Lahenda Farisi ra saka eno' fo rahihii' Ramatua Yesus la'e-neu' sasao' ma namaetu'
10
Yesus asa leo propensi Yudea reu ma mamana feke' nai lee Yarden poo' dulu. Lahenda reme basa mamana' ain mai eo ra Ni. Yesus nanori-nafada si, sama leo' bale-bale.
Markus 10:1-31
2 Lahenda Farisi hida mai fo nau rahihii' Ana. Ara ratane rae, “Tuka ita atoran agama na, kalu tou' a sao, ana bole namaetu' no sao na, do ta'a?”
3 Yesus nataa nae, “Mafarene dei! Atoran saoina-saotou' fo ba'i Musa feen neu' ita a nae, leo' bea?”
4 Ara rataa rae, “Ba'i Musa atoran na nae, lahenda bole namaetu', sadi fee sao ina na susura namaetu'.”a
5 Yesus balas nae, “Nenene! Huu no emi laka batu mara, de ba'i Musa dui' nae leo' naa. 6 Emi boso' mafarene heni tutui masososa' a, tepo fo Manetualain adu lalai ma dae-ina' a! Mana dui' nae,
‘Manetualain adu lahenda dae-bafo' a, tou' ma ina'.b
7 Huu ria naa, tou' a foa ela ina-aman,
fo neu nasoda dale' esa no sao na,
8 huu fo sira dua dadi esa' so!’c
9 Kalu Manetualain tao sira dua dadi esa', sona lahenda dae-bafo' a boso' fee si ramaetu' bali!”
10 Boe ma Yesus no ana mana tuka dea nara mesa' asa kodi leo uma esa dale' reu. Nai naa ara ratane Yesus nanori-nafada bisinaa na.
11 Yesus nataa nae, “Bea namaetu' no sao ina na, basa de sao selu', sona ana hohoke ria so. 12 Ina' ara boe leo naa'. Kalu ana namaetu' no sao na, basa de sao selu', sona ana hohoke ria boe!”d
Ramatua Yesus dedea fee ana ara ua-nale'
13 Fai' esa, boe ma lahenda ra roo ana nara leo Yesus reu, ara hule Ni fua lima Na neu' asa ela fee si ua-nale'. Tehuu Yesus ana mana tuka dea nara horo lahenda sira.
14 Yesus nita leo' naa, boe ma Ana namanasa no ana mana tuka dea nara nae, “Neme' naa ela ana' sira leo Au mai! Boso' horo si! Huu fo lahenda leo ia' ara, Manetualain lahendan. 15 Emi mafarene matalolole! Bea nau leo Manetualain mata Na neu, sona dale na muste nahii' neu Ana, sama leo' ana aana' ara rahii' ra ina-ama nara seli. Kalu ta leo naa', sona ta naraa dadi Manetualain lahendan.”e 16 Boe ma Yesus holu na ana' sira, de fua lima Na neu' sira esa-esa, fo fee si ua-nale'.
Lahenda kamasu'i a saka eno' fo nasoda naroo no Manetualain
17 Fai ria Yesus asa saka' la'o, boe ma lahenda kamasu'i esa nalai leo Yesus mai. Ana sunda' undulaka na neu' mata Na, ma natane nae, “Papa Mesen manuu hada-horomata! Au atane bai'. Leo ia', Papa. Au muste tao leo bea', ela bubulu' matetu' au bisa hapu soda' mana basa taa'.”
18 Yesus nataa nae, “Ubea' taon de o mafada Au mae, ‘manuu hada-horomata’? Ta hapu lahenda esa nanuu hada-horomata, noi Manetualain. 19 O bubulu' Manetualain pareta Na neme ulu' mai nae,
‘Boso' maisa lahenda;
Boso' hohoke;
Boso' mamana'o;
Boso' sakasii pepeko';
Boso' tipu-dai lahenda fo hai ma hata-heton;
Ma fee hada-horomata neu' o ina-amam.’”f
20 Lahenda ria nataa nae, “Tebe, Papa Mesen! Mulai neme muri-ana ka mai, au tuka katema' pareta sira.”
21 Yesus kasian neu' lahenda ria. Boe ma Ana nae, “Tebe! Tehuu bei hihii-nanau' esa bali. Besa' ia o fali fo se'o heni katema' hata-heto mara. Doi nara, o muu babati fee lahenda manato'a-manataa' ara. Basa sona mai tuka Au leo. Neu' ko Manetualain balas fee o hata-heto feke' nai nusatetu-ikutema'.”
