“Manoli ai hule-haladoik”
11
La'i esa, Yesus neu hule-haladoi. Ana hule-haladoi nate'e, boe ma ana mana tunggan esa mai, de noke nae, “Ama! Yohanis Mana Salanik nanoli ana mana tunggan nala, fo ala hule-haladoi lalelak. Ai moke fo Ama boe oo manoli ai hule-haladoik dei!”2 Boe ma Yesus nae, “Malole boe! Hule-haladoi pake conto leo iak:
Ama! Ama naden malalaok.
Ela basa hataholi so'u dema-demak Ama naden fo ana seli.
Ela Ama dadik Manek neu basa hataholi.
3 Ama tulun fee ai nana'ak mana daik tungga-tungga faik.
4 Ai moke Ama mafalende heni ai sala-singgon nala,
sama leo ai boe oo, mafalende heni hataholi salan fo ala taon neu ai.
Ama manea fo ai ta tao manggalauk.”
5-6 Basa boe ma Yesus fee nanonolik nakadaik neu sala la'e-neu huhule-haladoik. Ana pake nakandandaak nae, “Leo fatilada, hambu nonook neme dae dook mai, fo leo tataak nai o umam. Tehuu o ta maena hata-hata fo feen na'a. Basa de o muni o nonoo fe'em uman muu, de o kokoen mbea-mbea neme deak mai mae, ‘Ka'a, ei! Fee tataak au loti balok telu dei! Huu au hambu hataholi mana maik nai uma, tehuu ai mada ndoos! Ka'a tulun dei! Kada balok telu! Dei fo au nggati!’
7 Meda dei fo o nonoom nataa nasafali nae, ‘Ka'a boe oo! Hataholi sunggu namanee, tehuu ka'a mai babalik bali! Lelesu nana nggoe nisak kala so! Kakanak kala sunggu lamanee so. Boso mamanasa, baa! Tehuu fai seluk dei, ka'a!’
8 Mae leo ndiak boe oo, tehuu masaneda neulalau. Mae hataholi ndia ta fo'a fo fee o, huu o ndia nonoon, tehuu mete ma o mambue kokoen makandoo, na, neu ko ana fo'a fo fee.
9 Leo ndiak boe, no huhule-haladoik.
Moke makandoo neu Manetualain;
dei fo Ana fee.
Sangga makandoo;
dei fo Ana natudu dalak.
Manggou makandoo;
dei fo Ana soi lelesu.
10 Huu basa hataholi fo mana loke lakandoo neu Manetualain, na dei fo ala simbo. Mana sangga lakandoo, dei fo ala hambu. Mana langgou lakandoo dei fo Ana soi lelesu. 11 Ei dudu'a sudik kana! Hambu nai bee, amak fo mete ma anan noke i'ak, na, ana feen mengge? 12 Do, mete ma anan noke manu tolo, na, ana feen kulak? Ta dadi, hetu? 13 Memak hataholi hada teteben, manggalauk. Tehuu ei Amam manai nusa sodak ndia, hada teteben neulaun ana seli. De mete ma hataholi fo manggalaun matak leo ei, fo nahiik fee bua malole neu anan nala, na, nakalenak Amak bali! Ndia ta kada fee hata fo ei paluu, tehuu lenak neme ndia mai, Ana fee Ndia Dula-dale Malalaon neu hataholi fo noke neu Ndia.”
