Lahenda Farisi ra saka eno' fo rahihii' Ramatua Yesus la'e-neu' sasao' ma namaetu'
19
Yesus nanori-nafada basa, boe ma Ana la'o ela Galilea de leo propensi Yudea neu nai lee Yarden seri'. 2 Lahenda dodou' tuka Ni, ma Ana puli na lahenda kamahedis ara rai naa.3 Lahenda Farisi hida mai fo nau rahihii' Yesus boe. Ara ratane rae, “Papa! Tuka ita atoran agama na, kalu tou' a sao, sona ana bole namaetu' no sao na neni' sudi eno ubea' a, do leo bea'?”
4 Tehuu Ana nataa nae, “Emi lahenda mana malela' agama. Tehuu ubea' taon, de emi ta bubulu' Manetualain Susura Makamoi Na isi-liin? Nai tutui masososa' a mana dui' nae, ‘Manetualain adu na lahenda dae-bafo' a, tou' ma ina'.’a 5 Ma mana dui' bali nae,
‘Huu ria naa, tou' a muste foa ela ina-aman,
fo neu nasoda dale' esa no sao na,
nana huu sira dua dadi esa' so.’b
6 Huu ria naa, kalu Manetualain ri' tao naa si dadi esa', sona lahenda dae-bafo' a boso' fee si ramaetu' bali!”
7 Lahenda Farisi sira ramanene Yesus dedea nae leo' naa, boe ma ratane bali rae, “Kalu leo' naa, sona ubea' taon de ba'i Musa nae, lahenda bole ramaetu', sadi ana fee susura namaetu' neu' sao ina na dei?”c
8 Yesus nataa bali nae, “Ba'i Musa nataa' emi bei-ba'im ramaetu' ro sao ina nara, huu fo sira laka batu' leo' emi! Tehuu tepo' fo Manetualain adu dae-bafo' ia, Ria maksud Na ta leo naa' fa. 9 Huu ria naa, Au afada! Kalu sao ina' a hohoke naulu', sona tou' a bole namaetu'. Tehuu kalu sao ina' a ta hohoke fa, te tou' a ri' namaetu' noon, boe ma sao selu' ina feke', sona ana hohoke ria!”d
10 Ana mana tuka dea nara ramanene Ni dedea nae leo' naa, boe ma ara dedea rae, “Kalu leo' naa, sona malole lena' boso' sao.”
11 Yesus nataa si nae, “Ta basa lahenda ra bisa sipo' Au dedea Ka. Noi lahenda fo ri' Manetualain teka-here si a. 12 Hapu lahenda mana sao taa', nana huu neme boki ni a leo naa'. Hapu lahenda mana sao taa', nana huu lahenda tao ni leo' naa. Ma lahenda ta nahii' sao, nana huu ria nau nalala'o noi Manetualain nonoi-tataon. Lahenda bea bisa bubulu-nalela' nanori-nafada' ia, sona ela ana sipo'.”
Ramatua Yesus dedea fee ana aana' ara ua-nale'
13 Fai ria, lahenda ra o'o roo ana nara leo Yesus reu, ela Ana fua lima Na neu' asa ma dedea fee si ua-nale'. Tehuu ana mana tuka dea nara horo lahenda sira. 14 Boe ma Ana namanasa no ana mana tuka dea nara nae, “Neme' naa ela ana' sira leo Au mai! Boso' horo si! Huu fo lahenda leo ia' ara, nana Manetualain lahendan.”
15 Boe ma Ana fua lima Na neu' ana aana' sira, ma hule fo Manetualain fee si ua-nale'. Basa de Ana la'o ela mamana' ria.
Lahenda kamasu'i a saka eno' fo nasoda naroo no Manetualain
16 Lai' esa, de lahenda mai natane Yesus nae, “Papa Mesen! Au muste tao hihii-nanau' malole leo bea', fo ela au bubulu' matetu', au bisa maso' nusatetu-ikutema' a. Huu fo au nau asoda aroo oo Manetualain.”
17 Yesus nataa nae, “Ubea' taon, de o matane Au la'e-neu' ubea' ri' malole? Noi Manetualain ri' malole. Kalu o nau masoda mo Ni, sona tuka pareta Na.”
18 Lahenda ria natane selu' nae, “Pareta a ri' ubea'?”
Yesus nataa nae,
“Boso' maisa lahenda;
boso' hohoke;
boso' mamana'o;
boso' sakasii pepeko';e
19 fee hada-horomata neu' o ina-amam;
ma sue-lai toranoo ma sama leo' o sue-lai ao-ina heheli ma.”f
20 Lahenda ria nataa Ni nae, “Basa pareta sira au tao si so. Bei kura ubea' bali?”
21 Yesus namanene leo' naa, boe ma nae, “Kalu o nau tuka Manetualain hihii-nanaun katema', sona fali fo se'o heni katema' hata-hetom. Basa sona muu babati doi' sira fee lahenda hata taa' ara, besa' ko mai tuka Au. Huu fo neu' ko Manetualain balas fee o hata-heto dodou' nai nusatetu-ikutema' a.”
22 Lahenda ria namanene leo' naa, boe ma ana fali neun no dale susa, huu fo namasu'i naan seli.
23 Boe ma Yesus dedea no ana mana tuka dea nara nae, “Mamahere Au, huu fo lahenda kamasu'i a susa laesa' maso' nusatetu-ikutema'. 24 Ria susa na, sama leo' banda onta bau-ina' a, maso' leo oka na neu, nesi' rarau' a bolo na.”
25 Ana mana tuka dea nara ramanene leo' naa, boe ma ara heran. Ara rataa rae, “Kalu leo' naa, sona bea ri' bisa maso' nusatetu-ikutema' a?”
26 Ana mete natalolole si, boe ma dedea nae, “Kalu lahenda dae-bafo' a ri' noi-tao, sona mema' ta bisa fa. Tehuu kalu Manetualain ri' noi-tao, sona basa-basan bisa dadi!”
27 Boe ma Petrus fee nafarerene' nae, “Papa! Ami foa ela hata-hetom katema' fo tuka Papa. Tehuu ami hapu ubea'?”
28 Yesus nataa nae, “Mamahere Au! Kalu Manetualain tao naa basa-basan dadi bebeu, neu' ko Au, Lahenda Dae-bafo' Tetea' ia, atuu' nai kadera mana pareta bau-ina'. Tepo' ria, emi fo ri' tuka Au a, matuu' nai kadera mana pareta kasanahulu dua' sira boe, fo dadi mana ee dedea' soa-neu' leo Israel kasanahulu dua' ara.g 29 Lahenda fo foa ela ria uma-loon, a'a-fadin, ina-aman, ana nara ma oka-tinen fo tuka Au, neu' ko ana sipo fali' losa lena heni lai' natun. Ma kalu dae-bafo' ia noe, ana nasoda naroo no Manetualain. 30 Mafarerene'! Tuka Manetualain aafin, lahenda dodou' ratutua-radedema ao nara, neu' ko sira dadi lahenda mabui oe'. Tehuu lahenda fo raloe-radae ao nara, neu' ko sira dadi lahenda masososa', tuka Manetualain aafin.”h