3 Yudas bubulu' nae, Yesus hapu huhuku mamates, de ana nasaledale, nana huu ria ri' se'o heni Yesus. Boe ma ana fali leo malaka agama Yahudi malaka nara, ma lasi' ara neu fee fali' doi lilo fula katelu hulu' sira. 4 Ana nafada nae, “Au sala so, nana huu au fee heni Lahenda sala' taa' ia.”

Tehuu ara rataa rae, “Ami ta tao dale' neu' o so'! O lepa-masaa ma sala' ria.” 5 Boe ma Yudas tu'u doi' sira leo Uma Mamaso Yahudi Ina a dale' reu, de ana kalua neu londa naisa aon.

6 Malaka agama Yahudi malaka nara hai ra doi' fo ri' Yudas tu'u heni si a. Ara dedea-rao' rae, “Ita ta bole peda fali' doi' ia ra reu' peti doi' dale', huu fo doi ia ra makekeo-makakanu'. 7 Malole lena' ita teu asa ta mana tao ure' daen bibia ana' esa. Kalu mate lahenda fui, ma lahenda ta ralela' ana, sona ita bisa tatoin neu' naa.” 8 Boe ma ara pake doi' sira, de reu asa raa dae ria. Huu ria naa, losa besa' ia lahenda hule dae ria rae, ‘Dae Daa’.^b

9 No ria naa, ara tuka hata fo ba'i Yeremia dedea mema' nae,

11 Lahenda ra roo Yesus losa gubernor, boe ma ana natane Yesus nae, “Leo' bea? Tebe-tebe O nana, lahenda Yahudi ra Mane na, do?”

Yesus nataa nae, “Tebe. Papa dedea la'e ria.”

12 Malaka agama Yahudi malaka nara, ma lasi' ara rapaneneo' Yesus la'e-neu' hihii-nanau' dodou', tehuu Ana ta nataa hata-hata esa boe'.

13 Boe ma gubernor a natane Ni nae, “O ta mamanene sira dedea na? Ara fee sala' dodou' soa-neu' O. Tehuu ubea' taon de O ta sesefi si!”

14 Tehuu Ana ta nataa bai' boe', losa' gubernor a heran.

15 Tuka-tuka teu', kalu lahenda Yahudi ra tao feta Paska, sona lahenda kadodou' ara biasa here lahenda mana huku' esa, ela gubernor po'i ni. 16 Tepo' ria, lahenda mana huku' esa, nade Barabas.^d Basa lahenda bubulu' ria nana bea, huu fo makaresi na seli. 17 Fai ria boe, lahenda dodou' leo gubernor Pilatus reu, hule fo ana po'i lahenda mana huku' esa sama leo' bale-bale. Pilatus natane si nae, “Malole! Tehuu au po'i bea? Nai ia, Barabas, ma Yesus fo ri' lahenda hule rae, Kristus, de here ao mara leo.” 18 (Gubernor dedea leo naa', huu fo ana bubulu' malaka agama Yahudi malaka nara roo Yesus feen leo ria neu, nana huu ete' ao nara ro Yesus.)

19 Gubernor bei parisa' dedea' ria, boe ma sao na haitua feen haraoe' nae, “Papa! Besa-besa, huu fo Yesus nana Lahenda sala taa' ria. Huu no Ria, de leodae' a au alamei, meis tadalu'. Losa' besa' ia boe au bei ameda aan ta malole a.” 20 Tehuu malaka agama Yahudi malaka nara, ma lasi' ara duduku-papau' lahenda kadodou' sira, hule gubernor a fo po'i Barabas, ma huku namate Yesus. 21 Boe ma ana natane selu' asa bali nae, “Neme lahenda ia ra dua si, au po'i bea?”

Basa si rataa bela' a rae, “Barabas! Po'i Barabas!”

22 Ana natane si nae, “Kalu leo' naa, sona Yesus fo ri' lahenda hule rae Kristus, au taon leo' bea?”

Basa si rahara bela' a rae, “Paku maisa Ni neu' ai kake' a!”

23 Gubernor a natane bali nae, “Te Ana nasala' ubea'? Au parisa' Ana so, tehuu au ta hapu Ni sala hata esa boe'!”

Tehuu basa si rahara rambera bali rae, “Maisa Ni! Paku Ni neu' ai kake' a leo!”