Lamatuak Yesus ta pake koasa neme nitu la malanggan mai
14 La'i esa, Yesus husi kalua heni nitu neme hataholi hala taak esa mai. Basa de hataholi ndia kokolak nasafali. Hataholi malai ndia heran lalan seli. 15 Tehuu hambu luma boe lae, “Memak Ndia bisa husi nitu! Huu Ana hambu koasa neme nitu la malanggan mai, fo ndia Balsebuul.”a
16 Hataholi fe'ek kala sangga soba Yesus. De ala loke fo Ana tao tanda heran esa bali fo natudu sala nae, Ndia koasan ndia, memak neme Manetualain mai.b
17 Tehuu Yesus bubuluk memak sila langga ute manggenggeon. Boe ma Ana kokolak nae, “Mete ma nai nusak esa, lau-inggun nala lamusuk, na, neu ko nusak ndia nakalulutuk. Leo ndiak boe, mete ma nai uma esa, uma isin nala lambue lahuu esa no esa, na, neu ko uma-loo ndia ta dadadik so! 18 De mete ma nitu la lambue lamusuk ma lahusik esa no esa, na, sila malanggan ta bisa to'u palenda nala dook so bali! De ta masok langga utek, mete ma ei mae, Au pake nitu koasan fo husi asafali nitu! 19 Masanenedak, baa! Ei hataholim mala husi lalelak nitu boe. Ala pake koasa neme nitu mai, do? Taa, hetu! De ei boso kokolak madabak mae, Au pake nitu koasan fo husi nitu. Dei fo ei hataholim mesak kasa laketun lae, hata fo ei soli salak ndia, sala. 20 Tehuu mete ma Au tebe-tebe husi nitu pake Manetualain koasan, na, ndia natudu nae, Manetualain palendan nai ei matam so. Nai ia so, tehuu nonook ei ta bubuluk.
21 Mete ma palani manggalauk esa pake manala nai kii-konak, fo nanea neulalau ndia uman, na, neu ko basa ndia buan nala lasoda. 22 Tehuu hambu esa balakain lena ndia, dei fo mai tao senggin, ma namoa nala hataholi ndia manalan nala. Basa ndia, na ndia boe oo kao neni hataholi ndia hata-heton nala, fo baba'e fee ndia ana mana tunggan nala. Doo basa ia so, palani manggalauk kaesan namahele neu ndia manalan. Tehuu hatematak ia, ndia ta bisa namahena neu manala la so bali.c
23 Masaneda neulalau! Hataholi fo ta paltei no Au, na, ndia ndia Au musung. Ma hataholi fo ta tulu-fali Au ueng, na, ndia ndia, kada tao naodek.”d
Nitu sangga fali neni mamana laan neu
24 Yesus kokolak nakadaik bali nae, “Mete ma ita husi kalua nitu neme hataholi esa mai, na, ana neni mamana nees neu, fo sangga mamana hahae aok. Huu ana ta hambu mamanak fo nandaa, boe ma ana dudu'a nae, ‘Ee! Ta hambu mamana leo iak, na malolenak au fali uu leo seluk nai hataholi makahuluk ndia.’ 25 Basa de ana fali, boe ma nita mamanak ndia malalaok ma nana heti neulauk so. 26 De nitu ndia neu noke nonoon hitu, fo manggalaun nala lena ndia. Boe ma basa sala leu leo lai hataholi ndia, de lakamomotu lalan. De hatematak ia, hataholi ndia sodan soe lena bali.”
Mana maua-manalek nalan seli
27 Ledo-eik Yesus bei kola-kola no hataholi no'uk kala sila, hambu inak esa nai ndia nanggou nae, “Mesen inan ua-nalen ina-huuk, huu ana bonggi nala Mesen, ma nasusu Mesen!”
28 Yesus nataa nae, “Tetebes, ina! Tehuu mana maua-manalek nalan seli bali, ndia hataholi fo mana pasa ndi'i doon, fo namanene Manetualain Dede'a-kokolan, ma tao tunggan!”
Hataholi loke Lamatuak Yesus natudu buti dei!
