Malaka urusan malela' tipu-dai
16
Yesus tui fee ana mana tuka dea nara dedea nasasama' esa bali nae, “Lahenda kamasu'i esa nanuu malaka urusan esa. Tehuu doo-doo boe ma ana namanene fifo' rae, malaka urusan ria naepo' de tao narurugi' ana. 2 Boe ma ana naloo na malaka urusan ria, de nafada ni nae, ‘O leo bea' ia, so? Au amanene rae o maepo' au hata-heto ki. Besa' ia o dui' maa si fo au parisa' asa, huu fo au saka' hai heni o.’3 Malaka urusan ria namanene naa, boe ma ana dodoo neu-mai nae, ‘Au soe ia so! Besa' ia au tao ubea'? Foi dae oo, au ta ala. Soa nalamemei' a oo, au mae'. 4 Au muste saka eno' ela fai bea ma hai heni au boe, neu' ko lahenda feke' ara bisa sipo' au.’
5 Boe ma ana mulai naloo esa-esa no basa lahenda fo ri' rahuta malaka na. Ana natane lahenda masososa' a nae, ‘O mahuta au malaka ka hida?’
6 Lahenda ria nataa nae, ‘Au ahuta mina saitun liter rifun haa.’a
Malaka urusan ria nae, ‘Tebe. O susura huta ma ria'. Sii henin besa' ia leo, ma matuu' fo malale tao susura huta bebeu', dui' noi liter rifun dua'.’
7 Boe ma ana natane lahenda kadua a nae, ‘Te o mahuta hida?’
Lahenda ria nataa nae, ‘Au ahuta hade karong rifun esa.’b
Malaka urusan ria nafada ni nae, ‘O susura huta ma ria', de sii henin leo fo tao susura huta bebeu', dui' noi karong natun falu.’
8 Ana tao leo naa', losa' malaka na bubulu' ria dodole na. Tehuu malaka ria muste manaku nae, malaka urusan tadalu' ria, mema' malela' tipu-dai.
Au afada dedea nasasama' ia ela emi bubulu'. Kalu nararaa' ana no lahenda kamahere' ara, sona lahenda kamahere taa', fo besa' ia rasoda rai raun ara talada a mema' sira malela' tipu-dai na lena.
9 De soba emi afi. Lahenda dae-bafo' a rabubua sira hata-heton pake eno' ta malole, tehuu emi boso' leo naa'. Malole lena' emi pake hata-heto dae-bafo' a fo tulu-fali lahenda. No ria naa, emi hapu tia-lai dodou'. Leo mae hata-heto sira sapu-lalo, tehuu neu' ko Manetualain sadia fee emi mamana' nai nusatetu-ikutema'.
10 Kalu lahenda tao tuka roo na nai hihii-nanau' aana', tantu ana tao tuka roo na nai hihii-nanau' bau-ina' boe. Tehuu kalu lahenda naepo' nai hihii-nanau' aana', tantu ana naepo' nai hihii-nanau' bau-ina' boe. 11 Kalu lahenda ta ramahere emi fo urus hihii-nanau' aana' nai dae-bafo' ia, tao leo' bea de Manetualain bisa namahere emi neni' hihii-nanau' bau-ina'? 12 Kalu emi ta bisa urus lahenda feke' a hata-heton, sona bea ri' naparani fee emi hata-heto?
13 Ata esa ta bisa nalalau' malaka dua. Huu fo neu' ko ete' ao na no esa, ma sue esa. Ana dite-tama nahere neu' esa, ma ana ta tao dale' neu' esa. Leo' naa boe emi, huu fo lahenda ta bisa sue-lai Manetualain sama-sama no doi-tali.”c
Ramatua Yesus dedea la'e-neu' doi', la'e-neu' Manetualain Tutui Malole Na, ma la'e-neu' sasao' a ma namaetu'
14 Fai ria, lahenda Farisi hida ramanene bisinaa' a Yesus dedean sira. Boe ma ara ramamae' Ana, huu no ara tendetuu doi'. 15 Tehuu Yesus nataa nae, “Leo mae emi tao makamoi ao mara nai lahenda matan, tehuu Manetualain bubulu' emi dale mara tadalu'. Hihii-nanau' dodou' lahenda dae-bafo' a so'u-fua si, sekonaa te Manetualain tao si reu' hihii-nanau' tadalu', ma nahia' asa.