24 Fai ria boe', gubernor bubulu', ana ta bisa tao hata-hata esa so boe', huu fo lahenda kadodou' sira saka' tao tasibu'. Huu ria naa, hai na oe safe lima na nai sira matan, ma nafada nae, “Au ta lepa-asaa Lahenda ia mamate Na! Emi ri' lepa-masaa maan!”^e

25 Lahenda kadodou' sira rataa rambera rae, “Neme' naa! Ela ami mo upu-ana mara lepa-masaa Ria daa Na!”

26 Pilatus namanene leo' naa, boe ma nae, “Neme emi mai!” De ana po'i Barabas, tuka sira hihii-nanaun. Boe ma ana pareta lahenda manea ra, fepa-li'u Yesus pake cambuk.^f Fepa-li'u basan, boe ma soldadu ra roo Yesus, reu paku raisan nai ai kake'.

27 Boe ma soldadu ra hela roo Yesus leo sira kota musu na kintal maloa na neu. Nai naa, ara raloo ra sira nonoon batalion esa.^g 28 Ara olu heni Yesus badu Na, de fee Ni pake badu manaru pilas makarela' esa.^h 29 Ara hai ra ai makou' a rana nara, de ralanen tao silaka. Ara poro' silaka koo-kau' ria neu' Yesus laka Na, do'o-tabe ramimina' Ana sama leo' ara so'u mane' bebeu' de feen pake silaka mana pareta. Ara feen homu ai esa nai lima ona Na, sama leo' tete'e mana pareta. Ara sunda' undulaka nara rasare raan, ma ramumulu-ramamae' Ana rae, “Hada-horomata neu' lahenda Yahudi ra Mane' na.” 30 Ara mudi radiu Ni ape, ma hai ra tete'e ria neme' lima Na mai, fo fepa ramimina' laka Na. 31 Soldadu ra ramumulu-ramamae' basa Ni, boe ma ara olu heni badu manaru ria. Ara fee Ni pake selu' Ria kakao-papaken. Basa de ara roo Ni leo kota Yerusalem dea' neu, ela paku raisa Ni nai ai kake' a.

32 Ara roo Yesus, losa eno talada' ara raneta ro lahenda kota Kirene esa nade Simon, besa' ko saka' maso' leo kota dale' neu. Ara raseti ni nasaa Yesus ai kake' Na. 33 Ara losa mamana' esa, nade Golgotaa. (Dedea Aram, sosoa na nae, “Mamana laka dui'.”) 34 Nai naa ara fee Yesus ninu anggor mana epo' no modo-aidoo mali', ela Ana bisa nanenete hedis. Yesus muti' na bai', boe ma Ana natipa.ⁱ

35 Boe ma ara paku Ni nai ai kake' a. Soldadu ra hela lot fo nau bubulu' bea ri' hapu Ria kakao-papaken.^j 36 Ara ratuu ranea Ni nai naa. 37 Ara dui' nai papa' esa nae,

Ara paku papa' ria neu' Ria laka Na poo' lai, fo dadi nafafada' nae huu no tute na ri' naa', de ara huku ramate Ni.

38 Nai naa, ara paku lahenda parampok dua nai ai kake' a boe. Esa nai Ria boboa onan; esa nai boboa ii Na.

39 Basa lahenda fo la'o resi' naa, rita Ni. Ara peko bafa nara ma ramumulu-ramamae' Ana.^{k l} 40 Ara bobou' Ana rae, “O mae bisa fate heni Manetualain Uma Mamaso Yahudi Ina Na, boe ma noi fai' telu' a, te mafoa maan selu', hete? Kalu tetebes ara Manetualain Anan O, sona soba po'i ma aom fo onda meme' ai kake' ria mai leo.”^m

41 Leo' naa boe, malaka agama Yahudi malaka nara, mesen agama ma lasi' ara ramumulu-ramamae' Ana rae, 42 “Ana po'i-tata naa lahenda feke' a, tehuu Ana ta bisa po'i-tata na ao-ina heheli Na. Ana nae, Ria nana lahenda Israel Mane' na! Kalu leo' naa, sona malole lena' Ana onda neme' ai kake' ria mai. Kalu ita tita leo naa', besa' ko tamahere Ni. 43 Tebe-tebe Ria nana Manetualain Anan, sona ela

44 Lahenda parampok sira dua boe, ramumulu-ramamae' Ana leo naa'.

45 Boe ma maiu' a napoti na mamana' ria neme ledo a namatetu losa li'u telu leodaen. 46 Li'u telu leodaen, boe ma Yesus naloo nambera pake dedea Aram nae, “Eli! Eli! Lema sabaktani?” (Sosoa na nae, “Au Manetualain Ka! Au Manetualain Ka! Ubea' taon, Papa foa ela Au leo' ia?”)^o