22 Lahenda ria namanene Yesus dedea nae leo' naa, boe ma dale na nalulutu'. De ana fali no dale susa, huu fo namasu'i naan seli.
23 Boe ma Yesus mete neu-mai, ma dedea no ana mana tuka dea nara nae, “Nenene! Susa laesa' lahenda kamasu'i a maso' nusatetu-ikutema'!”
24 Ana mana tuka dea nara ramanene Ni dedea nae leo' naa, boe ma roi ramakokoa' a. Tehuu Yesus nafada selu' nae, “Nenene matalolole! Susa laesa' dadi Manetualain lahendan! Boso' afi mae ria muda' a. 25 Lahenda kamasu'i a maso' nusatetu-ikutema' a, fo dadi Manetualain lahendan, ria susa na sama leo' banda onta bau-ina' esa fali leo oka na neu, kodi tuka rarau' a bolo na.”
26 Yesus dedean ria, tao na lahenda sira tamba ramakoa. De ratatane ao' rae, “Kalu mema' tebe leo' naa, sona bea ri' hapu popo'i-tatata'?”
27 Yesus mete esa-esa no si, boe ma Ana nae, “Soa-neu' lahenda dae-bafo' sona ta'a. Tehuu boso mafarene henin: te soa-neu' Manetualain, basan bisa dadi!”
28 Petrus dedea nae, “Papa. Ami foa ela ami hata-heto mara katema', fo tuka Papa. Tehuu ami hapu ubea'?”
29-30 Yesus nae, “Au afada emi leo' ia: lahenda fo tuka Au, ma foa ela ina-aman, a'a-fadin, ana nara, oka-tinen, nonoi-tataon, ma uma na oe-isin katema' fo neu tui-beka fee lahenda rai basa mamana' ain Manetualain Tutui Malole Na, neu' ko ana sipo fali' lai' natun esa. Basa hihii-nanau' fo ana foa ela si a, neu' ko sipo fali no lena'. Ma neu' ko ana hapu eese-rurumu' nana huu tuka Au. Tehuu kalu dae-bafo' ia noe, ana hapu soda' mana basa taa'. Ria titifa-babae na ri naa'! 31 Mafarerene'! Lahenda fo natutua-nadedema aon, tuka Manetualain aafi Na, neu' ko dadi lahenda mabui oe'. Tehuu lahenda fo naloe-nadae aon, tuka Manetualain aafi Na, neu' ko dadi lahenda masososa'.”g
Ramatua Yesus nafada kalai' telu na la'e-neu' Ria mamate Na
32 Fai fo Yesus asa leo Yerusalem reu, Yesus la'o nesi' ulu'. Ana mana tuka dea kasanahulu dua nara ro lahenda feke' ara tuka Ni. Ara rafarene ma dedea-rao nara la'e-neu hata fo fai maneu' ara Ana nafada nae, lahenda nau raisa Ni nai Yerusalem. Huu ria naa ara roi ramakokoa' a, ma bii. Yesus namanene leo' naa, boe ma naloo na noi ana mana tuka dea nara mesa' asa, de nafada selu' asa hata fo lahenda nau taon soa-neu' Ana nai Yerusalem.
Markus 10:32-52
33 Ana dedea nae, “Emi nenene! Besa' ia ita saka' leo Yerusalem teu. Au, Lahenda Dae-bafo' Tetea'. Tehuu nai naa ara se'o heni Au leo malaka agama Yahudi ra malaka nara, ma mesen agama ra. Basa te ara raetu' huku ramate Au. Ara fee Au leo lahenda feke' fo ta ralela' Manetualain. 34 Ara dedea ramumulu-ramamae' Au. Ara mudi radiu Au ape. Ara fepa-li'u rasosopu' Au ao-ina Ka. Besa' ko ara raisa Au. Mema' Au mate tebe. Tehuu fai binesa na, te Au asoda selu'.”h
Yakobis no Yohanis hule fo dadi lahenda bau-ina'
35 Boe ma Yakobis no Yohanis, fo ri' Sabadeus ana nara, ara leo Yesus reu. Ara hule Ni rae, “Papa Mesen! Ami parluu bai'.”
