Ramatua Yesus fee dedea nasasama' la'e-neu' ana feto' ara rahani fo sipo' mana kabi tou'
25
Yesus tuti selu' dedea Na la'e-neu' Manetualain paretan nae, “Emi muste mahehere ao mara fo sipo' Au natafali mai Ka, sama leo' dedea nasasama' ia. Leo ia': hatu' esa boe ma ana feto' sanahulu reni dedede ana', kalua reu sipo' mana kabi tou' a nai sira tia-lain uma na.a 2 Tehuu neme sira sanahulu mai, lima pakanaa', ma lima malela'. 3 Pakanaa' lima si rafarene henin, de ta reni mina lena'. 4 Tehuu malela' lima si, sona reni mema'.5 Losa uma ria, te mana kabi tou' a bei ta mai boe'. Doo-doo boe ma ana feto' sira teau', de suku renin.
6 Fatilada boe ma kekeneu te ara ramanene lahenda raloo rae, ‘Mana kabi tou' a mai so! Mai ita teu sipo' ana leo!’ 7 Ana feto' sira ramanene leo' naa, boe ma ara foa bela' a, de sadia dedede ana nara. 8 Tehuu ana feto pakanaa' ara dedea ro tia-lai nara rae, ‘Tia kara, emin! Bati fee ami mina bai' dei, te ami dedede mara hii-hii' mate si!’ 9 Tehuu ana feto malela' ara rataa rae, ‘Boso' mamanasa', te ta bisa fa. Huu fo ami mina ma ta dai soa-neu' ita basa! Malole lena' emi meu asa nai kios.’ 10 Boe ma ara reu asa mina. Tehuu ara kalua, boe ma mana kabi tou' a losa. De ana feto malela' ara sama-sama ro mana kabi tou' a, ma basa fui ra maso' leo mamana feta a dale' reu. Basa si maso' rala uma dale', boe ma lahenda ra ena lelesu a.
11 Ana feto pakanaa' sira mai, de dedelu lelesu a ma raloo rae, ‘Papa! Papa! Soi lelesu a dei!’ 12 Tehuu ana nataa nae, ‘Ta bisa fa. Huu fo au ta alela' emi!’b
13 Huu ria naa, emi boe muste mahehere ao mara ma manea maroo, huu fo emi ta bubulu' Au mamai Ka la'e fai bea, do li'u hida.”
Ramatua Yesus fee dedea nasasama' la'e-neu' ata fo urus malaka na doi-talin
14 Yesus tui selu' dedea nasasama' esa nae, “Kalu Au la'o ela emi, sona emi muste moi-tao matalolole soa-neu' Au, sama leo' dedea nasasama' ia. Leo ia': malaka esa saka' leo dae doo' neu. Fai fo ana nahehere aon saka' la'o, boe ma naloo na ata nara de pareta si nae, ‘Emi pake doi' ia ra dadi poko. Kalu au fali, emi muste mafada au, emi hapu doi buna' hida.’ 15 Ana fee ata nara doi lilo pilasc fo rabubuna' asa. Ana fee ata masososa' a doi lilo pilas saku lima, ata kadua a saku dua, ma ata katelu a saku esa, tuka sira esa-esa' ko bebe'i-bara'ain. Boe ma ana leo dae doo' neu.
16 Ata sira sipo ra doi' ara, boe ma ata masososa' a kalua tuti' a neu dagan. Ta doo bea boe', te ana hapu doi buna' saku lima. 17 Leo' naa boe ata kadua a. Ana hapu doi buna' saku dua bali. 18 Tehuu ata katelu fo ri' sipo doi' saku esa a, ana ali bolo', de nafuni malaka na doin ria.
19 Doo' a, besa' ko malaka ria fali main. Ana nabubua na ata nara, de mulai parisa' ria doin fo ri' ara urus a. 20 Ata masososa' a maso' mai, ma neni feen doi' saku sanahulu, ana nae, ‘Papa! Ia doi mara. Fai' naa ra papa fee au doi' saku lima. Tehuu besa' ia au hapu doi buna' saku lima.’
21 Malaka ria namanene leo' naa, boe ma namaho'o. Ana nafada nae, ‘Malole! O nana ata malole. O makate nonoi-tatao', ma tuka maroo au pareta ka, leo mae au ta nai ia. Huu no o bisa urus hihii-nanau' aana leo ia', neu' ko au so'u o urus hihii-nanau' bau-ina'. Neu' ko au tao feta fo ita basa tamaho'o rame-rame.’
22 Ata kadua a mai neni fee malaka na doi' saku haa ma nae, ‘Papa! Maulu na papa fee au doi' saku dua. Mita' au hapu doi buna' saku dua bali.’
23 Malaka ria boe namaho'o. Ana nafada nae, ‘Malole! O boe, ata malole. O makate nonoi-tatao', ma tuka maroo au pareta ka, leo mae au ta nai ia. Huu no o bisa urus hihii-nanau' aana' leo ia', neu' ko au so'u o ela urus hihii-nanau' bau lena ia bali. Neu' ko au tao feta fo ita basa tamaho'o rame-rame.’
24 Basa de ata katelu a mai. Ana nafada nae, ‘Papa! Au bubulu' papa nana lahenda ta namimina' fa. Nana huu papa hai hata fo lahenda feke' tao, ma etu-oru hata fo lahenda feke' sele-tande. 25 Au bii', boso' losa doi' ia ra mopo si, basa te papa huku au. Huu ria naa, au afuni atalololen. Ia papa! Hai mafali' ana leo, te papa doi saku isem ia tetu-tetu!’
