Yohanis Mana Sarani' a nanori-nafada lahenda ra
3
Tepo' fo Yesus nambau-ina, boe ma Yohanis Mana Sarani' a mulai nanori-nafada lahenda ra nai mamana lino-nees, nai propensi Yudea. 2 Ana nafada nae, “Toranoo susue kara! Emi muste manaku ma foa ela sala-siko mara, fo matafali leo Manetualain meu. Huu fo besa' ia basa lahenda ra bisa dadi reu' Manetualain lahenda nara.”a3 Maulu na Manetualain mana nesi matan esa, nade Yesaya dui' mema' la'e-neu' Yohanis nae,
“Neu' ko lahenda esa naloo bou-bou nai mamana lino-nees nae,
‘Basa lahenda ra mahehere ao mara tao matalolole eno',
fo sipo' Manetualain mamai Na!
Pori matetetu eno', fo sipo-soru' Ana!’”b
4 Yohanis eno masoda na sama leo' Manetualain mana nesi mata fai ulu nara. Kakao-papaken, tao si reme banda onta a bulu na. Ria tali-ee na, tao ni neme banda a rou na. Ria nanaa-nininun, lama' ma fani oe nura.c
5 Tepo' ria lahenda dodou' leo Yohanis mai. Ara reme kota Yerusalem mai, ma reme propensi Yudea isi na katema'. Ma reme basa koro' fo ranenea' lee Yarden. 6 Ara manaku sira sala-sikon katema', boe ma Yohanis sarani si rai lee Yarden.
7 Tepo' ria, partei agama Farisi ma partei agama Saduki lahenda nara boe mai hule Yohanis fo sarani si. Tehuu ana nita si, boe ma nasapaa nae, “Emi ia sama leo' meke mana edi-mana fule'! Manetualain neu' ko huku emi, nana huu nonoi-tatao tadalu mara. Boso' mae emi bisa kalua meme Ria huhuku Na mai.d 8 De malole lena' emi matafali leo Manetualain meu, ma saledale-tu'etei mara. Boe ma tao hihii-nanau' malole ra, sama leo' ai huu' fo neni buna-boa malole. 9 Boso' afi mae emi lui meme' Manetualain huhuku Na, nana huu emi ia ba'i Abraham tititi-nonosin. Mamahere au! Huu fo Manetualain bisa tao na batu ia ra dadi reu' ba'i Abraham tititi-nonosin.e 10 Besa-besa! Huu fo Manetualain nahehere aon neni ta'a saka' lo'o heni basa ai huu' fo boa nara ta malole a. Lo'o basa, te Ana tu'u si leo ai-pila' dale' reu.f
11 Besa' ia au sarani emi pake oe, fo dadi tanda nae, emi saledale-tu'etei mara. Tehuu neu' ko Lahenda esa matua-madema lena au, saka' mai. Leo mae au dadi noi neu' Ria atan boe, au ta araa. Neu' ko Ana tao nahenu emi dale mara neni' Manetualain Dula-dale Malalao-malalafu Na. Ria boe tao na emi dadi lalao-lalafu', sama leo' lahenda hotu heni kadafu'.g 12 Huu fo Ana homu niru fo isi' nai dale', de saka' dai heni uu na. Boe ma Ana po'a isi' sira leo so'a dale' reu. Tehuu uu' ara, Ana tu'u si leo ai-pila' mana basa taa' a dale' reu.”
Yohanis sarani Ramatua Yesus
13 Fai ria Yesus onda neme Galilea mai leo lee Yarden neu. Ana hule Yohanis sarani Ni, 14 tehuu Yohanis ta nau. Ana nadedea laka nae, “Tao leo' bea fo au muste sarani Ramatua' a? Ta tabale' ia fa, do? Ramatua' a ri' muste sarani au. Huu fo ria ri' au parluu!”
15 Tehuu Yesus nataa nae, “Ta hata-hata fa. Soa-neu' besa' ia a'a ri' sarani Au. No ria naa, ita tuka Manetualain hihii-nanaun.”
Yohanis namanene leo' naa boe ma nataa nae, “Neu, neme Ramatua' a mai.” Boe ma ana sarani Yesus.
16 Sarani basa, boe ma Yesus kalua neme oe dale' mai. Kekeneu te, lalai natahu'a. Ana nita Manetualain Dula-dale Na sama leo' manupui kalasi a onda mai tena neu' ao-ina Na lain. 17 Boe ma ara ramanene Manetualain haraoe Na neme lalai mai nae,
“Ia nana, Au Ana susue Ka.
Ana tao na Au dale Ka namaho'o.”h