehuu ta bole tutui esa boe'! O muste tuka ba'i Musa pareta na. De leo malaka agama a muu, fo ana parisa' ao-ina ma, ela ana bubulu' nae, tebe o hedis ma mopon matetu', do bei'. Ma o muste fee tutunu-hohotu' tanda makasi, fo basa lahenda ra bubulu', o te'e ma aom matetu'.”f
15 Leo mae Yesus horo, tehuu tutui' la'e-neu' Ria kuasa Na, tui-bekan nai basa mamana' ara. De lahenda ra roi faa-faa' a mai, ela ramanene Ana nanori-nafada si. Ma Ana puli na lahenda reme hedis rupa nara. 16 Tehuu Yesus heo' neme lahenda kadodou-ina' sira mai, fo neu hule-haradoi nai mamana lino-nees.
Ramatua Yesus puli na lahenda luku' esa
17 Lai' esa de, Yesus nanori-nafada nai uma esa. Fai ria, sira lahenda agama Farisi ma mesen agama ra mai, fo nenene neu' Ana. Ara reme basa koro' nai propensi Galilea, propensi Yudea ma reme kota Yerusalem mai. Manetualain fee Yesus kuasa fo puli na lahenda kamahedis ara. 18-19 Fai ria, lahenda hida rolo reni lahenda luku' esa nai tandu, leo Yesus neu ela puli naan. Tehuu uma ria nakaseke no lahenda, de ara ta bisa maso' leo dale' reu. Huu ria naa, ara saka eno' de ae roo luku' ria leo uma lain reu. Ara fate bolo', ela raonda lahenda luku' ria no tandu na leo dae' neu. Ara raonda ni, nai lahenda kadodou-ina' sira talada, naraa no Yesus mata Na. 20 Yesus nita leo' naa, de Ana bubulu' nae, ara ramahere Ni bisa puli na sira nonoon ria. Boe ma Ana nafada lahenda luku' ria nae, “Ana Ki on! Au fee ampon neu' o sala-sikom.”
21 Lahenda Farisi ra ro mesen agama ra ramanene Yesus dedea nae leo' naa, boe ma esa nafada esa rae, “Noi Manetualain ri' nanuu haak fee ampon neu' lahenda sala-sikon. Te lahenda ia nana bea, de tao aon sama leo' Manetualain! Namumulu-namamae bau-ina' ia!”
22 Tehuu Yesus bubulu' sira dudu'a-aafin. Boe ma Ana dedea nae, “Ubea' taon emi du'a-afi nai dale mara mae Au amumulu-amamae'? 23-24 Au, Lahenda Dae-bafo' Tetea'. Ma Au anuu haak fee ampon neu' lahenda sala-sikon. Kalu Au afada lahenda luku' ia ae, ‘Au fee ampon neu' o sala-sikom,’ emi ta mita Au kuasa Ka nai dae-bafo' ia. Tehuu kalu Au ae, ‘foa leo! Hai ma tandu ma fo fali.’ Kalu ana foa tuti' a, sona besa' ko emi mita Au kuasa Ka. Huu ria naa, Au puli a lahenda luku' ia, ela emi bubulu' Au anuu haak fee ampon neu' lahenda sala-sikon.”
Boe ma Ana nafada lahenda luku' ria nae, “Foa leo! Hai ma tandu ma fo fali!”
25 Kekeneu te, lahenda ria foa napadei' neu' lahenda kadodou-ina' sira matan, boe ma hai na tandu na. Ana fali neun ma io-oa Manetualain. 26 Basa lahenda ra rita leo' naa, boe ma ara heran. Ara io-oa Manetualain nade Na rae, “Manetualain kuasa Na bau-ina'! Fai' ia ita tita mata' mana dadi bebeu'!”
Ramatua Yesus naloo Lewi fo tuka Ni
27 Yesus kalua neme uma ria mai, boe ma Ana nita lahenda mana susu doi-bea esa, nade Lewi, natuu' nai uma sususu doi-bea dale'.g Yesus nafada ni nae, “Mai tuka Au!” 28 Lewi namanene, boe ma ana foa ela basa-basan reu' naa, de neu tuka Yesus.
29 Boe ma Lewi tao feta bau-ina' de hule Yesus leo uma na neu. Ana hule nonoo mana susu doi-bea nara, ma lahenda feke' boe, fo mai raa feta. 30 Tehuu lahenda agama Farisi hida ma mesen agama ra, ramumuu neu' Yesus ana mana tuka dea nara rae, “Ubea' taon emi mia-minu sama-sama mo lahenda masala-masiko' ara, leo-leo' mana susu doi-bea ma lahenda tadalu' ara? Lahenda roo-tetu' a boso' rabua ro lahenda rupa leo naa' ara!”h
31 Tehuu Yesus nafada si nae, “Tebe lahenda kamahedis ara parluu doter. Tehuu lahenda soda' a, ta parluu. 32 Au mai urus lahenda masala-masiko', tehuu Au ta mai urus lahenda fo rae, sira lahenda roo-tetu'.”
Mesen agama ra ralelena ao' ro Ramatua Yesus la'e-neu' puasa
33 Boe ma lahenda agama Farisi ma mesen agama ra boe ramumuu neu' Yesus rae, “Leo ia', Papa! Yohanis Mana Sarani' a ana mana tuka dea nara puasa, ma hule-haradoi kose-kose. Lahenda Farisi ra ana mana tuka dea nara boe leo naa'. Tehuu ubea' taon de Papa ana mana tuka dea mara roi raa-rinu, raa-rinu' a? Ara ta puasa ralela', do?”
34 Tehuu Yesus sipo' asa pake dedea nasasama' nae, “Emi bubulu', kalu feta kakabi', sona fui ra ta puasa, tehuu ara raa-rinu rabete. Kalu mana kabi tou' a bei sama-sama no si, tantu ara raa-rinu bela' a. 35 Tehuu fai' esa nai naa, kalu hopu roo mana kabi tou' a, sona besa' ko tia-lai nara dale hedi, de ara puasa.”
36 Boe ma Yesus nafada si dedea nasasama' esa bali nae, “Ta hapu lahenda hai na tema' bibia bebeu', fo tapa neu' badu paraa' a sai na. Huu fo kalu safe badu ria te, neu' ko tema' bibia bebeu' a u'ulu, de badu paraa' a sii nambera. 37-38 Leo' naa boe, lahenda ta disi tua bebeu' neu' hai paraa'. Huu fo neu' ko hai' ria hea ni, de nosi heni tua' a.i [No ria naa, Yesus nanori si nae, Ria nanori-nafada bebeu Na, boso' epo-seo' ana no lahenda Farisi nanori-nafada paraan.] 39 Lahenda fo parnaa ninu oe anggor paraa', ana ta nahii' ninu oe anggor bebeu'. Huu fo ana bubulu', ‘Anggor fo peda ni doo' a, sona malada na seli!’”