47 Lahenda hida ranenea' rai naa ramanene Ria haraoe Na. De ara rae, “Emi nenene dei. Ana naloo Elia, Manetualain mana nesi mata fai ulu na!” 48 Lahenda esa nalai neu hai lopu fo naboron leo anggor ma'eis dale' neu. Ana nato lopu ria neu' tete'e a peda na, de loo ni neu' Yesus bafa Na, ela Ana nasamusi.^p

49 Tehuu lahenda feke' ruma bali dedea rae, “Tahani ela mete tasudi, Elia nau mai po'i-tata naan do, ta'a?”

50 Yesus naloo nambera selu' bali, boe ma mate Ni.

51 Nai Uma Mamaso Yahudi Ina a, tema' maloa ina esa mana pepele' babaa Manetualain Kama Malalao-malalafu Naan Seli. Naraa la'e Yesus maten, boe ma tema' ria sii batin neu' dua, neme lain losa dae'. Dae a natakeko, losa' batu bau-ina' ara ratahea.^q 52 Rates ara boe ratahu'a. Manetualain lahendan fo mate si a, Ana fee ruma rasoda selu'. 53 Fai fo Yesus nasoda selu', boe ma ara kalua reme rates ara dale' mai, de maso' leo kota Yerusalem reu. Lahenda dodou' rita si rai naa.

54 Nai Golgotaa, komendaan a no ria soldadu nara ranea Yesus ai kake Na. Ara rita dae-ina' a natakeko, ma basa hihii-nanau' mana dadi' sira, boe ma bii raan seli. Ara dedea-rao' rae, “Tebe-tebe Lahenda ia nana, Manetualain Anan!”

55 Ina' hida rai naa boe, ara rita Yesus mamate Na, tehuu mete reme doo' a mai. Ara tuka Ni neme Galilea, huu fo sira si' ralalaun neme ulu' mai. 56 Ina' sira nana Maria neme koro Magdala, Maria esa bali (fo ri' Yakobis no Yusuf maman), ma Sabadeus sao na (fo ri' Yakobis no Yohanis maman).^r

57 Nai naa lahenda kamasu'i esa nade Yusuf, lahenda koro Arimatea. Ana tuka Yesus nanori-nafadan doo' a so. Yesus maten la'e soda Lima'. Balahaa' la'e lahenda Yahudi ra fai huhule-haradoin. Huu ria naa, ledo a saka' tena, boe ma Yusuf saka eno' nau naonda mema' Yesus popora Na neme ai kake' a mai. 58 Ana leo gubernor Pilatus neu hule Yesus popora Na. Gubernor pareta fo ara fee ni popora' ria. 59 Boe ma Yusuf leo Golgotaa neu. Ana naonda Yesus popora Na neme ai kake' ria mai. Ana poti natalolole popora' ria neni' tema' bebeu' mabeli. 60 Tepo' ria, lahenda ra besa' ko paa basa bolo' esa nai lete batu, fo sadia mema' bolo natoi' fee Yusuf no kileo-boboki nara, kalu ara mate. De Yusuf asa o'o reni Yesus popora Na, de rapeu' Ana neu' bolo' ria dale'. Ara loli ra batu bau-ina' esa, de tatana ratalolole bolo' ria. Basa boe ma Yusuf asa fali.

61 Fai ria, Maria neme Magdala ma Maria feke', tuka losa naa boe. Ara ratuu' rasare leo bolo' ria reu.

62 Balahaa', la'e lahenda Yahudi ra fai hahae aon. Boe ma malaka agama Yahudi malaka nara ro lahenda Farisi ra leo gubernor reu. 63 Ara rafada rae, “Papa gubernor, ami mafarene tepo' fo manatipu-manadai' ria bei nasoda a, ana parnaa nae leo' ia: ‘Tebe Au mate, tehuu basa fai' telu, te Au asoda selu'.’^s 64 Huu ria naa, papa madenu soldadu ra ranea ratalolole rates ria losa fai' telu. No ria naa, Ria ana mana tuka dea nara ta bisa ramana'o ra popora Na, fo tipu lahenda rae, Ana nasoda selu' so. Huu fo kalu ara tipu leo' naa, sona sira tipu-dain ria tadalu lena neme maulu na sira manaku rae Ria nana Kristus.”

65 Gubernor namanene leo' naa, boe ma nataa nae, “Malole a boe! Tehuu emi manuu lahenda manea. De malole lena' mafada si, reu ranea ratalolole mamana' ria.”

66 Ara roo sira lahenda manea nara leo mamana' ria reu. Losa naa, boe ma ara segel raisa' batu fo nai rates a bafa na.^t Ara radenu lahenda sira ranea rahere mamana' ria, ela lahenda feke' boso' mai o'o ra popora' ria.