26 Malaka ria namanene leo' naa, boe ma nasapaa ni nae, ‘O ata tadalu', ma aomata'! Kalu o bubulu', au hai hata fo lahenda feke' taon, ma etu-oru hata fo lahenda feke' sele-tande, 27 ubea' taon de o ta muu peda au doi ka nai bank? Ela au fali, sona bisa hapu buna na, leo mae baiana', boe malole a!’
28 Malaka ria nadenu ata feke nara nae, ‘Hai ma doi' sira reme' ana mai, feen leo ata fo ri' onto doi' saku lima a. 29 Te lahenda fo urus natalolole hata fo ana homu a, neu' ko ana hapu tamba dodou'. Tehuu lahenda fo ta nau urus hata fo ana homu a, neu' ko ara hai ra katema' asa reme' ana mai.d
30 Hopu ma ata sosoa-raraa' taa' ia. Roso menin tu'un leo dea' neu. Pesin neme' naa ela dola-namatani ma doidoso nai mamana maiu' ele dale'!’”e
Ramatua Yesus nafada la'e-neu' dae-bafo' a nonoe na tepo' fo Ana naetu' basa lahenda ra dedean
31 Yesus dedea naroo nae, “Au, Lahenda Dae-bafo' Tetea' ia, neu' ko onda fali' mai pake Au Papa Ka kuasa marela-masa'a Na, sama-sama oo Ria eila'o-limalopen rai nusatetu-ikutema' a. Au atuu' nai kadera mana pareta marela-masa'a Ka lain, ela parisa' basa lahenda masodan.f 32 Neu' ko basa lahenda fo parnaa rasoda nai dae-bafo' ia, mai rataa Au. Boe ma Au heo heni si reu' bubua' dua, sama leo' mana foo a heo heni bibi-lopo ra reme kedae' ara mai. 33 Lahenda fo rasoda tuka Manetualain hihii-nanaun, Au fee si reu' boboa ona Ka. Tehuu feke' ara, Au fee si reu' boboa ii Ka. 34 Tepo' ria, Au homu pareta sama leo' Mane'. Neu' ko Au afada lahenda fo rai Au boboa ona Ka ae, ‘Emi sipo ua-nale' neme Au Papa Ka mai. Maso' dale' mai, leo Ria uman fo ri' Ana sadia mema' neme masososa na soa-neu' emi a, 35 nana huu fai fo Au amalaa-aparoe, emi fee Au ua. Au maamada-metihedu, emi fee Au inu. Au mai sama leo' lahenda dea, tehuu emi sipo' Au nai emi uma mara dale'. 36 Au ta anuu kakao-papake', tehuu emi fee Au kakao-papake'. Au amahedi-aparau, tehuu emi mai urus Au. Au nai bui dale', tehuu emi mai dama Au.’
37 Lahenda dale roo-tetu' fo rai Au boboa ona Ka ramanene leo' naa, boe ma ara rataa ratafali' Au rae, ‘Ramatua' a mae, Ramatua' mamalaa-maparoe, de ami fee Papa mua. Ramatua' a maamada-metihedu, de ami fee Papa minu. 38 Ramatua' a sama leo' lahenda dea, de ami sipo' Papa maso' leo ami umam dale' mai. Ramatua' a kakao-papake' ta'a, de ami fee. 39 Ramatua' a mamahedi-maparau, de ami meu urus. Ramatua' a nai bui dale', de ami meu tulu-fali. Tehuu fai' bea ri' ami tao hihii-nanau' leo naa' ara?’
40 Neu' ko Au ataa si ae, ‘Mamahere Au! Tepo' fo emi tao hata leo naa' soa-neu' Au lahendak fo ri' to'a-taa raan seli, sona emi tao soa-neu' Au ria so!’
41 Boe ma Au afada lahenda fo rai Au boboa ii Ka ae, ‘Lahenda tadalu' emin! Manetualain kutuk emi. Maheo' meme ia' mai! Neu' ko Au adenu lahenda tu'u emi leo ai-pila naraka mana basa taa' a dale' meu. Huu fo Manetualain sadia mamana doidoso' ria soa-neu' nitu ra ro sira malaka bau-ina na. 42 Au usi heni emi, nana huu tepo' fo Au amalaa-aparoe, emi ta fee Au ua. Au maamada-metihedu, emi ta fee Au inu. 43 Au mai sama leo' lahenda dea, tehuu emi ta sipo' Au nai emi uma mara dale'. Au ta anuu kakao-papake', tehuu emi ta fee Au kakao-papake'. Au amahedi-aparau, tehuu emi ta mai urus Au. Au nai bui a, tehuu emi ta mai tulu-fali Au.’
44 Lahenda tadalu' sira ramanene leo' naa, neu' ko rataa Au rae, ‘Ramatua' a mae, Ramatua' a mamalaa-maparoe, tehuu ami ta fee Papa mua. Ramatua' a maamada-metihedu, tehuu ami ta fee Papa minu. Ramatua' a sama leo' lahenda dea, tehuu ami ta sipo' Papa maso' leo ami uma mara dale' muu. Ramatua' a ta manuu kakao-papake', tehuu ami ta fee. Ramatua' a mamahedi-maparau, tehuu ami ta meu urus. Ramatua' a nai bui dale', tehuu ami ta meu tulu-fali. Tehuu fai hida' a ri' ami tao Ramatua' a leo naa'?’