16 Losa neu' Yohanis Mana Sarani' a mamai na, nana ita lahenda Yahudi a tasoda tuka ba'i Musa ma Manetualain mana nesi mata nara atoran. Tehuu besa' ia Manetualain Tutui Malole Na tui-bekan nai basa mamana' ain. Lahenda dodou' saka tao eno na leo' bea, ela ara rasoda tuka Manetualain hihii-nanaun.d 17 Leo mae lalai no dae-ina' a sapu-lalo, tehuu Manetualain atoran Na baiana' boe ta moi-mosa. Titi' do koma esa boe ta moi-mosa.e
18 Lahenda fo namaetu' no sao ina na, boe ma sao selu' ina feke', sona ana hohoke ria. Ma lahenda bea sao na ina fo ri' sao tou na namaetu' non a, ana hohoke ria boe.”f
Lahenda kamasu'i a no Lasarus tutui na
19 Yesus tui tamba selu' nae, “Lahenda kamasu'i esa, nahii' pake bua-loas malole fo ri' tao ni neme tema' balanau' a. Hatu-leledon ana naa-ninu mina-malada ma nasosoe aon kose-kose. 20 Nai naa lahenda manato'a-manataa' esa, nade Lasarus. Ao-ina na henu' no bisu lama naa'. Tuka-tuka fai' tia-lai nara roo ni ratuu' ana neu' lahenda kamasu'i ria uma na lelesu bafan. 21 Ana nahii' naan seli hapu nanaa' neme lahenda kamasu'i ria nanaa lena nara, tehuu ana ta hapu hata-hata esa boe'. Noi busa ra mai ralamomoi bisu nara.
22 Boe ma Lasarus mate ni. Manetualain eila'o-limalopen reme nusatetu-ikutema' a mai de roo ni, fo ratutuu' ana neu' ba'i Abraham boboa na.
Ta doo bea boe' te lahenda kamasu'i ria mate ni, de ratoin. 23 Tehuu ana ta maso' nusatetu-ikutema' a, ana maso' naraka, sama-sama no lahenda mana mate' dodou'. Nai naa ana hapu eese-rurumu' ma doidoso naroo. Lai' esa de ana boti' laka na te nita Lasarus natuu' no namaho'o nai ba'i Abraham boboa na. 24 Boe ma ana naloo nae, ‘Ba'i Abraham! Kasian neu' au dei! Madenu Lasarus naboro lima u'u na neu' oe a, fo mai naoe neu' au maa peda ka boe malole. Huu fo au doidoso aan seli nai ai-pila' naraka ia dale'!’
25 Tehuu ba'i Abraham nataa nae, ‘Ana ki, on! Mafarene matalolole. Fai fo o bei masoda nai dae-bafo' a, o hapu katema' malole ra. Tehuu Lasarus hapu noi susa a. De besa' ia Manetualain o'oe-nanasi ni nai ia, tehuu o doidoso. 26 Lena-lena' bali, o mo ami, Manetualain tada bati ita neni' pere madema-maloa ina. De lahenda ta bisa neme ia' mai leo naa' neu, ma neme naa' mai leo ia' mai.’
27 Boe ma lahenda kamasu'i ria hule nae, ‘Kalu leo' naa, sona ba'i Abraham madenu Lasarus leo au papa ka uma na neu dei. 28 Huu fo au bei anuu fadi tou' lima rai naa. Madenu Lasarus neu fee si nafarerene', fo ara ratafali leo Manetualain reu. Ela mate si sona, ara boso' maso' leo mamana doidoso ia mai.’
29 Tehuu Abraham nataa nae, ‘Manetualain fee si ba'i Musa no mana nesi mata ra dudui nara so. O fadi mara bisa lees rasarerein, de ara bubulu' Manetualain hihii-nanaun.’
30 Tehuu lahenda kamasu'i ria nadedea laka nae, ‘Ba'i Abraham! Ria bei ta dai. Ara ta tao dale' neu' Manetualain Hara-dasin! Muste lahenda mana mate', kalua neme rates dale' mai neu nafada si, besa' ko ara saledale-tu'etei nara.’
31 Tehuu Abraham nataa nae, ‘Kalu ara ta nau ramanene ba'i Musa no Manetualain mana nesi mata nara dedea-nafadan, leo mae lahenda mana mate' ara kalua reme rates dale' mai reu dedea ro si boe, ara ta ramanene.’”