29 Ledo-eik Yesus bei kola-kola, hataholi makadotok kala mai lakalilimbu lala Ndia. Boe ma Ana kokolak nae, “Hataholi hatematak ia, lalelak kada tao manggalauk. Ala lambue loke lakandoo fo Au tao tanda heran fee sala, fo ala bubuluk Au ia tebe-tebe Manetualain hataholin. Naa te makahulun Manetualain fee sala tanda heran so, pake Ndia mana kokolan Yunus. Dai ndia so! 30 Makahulun ele, Yunus nafada hataholi kota Niniwe nae, ala musi hondak dei. Hata fo dadi neu Yunus nai makahulun, dadik tanda neu sala nae, Manetualain nadenu ndia. Leo ndiak boe no Au, Hataholi Isi-isik ia. Au mai afada ei, fo ei musi hondak dei. Ma hata fo dadi neu Au, dei fo dadik tanda neu hataholi hatematak ia nae, memak Manetualain nadenu Au.e
31 Dei fo neu dae-bafok fai babasan, mete ma Lamatuak nambadeik dadik Mana Maketu Dede'ak, dei fo ina manek neme kona ele mai nasoda fali, de nambadeik dadik sakasii. Ana tuduk lima ku'un, fo kalaak ei basa nggei mana masodak hatematak ia nae, ‘Ei basa nggei ia, nggoak!’ Huu makahulun ina manek ndia neme dook ele mai, fo nita no mata de'e hehelin mane Soleman malelan. Naa te hatematak ia hambu Hataholi nai ei laladam mala ana seli lena heni mane Soleman. Tehuu ei ta nau mbali Ndia faa boe!f 32 Ma ta kada Ndia mesak kana! Dei fo hataholi maleme Niniwe mai, fo'a lambadeik fo dedeu ei fo kasodak hatematak ia lae, ‘Ei basa nggei nggoak!’ Ala kokolak leo ndiak, huu fai maneuk, ledo-eik Yunus neu nafada Manetualain hihiin neu sala, boe ma ala hondak tutik. Naa te hatematak ia, Hataholi fo ana seli lena heni Yunus ndia, nai ei laladam mala, tehuu ei ta nau hondak faa boe!”g
Nasoda nai manggaledok
33 Yesus tuti kokolan bali nae, “Hataholi tao nambila bandu anak, boe ma taon neu mamana madema, fo suek ana tao manggaledo kama ndia, neu basa hataholi mana maso leni ndia leu. Ta hambu hataholi tao nambila banduk, boe ma tatanan nenik lembeneu, do ana nafuni nisak kana.h Ndia sosoan ta faa boe!i 34 Ei matam boe oo sama leo banduk. Ana tao manggaledo ei dalem. Mete ma mata makiuk, na hataholi suli basa-basan no dale manggalauk. Tehuu mete ma mata manggaledok, na hataholi suli basa-basan no dale malole. 35 Masusua fo manggaledok manai ei dalem ndia, manggaledon ana seli, sama leo ledo manggaledon. Manggaledok manai ei dalem ndia, boso sama leo bulak manggaledon, fo kada fee salaon. 36 Mete ma ei dalem manggaledok, losa ta hambu bolok esa makiuk boe, na, neu ko basa ei sodam manggaledok boe, sama leo bandu ina-huuk, fo tao manggaledo ei sodam.”
Lamatuak Yesus ka'i hataholi Yahudi malangga anggaman nala
37 Yesus kokolak nate'e, boe ma hataholi esa neme paltei anggama Farisi noke Ndia, fo neu na'a nai ndia uman. Losa ele, boe ma Yesus maso neni uma dale neu, de Ana nanggatuuk neu mei nana'ak. 38 Tehuu maumak heran nita Yesus nanggatuuk na'a ma ta safe liman nakahuluk, tungga hataholi Farisi heti-heun.
39 Basa boe ma Yesus nafadan nae, “Ei hataholi Farisi la ana seli! Ei to'u mahele ei anggaman heti-heun! Ei masaneda safe malalao pinggak ma nggalaas dean losa langgadila, tehuu ei ta masaneda tao malalao ei dalem fo manggenggeok, manggalauk, ma balena'on ana seli! 40 Nggoak kala, aa! Boso mafalende henin. Manetualain tao nalalao baba'e manai deak. Ndia boe oo tao nalalao baba'e manai dalek. 41 Tehuu malolenak, ei fee hataholi kasian nala leme hata fo ei enam, fo suek ei bisa malalaok nai Manetualain matan.