36 Yesus natane si nae, “Emi parluu ubea'?”
37 Ara rataa rae, “Leo ia', Papa. Kalu Papa natuu' homu pareta, sona ami hule fo Papa matutuu' ami, esa neu' boboa ona Ma, esa neu' boboa ii Ma, ela ami homu pareta boe.”
38 Yesus nataa nae, “Emi dua ta bubulu' hata fo emi hule a. Neu' ko Au hapu doidoso dodou'. De leo' bea? Dodoo maan emi mabe'i lepa doidoso ria sama-sama mo Au losa mate, do?”i
39 Ara rataa rae, “Ami bisa, Papa!”
Yesus nafada si bali nae, “Tebe, emi boe neu' ko lepa doidoso ria sama leo' Au. 40 Tehuu neu' ko bea ri' natuu' nai Au boboa ona Ka, ma boboa ii Ka, ta Au ri' aetu' fa. Manetualain ri' nanuu haak naetu' ria. Ana naetu' mema', bea ri' natuu' nai mamana' ria.”
41 Ana mana tuka dea feke' ara ramanene Yakobis no Yohanis hule rae leo' naa, boe ma ramanasa. 42 Yesus naloo na basa si, de nae, “Leo ia'! Emi bubulu', hete? Lahenda bau-ina mana homu pareta ra biasa ese-rumu anaraun nara, losa' ara ta boboti' ao nara. Ma malaka reme' lahenda nusa' fo ta ralela' Manetualain, ara pareta rala lena', losa' anaraun nara ta bisa boti' laka nara. 43 Tehuu emi ta bole tao leo naa'! Neme emi bea mai nau dadi lahenda bau-ina', sona ana muste dadi sama leo' ata fo nalalau' lahenda feke'.j 44 Ma lahenda fo nau dadi malaka, sona ana muste tao aon sama leo' ata.k 45 Huu fo Au, Lahenda Dae-bafo' Tetea', Au ta mai fo lahenda ralalau' Au. Tehuu Au mai fo alalau' lahenda dodou'. Au mai fo fee katema' masoda Ka, ela soi-tefa lahenda dodou' reme sala-siko nara mai.”
Ramatua Yesus puli na lahenda poke'
46 Yesus no ana mana tuka dea nara, ma lahenda dodou-ina' ara losa rai kota Yeriko. Fai ria ara saka' la'o raroo, te lahenda poke' esa natuu' nai eno' a suu na, soa nalamemei' a. Ria nade Bartimeos, papa Timeos ana na. 47 Ana namanene rae, lahenda fo nesi' na a, nana Yesus lahenda Nasaret, boe ma bobou' nambera nae, “Yesus! Daud tititi-nonosin! Ami mahani Papa doo' a so. Kasian neu' au dei!”
48 Lahenda ra ramanene ni bobou' leo' naa, boe ma ara rasa'ain rae, “Nenee'!”
Tehuu ana bobou' nambera-ina nae, “Yesus! Daud tititi-nonosin! Kasian neu' au dei!”
49 Boe ma Yesus nate'e, de nae, “Emi moo ni leo ia' mai!”
De reu rafada ni rae, “O nenee' leo! Papa Mesen naloo o. Mai leo.”
50 Bartimeos namanene leo' naa, boe ma tapa heni lafa na, ana nalale foa napadei', fo leo Yesus neu.
51 Yesus natane ni nae, “O mahii' ubea'?”
Lahenda ria nataa nae, “Papa! Au hule fo bisa ita dae!”
52 Yesus nafada ni bali, “Huu no o mamahere, Au bisa puli a o, de besa' ia boe te'e ma aom! Muu leo.”
Boe ma Bartimeos mata na nita dae tuti' a. Basa de ana neu tuka Yesus.