42 Ei hataholi Farisi la! Dei fo ei hambu soe! Dede'ak fo fee Manetualain baba'ek esa neme baba'ek sanahulu mai, na ei mambue mahinggak lutu-lutuk, inahuu-kadi'ik. Losa ei bumbu-fani kadi'i anan neme osi dale mai boe oo, ei mahinggak malan seli! Tehuu dede'a penting ei ta mbali sala. Ei boe oo mafalende heni la'e-neu sue Manetualain ma dede'ak fo ta no ndoos. Memak ita musi fee tahele Manetualain baba'en, ma boso mafalende heni basa dede'ak fo penting lena.j
43 Dei fo ei hambu soe! Huu ei mahiik sangga mamana neulauk nalan seli nai uma huhule-haladoik, ma mahiik sangga hada-holomata nai mamanak hataholi no'uk.
44 Dei fo ei hambu soe! Huu ei sama leo lates fo bebelak no dae so. Hataholi la'ok nesik ndia, tehuu ta bubuluk lates nai ndia, huu lates bafon malalaok, tehuu dalen kaboo mbuluk. Naa te tungga ita hadan, hataholi fo mana heta la'e lates, aon manggenggeok, de ta nandaa maso neni uma huhule-haladoik neu. Ei hataholi Farisi la sama leo lates ndia! Mete neme deak mai, na, ei leo bali malalaok nalan seli. Tehuu ei dalem henuk no dede'a kaboo mbuluk.”
45 Hambu mana malela heti-heu Yahudi esa nai ndia, ndaso nala Yesus kokolan nae, “Ama Mesen! Ama kokolan isinaak ndia, femba la'e ai boe!”
46 Boe ma Yesus bala nae, “Tetebes! Ei mana malela heti-heu Yahudi la, elan fo ei hambu soe boe! Ei ta tao mamada'u hataholi la sodan, tehuu ei boe tao makatoto'ak kasa bali, fo tao ei anggaman heti-heun mabela. De ei makalelembak hataholi minik ei heti-heum mata-matak kala. Tehuu ei mesa nggei ta tulun lemba sudik belak ndia faa boe!
47 Dei fo ei hambu soe! Huu ei masambute mambadedei tutuus fee Manetualain mana kokola makahulun ele, fo fee hada-holomata neu sala. Naa te ei bei-ba'i hehelim ndia tao lisa mana kokola la sila! 48 Ei boe oo, eik esa mia ei bei-ba'im. Ala timba heni Manetualain mana kokolan, ma tao lisa sala. Boe ma ei mambadedei tutuus fee mana kokola la sila, fo dadik tanda nae, ei boe oo makaheik mia ei bei-baim. 49 Huu ndia de Manetualain bubuluk basan, kokolak nitak nae, ‘Dei fo Au adenu Au mana kokolang ma nadedenu fe'e nggala, fo leni hataholi Israel asa leu. Boe ma hataholi la sila tao doidoso lakamiminak luma, ma tao lisa luma.’
50-51 Hataholi fo kasodak hatematak ia musi lemba natataak neme hataholi fo mana tao lisa Manetualain mana kokolan nala so. Hinggan neme Manetualain nakadadadik dae-bafok ia, mulai neme Habel mamaten mai, losa mate'en ndia Sakarias. Ndia nana tao nisak neme mei tunu-hotuk ma Kama Malalaok laladan nai Manetualain Uma Ina Huhule-haladoin. Ei boe oo lemba mala sila huhukun!k
52 Ei mana malela heti-heu Yahudi la! Dei fo ei hambu soe! Huu ei ndia to'u nggoek fo bisa soi lelesu fo hataholi lalelak neulalau Manetualain hihiin. Tehuu ei mesa nggei ta maso mini ndia miu. Manggalaun lena bali, ei matabaa mala hataholi, fo boso maso leni ndia leu!”
53-54 Ledo-eik Yesus kokolak nate'e, boe ma mese anggama ma hataholi Farisi la manggalau Ndia. Mulai neme faik ndia mai, ala lambue latane mata-matak fo sangga latuda Ndia. Ala heti dalak lakandoo fo sangga dede'ak lo Ndia.